शब्दयात्रा प्रकाशनका जग्गादाता तथा सञ्चालक सदस्य श्री कृष्णमणि कुइँकेलका पूजनीय पिता समाजसेवी छविलाल कुइँकेल ८५ वर्षको उमेरमा भौतिक शरीर इहलोकमा विसर्जन गरी आज परलोकतर्फ प्रस्थान गर्नुभएको छ । शब्दयात्रा प्रकाशन उहाँको आत्मा भगवान् नीलकण्ठेश्वरमा समाहित होस् भन्ने कामना गर्दै शोकविह्वल परिवारजनप्रति हार्दिक समवेदना व्यक्त गर्दछ ।

शब्दयात्रा प्रकाशन परिवार

शब्दयात्रा प्रकाशनका संस्थापक अध्यक्ष हरि मञ्जुश्रीले आफूलाई ‘शब्दसारथि’ उपाधिसहित मोती महोत्सवमा सम्मान गर्ने ६० वटा संस्थाहरूप्रति आभार व्यक्त गर्नुभएको छ । उहाँले भन्नुभएको छ — उपाधि सरकारबाट मात्र दिइँदो रहेनछ, जनस्तरबाट पनि दिइँदो रहेछ । मलाई पनि शब्दकलाका नायक भनेर जनस्तरबाट ‘शब्दसारथि’ उपाधि र प्रमाणपत्रसहित त्यसको प्रमाणचिह्न प्रदान गरिएको छ । मेरा मित्रहरूले जनस्तरीय सम्मान भनेको जनताको हृदय जितेर पाएको माथिल्लो कोटिको र मूल्यवान् सम्मान हो भन्नुभएको छ । साठीवटा संस्थाले एकै दिन एउटै समारोहमा उपाधि र त्यसको प्रमाणचिह्नका साथै हरेक संस्थाबाट छुट्टाछुट्टै सम्मानपत्रसमेत प्रदान गरेको घटना थोरै मात्र होलान् । यसरी सम्मानित हुने पात्र पनि बिरलै होलान् । भगवानले मलाई त्यस्तै खालको बिरलै भेटिने पात्र बन्ने सौभाग्य दिनुभएछ । म सबै संस्थाहरूप्रति आभारी र भगवानप्रति कृतज्ञ छु।

शब्दयात्रा प्रकाशन भक्तपुर सम्पर्क केन्द्रद्वारा आयोजित जुम कार्यक्रममा ‘नेपाल, भारतवर्ष र हिन्दूस्थान’ विषयमा प्रमुख वक्ताका रूपमा शब्दयात्रा प्रकाशनका संस्थापक अध्यक्ष हरि मञ्जुश्रीले मन्तव्य व्यक्त गर्नुभयो । उहाँको मन्तव्यप्रति बुद्धिनारायण श्रेष्ठ, चन्द्रमान प्रधान, मच्छेश्वर सापकोटा, पदम दाहाल, सुनील सापकोटा, निर्मला श्रेष्ठ, नवीना श्रेष्ठ, साधुराम गिरी, प्रजापति तिमिल्सिना, शिव बन्जारा, पशुपतिमान पःमा आदिले आदिले प्रतिक्रिया र सुझाव दिनुभयो । कार्यक्रमका सञ्चालक जीवनाथ अधिकारी र सभाध्यक्ष डा. इन्दुल केसी हुनुहुन्थ्यो । पूर्णबहादुर कार्की, पुण्यवती घले, अमृत अधिकारी, कृष्ण किसी, लालबहादुर भुजेल, शारदाप्रसाद शर्मा आदि पनि कार्यक्रममा उपस्थित हुनुहुन्थ्यो

२०७० सालमा शब्दयात्रा बालसाहित्य सम्मानबाट सम्मानित व्यक्तित्व गणेशबहादुर खत्रीले यो धराधाम छाड्नुभएको खबर पाएर हामी स्तब्ध बनेका छौँ । उहाँको आत्मा आफूमा लीन गराइदिन नीलकण्ठेश्वर महादेवसँग प्रार्थना गर्दै शोकसन्तप्त परिवारजनप्रति हार्दिक समवेदना व्यक्त गर्दछौँ ।

शब्दयात्रा प्रकाशन परिवार

शब्दयात्रा प्रकाशनद्वारा संस्थापित समालोचना सम्मानबाट २०७६ सालमा सम्मानित समालोचक प्रा. राजेन्द्र सुवेदीको देहावसानले हामीलाई अत्यन्त व्यथित बनाएको छ । उहाँको आत्मशान्तिको कामना गर्दै शोकाकुल परिवारजनमा हार्दिक समवेदना व्यक्त गर्दछौँ ।

शब्दयात्रा प्रकाशन परिवार

कोरोना महामारीका कारणले कार्यक्रम उत्पादन तथा प्रसारण गर्नमा कठिनाइ उत्पन्न भएको हुँदा शब्दयात्रा प्रकाशनको साप्ताहिक रेडियो कार्यक्रम ‘शब्दसञ्चार’ अर्को व्यवस्था नभएसम्मका लागि स्थगित गरिएको छ । यसबाट पर्न गएको असुविधाका लागि शब्दयात्रा प्रकाशन क्षमाप्रार्थी छ ।

शब्दयात्रा प्रकाशन परिवार

‘शब्दयात्रा नन्दिकेश्वर अधिकारी शोध सम्मान’ बाट २०७७ सालमा सम्मानित ग्रन्थसम्पादक जीवनचन्द्र कोइरालाको यही २०७८ साल वैशाख २९ गते निधन भएको छ । उहाँको निधनप्रति व्यथित बन्दै शब्दयात्रा प्रकाशनले उहाँको आत्मा परमात्मामा एकाकार होस् भन्ने कामनाका साथ शोकविह्वल परिवारजनप्रति हार्दिक समवेदना व्यक्त गरेको छ ।
उहाँको निधनपछि शब्दयात्रा प्रकाशनका संस्थापक अध्यक्ष हरि मञ्जुश्रीले सामाजिक सन्जालमा यस्तो लेख्नुभएको छ —
बन्धु जीवनचन्द्र कोइरालासँग २०३५ साल वैशाखदेखि सुरु भएको मेरो सहयात्रा र सहकर्म २०७८ साल वैशाखसम्म आएर ४३ वर्ष पूरा भएपछि हिजो वैशाख २९ गते पूर्णविराम लाग्यो ।
हिजो दिउँसो १ बजेदेखि साँझ ९ बजेसम्म दर्जनौँ मित्र, अग्रज र अनुजहरूले मलाई फोन गरेर मसँग जीवन बन्धुका बारेमा अनेकौँ प्रश्नहरू सोध्नुभयो र मैले उत्तर दिएँ । सबैले हाम्रो हल छुटेको प्रतिक्रिया दिनुभयो । फेसबुकमा जीवन बन्धुका छायाचित्रहरू देखेँ । मलाई चाहिँ श्रद्धाञ्जली र समवेदना शब्द लेख्ने आँटै आएन । रातभरि ओल्टेकोल्टे गरिरहेँ, एकै झप्को पनि निदाउन सकिनँ । मन अलि शान्त होला कि भनेर अहिले यी शब्दहरू लेख्न थालेको हुँ ।
जीवन बन्धुको प्रथम प्रकाशकीय मेरो सम्पादनमा निस्केको ‘सम्झौटो’ मा थियो । जीवन बन्धुको अन्तिम लेख प्रकाशन मेरो विषयमा प्रकाशित ‘शब्दकलाका नायक’ पुस्तकमा भएको थियो । जीवन बन्धुले पाउनुभएको अन्तिम सम्मान म अध्यक्ष बनेको शब्दयात्रा प्रकाशनबाट समर्पित ‘नन्दिकेश्वर अधिकारी शोध सम्मान’ थियो । मैले जीवन बन्धुको परिचय पहिलोपटक उहाँको पुस्तिका ‘सहिद सरोज कोइराला’ मा लेखेको थिएँ । हामीले संयुक्त रूपमा ग्रन्थसम्पादन गर्ने कार्य ‘पूर्णप्रसाद ब्राह्मण स्मृतिग्रन्थ’ बाट सुरु गरेका थियौँ । हामीले पत्रिकाको संयुक्त सम्पादन गर्न ‘पानस’ बाट सुरु गरेका थियौँ । हामीले संस्थागत सहकार्य ‘छन्द समिति’ बाट गरेका थियौँ । मेरो नाउँ कतै आउँदा जीवन बन्धुको नाउँ सँगसँगै लिइन्थ्यो, जीवन बन्धुको नाउँ कतै आउँदा मेरो नाउँ सँगसँगै लिइन्थ्यो ।अझै कति–कति काम गर्ने हाम्रा सपनाहरू थिए, योजनाहरू थिए, आकाङ्क्षाहरू थिए । अस्पतालको शैयामा सुतेर मसँग बोलेको अन्तिम शब्द
‘बन्धु…’ पछि ती सपना, योजना र आकाङ्क्षाहरू जीवन बन्धुको आत्माका साथमा समाउनै नसकिने गरी उडे ।
म धेरैजनाको मलामी बनेको छु र लास काँधमा बोकेर हिँडेको छु, मैले लास पोलेको छु र कोरा पनि बसेको छु, तर कुनै पनि मृत्युले मलाई
भित्रैदेखि हल्लाएर कहिल्यै यसरी गलित र थकित बनाएको थिएन ।