आर्थिक रूपमा कमजोर परिवारका तर पढाइमा अब्बल रहेका काभ्रेपलाञ्चोक जिल्लाका तीन छात्रालाई शब्दयात्रा प्रकाशनमार्फत आर्थिक सहयोग प्रदान गरिएको छ । तीनैजनालाई शब्दयात्रा प्रकाशनका संस्थापक सदस्य सकुल थापाले सात–सात हजार रुपियाँ आर्थिक सहयोग गर्नुभएको हो । आर्थिक सहयोग गर्नका लागि शब्दयात्रा प्रकाशनले छात्राहरूको छनोट गरेको थियो । आर्थिक सहयोग प्राप्त गर्ने छात्राहरूमा धनेश्वर आधारभूत विद्यालयको कक्षा ३ मा अध्ययनरत प्रनिशा पहरी, श्रीखण्डपुर माध्यमिक विद्यालयको कक्षा ५ मा अध्ययनरत छात्रा सुस्मिता मोक्तान र काभ्रे माध्यमिक विद्यालयको कक्षा १० मा अध्ययनरत छात्रा सिमोना बस्नेत छन् ।
सेवामा समर्पित सकुल थापा नामक वृत्तचित्र सार्वजनिक
शब्दयात्रा प्रकाशनद्वारा निर्मित वृत्तचित्र ‘सेवामा समर्पित सकुल थापा’ सार्वजनिक गरिएको छ । हरि मञ्जुश्रीको लेखन, इ. रोशन मञ्जुश्री अधिकारीको निर्देशन र सम्पादन तथा रश्मि हुमागाईको वाचन रहेको यस वृत्तचित्रलाई प्रमुख अतिथिका रूपबाट काठमाडौँ विश्वविद्यालयका निवर्तमान उपकुलपति प्रा. डा. भोला थापाले सार्वजनिक गर्नुभएको हो । यस वृत्तचित्रमा शब्दयात्रा प्रकाशनका संस्थापक सदस्य सकुल थापाको जीवनका विविध पक्षलाई प्रस्तुत गरिएको छ । वृत्तचित्र आठ मिनेटको छ । शब्दयात्रा प्रकाशनद्वारा निर्मित यो दोस्रो वृत्तचित्र हो ।
‘ॐ हरिहरि’ नेपाली भजन सार्वजनिक
शब्दयात्रा प्रकाशनले बनेपामा हिजो आयोजना गरेको कार्यक्रममा ‘ॐ हरिहरि’ नामक नेपाली साङ्गीतिक भजन सार्वजनिक गरिएको छ । काठमाडौँ विश्वविद्यालयका निवर्तमान उपकुलपति प्रा. डा. भोला थापाले प्रमुख अतिथिका रूपबाट यसलाई सार्वजनिक गर्नुभएको हो । सकुल थापाको शब्द र हरि मञ्जुश्रीको सङ्गीत रहेको यस भजनमा रश्मि हुमागाई र इ. रोशन अधिकारीको स्वर रहेको छ । भजनको साङ्गीतिक सुपरिवेक्षण गीतिभास्कर मच्छेश्वर सापकोटाले, बाद्यसंयोजन र ध्वनिमिश्रण बालकृष्ण सेवाचार्यले र सम्पादन इ. रोशन अधिकारीले गर्नुभएको हो । यो भजन शब्दयात्रा प्रकाशनको बीसौँ साङ्गीतिक उपहार हो ।
तीनजना विद्यार्थीलाई आर्थिक सहयोग दिइने
शब्दयात्रा प्रकाशनका संस्थापक सदस्य सकुल थापाले आर्थिक रूपमा कमजोर तर पढाइमा अब्बल रहेका तीनजना विद्यार्थीलाई शब्दयात्रा प्रकाशनमार्फत आर्थिक सहयोग दिन लाग्नुभएको छ । सहयोग रकम यही महिनामा प्रदान गरिनेछ । आर्थिक सहयोग पाउने विद्यार्थीहरू धनेश्वर आधारभूत विद्यालय, श्रीखण्डपुर माध्यमिक विद्यालय र काभ्रे माध्यमिक विद्यालयमा अध्ययन गरिरहेका छन् ।
‘सेवामा समर्पित सकुल थापा’ नामक वृत्तचित्र तयार
शब्दयात्रा प्रकाशनका संस्थापक सदस्य सकुल थापाको हालसम्मको सेवायात्रालाई समेटेर शब्दयात्रा प्रकाशनकै आजीवन सदस्य सफ्टवेयर इन्जिनियर रोशन मञ्जुश्री अधिकारीले ‘सेवामा समर्पित सकुल थापा’ नामक वृत्तचित्र तयार पार्नुभएको छ । वृत्तचित्रमा सकुल थापाको जीवनयात्रा प्रस्तुत गरिनुका साथै उहाँको लेखक व्यक्तित्व, साहित्यसेवी व्यक्तित्व, समाजसेवी व्यक्तित्व, आध्यात्मिक व्यक्तित्व र छायाछविकार व्यक्तित्वबाट भएका योगदानका बारेमा जानकारी गराइएको छ । उक्त वृत्तचित्रको सार्वजनिकीकरण शब्दयात्रा प्रकाशनको आयोजनामा यसै महिनाभित्र गरिनेछ ।
२६१. गगनमण्डलका ताराहरू
‘गगनमण्डलका ताराहरू’ समीक्षासङ्ग्रह हो । यसका लेखक डा. इन्दुल केसी हुनुहुन्छ । ‘गगनमण्डल’ ले साहित्याकाशलाई र ‘तारा’ ले पुस्तकलाई जनाएको छ । यसभित्र सोह्रवटा कृतिका समीक्षाहरू, एउटा संस्था परिचय र एउटा संस्मरण रहेका छन् भने परिशिष्ट अन्तर्गत डा. इन्दुल केसीका विषयमा अन्य व्यक्तिले लेखेका तीनवटा संस्मरणात्मक प्रतिक्रिया रहेका छन् । जम्मा २१ थुँगाको मालाका रूपमा यो पुस्तक प्रस्तुत भएको छ । शब्दयात्रा प्रकाशनद्वारा प्रकाशित पुस्तक र शब्दयात्रा प्रकाशनका आजीवन सदस्यद्वारा सम्पादित पुस्तकका समीक्षाहरू पनि यसमा परेका छन् । जम्मा ९६ पृष्ठको यस पुस्तकको मूल्य २ सय रुपियाँ राखिएको छ ।
२६०. वरद नायक भरत जङ्गम
‘वरद नायक भरत जङ्गम’ पदम दाहालको कृति हो । भरत जङ्गमका विषयमा लेखिएका लेखहरू समेटिएको अभिनन्दनग्रन्थ हरि मञ्जुश्रीको सम्पादनमा प्रकाशित भएको थियो । त्यस ग्रन्थमा रहेका केही लेखलाई आधार बनाएर पदम दाहालले एक लेखमाथि अर्को लेख लेख्नुभएको थियो । यो पुस्तक त्यसरी लेखिएका लेखहरूको सङ्ग्रह हो । यस सङ्ग्रहभित्रका लेखहरू विश्लेषणात्मक अध्ययन गरी परम्परागत ढाँचामा लेखिएका विवेचनात्मक लेखभन्दा भिन्न प्रकृतिका छन् । कृतिपरक सिंहावलोकनभन्दा अनुभूतिपरक र प्रभावपरक समीक्षाले यहाँका लेखहरूमा ठाउँ पाएका छन् । त्यसैले यो पुस्तक नवीन बौद्धिक खुराक बनेको छ र यसले कृतिनायक र कृतिकार दुवैको योगदान र व्यक्तित्वमा चहक थप्न सकेको छ ।
२५९. बसिबियाँलोका क्षणहरू
‘बसिबियाँलोका क्षणहरू’ नामक कवितासङ्ग्रहका लेखक कृष्ण कार्की हुनुहुन्छ । यस सङ्ग्रहमा मानवको आध्यात्मिक चिन्तन र गतिविधिलाई उजागर गर्ने प्रयत्न गर्नुका साथै मानव जातिको उत्थान र उत्सुकताले प्रेरणा देओस् भन्ने कामना गरिएको छ । कवितामा छन्द, वर्ण, लय मिलाउने मात्र नगरी स्वतन्त्रता र स्वच्छन्दतामा लेख्ने पाश्चात्य परम्परा अँगालिएको छ । मानव–मानव सम्बन्ध र विचारलाई मनन गरी मनमा लागेका कुराहरू व्यक्त गर्ने क्रममा कविले यसमा आफ्नो मनमा लागेका कुरा लेख्नुभएको छ । जम्मा ११२ पृष्ठको यस पुस्तकको मूल्य १५० रुपियाँ राखिएको छ ।
रसुवा प्रतिभा पुरस्कार सम्बन्धी सम्झौतापत्र आदानप्रदान
‘शब्दयात्रा टोपकुमारी–तुलसीप्रसाद आचार्य रसुवा प्रतिभा पुरस्कार’ सम्बन्धी सम्झौतापत्र पुरस्कारका संस्थापक डा. सरस्वती आचार्य र व्यवस्थापक शब्दयात्रा प्रकाशनका तर्फबाट पदम दाहालले आदानप्रदान गर्नुभयो । सम्झौतापत्र आदानप्रदान गर्नमा साधुराम गिरीले सहयोग गर्नुभएको थियो भने डा. सरस्वती आचार्यले शब्दयात्रा प्रकाशनलाई प्रदान गर्नुभएको चेक शब्दयात्रा प्रकाशनका तर्फबाट अच्युत अधिकारीले ग्रहण गर्नुभयो ।
शब्दयात्रा प्रकाशनले यही वर्षदेखि रसुवा जिल्लाका प्रतिभालाई २५ हजार रुपियाँ, अभिवन्दनापत्र र शब्दयात्रा पट्ट सहित ‘शब्दयात्रा टोपकुमारी–तुलसीप्रसाद आचार्य रसुवा प्रतिभा पुरस्कार’ समर्पण गर्नेछ ।
सम्मान समर्पण तथा पुस्तक सार्वजनिकीकरण समारोह सम्पन्न
शब्दयात्रा प्रकाशनले २०८२ सालको दोस्रो चरणको सम्मान समर्पण तथा पुस्तक सार्वजनिकीकरण समारोह सम्पन्न गरेको छ । समारोहमा आठ विधामा सम्मान समर्पण र चारवटा पुस्तकको सार्वजनिकीकरण गरिएको थियो ।
शब्दयात्रा प्रकाशनका संस्थापक अध्यक्ष हरि मञ्जुश्रीको सभापतित्वमा सम्पन्न उक्त समारोहमा सल्लाहकार सावित्री जङ्गम थापाले मन्तव्य व्यक्त गर्नुभएको थियो भने समारोहको सञ्चालन कार्यसम्पादन समितिका सदस्य कालिका त्रिपाठी पन्तले र समापन अग्रज पत्रकार बलदेव थापाले गर्नुभएको थियो ।
समारोहको समुद्घाटन लीलादेवी श्रेष्ठले, छायाङ्कन तथा स्वराङ्कन सफ्टवेयर इन्जिनियर रोशन मञ्जुश्री अधिकारीले, मञ्चस्थ महानुभावहरूलाई रुद्राक्षमाला अर्पण केदारनाथ तिमल्सिनाले, सम्मान सामग्रीको व्यवस्थापन अमृत अधिकारीले, कविता वाचन गोविन्दबहादुर खड्काले र विविध कार्यमा सहयोग कार्यालय व्यवस्थापक सङ्गीता केसीले गर्नुभएको थियो ।
चयन समितिका संयोजक चन्द्रबहादुर खड्का तथा सदस्यहरू शिव बन्जारा र कालिका त्रिपाठी पन्तलाई शब्दयात्रा प्रकाशनका तर्फबाट आजीवन सदस्य सहदीप पलाञ्चोकेले उपहार समर्पण गर्नुभएको उक्त समारोहमा प्रथम शिक्षासेवी बालागुरु षडानन्द अधिकारी, प्रथम लोकतान्त्रिक पत्रकार देवीप्रसाद सापकोटा, आध्यात्मिक लेखक दुर्गाप्रसाद अधिकारी र मनका श्रेष्ठको तस्बिरमा पुष्पार्पण गरिएको थियो भने शब्दयात्रा प्रकाशनद्वारा सम्मानित व्यक्तित्व टी. पी. शर्मा तिमिल्सिनाको निधनमा उहाँको आत्मशान्तिको कामनाका साथ एक मिनेट मौन धारण गरिएको थियो ।