Shabdayatra Prakashan

शब्दयात्रा प्रकाशनका संस्थापक अध्यक्ष हरि मञ्जुश्रीलाई ५० हजार रुपियाँ र सम्मानपत्रसहितको ‘गोपाल पाँडे असीम पुरस्कार, २०७८’ प्रदान गरिएको छ । विविध विधाका कृति सिर्जनाका साथै विभिन्न रचनात्मक क्रियाकलापद्वारा नेपाली साहित्यको श्रीबृद्धिमा उल्लेखनीय योगदान पु¥याएकोमा उहाँलाई नेपाली शिक्षा परिषदले पुरस्कृत गरेको हो ।
नेपाली शिक्षा परिषदका अध्यक्ष रमा शर्मा सभापति, अग्रज कवि मुकुन्दशरण उपाध्याय प्रमुख अतिथि, पूर्वराजदूत डा. जयराज आचार्य अतिथि वक्ता र डा. इन्दिरा शर्मा कार्यक्रम सञ्चालक हुनुभएको पुरस्कार समर्पण कार्यक्रममा आयोजक संस्थाका गतिविधिबारे समाजसेवी लक्ष्मण थापाले र पुरस्कृत व्यक्तित्व हरि मञ्जुश्रीका विषयमा आख्यानकार भरत जङ्गमले जानकारी गराउनुभएको थियो । स्वागत भाषण संस्कृतिविद तेजेश्वरबाबु ग्वंगःले गर्नुभएको त्यस कार्यक्रममा कवि डा. बमबहादुर थापा जितालीले कविता वाचन गर्नुभएको थियो । कार्यक्रममा डा. मोहन लोहनी, रमेश खकुरेल, कोषराज न्यौपाने, प्रह्लाद पोखरेल, पवन आलोक, धनराज गिरी, होम सुवेदी, मुकुन्द शर्मा चालिसे, खोलाघरे साहिँलो, किरण थापा, चन्द्रवदना घिमिरे, नवीना श्रेष्ठ, हरिगोपाल प्रधान आदिको उपस्थिति रहेको थियो ।

शब्दयात्रा प्रकाशनका संस्थापक अध्यक्ष हरि मञ्जुश्रीसँग सूचना चौतारीका तर्फबाट जुम संवादको आयोजना गरियो । ‘लोकतन्त्र, महामारी र देश’ शीर्षकको नवीनतम शृङ्खलाको उक्त जुम संवाद गत २८ गते बिहीबार आयोजना गरिएको थियो । त्यस शृङ्खलामा उहाँलाई आयोजकका तर्फबाट आग्रह गरिएअनुसार उहाँले ग्रन्थसम्पादक जीवनचन्द्र कोइरालाका विषयमा आफूले थाहा पाएका जानकारीहरू व्यक्त गर्नुभएको थियो । उहाँका साथमा नेपाल संस्कृत विश्वविद्यालयका पूर्वउपकुलपति प्रा. डा. कुलप्रसाद कोइराला तथा सञ्चारकर्मीद्वय पुरुषोत्तम दाहाल र जीवनाथ धमलाले पनि मन्तव्य व्यक्त गर्नुभएको थियो । कवि कलानिधि दाहालले कविता वाचन गर्नुभएको उक्त कार्यक्रममा डा. तुलसी भट्टराई, वनमाली निराकार आदि पनि उपस्थित हुनुहुन्थ्यो । कार्यक्रमको सञ्चालन कवि तथा सञ्चारकर्मी मनोज न्यौपानेले गर्नुभएको थियो ।