Shabdayatra Prakashan

शब्दयात्रा प्रकाशनको नियमित साप्ताहिक प्रवचन कार्यक्रम ‘कर्मयोद्धासँग शब्दसंवाद’ को ६८ औँ शृङ्खला गत २०७५ मङ्सिर २१ गते शुक्रबार शब्दयात्रा प्रकाशनको सभाकक्षमा सम्पन्न भयो । ‘नेपालभूमि’ राष्ट्रिय साप्ताहिक पत्रिकाका संस्थापक प्रधान सम्पादक रामचन्द्र हुमागाईंका ज्येष्ठ सुपुत्र तथा काठमाडौँको आनन्द इभेन्टसँग सम्बद्ध व्यवसायी राजु हुमागाईं उक्त कार्यक्रमका प्रमुख वक्ता हुनुहुन्थ्यो । शब्दयात्रा प्रकाशनका सञ्चालक सदस्य सकुल थापाको सभापतित्व र समाजसेवी नानुदेवी कुइँकेलको प्रमुख आतिथ्यमा सम्पन्न भएको उक्त कार्यक्रमको सञ्चालन शब्दयात्रा पाठक समाजका संयोजक दामोदर घिमिरेले गर्नुभएको थियो भने पूर्वप्रशासक तथा लेखक डा. इन्दुल केसीले प्रमुख वक्ताको प्रवचनमाथि मन्तव्य राख्नुभएको थियो ।
उक्त कार्यक्रममा शब्दयात्रा प्रकाशनका अध्यक्ष हरि मञ्जुश्री, महाप्रबन्धक शारदाप्रसाद शर्मा, ‘नेपालभूमि’ का कार्यकारी सम्पादक चूडाप्रसाद चौलागाई, शब्दयात्रा लेखक समाजका संयोजक ओतबहादुर खड्का, शिक्षासेवी फणीन्द्रराज अधिकारी, व्यवस्थापनविद् श्री शर्मा मूर्ख, समाजसेवी छविलाल कुइँकेल तथा कुलप्रसाद तिमल्सिना, दण्डपाणि अधिकारी, पुरुषोत्तम हुमागाई, विक्रम धौबन्जार, रीक्षा घिमिरे आदिको समुपस्थिति रहेको थियो ।

शब्दयात्रा प्रकाशनद्वारा स्थापना गर्न लागिएका सालिकहरूको निर्माणकार्यका लागि काभ्रेपलाञ्चोक बनेपा — ७ निवासी चन्द्रप्रभा प्रणामीले ५१ हजार १ सय ११ रुपियाँ आर्थिक सहयोग उपलब्ध गराउनुभएको छ । उहाँले उक्त रकम शब्दयात्रा प्रकाशनका सदस्य तथा आध्यात्मिक लेखक तुतुकाजी प्रणामी श्रेष्ठ र सूर्यकुमारी प्रणामी श्रेष्ठको स्मृतिमा उपलब्ध गराउनुभएको हो ।
यसै गरी काभ्रे बनेपाका त्रिरत्न रन्जितकारले १० हजार १ सय १ रुपियाँ, पिता नन्दलाल भट्टराईको स्मृतिमा खोटाङ एेंसेलुखर्कका परशुराम भट्टराई र कुन्ता कोइरालाले ६ हजार रुपियाँ, होटल सत्यम्का प्रबन्धक साधुराम गिरीले ५ हजार १ सय ८ रुपियाँ, पिता ठाकुरनाथ पौडेलको स्मृतिमा नुवाकोटका डा. रामचन्द्र पौडेलले ५ हजार १ सय रुपियाँ, पिता श्यामबहादुर पुनको स्मृतिमा गुल्मीकी सुश्री एक्कुमाया पुनले ५ हजार १ सय रुपियाँ, मातापिता डम्बरकुमारी र नरबहादुर कार्कीको स्मृतिमा भोजपुर कुदाककाउलेका पदमबहादुर कार्कीले ५ हजार १ सय रुपियाँ र काभ्रे बनेपाका सहदीप पलान्चोकेले ५ हजार १ सय रुपियाँ उपलब्ध गराउनुभएको छ ।
काभ्रेको पाँचखाल बालुुवाका रोजनाथ लुइँटेलबाट १ हजार १ सय ११ रुपियाँ, भक्तपुरका डा. इन्दुल केसीबाट ५ सय रुपियाँ र नुवाकोटका रमेश अधिकारीबाट ५ सय रुपियाँ पनि प्राप्त भएको छ ।

नेपालमै पहिलोपटक बनेपामा मुलुकका पाँचजना विशिष्ट व्यक्तिहरूका सालिक एकै ठाउँमा स्थापना गरिएका छन् । प्रथम शिक्षासेवी षडानन्द अधिकारी, प्रथम लोकतान्त्रिक पत्रकार देवीप्रसाद सापकोटा, राष्ट्रिय पुरस्कारप्राप्त प्रथम वैज्ञानिक नरबहादुर भारती, प्रथम साहित्यिक सहिद कृष्णलाल अधिकारी र गीत स्वराङ्कन गर्ने प्रथम गायिका मेलवादेवी गुरुङका ती सालिकहरू शब्दयात्रा प्रकाशनबाट स्थापना गरिएका हुन् । ती सालिकहरूलाई आगामी २०७५ साल मङ्सिर २६ गते बुधबार विवाहपञ्चमीका दिन अनावरण गरिने भएको छ । उक्त दिन सिर्जनावाचन, प्रवचन, गायन आदि विभिन्न कार्यक्रमहरू पनि गरिनेछन् । उक्त ऐतिहासिक कार्यक्रममा उपस्थित भइदिन हार्दिक आग्रह गर्दछौं ।

कार्यक्रम हुने दिन : २०७५ साल मङ्सिर २६ गते बुधबार विवाहपञ्चमी
कार्यक्रम हुने स्थान : काभ्रे, बनेपा, २८ किलो, नीलकण्ठेश्वर, कृष्णगीता परिसर
कार्यक्रम हुने समय : दिउँसो ११ बजेदेखि ४ बजेसम्म
अनावरण गरिने समय : दिउँसो १ बजे

आग्रही
शब्दयात्रा प्रकाशन परिवार
अक्षरधाम, बनेपा, काभ्रे

शब्दयात्रा प्रकाशन मुनाफा वितरण नगर्ने संस्थाका रूपमा कम्पनी रजिस्ट्रारको कार्यालयमा दर्ता भएको सामाजिक संस्था हो । यस संस्थाले काभ्रेपलाञ्चोक जिल्लालाई केन्द्र बनाई राष्ट्रिय स्तरका गतिविधिहरू सञ्चालन गरिरहेको छ । यस संस्थाले हालसम्म गरेका र गरिरहेका केही कार्यहरू निम्नानुसार छन् —
१. ‘नेपालभूमि’ नामक राष्ट्रिय साप्ताहिक पत्रिकाको प्रकाशन गरी हरेक हप्ता ५०० प्रति पत्रिका विद्यार्थीहरूलाई निःशुल्क वितरण गर्ने गरेको ।
२. ‘अक्षरधाम’ नामक साहित्यिक पत्रिकाको व्यवस्थापन गर्ने गरेको ।
३. ‘शब्दसञ्चार’ नामक साप्ताहिक रेडियो कार्यक्रमको सञ्चालन गर्ने गरेको ।
४. ‘शब्दसंवाद’ नामक साप्ताहिक प्रवचन कार्यक्रमको सञ्चालन गरी ती प्रवचनहरूलाई पुस्तकका रूपमा प्रकाशन गर्न गरेको ।
५. ‘शब्दसौगात’ नामक वृत्तचित्रको निर्माण गरेको ।
६. हरेक वर्ष १८ विधामा रु. ५०००।– सहित सम्मान समर्पण गर्ने गरेको । मदनमणि दीक्षित, अङ्गुरबाबा जोशी, श्यामदास वैष्णव, केदारभक्त माथेमा, श्रीधर खनाल, होमनाथ दाहाल, राजेश्वर नेपाली, डा. चूडामणि बन्धु, दिनेशराज पन्त, डा. त्रिरत्न मानन्धर, डा. माधव भट्टराई, रमेश खकुरेल, किरण खरेल, देवीप्रसाद वनवासी, ज्ञानुवाकर पौडेल, डा. विद्यानाथ कोइराला, शङ्करनाथ रिमाल, डा. जीवराज पोखरेल, ज्ञानमणि नेपाल, गोपाल पराजुली, बुद्धिनारायण श्रेष्ठ, नरेन्द्रबहादुर श्रेष्ठ, भैरव रिसाल, रोचक घिमिरे, डा. चिन्तामणि योगी, पुरुषोत्तम सापकोटा, सावित्री जङ्गम थापा, लक्ष्मी गिरी, नूपुर भट्टाचार्य, वासुदेवशरण कोइराला, सगुन शाह, सीता पोखरेल, भीमबहादुर अधिकारी आदिसमेत ११३ जना राष्ट्रिय व्यक्तित्वलाई सम्मान गरिसकिएको ।
७. हरेक वर्ष रु. १०,०००।– को ‘शब्दयात्रा कर्मशीलता पुरस्कार’ प्रदान गर्ने गरेको ।
८. हालसम्म डा. सुरेशराज शर्मा, मोहनप्रसाद खनाल, हरि मञ्जुश्री, डा. विष्णु सापकोटा, गणेशबहादुर खत्री, पोष चापागाई, मुकुन्दप्रसाद उपाध्याय, बेलप्रसाद श्रेष्ठ आदिका १११ वटा पुस्तकको प्रकाशन गरेको ।
९. समाजसेवी बेलप्रसाद श्रेष्ठको प्रतिमा धुलिखेलमा स्थापना गरेको ।
१०. पुस्तकालयहरूलाई पुस्तक सहयोग गरेको । कारागारका कैदी–बन्दीहरूलाई आध्यात्मिक पुस्तकहरू उपलब्ध गराउने गरेको ।
११. अक्षरसेवी सहयोग कोषको सञ्चालन गरी पीडित लेखकहरूलाई सहयोग गर्ने गरेको ।
१२. वेभसाइट सञ्चालन र ब्लग निर्माण गरेको ।
१३. घुम्ती पुस्तक पसल सञ्चालन गरेको ।
१४. फुटकर साहित्यिक कार्यक्रम गर्ने गरेको ।
१५. संस्थाले गरेको सामाजिक कार्य देखेर प्रभावित बनी कृष्णमणि कुइँकेल नामक स्थानीय दाताले बनेपामा ५ आना जग्गा संस्थाको नाउँमा दान दिनुभएको । त्यही जग्गामा प्रथम शिक्षासेवी षडानन्द अधिकारी, प्रथम लोकतान्त्रिक पत्रकार देवीप्रसाद सापकोटा, राष्ट्रिय पुरस्कारप्राप्त प्रथम वैज्ञानिक नरबहादुर भारती, प्रथम साहित्यिक सहिद कृष्णलाल अधिकारी र गीत स्वराङ्कन गर्ने प्रथम गायिका मेलवादेवी गुरुङका सालिकहरू स्थापना गरिएको । नेपालमै पहिलोपटक पाँच विधाका अग्रज व्यक्तित्वका ती पाँच सालिकहरू निर्माण गरी स्थापना गर्न सरकारी निकायबाट आर्थिक सहयोग नलिएको, परिचित व्यक्तिहरूसँग मागेर सहयोग जुटाइएको ।
यो संस्था जनसहयोगबाट राष्ट्रको हितमा सञ्चालन भइरहेकाले यस संस्थालाई सहयोग गर्नु भनेको राष्ट्रहितका लागि सहयोग गर्नु हो ।

शब्दयात्रा प्रकाशनद्वारा प्रकाशित ‘नेपालभूमि’ नामक राष्ट्रिय साप्ताहिक पत्रिकाको सम्पादकमा इ. रोशन मञ्जुश्री अधिकारी नियुक्त हुनुभएको छ । शब्दयात्रा प्रकाशन सञ्चालक समितिको बैठकले उहाँलाई सम्पादकमा नियुक्त गरेको हो ।
‘नेपालभूमि’ का संस्थापक प्रधान सम्पादक रामचन्द्र हुमागाईंको निधन भइसकेको छ । उहाँले आफ्नो स्वामित्वमा रहेको ‘नेपालभूमि’ को प्रकाशन स्वामित्व शब्दयात्रा प्रकाशनलाई हस्तान्तरण गर्नुभएको थियो ।
नवनियुक्त सम्पादक रोशन मञ्जुश्री अधिकारीले काठमाडौँ विश्वविद्यालयबाट कम्प्युटर इन्जिनियरिङ विषयमा स्नातकोत्तर तह उत्तीर्ण गर्नुभएको छ । उहाँ यसअघि शब्दयात्रा प्रकाशनमा सूचना–प्रविधि अधिकृत हुनुहुन्थ्यो । उहाँको एकल लेखनमा एउटा कवितासङ्ग्रह र संयुक्त सम्पादनमा एउटा पुस्तक प्रकाशित भएको छ ।
शब्दयात्रा प्रकाशनले नवनियुक्त सम्पादक इ. रोशन मञ्जुश्री अधिकारीबाट ‘नेपालभूमि’ को गुणस्तरमा बृद्धि हुने अपेक्षा राखेको छ । ‘नेपालभूमि’ को सम्पादक बन्नुभएकोमा ‘नेपालभूमि’ परिवारले उहाँलाई हार्दिक बधाई ज्ञापन गरेको छ ।

शब्दयात्रा प्रकाशनलाई २०७५ सालको सीता राणा प्रतिभा पुरस्कारबाट पुरस्कृत गरिने भएको छ । रु. १५,००० राशीको उक्त पुरस्कार कर्ण कौशल्या सीता स्मृति प्रतिष्ठानबाट प्रदान गर्न लागिएको हो । आगामी २०७५ मङ्सिर २८ गते शुक्रबार काठमाडौँमा आयोजना गरिने विशेष समारोहमा उक्त पुरस्कार प्रदान गरिने जानकारी आयोजक संस्थाले गराएको छ । उक्त समारोहमा बालशिक्षा सहयोग तथा संरक्षण केन्द्रलाई पनि रु. २५,००० राशीको सीता राणा स्मृति पुरस्कार प्रदान गरिने भएको छ ।
यसै गरी भोग्य सगुन सेवा समाजले रु. १०,००० राशीको भोग्य सगुन राष्ट्रिय पत्रकारिता पुरस्कार माउन्टेन टेलिभिजनमा कार्यरत पत्रकार गोपाल बस्नेतलाई र रु. १०,००० राशीको भाग्य सगुन सन्तोष स्वास्थ्य सहयोग दिनेश चन्दलाई प्रदान गर्ने निर्णय गरेको छ ।
२०६५ सालमा स्थापित कर्ण कौशल्या सीता स्मृति प्रतिष्ठान र २०६८ सालमा स्थापित भोग्य सगुन सेवा समाजले संयुक्त रूपमा कार्यक्रमको आयोजना गरी उक्त पुरस्कारहरू प्रदान गर्न लागेको जानकारी गराइएको छ ।