शब्दयात्रा प्रकाशनद्वारा संस्थापित ‘शब्दयात्रा जयदेव अधिकारी अनुसन्धान सम्मान’ बाट २०७२ सालमा सम्मानित समालोचक रमा शर्मा २०७८ सालको ‘दण्डपाणि नन्दकुमारी अज्र्याल स्मृति पुरस्कार’ बाट पुरस्कृत हुनुभएकोमा हार्दिक बधाई ज्ञापन गर्दछौँ ।

शब्दयात्रा प्रकाशन परिवार

अग्रज आख्यानकार, भ्रष्टाचारविरोधी अभियन्ता एवं भ्रष्टविरोधी शास्त्रका प्रणेता भरत जङ्गमले शब्दयात्रा प्रकाशनको आजीवन सदस्यता ग्रहण गर्नुभएको छ । शब्दयात्रा प्रकाशन उहाँप्रति हार्दिक आभार व्यक्त गर्दछ ।

शब्दयात्रा प्रकाशनका संस्थापक अध्यक्ष हरि मञ्जुश्रीले महात्मा रामदास नौबागका विषयमा प्रवचन गर्नुभयो । सनातन वैदिक विवेचना नामक आध्यात्मिक कार्यक्रममा नेपाली सन्तहरूका विषयमा जानकारी गराउने क्रममा उहाँले यस पटकको प्रवचनमा दमाईं जातिमा जन्मेर ब्राह्मण जातिका गुरु बनेका महात्मा रामदास नौबागको प्रेरक जीवनगाथा सङ्क्षिप्त रूपमा उल्लेख गर्नुभएको थियो । उहाँले प्रवचनका रूपमा प्रस्तुत गर्नुभएका सन्तगाथाहरू यु–ट्युबमा पनि सुन्न सकिनेछ । हरेक आइतबार बिहान ६ बजेदेखि साढे ६ बजेसम्म उहाँले सन्तगाथा प्रस्तुत गर्ने गर्नुभएको छ ।

नव कविता वाचन कार्यक्रमको पाँचौँ शृङ्खला सम्पन्न भएको छ । शब्दयात्रा प्रकाशन भक्तपुर सम्पर्क केन्द्र र प्राञ्जल नेपालको आयोजना तथा छन्द कविता मञ्चको संयोजनमा सञ्चालन भएको उक्त कार्यक्रममा प्रमुख अतिथि साहित्यकार डा. अमर गिरी तथा विशेष अतिथि शब्दयात्रा प्रकाशनका संस्थापक अध्यक्ष शब्दसारथि हरि मञ्जुश्री रहनुभएको थियो । शब्दयात्रा प्रकाशन भक्तपुर सम्पर्क केन्द्रका संयोजक डिल्लीराम गौतमको अध्यक्षता तथा छन्द कविता मञ्चका संयोजक कवि जीवनाथ अधिकारीको सञ्चालन रहेको उक्त कार्यक्रममा पन्ध्रजना कवि–कवयित्रीले आ–आफ्ना कविताहरू वाचन गर्नभएको थियो । अतिथि कविका रूपमा भोजपुरका कवि सुवास विभास र कञ्चनपुरकी कवयित्री बासमती राना थारू हुनुहुन्थ्यो । सहभागी अन्य कविहरूमा डा. इन्दुल केसी, जीवनाथ अधिकारी, पदम दाहाल, पुण्यवती घले, प्रजापति तिमिल्सिना, विरजा घिमिरे, विनोद कोइराला र सुनील सापकोटा हुनुहुन्थ्यो । कार्यक्रम साँझ ५ बजेदेखि करिब २ घन्टा चलेको थियो । कार्यक्रममा छन्दोबद्ध, लयबद्ध र मुक्त लयका कविताहरू वाचन गरिएका थिए । त्यस बखत नव कविता वाचन कार्यक्रमको छैटौँ शृङ्खला आगामी असोज २३ गते सञ्चालन हुने जानकारी गराइएको थियो ।

साहित्यिक लेखन, प्रकाशन र पत्रकारिताका माध्यमद्वारा भुटानमा नेपाली भाषा, साहित्य र संस्कृतिको संरक्षण र विस्तार गर्न योगदान दिनुभएका छत्रपति फुएललाई शब्दयात्रा प्रकाशनले सम्मान गर्ने भएको छ । शब्दयात्रा प्रकाशनले स्थापनाकालको दसौँ वर्षको अवसर पारी विभिन्न व्यक्तित्वहरूलाई विशेष सम्मान गर्ने क्रममा भुटानको साम्ची दोरोखा निवासी छत्रपति फुएललाई पनि सम्मान गर्न लागेको हो । यसअघि गायक उदितनारायण झालाई पनि विशेष सम्मान गर्ने समाचार प्रसारित भइसकेको छ ।

शब्दयात्रा प्रकाशनबाट ‘भरत’ नामक महाकाव्य प्रकाशित हुने भएको छ । महाकाव्यकार मनिराज जोशीले लेख्नुभएको यो महाकाव्य शब्दयात्रा प्रकाशनको १ सय ६२ औँ प्रकाशनपुष्प हो । शब्दयात्रा प्रकाशनले यसअघि नै तीनवटा महाकाव्य प्रकाशन गरिसकेको छ ।

शब्दयात्रा प्रकाशनको सञ्चालक समिति पुनर्गठन गरिएको छ । सञ्चालक समितिका दुई सदस्य पद रिक्त हुन आएकाले शब्दयात्रा प्रकाशनका आजीवन सदस्यमध्येका केदारनाथ तिमल्सिना र अमृत अधिकारीलाई सञ्चालक समितिमा मनोनयन गरी सञ्चालक समितिलाई पूर्णता दिइएको हो । शब्दयात्रा प्रकाशनको सञ्चालक समितिमा २६ जना आजीवन सदस्य रहेका छन् ।

शब्दयात्रा प्रकाशनले ‘संस्मरण र आत्मवृत्तान्त’ नामक पुस्तक प्रकाशन गर्ने भएको छ । बनेपाका हर्षनारायण कर्माचार्यले लेख्नुभएका फुटकर लेख–संस्मरणहरूको सङ्ग्रहका रूपमा रहेको उक्त पुस्तकमा जनमत प्रकाशनका अध्यक्ष मोहन दुवालको मन्तव्य रहेको छ ।
शब्दयात्रा प्रकाशनको आठौँ वार्षिक साधारण सभा सम्पन्न —
शब्दयात्रा प्रकाशनको आठौँ वार्षिक साधारण सभा यही २०७८ साल असोज ९ गते सम्पन्न भएको छ । सभाले सञ्चालक समितिमा रिक्त हुन आएका दुई सदस्यमा केदारनाथ तिमल्सिना र अमृत अधिकारीलाई मनोनयन गरी सञ्चालक समितिको पुनर्गठन गरेको छ । सभाले सञ्चालक समितिको प्रतिवेदन, स्वतन्त्र लेखापरीक्षकको प्रतिवेदन, आ. व. २०७८–७९ को वार्षिक कार्यक्रम र आयव्ययको संशोधित अनुमान तथा आ. व. २०७९–८० का लागि अनुमानित कार्यक्रम र आयव्यय विवरण पारित गरेको छ । आ. व. २०७८–७९ को लेखापरीक्षणका लागि दर्तावाला स्वतन्त्र लेखापरीक्षक नियुक्त गरी निजको पारिश्रमिक समेत तोकेको छ ।