शब्दयात्रा प्रकाशन काभ्रेपलान्चोक सम्पर्क केन्द्रले हरेक हप्ता शुक्रबार बेलुका ७ बजे प्रारम्भ गर्ने गरी नियमित रूपमा जुममार्फत सञ्चालन गरिरहेको ‘कर्मयोद्धासँग शब्दसंवाद’ नामक प्रवचन कार्यक्रम गत शुक्रबार पनि सम्पन्न भयो । कार्यक्रममा पूर्वीय चिकित्साका विज्ञ प्रकाशबहादुर कायस्थ प्रमुख वक्ता हुनुहुन्थ्यो । उहाँले ‘प्राकृतिक चिकित्सा आजको आवश्यकता’ विषयमा प्रवचन गर्नुभएको थियो ।  काभ्रेपलान्चोक सम्पर्क केन्द्रका संयोजक साधुराम गिरीले सञ्चालन तथा अनुसन्धान समितिका संयोजक डा. इन्दुल केसीले सभापतित्व गर्नुभएको उक्त कार्यक्रममा पदम दाहाल, जीवनाथ अधिकारी, सुनील सापकोटा, शिव बन्जारा, पुण्यवती घले, सहदीप पलान्चोके आदिको उपस्थिति रहेको थियो ।

शब्दयात्रा प्रकाशनका सहयोगी मित्र समालोचक प्रा. डा. कुलप्रसाद कोइराला ‘उखान सिद्धान्त र विश्लेषण’ पुस्तकका लागि साझा लोकसाहित्य पुरस्कारबाट र बालसाहित्यकार गोपाल पराजुली ‘पच्चीस प्रतिभा’ पुस्तकका लागि साझा बालसाहित्य पुरस्कारबाट पुरस्कृत हुनुभएको छ । साझा प्रकाशनबाट प्रदान गरिएका दुवै पुरस्कारको रकम पन्ध्र–पन्ध्र हजार रुपियाँ रहेको छ । पुरस्कृत हुनुभएकोमा वाङ्मयसेवी दुवैजनालाई हामी हार्दिक बधाई ज्ञापन गर्दछौँ ।

शब्दयात्रा प्रकाशन परिवार

शब्दयात्रा प्रकाशन भक्तपुर सम्पर्क केन्द्र र प्राञ्जल नेपालको संयुक्त आयोजना तथा छन्द कविता मञ्चको व्यवस्थापनमा नवकवितावाचन कार्यक्रमको छैटौँ शृङ्खला सम्पन्न भएको छ । जुमका माध्यमबाट भएको यस कार्यक्रमको सञ्चालन जीवनाथ अधिकारीले गर्नुभएको थियो । कार्यक्रमको सभापतित्व शब्दयात्रा प्रकाशन भक्तपुर सम्पर्क केन्द्रका संयोजक डिल्लीराम गौतमले र प्रमुख आतिथ्य शब्दयात्रा प्रकाशनका संस्थापक अध्यक्ष हरि मञ्जुश्रीले गर्नुभएको थियो ।
कार्यक्रममा भक्तपुर सम्पर्क केन्द्रका तर्फबाट डा. इन्दुल केसी र पदम दाहालले, काभ्रेपलान्चोक सम्पर्क केन्द्रका तर्फबाट संयोजक साधुराम गिरी, दामोदर घिमिरे र पुण्यवती घलेले, मोरङ सम्पर्क केन्द्रका तर्फबाट संयोजक चेतना अधिकारी र सदस्य भक्ति दाहालले, ललितपुरबाट श्रीराम पौडेल उदासीले, कालिकोटबाट नगेन्द्रप्रसाद आचार्यले तथा टीका श्रेष्ठले आआफ्ना कविताहरू वाचन गर्नुभएको थियो । कार्यक्रममा इ. रोशन मञ्जुश्री अधिकारी, सहदीप पलान्चोके, नानु उप्रेती खरेल आदिको पनि सहभागिता रहेको थियो ।

शब्दयात्रा प्रकाशन काभ्रेपलान्चोक सम्पर्क केन्द्रको आयोजनामा जुमका माध्यमबाट सम्पन्न भएको ‘कर्मयोद्धासँग शब्दसंवाद’ साप्ताहिक प्रवचन कार्यक्रममा यसपटक लेखक तथा पूर्वप्रशासक डा. इन्दुल केसीले प्रवचन गर्नुभएको छ । उहाँले ‘प्राकृतिक चिकित्सा आजको आवश्यकता’ भन्ने विषयमा प्रवचन गर्नुभएको हो । काभ्रेपलान्चोक सम्पर्क केन्द्रका संयोजक साधुराम गिरीले सञ्चालन गर्नुभएको उक्त प्रवचन कार्यक्रमको सभापतित्व शब्दयात्रा प्रकाशनका संस्थापक अध्यक्ष हरि मञ्जुश्रीले गर्नुभएको थियो भने जुम कार्यक्रममा दीपक तिमल्सिना, सहदीप पलान्चोके, शिव बन्जारा, सुनील सापकोटा, पदम दाहाल आदिको सहभागिता रहेको थियो । यो कार्यक्रम हरेक शुक्रबार बेलुका ७ बजेदेखि हुने गरेको छ ।

शब्दयात्रा प्रकाशनका संस्थापक अध्यक्ष हरि मञ्जुश्रीले जैन सम्प्रदायका प्रथम तीर्थङ्कर ऋषभदेव र अन्तिम तीर्थङ्कर महावीर वर्धमानका साथै जैन मुनि भद्रबाहु र स्थूलभद्रका विषयमा प्रवचन गर्नुभएको छ । ऋषभदेव र महावीर दुवैजना नेपाली भूमिपुत्र हुनुभएकाले बौद्ध सम्प्रदायको जस्तै जैन सम्प्रदायको उद्गम पनि नेपाल नै भएको कुरा उहाँले आफ्नो प्रवचनमा उल्लेख गर्नुभएको थियो । यसै गरी उहाँले आफ्नो प्रवचनमा भद्रबाहुले भारतमा जन्मेर पनि नेपाललाई तपस्थली बनाउनुभएको, उहाँले १२ वर्षसम्म हाल खोटाङ जिल्लामा पर्ने हलेसी महादेवस्थानको गुफामा बसेर तपस्या गर्नुभएको र त्यहीँ बसेर आफ्ना शिष्य स्थूलभद्रलाई जैनमतको शिक्षा पनि दिनुभएको थियो भन्ने कुरा पनि उल्लेख गर्नुभएको थियो । ‘सनातन वैदिक विवेचना’ नामक कार्यक्रममा उहाँले हरेक हप्ता नेपाली सन्तहरूका विषयमा प्रवचन गर्ने गर्नुभएको छ ।
स्मरणीय छ — जैन सम्प्रदायका प्रथम तीर्थङ्कर ऋषभदेवको वर्णन भागवतमा पनि गरिएको छ र महावीर वर्धमान मिथिला प्रदेशमा जन्मिएको प्रमाणित भइसकेको छ भने भद्रबाहु र स्थूलभद्रलाई चन्द्रगुप्त मौर्यका समकालीन मुनिका रूपमा मानिन्छ ।

शब्दयात्रा प्रकाशनले १ सय ६९ औँ प्रकाशनपुष्पका रूपमा ‘अशोकचन्द्र धुँजूका लेखहरू’ नामक लेखसङ्ग्रह प्रकाशन गर्ने भएको छ । शब्दयात्रा प्रकाशनद्वारा प्रकाशित ‘नेपालभूमि साप्ताहिक’ लगायतका पत्रिकाहरूमा प्रकाशित भइसकेका लेखहरूको सङ्ग्रहका रूपमा यो पुस्तक प्रकाशन ह्ुन लागेको हो । ‘शब्दसञ्चार’ साप्ताहिक रेडियो कार्यक्रमका प्रस्तोता शिव बन्जाराको सम्पादकत्वमा प्रकाशन हुन लागेको यस पुस्तकमा शिक्षा, स्वास्थ्य, संस्कृति, राजनीति, अर्थ आदि विषयमा लेखक अशोकचन्द्र धुँजूले लेखेका लेखहरू समावेश गरिएका छन् ।

शब्दयात्रा प्रकाशनले काभ्रेपलान्चोक जिल्लामा जन्मेर यसै जिल्लामा पत्रकारिता विषय अध्ययन गर्ने गरिब तथा जेहेन्दार एक छात्रालाई हरेक वर्ष प्रदान गर्ने गरेको ‘शब्दयात्रा द्रोणपुष्प पत्रकारिता छात्रवृत्ति’ यस वर्ष २०७८ सालका लागि काभ्रे बहुमुखी क्याम्पसमा पत्रकारिता विषय लिई स्नातक तह प्रथम वर्षमा अध्ययनरत छात्रा सुश्री रोमिला लुम्बालाई प्रदान गर्ने भएको छ ।
काभ्रे बहुमुखी क्याम्पसले गरेको सिफारिसका आधारमा उहाँलाई शब्दयात्रा द्रोणपुष्प पत्रकारिता छात्रवृत्ति प्रदान गरिने भएको हो । यस छात्रवृत्तिका लागि लेखक तथा पूर्वप्रशासक द्रोणप्रसाद श्रेष्ठले शब्दयात्रा प्रकाशनमा अक्षयकोषको व्यवस्था गर्नुभएको छ । ‘शब्दयात्रा द्रोणपुष्प पत्रकारिता छात्रवृत्ति’ शब्दयात्रा प्रकाशनले यसअघि दुईपटक प्रदान गरिसकेको छ ।

शब्दयात्रा प्रकाशनले २०७८ सालको ‘शब्दयात्रा भरत जङ्गम भक्तपुर प्रतिभा पुरस्कार’ प्रा. कोमलवदन मल्ललाई समर्पण गर्ने भएको छ । प्राथमिक बाल शिक्षा कार्यक्रमका माध्यमबाट नेपालको शिक्षा क्षेत्रमा राष्ट्रिय योगदान गर्नुभएकोमा उहाँलाई पुरस्कृत गर्न लागिएको हो । जीवनको लामो समय शिक्षा क्षेत्रलाई समर्पण गर्नुहुने प्रा. कोमलवदन मल्ल हाल अवकाशप्राप्त जीवन बिताइरहनुभएको छ ।
‘शब्दयात्रा भरत जङ्गम भक्तपुर प्रतिभा पुरस्कार’ पहिलोपटक समर्पण गर्न लागिएको हो । यस पुरस्कारका लागि भ्रष्टाचार निवारण शास्त्रका प्रवर्तक तथा वाङ्मयसेवी भरत जङ्गमले शब्दयात्रा प्रकाशनमा अक्षयकोषको व्यवस्था गर्नुभएको छ ।