शब्दयात्रा प्रकाशनद्वारा प्राचार्य लोकेन्द्र ढकालको संयोजकत्वमा गठित सम्मान्य व्यक्तित्व चयन समितिले अनलाइन बैठक बसी चयन गरेका सम्मान्य व्यक्तित्वहरूको नामावली शब्दयात्रा प्रकाशनलाई उपलब्ध गराएको छ । उक्त समितिले शब्दयात्रा प्रकाशनबाट २०७८ सालको प्रथम चरणमा समर्पण गर्नुपर्ने नौ विधाका सम्मानबाट सम्मानित व्यक्तित्वहरूको चयन गरेको हो । चयन समितिले चयन गरेका व्यक्तित्वहरूलाई नै शब्दयात्रा प्रकाशनले सम्मान समर्पण गर्ने गरेको छ । प्राप्त निर्णयअनुसार शब्दयात्रा प्रकाशनबाट अघिल्लो वर्ष प्रकाशित पुस्तकहरूमध्ये सर्वोत्कृष्ट पुस्तकलाई समर्पण गरिने २०७८ सालको सिर्जना सम्मान शब्दयात्रा प्रकाशनले २०७७ सालमा प्रकाशन गरेका १५ वटा पुस्तकहरूमध्ये पाठकमतका आधारमा सर्वोत्कृष्ट ठहरिएको ‘नेपालको इतिहासमा रहेका भ्रम तथा निराकरण’ नामक अन्वेषणात्मक पुस्तकका लागि अन्वेषक भरत जङ्गम (भक्तपुर) लाई समर्पण गरिने भएको छ । भीमभक्तमानसिंह बस्नेतको नाउँमा संस्थापित यस सम्मानको आर्थिक व्यवस्थापन कल्याण लम्सालले गर्नुभएको हो । यसै गरी आफ्ना विद्यार्थीहरूलाई गुणस्तरीय शिक्षा दिनुका साथै आफू आबद्ध शैक्षिक संस्थाको हितमा समर्पित शिक्षक–प्राध्यापकलाई समर्पण गरिने शिक्षक सम्मान २०७८ सालका लागि पद्मकन्या बहुमुखी क्याम्पसको नेपाली विभागका प्रमुख रहिसक्नुभएका प्रा. डा. नन्दीश अधिकारी (भोजपुर) लाई समर्पण गरिने भएको छ । अङ्गुरबाबा जोशीको नाउँमा संस्थापित यस सम्मानको आर्थिक व्यवस्थापन निर्मलाकुमारी यगोल श्रेष्ठले गर्नुभएको हो । कवि नन्दिकेश्वर अधिकारी र उनका साहित्यिक वंशजका विषयमा शोध–अनुसन्धान र प्रसारप्रसार गर्ने व्यक्ति अथवा संस्थालाई समर्पण गरिने शोध सम्मान हरि मञ्जुश्री मोती महोत्सवमा सक्रिय रही उहाँका विषयमा साढे छ सय पृष्ठको ‘शब्दकलाका नायक’ पुस्तकको संयुक्त सम्पादन गर्नुभएकोमा निर्मला श्रेष्ठ (काभ्रेपलान्चोक) लाई समर्पण गरिने भएको छ । नन्दिकेश्वर अधिकारीको नाउँमा संस्थापित यस सम्मानको आर्थिक व्यवस्थापन गीता अधिकारीले गर्नुभएको हो । सम्मान ग्रहण गर्न स्वीकृति दिनुभएकोमा शब्दयात्रा प्रकाशन उहाँहरूप्रति आभार व्यक्त गर्दछ । बाँकी छजनाको नाम पनि छिटै सार्वजनिक गरिनेछ ।
हार्दिक समवेदना
२०७० सालमा शब्दयात्रा बालसाहित्य सम्मानबाट सम्मानित व्यक्तित्व गणेशबहादुर खत्रीले यो धराधाम छाड्नुभएको खबर पाएर हामी स्तब्ध बनेका छौँ । उहाँको आत्मा आफूमा लीन गराइदिन नीलकण्ठेश्वर महादेवसँग प्रार्थना गर्दै शोकसन्तप्त परिवारजनप्रति हार्दिक समवेदना व्यक्त गर्दछौँ ।
शब्दयात्रा प्रकाशन परिवार
हार्दिक समवेदना
शब्दयात्रा प्रकाशनद्वारा संस्थापित समालोचना सम्मानबाट २०७६ सालमा सम्मानित समालोचक प्रा. राजेन्द्र सुवेदीको देहावसानले हामीलाई अत्यन्त व्यथित बनाएको छ । उहाँको आत्मशान्तिको कामना गर्दै शोकाकुल परिवारजनमा हार्दिक समवेदना व्यक्त गर्दछौँ ।
शब्दयात्रा प्रकाशन परिवार
‘शब्दसञ्चार’ स्थगित
कोरोना महामारीका कारणले कार्यक्रम उत्पादन तथा प्रसारण गर्नमा कठिनाइ उत्पन्न भएको हुँदा शब्दयात्रा प्रकाशनको साप्ताहिक रेडियो कार्यक्रम ‘शब्दसञ्चार’ अर्को व्यवस्था नभएसम्मका लागि स्थगित गरिएको छ । यसबाट पर्न गएको असुविधाका लागि शब्दयात्रा प्रकाशन क्षमाप्रार्थी छ ।
शब्दयात्रा प्रकाशन परिवार
हार्दिक समवेदना
‘शब्दयात्रा नन्दिकेश्वर अधिकारी शोध सम्मान’ बाट २०७७ सालमा सम्मानित ग्रन्थसम्पादक जीवनचन्द्र कोइरालाको यही २०७८ साल वैशाख २९ गते निधन भएको छ । उहाँको निधनप्रति व्यथित बन्दै शब्दयात्रा प्रकाशनले उहाँको आत्मा परमात्मामा एकाकार होस् भन्ने कामनाका साथ शोकविह्वल परिवारजनप्रति हार्दिक समवेदना व्यक्त गरेको छ ।
उहाँको निधनपछि शब्दयात्रा प्रकाशनका संस्थापक अध्यक्ष हरि मञ्जुश्रीले सामाजिक सन्जालमा यस्तो लेख्नुभएको छ —
बन्धु जीवनचन्द्र कोइरालासँग २०३५ साल वैशाखदेखि सुरु भएको मेरो सहयात्रा र सहकर्म २०७८ साल वैशाखसम्म आएर ४३ वर्ष पूरा भएपछि हिजो वैशाख २९ गते पूर्णविराम लाग्यो ।
हिजो दिउँसो १ बजेदेखि साँझ ९ बजेसम्म दर्जनौँ मित्र, अग्रज र अनुजहरूले मलाई फोन गरेर मसँग जीवन बन्धुका बारेमा अनेकौँ प्रश्नहरू सोध्नुभयो र मैले उत्तर दिएँ । सबैले हाम्रो हल छुटेको प्रतिक्रिया दिनुभयो । फेसबुकमा जीवन बन्धुका छायाचित्रहरू देखेँ । मलाई चाहिँ श्रद्धाञ्जली र समवेदना शब्द लेख्ने आँटै आएन । रातभरि ओल्टेकोल्टे गरिरहेँ, एकै झप्को पनि निदाउन सकिनँ । मन अलि शान्त होला कि भनेर अहिले यी शब्दहरू लेख्न थालेको हुँ ।
जीवन बन्धुको प्रथम प्रकाशकीय मेरो सम्पादनमा निस्केको ‘सम्झौटो’ मा थियो । जीवन बन्धुको अन्तिम लेख प्रकाशन मेरो विषयमा प्रकाशित ‘शब्दकलाका नायक’ पुस्तकमा भएको थियो । जीवन बन्धुले पाउनुभएको अन्तिम सम्मान म अध्यक्ष बनेको शब्दयात्रा प्रकाशनबाट समर्पित ‘नन्दिकेश्वर अधिकारी शोध सम्मान’ थियो । मैले जीवन बन्धुको परिचय पहिलोपटक उहाँको पुस्तिका ‘सहिद सरोज कोइराला’ मा लेखेको थिएँ । हामीले संयुक्त रूपमा ग्रन्थसम्पादन गर्ने कार्य ‘पूर्णप्रसाद ब्राह्मण स्मृतिग्रन्थ’ बाट सुरु गरेका थियौँ । हामीले पत्रिकाको संयुक्त सम्पादन गर्न ‘पानस’ बाट सुरु गरेका थियौँ । हामीले संस्थागत सहकार्य ‘छन्द समिति’ बाट गरेका थियौँ । मेरो नाउँ कतै आउँदा जीवन बन्धुको नाउँ सँगसँगै लिइन्थ्यो, जीवन बन्धुको नाउँ कतै आउँदा मेरो नाउँ सँगसँगै लिइन्थ्यो ।अझै कति–कति काम गर्ने हाम्रा सपनाहरू थिए, योजनाहरू थिए, आकाङ्क्षाहरू थिए । अस्पतालको शैयामा सुतेर मसँग बोलेको अन्तिम शब्द
‘बन्धु…’ पछि ती सपना, योजना र आकाङ्क्षाहरू जीवन बन्धुको आत्माका साथमा समाउनै नसकिने गरी उडे ।
म धेरैजनाको मलामी बनेको छु र लास काँधमा बोकेर हिँडेको छु, मैले लास पोलेको छु र कोरा पनि बसेको छु, तर कुनै पनि मृत्युले मलाई
भित्रैदेखि हल्लाएर कहिल्यै यसरी गलित र थकित बनाएको थिएन ।
‘शब्दसारथि सङ्ग्रहालय’ निर्माण हुँदै
शब्दयात्रा प्रकाशनले काभ्रेपलान्चोक जिल्लामा सङ्ग्रहालय बनाउने लक्ष्य राखेको सन्दर्भमा शब्दयात्रा प्रकाशनका संस्थापक अध्यक्ष हरि मञ्जुश्रीको नाउँमा ‘शब्दसारथि सङ्ग्रहालय’ को निर्माणकार्य सुरु गरिएको छ । सङ्ग्रहालयका लागि आवश्यक स्थान हरि मञ्जुश्रीको परिवारले बनेपामा रहेको आफ्नै घरमा निःशुल्क उपलब्ध गराएको छ ।
‘साहित्यकार तथा भाषासेवी हरि मञ्जुश्री मोती महोत्सव समारोह समिति’ ले उहाँलाई ‘शब्दसारथि’ उपाधिबाट विभूषित गरेको समारोहमा ६० वटाभन्दा बढी संस्थाहरूले एकसाथ उहाँको सम्मान गरेपछि ‘शब्दसारथि सङ्ग्रहालय’ को निर्माण गर्न विभिन्न व्यक्ति तथा संस्थाहरूबाट आग्रह गरिएको थियो । उहाँहरूको आग्रह स्वीकार गर्दै ‘शब्दसारथि सङ्ग्रहालय’ को निर्माण गर्न थालिएको हो ।
स्मरणीय छ — शब्दयात्रा प्रकाशनले राखेका विभिन्न उद्देश्यहरूमध्ये सङ्ग्रहालयको निर्माण गर्नु पनि एउटा हो । भाषा, साहित्य, पत्रकारिता, कलाकारिता, शिक्षा, धर्म–संस्कृति, इतिहास, लोकसंस्कृति, पुरातत्त्व आदि क्षेत्रमा अनुसन्धान गर्न चाहने अनुसन्धाताहरूका लागि आवश्यक पर्ने विभिन्न सामग्रीहरू ‘शब्दसारथि सङ्ग्रहालय’ मा राखिनेछन् । निर्माणकार्य सम्पन्न भएपछि सङ्ग्रहालयको औपचारिक रूपमा समुद्घाटन पनि गरिनेछ ।
शब्दसाधक तीर्थमा पुग्नेहरूको सङ्ख्यामा बृद्धि
शब्दयात्रा प्रकाशनद्वारा बनेपामा संस्थापित शब्दसाधकका पाँचवटा सालिक शब्दयात्रा शारदा मन्दिर, शब्दयात्रा पुस्तकालय र शब्दयात्रा स्तम्भको अवलोकन गर्नका लागि शब्दसाधक तीर्थमा पुग्ने वाङ्मयप्रेमीहरूको सङ्ख्या बढ्दै गएको छ । शब्दसाधक तीर्थमा पुग्दा नीलकण्ठेश्वर महादेव र शेषशायी विष्णुको दर्शन पनि गर्न पाइने भएकाले सङ्ख्या बढ्दै गएको हो ।
कवयित्री शारदा घिमिरे भैलले पनि मित्रका साथ शब्दसाधक तीर्थको अवलोकन गर्नुभएको छ । उहाँलाई शब्दयात्रा प्रकाशनका संस्थापक अध्यक्ष हरि मञ्जुश्रीले शब्दसाधक तीर्थमा स्वागत गर्नुभएको थियो भने रमेश अधिकारी र सङ्गीता केसीले शब्दयात्रा प्रकाशनका गतिविधिहरूका बारेमा जानकारी गराउनुभएको थियो ।
हार्दिक समवेदना
शब्दयात्रा प्रकाशनका शुभचिन्तक रामानन्द मिश्रको देहावसानबाट दुःखित बनिरहेको अवसरमा उहाँमा श्रद्धाञ्जली व्यक्त गर्दै उहाँको आत्मशान्तिका लागि प्रार्थना गर्दछौँ र शोकाकुल परिवारजनप्रति हार्दिक समवेदना व्यक्त गर्दछौँ ।
शब्दयात्रा प्रकाशन परिवार
हार्दिक बधाई
शब्दयात्रा प्रकाशनबाट कदरपत्र प्राप्त गर्नुभएका काभ्रेली पत्रकारहरूमध्ये नेपाल पत्रकार महासङ्घ काभ्रेको सदस्यमा शुकदेव थपलिया र राष्ट्रिय परिषद् सदस्यमा प्रदीप केसी निर्वाचित हुनुभएकोमा हार्दिक बधाई ज्ञापन गर्दछौँ ।
शब्दयात्रा प्रकाशन परिवार
हार्दिक बधाई
शब्दयात्रा प्रकाशनबाट २०७३ सालमा सम्मानित नियात्राकार पोष चापागाईले भाषा तथा साहित्य विधातर्फको प्रादेशिक प्रतिभा पुरस्कार एवम् शब्दयात्रा प्रकाशनबाट २०७२ सालमा सम्मानित गजलकार बूँद रानाले र २०६९ सालमा सम्मानित साहित्यिक पत्रकार मोहन दुवालले महाकवि देवकोटा पुरस्कार संस्कृति, पर्यटन तथा नागरिक उड्डयन मन्त्रालयबाट प्राप्त गर्नुभएकोमा हार्दिक बधाई ज्ञापन गर्दछौँ ।