Shabdayatra Prakashan

कुनै पनि विधाका माध्यमले राष्ट्रिय स्तरको योगदान गर्ने भक्तपुर जिल्लाका प्रतिभाशाली व्यक्तिलाई शब्दयात्रा प्रकाशनबाट हरेक वर्ष पुरस्कार समर्पण गरिने भएको छ । यसका लागि भ्रष्टविरोधी शास्त्रका प्रणेता तथा अग्रज वाङ्मयसेवी भरत जङ्गमले अक्षयकोषको व्यवस्था गरिदिनुभएको छ । त्यही अक्षयकोषको ब्याजबाट प्राप्त भएको रकम पुरस्कारका लागि खर्च गरिनेछ । पुरस्कारको नाउँ ‘शब्दयात्रा भरत जङ्गम भक्तपुर प्रतिभा पुरस्कार’ राखिएको छ । पुरस्कार यही २०७८ सालदेखि समर्पण गरिनेछ । पुरस्कृत गर्दा रकम, अभिवन्दनापत्र, शब्दयात्रा पट्ट, रुद्राक्षमाला र उपहार समर्पण गरिनेछ ।

शब्दयात्रा प्रकाशनका संस्थापक अध्यक्ष हरि मञ्जुश्रीले सनातन वैदिक विवेचना कार्यक्रम अन्तर्गत प्रवचन गर्ने क्रममा यसपटक निजी क्षेत्रबाट नेपालमा पहिलोपटक सामुदायिक विद्यालय खोल्ने शिक्षासेवी आबाल ब्रह्मचारी षडानन्द अधिकारीसँग सम्बन्धित किंवदन्तीहरूका विषयमा प्रवचन गर्नुभएको छ । उहाँले आफ्नो प्रवचनमा षडानन्द अधिकारीसँग जोडिएका ३५ प्रकारका किंवदन्तीहरूको चर्चा गर्नुभएको थियो । प्रवचनपछि त्यस्ता किंवदन्तीहरूलाई सङ्कलन गरेर पुस्तकका रूपमा प्रकाशन गर्न सके समाज धेरै लाभान्वित हुने थियो भन्ने प्रतिक्रिया प्राप्त भएको थियो । स्मरणीय छ आबाल ब्रह्मचारी षडानन्द अधिकारीको अर्धकदको सालिक शब्दयात्रा प्रकाशनले नेपालका प्रथम शिक्षासेवीका रूपमा बनेपामा स्थापना गरेको छ ।

साहित्यकारद्वय ज्ञान उदास र प्रेमा उदासले आफूले उपहार पाएर तथा खरिद गरेर निजी सङ्कलनमा राखेका महत्त्वपूर्ण र दुर्लभ पुस्तकहरू शब्दयात्रा प्रकाशन पुस्तकालयलाई उपहारस्वरूप प्रदान गर्नुभएको छ । ती पुस्तकहरू साहित्यकार प्रेमा उदासले प्रदान गर्नुभएको थियो भने शब्दयात्रा प्रकाशन पुस्तकालयका तर्फबाट शब्दयात्रा प्रकाशनका आजीवन सदस्य वेदप्रसाद गौतमले ग्रहण गर्नुभएको थियो । शब्दयात्रा प्रकाशनको सभाकक्षमा आयोजित विशेष कार्यक्रममा पुस्तकालयका लागि पुस्तकहरू हस्तान्तरण गरिएको हो । निजी सङ्कलनमा राखेका महत्त्वपूर्ण र दुर्लभ पुस्तकहरू शब्दयात्रा प्रकाशन पुस्तकालयलाई उपहारस्वरूप प्रदान गर्नुभएकोमा साहित्यकारद्वय ज्ञान उदास र प्रेमा उदासप्रति शब्दयात्रा प्रकाशन हार्दिक आभार व्यक्त गर्दछ ।

भक्तपुर जिल्लाको बागमती फार्मेसीले शब्दयात्रा प्रकाशनको आजीवन सदस्यताको प्रमाणपत्र लिएका व्यक्तिहरूका लागि चिकित्सकीय परीक्षण निःशुल्क गरिदिने भएको छ । यसै गरी शब्दयात्रा प्रकाशनको सम्पर्क केन्द्रका संयोजकहरूले सिफारिस गरेका व्यक्तिहरूका लागि हरेक प्रकारका औषधिमा औषधिका आधारमा न्यूनतम १२ प्रतिशतदेखि अधिकतम १५ प्रतिशतसम्म छुट दिई काभ्रेपलान्चोक, भक्तपुर, काठमाडौँ र ललितपुर जिल्लाका सम्पर्क केन्द्रका कार्यालयहरूसम्म हरेक पन्ध्र दिनमा एक दिन औषधि पु¥याइदिने भएको छ ।
शब्दयात्रा प्रकाशन र बागमती फार्मेसीका बीचमा यससम्बन्धी औपचारिक सम्झौतापत्र सम्पन्न भइसकेको छ । शब्दयात्रा प्रकाशनको सभाकक्षमा आयोजित विशेष कार्यक्रममा शब्दयात्रा प्रकाशनका तर्फबाट आजीवन सदस्य अमृत अधिकारीले र बागमती फार्मेसीका तर्फबाट सञ्चालक डा. भास्कर हुमागाईंले यससम्बन्धी सम्झौतापत्रमा हस्ताक्षर गर्नुभएको छ । त्यस बखत शब्दयात्रा प्रकाशनका तर्फबाट संस्थापक अध्यक्ष हरि मञ्जुश्री र बागमती फार्मेसीका तर्फबाट रश्मि हुमागाईं पनि उपस्थित हुनुहुन्थ्यो ।

शब्दयात्रा प्रकाशन काभ्रेपलान्चोक सम्पर्क केन्द्रको आयोजनामा भएको ‘कर्मयोद्धासँग शब्दसंवाद’ नामक साप्ताहिक प्रवचन कार्यक्रममा अग्रज नियात्राकार पोष चापागाईंले नियात्रा साहित्यमा हुनुपर्ने तत्त्वहरूका विषयमा प्रवचन गर्नुभयो । उहाँले यात्रा, नियात्रा, यात्रासंस्मरण जस्ता शब्दहरूले दिने अर्थको भिन्नताको चर्चासमेत गर्नुभयो र यात्रालेखकले ध्यान दिनुपर्ने कुराहरूका विषयमा पनि जानकारी दिनुभयो । जुमका माध्यमबाट सम्पन्न उक्त कार्यक्रममा शब्दयात्रा प्रकाशनका संस्थापक अध्यक्ष हरि मञ्जुश्रीले प्रवाचक पोष चापागाईंको सङ्क्षिप्त चिनारी गराउनुभएको थियो । कार्यक्रममा अग्रज नियात्राकार घनश्याम राजकर्णिकार, डा. इन्दुल केसी, सुनील सापकोटा, गोविन्द चापागाई, बलराम अधिकारी, शिव बन्जारा, पुण्यवती घले, दीपक तिमल्सिना आदिको उपस्थिति रहेको थियो । कार्यक्रमको सञ्चालन काभ्रेपलान्चोक सम्पर्क केन्द्रका संयोजक साधुराम गिरीले गर्नुभएको थियो ।