शब्दयात्रा प्रकाशनद्वारा संस्थापित ‘शब्दयात्रा प्रशासनिक महिला प्रतिभा सम्मान’ बाट २०७७ सालमा सम्मानित व्यक्तित्व श्रीमती हिरण्यकुमारी पाठकलाई पतिशोक परेको छ । उहाँका पति अग्रज कानुन व्यवसायी तथा राजनीतिज्ञ प्रेमकृष्ण पाठकको गत माघ २३ गते ८२ वर्षको उमेरमा निधन भएको थियो । शब्दयात्रा प्रकाशन परिवार गतात्माले मोक्ष प्राप्त गरोस् भन्ने कामना गर्दै श्रीमती हिरण्यकुमारी पाठकलगायत शोकाकुल परिवारजनप्रति हृदयतः सहवेदना तथा समवेदना व्यक्त गर्दछ ।

शब्दयात्रा प्रकाशन परिवार

शब्दयात्रा प्रकाशनको साप्ताहिक प्रवचन कार्यक्रम ‘कर्मयोद्धासँग शब्दसंवाद’ मा यसपटक शिक्षासेवी तथा साहित्यसेवी पदम दाहालले आफ्नो शैक्षिक तथा साहित्यिक यात्राका विषयमा जानकारी गराउनुभयो । शब्दयात्रा प्रकाशनका संस्थापक अध्यक्ष हरि मञ्जुश्रीले सञ्चालन गर्नुभएको उक्त कार्यक्रमको प्रमुख आतिथ्य आजीवन सदस्य लोकेन्द्र ढकालले र सभापतित्व आजीवन सदस्य पुण्यवती घलेले गर्नुभएको थियो । ‘कर्मयोद्धासँग शब्दसंवाद’ कार्यक्रमको यस शृङ्खलामा कर्मयोद्धा पदम दाहालले आफ्नो प्रस्तुति प्रस्तुत गरिसकेपछि सहभागीहरूले पदम दाहालसँग विभिन्न जिज्ञासाहरू राख्नुभएको थियो भने पदम दाहालले पनि ती जिज्ञासाहरूको समाधान गरिदिनुभएको थियो । विद्युतीय माध्यमबाट भएको उक्त कार्यक्रममा बिरजा घिमिरे, जीवनाथ अधिकारी, हरिप्रसाद चौलागाई, शिव बन्जारा, डा. इन्दुल केसी आदिको उपस्थिति रहेको थियो । विभिन्न विधाका कर्मयोद्धाहरूबाट आफ्ना ज्ञान र अनुभवहरू अरूलाई हस्तान्तरण गराउन शब्दयात्रा प्रकाशनले हरेक शुक्रबार बेलुका साँझ ७ बजेदेखि यस कार्यक्रमको सञ्चालन गर्ने गरेको छ । यसअघि विभिन्न व्यक्तिहरूले यस कार्यक्रममा आफ्ना ज्ञान र अनुभवहरूको आदानप्रदान गरिसक्नुभएको छ ।

शब्दयात्रा प्रकाशनबाट १५ औँ प्रकाशनपुष्पका रूपमा प्रकाशन गरिएको तथा काभ्रेपलान्चोक बनेपास्थित शैलेश्वर महादेव सिद्धपीठका महन्त मुक्ति शर्मा महाराजद्वारा नेपाली भाषामा काव्यानुवाद गरिएको काव्य ‘गीता–माली’ को तेस्रो संस्करण प्रकाशन हुने भएको छ । यस पुस्तकको पहिलो संस्करण २०६९ सालको साउन महिनामा र दोस्रो संस्करण २०६९ सालको पुस महिनामा प्रकाशन गरिएको थियो । यस काव्यको तेस्रो संस्करणलाई यही फागुन महिनामा सार्वजनिक गरिने भएको छ ।

शब्दयात्रा प्रकाशनले काभ्रेपलान्चोक जिल्लाका सक्रिय पत्रकारद्वय राजकुमार पराजुली र ज्ञानमणि नेपाल कालोटोपीलाई २०७८ सालको शब्दयात्रा कदरपत्र प्रदान गर्ने भएको छ । शब्दयात्रा प्रकाशनका सञ्चालक सदस्य हरिगोपाल प्रधानको सौजन्यबाट प्रदान गरिने कदरपत्र हरेक वर्ष काभ्रेपलान्चोक जिल्लाका दुईजना सक्रिय पत्रकारलाई प्रदान गर्ने गरिएको छ । शब्दयात्रा कदरपत्र २०७७ सालमा मधुसूदन गुरागाईं र भगवती तिमिल्सिनालाई प्रदान गरिएको थियो ।

शब्दयात्रा प्रकाशन काभ्रेपलान्चोक सम्पर्क केन्द्रको आयोजनामा साप्ताहिक रूपमा जुमका माध्यमबाट सञ्चालन हुँदै आएको ‘कर्मयोद्धासँग शब्दसंवाद’ नामक प्रवचन कार्यक्रममा यो साता योगगुरु उद्धवप्रसाद भट्टराईले योग र ध्यानका विषयमा प्रवचन गर्नुभयो । शब्दयात्रा प्रकाशनका संस्थापक अध्यक्ष हरि मञ्जुश्रीको सभापतित्वमा सञ्चालित उक्त कार्यक्रममा प्रवचनपछि सञ्चारकर्मी शिव बन्जारा तथा कवित्रय सुनील सापकोटा, पदम दाहाल र जीवनाथ अधिकारीले योग र ध्यानसम्बन्धी जिज्ञासा राख्नुभएको थियो भने प्रवचनमाथिको टिप्पणी डा. इन्दुल केसीले गर्नुभएको थियो । शब्दयात्रा प्रकाशन काभ्रेपलान्चोक सम्पर्क केन्द्रका संयोजक साधुराम गिरीले उक्त कार्यक्रमको सञ्चालन गर्नुभएको थियो ।

शब्दयात्रा प्रकाशनले आख्यानकार प्रजापति तिमिल्सिनालाई शब्दयात्रा प्रकाशनको आजीवन सदस्यता प्रदान गरेको छ । श्री तिमिल्सिनाले शब्दयात्रा प्रकाशनको आजीवन सदस्यता ग्रहण गर्नुभएकोमा शब्दयात्रा प्रकाशन परिवारले हर्ष व्यक्त गरेको छ र उहाँको ज्ञान र अनुभवबाट लाभान्वित हुन पाउने अपेक्षा पनि प्रकट गरेको छ । उहाँको उपन्यास ‘विधवा वासना’ लाई शब्दयात्रा प्रकाशनले २०७७ सालको ‘शब्दयात्रा भीमभक्तमानसिंह बस्न्यात सिर्जना सम्मान’ समर्पण गरेको थियो । कास्की जिल्लामा जन्मनुभएका उहाँको बसोवास हाल काठमाडौँमा रहेको छ ।