Shabdayatra Prakashan

शब्दयात्रा प्रकाशनद्वारा निर्मित शब्दसाधक तीर्थमा रुद्राक्ष लगायतका बिरुवाहरू रोपी वृक्षरोपण कार्यक्रम सम्पन्न गरिएको छ । नेपालमा पहिलोपल्ट रुद्राक्षको बिरुवा बालागुरु षडानन्द अधिकारीले भोजपुरको दिङलामा रोप्नुभएको थियो । बनेपामा स्थापित उहाँको सालिकसँगै शब्दयात्रा प्रकाशनका संस्थापक अध्यक्ष हरि मञ्जुश्रीले रुद्राक्षको बिरुवा रोपेर वृक्षरोपण कार्यक्रमको प्रारम्भ गर्नुभएको थियो ।
त्यसै गरी वृक्षरोपण कार्यक्रम नीलकण्ठेश्वर धाम परिसरमा पनि गरिएको छ । नीलकण्ठेश्वर धाम संरक्षण समितिका अध्यक्ष कृष्णमणि कुइकेलले वृक्षरोपण गरेर कार्यक्रमको शुभारम्भ गर्नुभएको थियो । त्यस बखत हरिगोपाल प्रधान, रमेश अधिकारी, सङ्गीता केसी आदिले पनि वृक्षरोपण गर्नुभएको थियो भने सघाउने काम भुवन पाण्डेले गर्नुभएको थियो ।
शब्दसाधक तीर्थ र नीलकण्ठेश्वर धाममा वृक्षरोपण गर्नका लागि शब्दयात्रा प्रकाशनका सञ्चालक सदस्य हरिगोपाल प्रधानले रुद्राक्ष, वर, पीपल, एभोकाडो लगायतका एक सयभन्दा बढी बिरुवाहरू उपलब्ध गराउनुभएको थियो ।

शब्दयात्रा प्रकाशनले नेपाली वाङ्मयसेवी हिरण्यकुमारी पाठकद्वारा लिखित यात्रासंस्मरणात्मक कृति प्रकाशन गर्ने भएको छ । उक्त कृतिमाथि डा. दामोदर पुडासैनी किशोर र प्रतीक ढकालले विवेचनात्मक भूमिका लेख्नुभएको छ ।

शब्दयात्रा प्रकाशनका आजीवन सदस्य डा. इन्दुल केसी भक्तपुर जिल्लाका पुराना पत्रकारका रूपमा स्वतन्त्र पत्रकार सङ्घ नेपाल भक्तपुर जिल्ला शाखाले सम्मान गरेको छ । उनले २०१५ सालमा तत्कालीन नेपाल संवाद समितिमा आबद्ध भई पत्रकारिता गरेका थिए । उनी यसअघि स्वतन्त्र पत्रकार सङ्घ नेपालको भक्तपुर जिल्ला शाखाका अध्यक्ष पनि थिए । आफ्नो दुईवर्षे कार्यकालमा पत्रकारितासम्बन्धी विविध कार्यक्रमहरू सफलतापूर्वक सम्पन्न गरी संस्थालाई अगाडि बढाउन विशेष कार्य गरेबापत उनलाई सम्मान गरिएको थियो ।

शब्दयात्रा प्रकाशनबाट २०७८ सालमा समर्पण गरिने शब्दयात्रा कृष्ण जोशी भोजपुर प्रतिभा पु्रस्कार अन्वेषक डा. गोविन्दमानसिंह कार्कीलाई प्रदान गरिने भएको छ । कवि कृष्ण जोशीको आर्थिक व्यवस्थापन रहेको यो पुरस्कार यसै वर्षदेखि समर्पण गर्न थालिएको हो । भोजपुर जिल्लाका प्रतिभालाई पुरस्कृत गरिने यस पुरस्कारका लागि योग्य व्यक्तिको नाउँ पठाउन शब्दयात्रा प्रकाशनले ‘शब्दसञ्चार’ रेडियो कार्यक्रम र वेबसाइटबाट सार्वजनिक आह्वान गरेको थियो ।

शब्दयात्रा प्रकाशनले २०७८ सालको शब्दयात्रा हंसराज श्रेष्ठ सामाजिक जागरण सम्मान राष्ट्रिय समाजसेवी प्रा. डा. जगदीश वैद्य (ललितपुर) लाई समर्पण गर्ने भएको छ । उक्त सम्मानको आर्थिक व्यवस्थापक आनन्दराज श्रेष्ठ हुनुहुन्छ । यसै गरी शब्दयात्रा होम–तोत्र शिक्षा सम्मान प्राविधिक शिक्षा तथा व्यावसायिक तालिम विशेषज्ञ प्रा. डा. टङ्कनाथ शर्मा (कास्की) लाई समर्पण गरिने भएको छ । उक्त सम्मानको आर्थिक व्यवस्थापक रमेश पौड्याल हुनुहुन्छ । यसै गरी शब्दयात्रा रामकृष्ण श्रेष्ठ विज्ञान–प्रविधि सम्मान हाइड्रोपावरविज्ञ इन्जिनियर प्रा. डा. रमेशकुमार मास्के (मोरङ) लाई समर्पण गरिने भएको छ । उक्त सम्मानको आर्थिक व्यवस्थापक रामकृष्ण स्मृति प्रतिष्ठान रहेको छ । २०७८ सालको पहिलो चरणमा समर्पण गरिने ९ विधाका सम्मानहरूमध्ये अन्य छ विधाका सम्मानहरूको घोषणा यसअघि नै भइसकेको छ ।

शब्दयात्रा प्रकाशनका संस्थापक अध्यक्ष हरि मञ्जुश्रीले थारू जातिका स्वामी मुरलीधरानन्द र लिम्बू जातिका स्वामी आत्मानन्द लिङ्देनका विषयमा प्रवचन गर्नुभयो । सनातन वैदिक विवेचना कार्यक्रमअन्तर्गत हरेक आइतबार बिहान नेपाली सन्तको परिचयात्मक प्रवचन गर्ने क्रममा यसपटक उहाँहरूका विषयमा जानकारी गराउनुभएको हो ।