शब्दयात्रा प्रकाशनले अग्रज कवि शैलेन्द्र साकारको कवितासङ्ग्रह ‘अरू सात समुद्र’ प्रकाशन गर्न लागेको छ । उहाँ विचारोत्तेजक कविताका कारण ख्याति आर्जन गर्नुभएका प्रसिद्ध कवि हुनुहुन्छ । समालोचकहरूले उहाँलाई प्रतिनिधि नेपाली कविका रूपमा नेपालबाहिर प्रस्तुत गर्न योग्य कविका रूपमा परिचय गराउने गरेका छन् । सधैँ नयाँ लागिरहने कविताहरू सिर्जना गर्नु उहाँको विशिष्टता हो । उहाँ विद्रोही भएर पनि कला पक्षप्रति अत्यन्त सचेत कवि मानिनुहुन्छ । उहाँ कविता विधाका ६ वटा कृतिका स्रष्टा हुनुहुन्छ । उहाँले देवकोटा काव्य पुरस्कार र युगकवि सिद्धिचरण पुरस्कार लगायत विभिन्न पुरस्कार र सम्मानहरू प्राप्त गर्नुभएको छ । उहाँको जन्म २००३ सालमा भोजपुरमा भएको हो । ‘अरू सात समुद्र’ कवितासङ्ग्रहमा उहाँका लामा–छोटा दुवै आकारका ८२ वटा शक्तिशाली कविता सङ्ग्रहित छन् ।

शब्दयात्रा प्रकाशन भक्तपुर सम्पर्क केन्द्र र प्राञ्जल नेपालको आयोजना तथा छन्द कविता मञ्चको संयोजनमा नवकविता वाचन जुम कार्यक्रमको तेस्रो शृङ्खला सम्पिन्न भयो । नेपाल प्रज्ञाप्रतिष्ठानका सदस्य सचिव जगतप्रसाद उपाध्याय प्रमुख अतिथि र शब्दयात्रा प्रकाशनका संस्थापक अध्यक्ष हरि मञ्जुश्री विशेष अतिथि रहेको उक्त कार्यक्रमको सभापतित्व डिल्लीराम गौतमले र सञ्चालन जीवनाथ अधिकारीले गर्नुभएको थियो । कार्यक्रममा डा. इन्दुल केसी, डीपी दाहाल, निर्मला श्रेष्ठ, पदम दाहाल, प्रजापति तिमिल्सिना, पुण्यवती घले, लालबहादुर भुजेल, विरजा घिमिरे, विश्वनाथ बराल, सागर गुरागाई र सुनील सापकोटाले कविता वाचन गर्नुभएको थियो ।

शब्दयात्रा प्रकाशन पुस्तकालयका लागि काठमाडौँ घट्टेकुलो निवासी कवि कृष्ण जोशीले विभिन्न साहित्यिक पत्रिकाहरू एक सय सङ्ख्यामा प्रदान गर्नुभएको छ । ती साहित्यिक पत्रिकाहरू शब्दयात्रा प्रकाशन पुस्तकालयका लागि शब्दयात्रा प्रकाशनका संस्थापक अध्यक्ष हरि मञ्जुश्रीले ग्रहण गर्नुभएको थियो । यसभन्दा अघि उहाँले चार सय थान पुस्तकहरू उपलब्ध गराउनुभएको थियो । यसै गरी ललितपुर झम्सिखेल निवासी अध्येता श्रीमती मन अधिकारीले शब्दयात्रा प्रकाशन पुस्तकालयका लागि दुई दर्जन पुस्तकहरू उपहारस्वरूप उपलब्ध गराउनुभएको छ । बनेपाको शब्दसाधक तीर्थमा रहेको शब्दयात्रा प्रकाशन पुस्तकालयका लागि आफूले सङ्ग्रह गरेका पुस्तक–पत्रिकाहरू प्रदान गर्नुभएकोमा कवि कृष्ण जोशी र अध्येता मन अधिकारीप्रति शब्दयात्रा प्रकाशनले हार्दिक आभार व्यक्त गरेको छ ।

शब्दयात्रा प्रकाशनका संस्थापक अध्यक्ष हरि मञ्जुश्रीले नेपाली सन्तहरूका विषयमा हरेक हप्ता प्रवचन गर्ने क्रममा यो हप्ता शिव औतारी लामाका विषयमा प्रवचन गर्नुभयो । सनातन वैदिक विवेचना नामक मूल कार्यक्रम अन्तर्गत हरेक आइतबार बिहान ६ बजेदेखि साढे ६ बजेसम्म हरि मञ्जुश्रीले नेपाली सन्तहरूका विषयमा परिचय दिने गर्नुभएको छ र त्यसलाई सन्तगाथा भन्ने गरिएको छ ।

शब्दयात्रा प्रकाशनद्वारा संस्थापित शब्दयात्रा हंसराज श्रेष्ठ सामाजिक जागरण सम्मानबाट २०६९ सालमा सम्मानित अग्रज समाजसेवी श्रीमती सगुन शाहले परलोकगमन गर्नुभएको समाचारबाट व्यथित बनेर उहाँको आत्मा परमात्मामा एकाकार होस् भन्ने प्रार्थना गर्दै उहाँका शोकविह्वल पारिवारिक सम्बन्धीहरूमा हार्दिक समवेदना व्यक्त गर्दछौँ ।

शब्दयात्रा प्रकाशन परिवार

शब्दयात्रा प्रकाशनद्वारा निर्मित शब्दसाधक तीर्थमा रुद्राक्ष लगायतका बिरुवाहरू रोपी वृक्षरोपण कार्यक्रम सम्पन्न गरिएको छ । नेपालमा पहिलोपल्ट रुद्राक्षको बिरुवा बालागुरु षडानन्द अधिकारीले भोजपुरको दिङलामा रोप्नुभएको थियो । बनेपामा स्थापित उहाँको सालिकसँगै शब्दयात्रा प्रकाशनका संस्थापक अध्यक्ष हरि मञ्जुश्रीले रुद्राक्षको बिरुवा रोपेर वृक्षरोपण कार्यक्रमको प्रारम्भ गर्नुभएको थियो ।
त्यसै गरी वृक्षरोपण कार्यक्रम नीलकण्ठेश्वर धाम परिसरमा पनि गरिएको छ । नीलकण्ठेश्वर धाम संरक्षण समितिका अध्यक्ष कृष्णमणि कुइकेलले वृक्षरोपण गरेर कार्यक्रमको शुभारम्भ गर्नुभएको थियो । त्यस बखत हरिगोपाल प्रधान, रमेश अधिकारी, सङ्गीता केसी आदिले पनि वृक्षरोपण गर्नुभएको थियो भने सघाउने काम भुवन पाण्डेले गर्नुभएको थियो ।
शब्दसाधक तीर्थ र नीलकण्ठेश्वर धाममा वृक्षरोपण गर्नका लागि शब्दयात्रा प्रकाशनका सञ्चालक सदस्य हरिगोपाल प्रधानले रुद्राक्ष, वर, पीपल, एभोकाडो लगायतका एक सयभन्दा बढी बिरुवाहरू उपलब्ध गराउनुभएको थियो ।

शब्दयात्रा प्रकाशनले नेपाली वाङ्मयसेवी हिरण्यकुमारी पाठकद्वारा लिखित यात्रासंस्मरणात्मक कृति प्रकाशन गर्ने भएको छ । उक्त कृतिमाथि डा. दामोदर पुडासैनी किशोर र प्रतीक ढकालले विवेचनात्मक भूमिका लेख्नुभएको छ ।