शब्दयात्रा प्रकाशनका संस्थापक अध्यक्ष हरि मञ्जुश्रीले सम्पादन गरेको ९५ औँ पुस्तक ‘द म्यान बिहाइन्ड धुलिखेल’ यही २०७८ साल असार ३० गते बुधबार शब्दयात्रा प्रकाशनको आयोजनामा धुलिखेलस्थित होटल हिमालयन होराइजनमा आयोजित कार्यक्रममा सार्वजनिक गरियो । उक्त पुस्तक धुलिखेलका अग्रज समाजसेवी, समुन्नत धुलिखेलका लागि समग्र पूर्वाधारको विकास गराउने स्वप्नद्रष्टा तथा कार्यान्वयनका लागि जनपरिचालन गर्न नेतृत्वदायी भूमिका निर्वाह गर्ने सामाजिक अभियन्ताका रूपमा सुपरिचित व्यक्तित्व बेलप्रसाद श्रेष्ठका विषयमा तयार पारिएको थियो ।
काठमाडौँ विश्वविद्यालयका उपकुलपति डा. भोला थापाको प्रमुख आतिथ्य, काठमाडौँ विश्वविद्यालयका संस्थापक उपकुलपति डा. सुरेशराज शर्माको सभापतित्व, धुलिखेल नगरपालिकाका प्रमुख अशोक ब्यान्जू श्रेष्ठ र उपप्रमुख विमला शर्मा तथा काभ्रे जिल्लाका प्रमुख जिल्ला अधिकारी शिवराम पोखरेलको आतिथ्य रहेको उक्त कार्यक्रममा काठमाडौँ विश्वविद्यालयका परीक्षा नियन्त्रक डा. पन्ना थापाले उक्त पुस्तकमाथि समालोचना गर्नुभएको थियो । उक्त पुस्तक शब्दयात्रा प्रकाशनद्वारा प्रकाशित १ सय ५४ औँ कृति हो ।
‘शब्दसञ्चार’ रेडियो कार्यक्रमका प्रस्तोता शिव बन्जाराले सञ्चालन र महाप्रबन्धक शारदाप्रसाद शर्माले स्वागत भाषण गरी मैले पुस्तकको परिचय दिएको उक्त कार्यक्रममा अनुवादकद्वय डा. भास्कर हुमागाई र इ. रोशन अधिकारीलाई होटल हिमालयन होराइजनका तर्फबाट आभारपत्र प्रदान गरिएको थियो ।
कार्यक्रममा गीतिभास्कर मच्छेश्वर सापकोटा, लेखकहरू डा. इन्दुल केसी, डा. हेमराज काफ्ले, उद्धवप्रसाद नेपाल, निर्मला श्रेष्ठ, रमेश अधिकारी, पूर्णबहादुर कर्माचार्य, पुण्यवती घले, चूडाप्रसाद चौलागाई, केदारनाथ तिमल्सिना तथा रामप्रसाद अधिकारी, प्रह्लाद प्याकुरेल, अमृत अधिकारी, सिद्धिबहादुर कर्माचार्य, अम्बिका थापा, प्रकृति प्याकुरेल, सङ्गीता केसी, दीपक तिमल्सिना, वेदप्रसाद कोजू, अनमोल माकजू, चुनियालाल श्रेष्ठ आदिको सहभागिता रहेको थियो ।

शब्दयात्रा प्रकाशनद्वारा घोषणा गरिएको २०७७ सालको राष्ट्रझङ्कार सम्मान ग्रहण गर्न स्वीकृति दिनुभएका तर स्वास्थ्यसम्बन्धी समस्याका कारण समारोहमा उपस्थित हुन नसक्नुभएका अग्रज मूर्तिकार ठाकुरप्रसाद मैनालीलाई उहाँको निवासमै गएर सम्मान समर्पण गरिएको छ । सम्मान ग्रहण गरिदिनुभएकोमा शब्दयात्रा प्रकाशनले उहाँप्रति आभार व्यक्त गरेको छ ।
यसै गरी अग्रज आमसञ्चारकर्मी यादव खरेल शब्दयात्रा प्रकाशनले उहाँलाई समर्पण गर्ने निर्णय गरेको २०७७ सालको आमसञ्चार सम्मान ग्रहण गर्नका लागि शारीरिक अस्वस्थताका कारण समारोहमा उपस्थित हुन नसक्नुभएको हुँदा कोरोना महामारीका कारण लामो समयपछि नै भए पनि शब्दयात्रा प्रकाशनको टोलीले उहाँको निवासमै पुगेर उहाँलाई सम्मान गरेको छ । सम्मान स्वीकार गरिदिनुभएकोमा शब्दयात्रा प्रकाशन परिवार उहाँप्रति कृतज्ञ बनेको छ ।
यसै गरी शब्दयात्रा प्रकाशनद्वारा संस्थापित सामाजिक जागरण सम्मान २०७७ ग्रहण गर्न स्वास्थ्यसम्बन्धी समस्याका कारण समारोहमा उपस्थित हुन नसक्नुभएका डा. योगेन्द्रभक्त मल्ललाई उहाँको निवासमै पुगेर शब्दयात्रा प्रकाशनले सम्मान गरेको छ । सम्मान स्वीकार गरिदिनुभएकोमा शब्दयात्रा प्रकाशन परिवारले उहाँप्रति आभार व्यक्त गरेको छ ।
सम्मान समर्पण गर्ने क्रममा नवीना श्रेष्ठले रुद्राक्षको माला, हरिगोपाल प्रधानले उपहार, शिव बन्जाराले किरीट तथा हरि मञ्जुश्रीले रकम र अभिवन्दनापत्र समर्पण गर्नुभएको थियो ।