काभ्रेपलान्चोक जिल्लाका शिक्षासेवी, समाजसेवी, सामूहिक चेतनाका उद्घोषक र उद्बोधक, सामाजिक विकासका पथप्रदर्शक, शैक्षिक व्यवस्थापन कौशलका उदाहरण, शिक्षाको विकास र समाज परिचालकका रूपमा सुपरिचित आदर्श शिक्षक र अनुकरणीय व्यक्तित्व रामप्रसाद अधिकारीको सम्मानस्वरूप हरि मञ्जुश्रीको सम्पादनमा ‘आदर्श शिक्षक’ नामक रामप्रसाद अधिकारी अभिनन्दनग्रन्थ प्रकाशन गरिएको हो । यस ग्रन्थमा उहाँका निकटस्थ व्यक्तिहरूले लेखेका सामग्रीहरूले उहाँको पारिवारिक वातावरणसहितको जीवनको सग्लो चित्रका साथै शैक्षिक, सामाजिक र राजनीतिक क्षेत्रमा उहाँको योगदानका बारेमा जानकारी दिएका छन् ।
