इलामका साहित्यिक प्रतिभा नरनारायण वत्सद्वारा लिखित दोस्रो कवितासङ्ग्रह ‘समयको अन्तराल’ आज २०७९ साल मङ्सिर १८ गते आइतबार गीताजयन्तीका दिन शब्दयात्रा प्रकाशनको सभाकक्षमा आयोजित विशेष कार्यक्रममा सार्वजनिक गरियो । शब्दयात्रा प्रकाशनद्वारा प्रकाशित उक्त पुस्तकलाई आख्यानकार प्रजापति तिमिल्सिना, कवि पदम दाहाल र आध्यात्मिक लेखक ढुण्डिराज पोखरेलले संयुक्त रूपमा सार्वजनिक गर्नुभएको थियो । शब्दयात्रा प्रकाशनका संस्थापक अध्यक्ष हरि मञ्जुश्रीको सभापतित्व र गीतिभास्कर मच्छेश्वर सापकोटाको आतिथ्यमा सम्पन्न उक्त कार्यक्रममा प्रजापति तिमिल्सिनाले कवि नरनारायण वत्सको परिचय गराउँदै कृतिमाथि टिप्पणी गर्नुभएको थियो भने कवि पदम दाहालले ‘समयको अन्तराल’ भित्रको कविता वाचन गर्नुभएको थियो । समाजसेवी कृष्णमणि कुइकेलले मन्तव्य व्यक्त गर्नुभएको र व्यङ्ग्यकवि शारदाप्रसाद शर्माले सञ्चालन गर्नुभएको उक्त कार्यक्रममा ढुण्डिराज पोखरेलले गीताका केही श्लोक तथा प्रकाश उज्ज्वल बनेपा, केदारनाथ तिमल्सिना, साधुराम गिरी, रोशन सत्याल आदिले आआफ्ना कविता वाचन गर्नुभएको थियो । कवि नरनारायण वत्स अमेरिकामा हुनुभएकाले कार्यक्रममा उपस्थित हुन सक्नुभएन । कार्यक्रममा राजनीतिक विश्लेषक अनारसिंह कार्की, हरिगोपाल प्रधान, शिव बन्जारा, इ. रोशन मञ्जुश्री अधिकारी, प्रकृति प्याकुरेल, निर्मला श्रेष्ठ, सङ्गीता केसी, चूडाप्रसाद चौलागाई, दीपकराम भण्डारी, नवराज पराजुली, पुरुषोत्तम हुमागाई, श्री शर्मा मूर्ख, भुवन पाण्डे, लालप्रसाद पौडेललगायतका विद्वतवर्गको समुपस्थिति थियो ।
भरतमणि जङ्गमका विषयमा ‘कालजयी व्यक्तित्व भरत जङ्गम’ नाउँको पहिलो अभिनन्दनग्रन्थ २०६३ साल मङ्सिर १० गते हरि मञ्जुश्रीको सम्पादनमा प्रकाशन भएको थियो । त्यस बेला भरत जङ्गमको नाउँबाट मोती महोत्सव समारोह समिति गठन गरिएको थियो र मोती महोत्सव नेपालमै पहिलोपल्ट भरतमणि जङ्गमको ६० औँ वर्षमा मनाइएको थियो । त्यही समितिबाट प्रकाशित ९ सय ४४ पृष्ठको विशालकाय ग्रन्थको आधारभूमिमा त्यो ग्रन्थ प्रकाशन भएको १६ औँ वर्षमा प्रजापति तिमिल्सिनाले ‘शिरोवर्ती भरत जङ्गम’ नामक प्रस्तुत पुस्तक लेख्नुभएको हो । यस पुस्तकमा ‘कालजयी व्यक्तित्व भरत जङ्गम’ भित्रका पाठ्यसामग्रीहरूको गुणवत्ताका विषयमा प्रभावपरक विवेचना गरिएको छ ।
