Shabdayatra Prakashan

शब्दयात्रा प्रकाशनद्वारा २०७७ सालको बालसाहित्य सम्मान ग्रहण गर्नुभएका बालसाहित्यकार प्रमोद प्रधानकी माता गङ्गादेवी प्रधानको ९१ वर्षको उमेरमा निधन भएको छ । शब्दयात्रा प्रकाशन परिवार दिवङ्गत आत्माको मोक्षप्राप्तिको कामना गर्दै शोकसपह्वल परिवारप्रति हार्दिक समवेदना प्रकट गर्दछ ।

नेपालको राजनीतिक वृत्तमा सुपरिचित प्रखर राष्ट्रवादी व्यक्तित्व नवराज सुवेदीले शब्दयात्रा प्रकाशनको एक समूहलाई आफ्नो निवासमा हार्दिकतापूर्वक स्वागत गर्नुभएको छ । उहाँको स्नेहपूर्ण आतिथ्यपछि उहाँलाई ‘शब्दकलाका नायक’ पुस्तक उपहारस्वरूप प्रदान गरिएको थियो । शब्दयात्रा प्रकाशनको टोलीमा संस्थापक अध्यक्ष हरि मञ्जुश्री, सञ्चालक सदस्य हरिगोपाल प्रधान, सदस्य तथा ‘शब्दसञ्चार’ रेडियो कार्यक्रमका प्रस्तोता शिव बन्जारा र सदस्य नवीना श्रेष्ठ हुनुहुन्थ्यो ।

भक्तपुरनिवासी लेखक तथा शिक्षासेवी लोकेन्द्र ढकालले शब्दयात्रा प्रकाशनको आजीवन सदस्यता ग्रहण गर्नुभएको छ । उहाँ हाल धुलिखेलस्थित सञ्जीवनी उच्चमाध्यमिक विद्यालयका प्राचार्य हुनुहुन्छ । शब्दयात्रा प्रकाशनको आजीवन सदस्यता ग्रहण गर्नुभएकोमा उहाँलाई हार्दिक बधाई छ ।

साहित्यकार तथा पूर्वप्रशासक कृष्ण जोशीले हरेक वर्ष भोजपुरे प्रतिभालाई पुरस्कृत गर्ने गरी शब्दयात्रा प्रकाशनको अक्षयकोषका लागि एक लाख एक हजार रुपियाँ उपलब्ध गराउनुभएको छ । भोजपुर जिल्लामा जन्मेर कुनै पनि विधाबाट योगदान गरेको ५० वर्षभन्दा कम उमेरको व्यक्तिलाई पुरस्कृत गर्नका लागि उहाँले अक्षयकोषमा उक्त रकम राखिदिनुभएको हो ।
उक्त रकम साहित्यकार तथा पूर्वप्रशासक कृष्ण जोशीले शब्दयात्रा प्रकाशनका संस्थापक अध्यक्ष हरि मञ्जुश्रीलाई हस्तान्तरण गर्नुभएको छ । श्री जोशी शब्दयात्रा प्रकाशनबाट २०७२ सालमा कविताकाव्य सम्मानद्वारा सम्मानित कवि हुनुहुन्छ ।

शब्दयात्रा प्रकाशनका जग्गादाता तथा सञ्चालक सदस्य श्री कृष्णमणि कुइँकेलका पूजनीय पिता समाजसेवी छविलाल कुइँकेल ८५ वर्षको उमेरमा भौतिक शरीर इहलोकमा विसर्जन गरी आज परलोकतर्फ प्रस्थान गर्नुभएको छ । शब्दयात्रा प्रकाशन उहाँको आत्मा भगवान् नीलकण्ठेश्वरमा समाहित होस् भन्ने कामना गर्दै शोकविह्वल परिवारजनप्रति हार्दिक समवेदना व्यक्त गर्दछ ।

शब्दयात्रा प्रकाशन परिवार

शब्दयात्रा प्रकाशनका संस्थापक अध्यक्ष हरि मञ्जुश्रीले आफूलाई ‘शब्दसारथि’ उपाधिसहित मोती महोत्सवमा सम्मान गर्ने ६० वटा संस्थाहरूप्रति आभार व्यक्त गर्नुभएको छ । उहाँले भन्नुभएको छ — उपाधि सरकारबाट मात्र दिइँदो रहेनछ, जनस्तरबाट पनि दिइँदो रहेछ । मलाई पनि शब्दकलाका नायक भनेर जनस्तरबाट ‘शब्दसारथि’ उपाधि र प्रमाणपत्रसहित त्यसको प्रमाणचिह्न प्रदान गरिएको छ । मेरा मित्रहरूले जनस्तरीय सम्मान भनेको जनताको हृदय जितेर पाएको माथिल्लो कोटिको र मूल्यवान् सम्मान हो भन्नुभएको छ । साठीवटा संस्थाले एकै दिन एउटै समारोहमा उपाधि र त्यसको प्रमाणचिह्नका साथै हरेक संस्थाबाट छुट्टाछुट्टै सम्मानपत्रसमेत प्रदान गरेको घटना थोरै मात्र होलान् । यसरी सम्मानित हुने पात्र पनि बिरलै होलान् । भगवानले मलाई त्यस्तै खालको बिरलै भेटिने पात्र बन्ने सौभाग्य दिनुभएछ । म सबै संस्थाहरूप्रति आभारी र भगवानप्रति कृतज्ञ छु।

शब्दयात्रा प्रकाशन भक्तपुर सम्पर्क केन्द्रद्वारा आयोजित जुम कार्यक्रममा ‘नेपाल, भारतवर्ष र हिन्दूस्थान’ विषयमा प्रमुख वक्ताका रूपमा शब्दयात्रा प्रकाशनका संस्थापक अध्यक्ष हरि मञ्जुश्रीले मन्तव्य व्यक्त गर्नुभयो । उहाँको मन्तव्यप्रति बुद्धिनारायण श्रेष्ठ, चन्द्रमान प्रधान, मच्छेश्वर सापकोटा, पदम दाहाल, सुनील सापकोटा, निर्मला श्रेष्ठ, नवीना श्रेष्ठ, साधुराम गिरी, प्रजापति तिमिल्सिना, शिव बन्जारा, पशुपतिमान पःमा आदिले आदिले प्रतिक्रिया र सुझाव दिनुभयो । कार्यक्रमका सञ्चालक जीवनाथ अधिकारी र सभाध्यक्ष डा. इन्दुल केसी हुनुहुन्थ्यो । पूर्णबहादुर कार्की, पुण्यवती घले, अमृत अधिकारी, कृष्ण किसी, लालबहादुर भुजेल, शारदाप्रसाद शर्मा आदि पनि कार्यक्रममा उपस्थित हुनुहुन्थ्यो