Shabdayatra Prakashan

शब्दयात्रा प्रकाशनले २०८२ सालको ‘शब्दयात्रा रणलक्ष्मी राष्ट्रिय प्रतिभा पुरस्कार’ साहित्यकारद्वय कुमार काफ्ले र कमला महतमा संयुक्त रूपमा समर्पण गर्ने भएको छ । शब्दयात्रा प्रकाशनद्वारा गठित पुरस्करणीय व्यक्तित्व चयन समितिको बैठकले उहाँहरूलाई पुरस्कृत गर्ने निर्णय गरेको हो । ओखलढुङ्गा जिल्लाको यसममा २०४१ सालमा जन्मनुभएका कुमार काफ्लेले उपन्यास, कथा र गीत विधामा तथा नुवाकोट जिल्लाको शिखरबेसीमा २०२५ सालमा जन्मनुभएकी कमला महतले ‘अनन्त’ कृतिमार्फत बाछिटा विधामा योगदान गर्नुभएको छ । दुवैजना शिक्षण पेसामा संलग्न हुनुहुन्छ । त्यस्ता व्यक्तित्वलाई पुरस्कृत गर्न पाउँदा शब्दयात्रा प्रकाशन गौरवान्वित बनेको छ । पुरस्कार यही साउन महिनामा समर्पण गरिनेछ । वाङ्मय क्षेत्रका प्रतिभाशाली व्यक्तित्वलाई हरेक वर्ष समर्पण गर्ने गरी कवि अमर त्यागीले आफ्ना पितामाताको नाउँमा यस पुरस्कारका लागि कोषको व्यवस्था गरिदिनुभएको हो । पुरस्कार ग्रहण गर्न स्वीकृति दिनुभएकोमा शब्दयात्रा प्रकाशन कुमार काफ्ले र कमला महतप्रति हार्दिक आभार व्यक्त गर्दछ ।

प्रशासनिक क्षेत्रका महिला प्रतिभालाई हरेक वर्ष समर्पण गर्ने गरी लोकसेवा आयोगका पूर्वसदस्य, पूर्वसचिव तथा गायिका उर्मिला श्रेष्ठले ‘प्रशासनिक महिला प्रतिभा पुरस्कार’ का लागि शब्दयात्रा प्रकाशनमा अक्षयकोषको व्यवस्था गरिदिनुभएको छ । शब्दयात्रा प्रकाशनले २०८२ सालका लागि उक्त पुरस्कार पूर्वप्रशासक लीलादेवी गड्तौलामा समर्पण गर्ने भएको छ । शब्दयात्रा प्रकाशनद्वारा गठित पुरस्करणीय व्यक्तित्व चयन समितिको बैठकले उहाँलाई पुरस्कृत गर्ने निर्णय गरेको हो । तेह्रथुम जिल्लाको म्याङ्लुङ पिप्लेमा २०२३ सालमा जन्मनुभएकी उहाँ नेपालको पहिलो महिला मुख्यसचिव हुनुहुन्छ । कानुन तर्जुमा र लैङ्गिक न्यायका विषयमा विशेष दखल राख्ने उहाँले देशमा हाल लागू भएको देवानी संहिता निर्माण गर्ने क्रममा आफ्नो क्षमता प्रदर्शन गर्नुभएको छ । त्यस्ता व्यक्तित्वलाई पुरस्कृत गर्न पाउँदा शब्दयात्रा प्रकाशन गौरवान्वित बनेको छ । पुरस्कार यही साउन महिनामा समर्पण गरिनेछ । पुरस्कार ग्रहण गर्न स्वीकृति दिनुभएकोमा शब्दयात्रा प्रकाशन लीलादेवी गड्तौलाप्रति हार्दिक आभार व्यक्त गर्दछ ।

शब्दयात्रा प्रकाशनले २०८२ सालको ‘शब्दयात्रा सूर्यप्रसाद श्रेष्ठ कर्मशीलता पुरस्कार’ साहित्यकार रेणुका भट्टराई (पाल्पा) मा समर्पण गर्ने भएको छ । शब्दयात्रा प्रकाशनद्वारा गठित पुरस्करणीय व्यक्तित्व चयन समितिको बैठकले उहाँलाई पुरस्कृत गर्ने निर्णय गरेको हो । काभ्रेपलाञ्चोक जिल्लामा २०३८ सालमा जन्मेर वैवाहिक सम्बन्धबाट पाल्पाली हुनुभएकी उहाँले विभिन्न साहित्यिक कृतिहरूको सिर्जना गरी प्रकाशन गराउनुका साथै साहित्यिक पत्रिकाहरूको पनि सम्पादन गर्नुभएको छ भने साहित्यिक संस्था र विद्युतीय सञ्चार माध्यम पनि सञ्चालन गर्नुभएको छ । श्रीमानको निधनपछि उहाँको अभियानलाई निरन्तरता दिँदै शारीरिक अस्वस्थता हुँदाहुँदै पनि उहाँ नेपालको मौलिक छन्दलय ‘झ्याउरे’ लाई पुनर्जागरण गराएर अन्तर्राष्ट्रिय व्याप्ति दिने अभियानमा हुनुहुन्छ । उहाँजस्ती कर्मशील महिलालाई पुरस्कृत गर्न पाउँदा शब्दयात्रा प्रकाशन गौरवान्वित बनेको छ । पुरस्कार यही साउन महिनामा समर्पण गरिनेछ । कुनै पनि विधाको कर्मशील प्रतिभालाई हरेक वर्ष समर्पण गर्ने गरी पूर्वराजदूत तथा पूर्व प्रमुख निर्वाचन आयुक्त सूर्यप्रसाद श्रेष्ठले यस पुरस्कारका लागि अक्षयकोषको व्यवस्था गरिदिनुभएको छ । पुरस्कार ग्रहण गर्न स्वीकृति दिनुभएकोमा शब्दयात्रा प्रकाशन रेणुका भट्टराईप्रति हार्दिक आभार व्यक्त गर्दछ ।

शब्दयात्रा प्रकाशनले २०८२ सालको ‘शब्दयात्रा कृष्ण जोशी भोजपुर प्रतिभा पुरस्कार’ साहित्यकार डा. शैलेन्दुप्रकाश नेपालमा समर्पण गर्ने भएको छ । शब्दयात्रा प्रकाशनद्वारा गठित पुरस्करणीय व्यक्तित्व चयन समितिको बैठकले उहाँलाई पुरस्कृत गर्ने निर्णय गरेको हो । भोजपुर जिल्लाको कटुन्जेमा २०१८ सालमा जन्मनुभएका उहाँले कविता, गीतिकाव्य, खण्डकाव्य, महाकाव्य, बालगीत, बालकथा, निबन्ध, समालोचना आदि विधामा विभिन्न कृतिहरूको सिर्जना गरी प्रकाशन गराउनुका साथै पाठ्यपुस्तक पनि लेख्नुभएको छ । लामो समयसम्म प्राध्यापन गरेर निवृत्त हुनुभएका उहाँले स्मृतिग्रन्थ र पत्रिकाहरूको सम्पादन पनि गर्नुभएको छ । निरन्तर वाङ्मयिक साधना गरिरहनुभएका उहाँजस्ता व्यक्तित्वलाई पुरस्कृत गर्न पाउँदा शब्दयात्रा प्रकाशन गौरवान्वित बनेको छ । पुरस्कार यही साउन महिनामा समर्पण गरिनेछ । भोजपुर जिल्लाका प्रतिभालाई हरेक वर्ष समर्पण गर्ने गरी कवि कृष्ण जोशीले यस पुरस्कारका लागि अक्षयकोषको व्यवस्था गरिदिनुभएको थियो । पुरस्कार ग्रहण गर्न स्वीकृति दिनुभएकोमा शब्दयात्रा प्रकाशन डा. शैलेन्दुप्रकाश नेपालप्रति हार्दिक आभार व्यक्त गर्दछ ।

शब्दयात्रा प्रकाशनबाट अघिल्लो वर्ष प्रकाशित कृतिहरूमध्ये पाठकमतका आधारमा सर्वोत्कृष्ट ठहरिएको कृतिका कृतिकारलाई पछिल्लो वर्ष समर्पण गर्ने गरी स्थापित ‘शब्दयात्रा कल्याण लम्साल सिर्जना सम्मान’ २०८२ सालका लागि भोजपुरका सुदीप अधिकारीलाई ‘नेपालको विविध पृष्ठभूमि र योगदानमा षडानन्द’ नामक अनुसन्धानात्मक ग्रन्थका लागि समर्पण गरियो । यस सम्मानको आर्थिक व्यवस्थापन काठमाडौँका कवि कल्याण लम्सालले गर्नुभएको हो । सम्मानका क्रममा कल्याण लम्सालका तर्फबाट सकुल थापाले माला र उपहार, हरि मञ्जुश्रीले किरीट तथा श्रीराम पौडेल ‘उदासी’ ले अभिवन्दनापत्र समर्पण गर्नुभएको थियो ।

आफूले अध्यापन गरेका र प्राचार्य भई नेतृत्व गरेका शिक्षण संस्थाहरूको सुसञ्चालन, स्तरोन्नति, शैक्षिक गुणस्तर र भौतिक संरचना निर्माण जस्ता विभिन्न कार्यहरूका लागि आफूलाई सक्रिय बनाएर शिक्षालय र शिक्षार्थीहरूको सेवामा आफ्नो सम्पूर्ण क्षमता समर्पण गर्नुभएकाले तेह्रथुमका लोकेन्द्र ढकाललाई ‘शब्दयात्रा अङ्गुरबाबा जोशी शिक्षक सम्मान, २०८२’ समर्पण गरियो । यस सम्मानको आर्थिक व्यवस्थापन काभ्रेपलाञ्चोककी शिक्षासेवी निर्मलाकुमारी यगोल श्रेष्ठले गर्नुभएको हो । सम्मानका क्रममा निर्मलाकुमारी यगोल श्रेष्ठका तर्फबाट सकुल थापाले माला र उपहार, हरि मञ्जुश्रीले किरीट तथा प्रतिभा सुवेदीले अभिवन्दनापत्र समर्पण गर्नुभएको थियो ।