शब्दयात्रा प्रकाशनका संस्थापक अध्यक्ष हरि मञ्जुश्रीले बीजक ग्रन्थको नेपाली अनुवाद गर्ने अनुवादक कवीर सम्प्रदायका नेपाली सन्त आज्ञासाहेब लीलाबहादुर थापाका विषयमा प्रवचन गर्नुभएको छ । हरेक आइतबार बिहान सनातन वैदिक विवेचना कार्यक्रम अन्तर्गत नेपाली सन्तहरूका विषयमा जानकारी गराउने क्रममा उहाँले नेपाली सन्त आज्ञासाहेबका विषयमा प्रवचन गर्नुभएको हो ।
भक्तपुर सम्पर्क केन्द्रबाट पुस्तिका प्रकाशित
शब्दयात्रा प्रकाशन भक्तपुर सम्पर्क केन्द्रले हालसम्म गरेका गतिविधिहरू समेटेर पुस्तिका प्रकाशन गरेको छ । भक्तपुर सम्पर्क केन्द्रका सम्पूर्ण गतिविधिहरूको सङ्कलन कवि जीवनाथ अधिकारीले गर्नुभएको हो ।
कृतज्ञतापत्र समर्पण
शब्दयात्रा प्रकाशनले शब्दयात्रा प्रकाशन पुस्तकालयलाई १०० भन्दा बढी पुस्तकहरू उपलब्ध गराउने विभिन्न महानुभावहरूलाई कृतज्ञतापत्र समर्पण गरेको छ । शिक्षासेवी रामप्रसाद अधिकारी र गीतिभास्कर मच्छेश्वर सापकोटाले कृतज्ञतापत्रहरू समर्पण गर्नुभएको हो । कृतज्ञतापत्र कवि कृष्ण जोशी, महाप्रबन्धक शारदाप्रसाद शर्मा, सदस्य शिव बन्जारा र सदस्य पुण्यवती घलेले स्वयं ग्रहण गर्नुभएको थियो । त्यसबाहेक गीता अधिकारीका तर्फबाट प्रकृति प्याकुरेलले तथा प्रा. डा. भोला थापा, सावित्री जङ्गम थापा, हिरण्यकुमारी पाठक र पशुपतिमान प्रधानलाई उपलब्ध गराउने गरी उहाँहरूका कृतज्ञतापत्रहरू सफ्टवेयर इन्जिनियर रोशन अधिकारीले ग्रहण गर्नुभएको थियो ।
पुरस्कार समर्पण समारोह सम्पन्न
यही २०७८ साल असोज ९ गते शनिबार शब्दयात्रा प्रकाशनले दुईजना विशिष्ट व्यक्तित्वलाई पुरस्कार समर्पण गर्न पायो । कवि तथा पूर्वप्रशासक कृष्ण जोशीद्वारा व्यवस्थापित ‘शब्दयात्रा कृष्ण जोशी भोजपुर प्रतिभा पुरस्कार’ प्रा. डा. गोविन्दमानसिंह कार्कीलाई एवं पूर्वप्रशासक तथा कूटनीतिज्ञ सूर्यप्रसाद श्रेष्ठद्वारा व्यवस्थापित ‘शब्दयात्रा कर्मशीलता पुरस्कार’ डा. इन्दुल केसीलाई समर्पण गरियो । पुरस्कारमा अभिवन्दनापत्र, नगद, उपहार तथा शब्दयात्रा पट्ट समर्पण गरिएको थियो । कार्यक्रमका प्रमुख अतिथि सङ्गीतशिल्पी तथा साहित्यकार गणेश रसिक तथा अतिथि पुरस्कारका व्यवस्थापक कवि कृष्ण जोशी र साहित्यकार पवन आलोक हुनुहुन्थ्यो । सम्मान गर्दा उपहार शब्दयात्रा प्रकाशनका सञ्चालक सदस्य हरिगोपाल प्रधानले, शब्दयात्रा पट्ट सभापति हरि मञ्जुश्रीले, रकम व्यवस्थापक कृष्ण जोशीले र अभिवन्दनापत्र प्रमुख अतिथि गणेश रसिकले समर्पण गर्नुभएको थियो । साहित्यकार पवन आलोकले पुरस्कृत व्यक्तित्वको चिनारी गराउनुभएको थियो भने कवि कृष्ण जोशीले कार्यक्रमको समीक्षा गर्दै सभाविसर्जन गर्नुभएको थियो । शब्दयात्रा प्रकाशनका संस्थापक अध्यक्ष हरि मञ्जुश्रीको सभापतित्वमा सम्पन्न उक्त कार्यक्रमको सञ्चालन ‘शब्दसञ्चार’ रेडियो कार्यक्रमका सञ्चालक शिव बन्जाराले गर्नुभएको थियो । कार्यक्रममा पुरस्कारको अभिवन्दनापत्र वाचन शब्दयात्रा प्रकाशनका सञ्चालक सदस्य कृष्णमणि कुइँकेलले र स्वागत भाषण महाप्रबन्धक शारदाप्रसाद शर्माले गर्नुभएको थियो भने रुद्राक्षको माला शब्दयात्रा प्रकाशनका आजीवन सदस्य नवीना श्रेष्ठले अर्पण गर्नुभएको थियो । शब्दयात्रा प्रकाशनका तर्फबाट प्रमुख अतिथि गणेश रसिक र अतिथि वक्ता पवन आलोकलाई शब्दयात्रा प्रकाशन संरक्षण समितिका सदस्य सकुल थापाले उपहार समर्पण गर्नुभएको थियो । कार्यक्रम अध्यक्ष हरि मञ्जुश्रीको फेसबुकबाट प्रत्यक्ष प्रसारण गरिएको थियो । उक्त कार्यक्रम शब्दयात्रा प्रकाशनको वेबसाइटबाट पनि हेर्न सकिनेछ ।
शब्दयात्रा प्रकाशनको काभ्रे सम्पर्क केन्द्र गठन
शब्दयात्रा प्रकाशनको काभ्रे सम्पर्क केन्द्र गठन भएको छ । पाँच सदस्यीय काभ्रे सम्पर्क केन्द्रमा शब्दयात्रा प्रकाशनका आजीवन सदस्यद्वय साधुराम गिरी र सहदीप पलान्चोके रहनुभएको छ । अन्य सदस्यहरूमा गीता मञ्जुश्री, दामोदर घिमिरे र दीपक तिमल्सिना रहनुभएको छ । यस केन्द्रले विद्युतीय माध्यमबाट ‘कर्मयोद्धासँग शब्दसंवाद’ कार्यक्रमलाई निरन्तरता दिने भएको छ ।
नव कविता वाचनको चौथो शृङ्खला सम्पन्न
शब्दयात्रा प्रकाशन भक्तपुर सम्पर्क केन्द्र र प्राञ्जल नेपालको संयुक्त आयोजना तथा छन्द कविता मञ्चको संयोजनमा चौथो नव कविता वाचन कार्यक्रम जुमका माध्यमबाट सम्पन्न भयो । डा. यज्ञेश्वर निरौला प्रमुख अतिथि, शब्दयात्रा प्रकाशनका अध्यक्ष शब्दसारथि हरि मञ्जुश्री विशेष अतिथि र प्राञ्जल नेपालका अध्यक्ष तथा शब्दयात्रा प्रकाशन भक्तपुर सम्पर्क केन्द्रका संयोजक डिल्लीराम गौतम सभापति रहनुभएको सो कार्यक्रमको सञ्चालन छन्द कविता मञ्चका संयोजक जीवनाथ अधिकारीले गर्नुभएको थियो । कार्यक्रममा डा इन्दुल केसी, जीवनाथ अधिकारी, टीका श्रेष्ठ, डिल्लीराम गौतम, ढुण्डीराज पोखरेल, निर्मला श्रेष्ठ, पदम दाहाल, पशुपतिमान प्रधान, पुण्यवती घले, प्रजापति तिमल्सिना, बिरजा घिमिरे, रमेश शर्मा घिमिरे र विमला पोखरेलले कविता वाचन गर्नुभएको थियो ।
नौ गते पुरस्कृत गरिने
शब्दयात्रा प्रकाशनले २०७८ सालमा समर्पण गर्ने दुई पुरस्कार यही असोज ९ गते समर्पण गर्ने भएको छ । शब्दयात्रा प्रकाशनको सभाकक्ष नीलकण्ठेश्वर बनेपामा स्वास्थ्य सुरक्षाका मापदण्डको पालना गरी आयोजना गरिने कार्यक्रममा दुवै पुरस्कार समर्पण गरिनेछन् । कार्यक्रमका प्रमुख अतिथि अग्रज गायक, सङ्गीतकार, गीतकार तथा साहित्यकार गणेश रसिक रहनुहुनेछ भने साहित्यकारहरू कृष्ण जोशी र पवन आलोकको उपस्थिति हुनेछ । कार्यक्रममा शब्दयात्रा कृष्ण जोशी भोजपुर प्रतिभा पुरस्कार अन्वेषक प्रा. डा. गोविन्दमानसिंह कार्कीलाई र शब्दयात्रा कर्मशीलता पुरस्कार डा. इन्दुल केसीलाई समर्पण गरिनेछ । पुरस्कार समर्पण गर्दा रकम, अभिवन्दनापत्र र शब्दयात्रा पट्ट समर्पण गरिनेछ ।
शब्दसञ्चारः असोज ०५, २०७८
- Episode 68 – Shabda Sanchar 29:49
गायक उदितनारायण झालाई शब्दयात्रा सम्मान समर्पण गरिने
शब्दयात्रा प्रकाशनले गायक उदितनारायण झालाई शब्दयात्रा विशेष सङ्गीत सम्मान समर्पण गर्ने भएको छ । नेपाली भाषासहित दक्षिण एसियाली क्षेत्रका विभिन्न दस भाषामा गीत गाएर साङ्गीतिक क्षेत्रमा योगदान गर्नुभएकाले उहाँलाई शब्दयात्रा प्रकाशनको दसौँ वार्षिकोत्सवको अवसर पारी सम्मान समर्पण गर्न लागिएको हो ।
शब्दयात्रा प्रकाशनले नगेन्द्रप्रसाद आचार्यको पुस्तक छाप्ने
शब्दयात्रा प्रकाशनले कालिकोट निवासी साहित्यकार नगेन्द्रप्रसाद आचार्यको लघुकाव्य ‘कुमारी सिन्दुर’ प्रकाशन गर्ने भएको छ । उहाँ ‘विरामरश्मि’ उपनामबाट साहित्यिक सिर्जना गर्नुहुन्छ ।
रासकोट कला संस्कृति साहित्य प्रतिष्ठान कालिकोटका संस्थापक अध्यक्ष नगेन्द्रप्रसाद आचार्यले यसअघि ‘सेतो फूल’ नामक साहित्यिक कृति प्रकाशन गराइसक्नुभएको छ । उहाँ शिक्षण पेसामा आबद्ध हुनुहुन्छ ।