Shabdayatra Prakashan

काठमाडौँ विश्वविद्यालयका संस्थापक रजिस्ट्रार, वैज्ञानिक तथा लेखक प्रा. डा. सीताराम अधिकारीले आफ्नी धर्मपत्नी शिक्षासेवी तथा साहित्यकार माधवी अधिकारीको स्मृतिमा कन्या छात्रवृत्तिको व्यवस्था गर्नुभएको छ । काभ्रेपलान्चोक जिल्लाको विद्यालयमा अध्ययन गर्ने गरिब तथा जेहेन्दार छात्रामध्ये एउटी छात्राका लागि उहाँले छात्रवृत्तिको व्यवस्था गर्नुभएको हो । छात्रवृत्ति आगामी २०८० साल वैशाखदेखि शब्दयात्रा प्रकाशनमार्फत प्रदान गरिनेछ । शब्दयात्रा प्रकाशनमार्फत यसबाहेक अन्य दुई छात्रवृत्ति पनि प्रदान गर्ने गरिएको छ । छात्रवृत्तिसम्बन्धी व्यवस्थापनको जिम्मा दिन शब्दयात्रा प्रकाशनलाई पत्यार गर्नुभएकोमा डा. सीताराम अधिकारीप्रति हार्दिक कृतज्ञता ज्ञापन गर्दै उहाँको यस सत्कर्मबाट नारी शिक्षामा जोड दिने माधवी अधिकारीको शिक्षाप्रेमले थप सार्थकता पाउने विश्वास शब्दयात्रा प्रकाशनले व्यक्त गरेको छ ।

कुनै पनि साहित्यकार, पत्रकार र कलाकार आर्थिक सङ्कटका कारणले विपत्तिमा परेको छ भन्ने जानकारी कसैबाट पाएपछि शब्दयात्रा प्रकाशनले यथासम्भव सहयोग गर्ने गरेको छ । त्यसका लागि बैङ्कमा खाता खोलिएको छ । त्यसलाई अक्षरसेवी सहयोग कोष भनिएको छ । त्यस कोषमा विभिन्न महानुभावहरूले सहयोग गर्ने गर्नुभएको छ । आर्थिक सङ्कटमा परेका साहित्यकार, पत्रकार र कलाकारलाई त्यही कोषबाट झिकेर सहयोग गर्ने गरिन्छ । कोषमा भएको रकमका आधारमा न्यूनतम ५ हजार रुपियाँसम्म सहयोग गरिएको छ । त्यस कोषका लागि दोलखाको रुक्मणिराज सिवाकोटी स्मारक कोषका तर्फबाट ५ हजार ५ सय ५५ रुपियाँ प्राप्त भएको छ । त्यो रकम बैङ्कमा रहेको खातामा जम्मा गरिसकिएको छ । यस सहयोगका लागि शब्दयात्रा प्रकाशन परिवारका तर्फबाट रुक्मणिराज सिवाकोटी स्मारक कोषप्रति हार्दिक आभार व्यक्त गर्दछु । 

शब्दयात्रा प्रकाशनबाट यही माघ २७ गते शुक्रबार शान्ता मानवी (अर्घाखाँची), चूडामणि रेग्मी (सङ्खुवासभा), शैलेन्द्र साकार (भोजपुर), डा. कुलप्रसाद कोइराला (ओखलढुङ्गा), विजय चालिसे (काठमाडौँ), डा. रामदयाल राकेश (सर्लाही), मनिराज जोशी (डोटी), शेषराज सिवाकोटी (दोलखा), उद्धवप्रसाद भट्टराई (काभ्रेपलान्चोक) र मीनरत्न बज्राचार्य (काठमाडौँ) लाई सम्मान समर्पण गरिनेछ । शब्दयात्रा प्रकाशनको सभाकक्ष बनेपामा आयोजना गरिने सम्मान समर्पण समारोह दिउँसो १ बजेदेखि ३ बजेसम्म सञ्चालन हुनेछ । त्यसै समारोहमा खेमराज शर्माद्वारा लिखित महाकाव्य ‘माण्डवी’ लाई सार्वजनिक गरिनेछ ।

आज २०७९ साल माघ १९ गते बिहीबार ‘महाकवि देवकोटाका काव्यको अध्ययन’ नामक समालोचनासङ्ग्रहलाई शब्दयात्रा प्रकाशनले सार्वजनिक गरायो । शब्दयात्रा प्रकाशनको सभाकक्षमा आयोजित पुस्तक सार्वजनिकीकरण समारोहमा नेपालका शैक्षिक शिरोभूषण तथा काठमाडौँ विश्वविद्यालयका संस्थापक उपकुलपति डा. सुरेशराज शर्मा, काठमाडौँ विश्वविद्यालयका संस्थापक रजिस्ट्रार तथा शिक्षासेवी डा. सीताराम अधिकारी, वरिष्ठ अधिवक्ता राधेश्याम अधिकारी तथा कृतिकारकी धर्मपत्नी शोभा बरालले संयुक्त रूपमा उक्त पुस्तक सार्वजनिक गर्नुभएको थियो ।
शब्दयात्रा प्रकाशनका अध्यक्ष हरि मञ्जुश्रीको सभापतित्वमा सम्पन्न उक्त समारोहमा डा. सुरेशराज शर्मा र डा. सीताराम अधिकारीले टीकादत्त बरालसँगका संस्मरण र उहाँको योगदानका विषयमा जानकारी गराउनुभएको थियो । सार्वजनिक गरिएको कृतिका विषयमा लेखक मुकुन्दप्रसाद उपाध्यायले र कृतिकारका विषयमा लेखिका निर्मला श्रेष्ठले बोल्नुभएको थियो भने कृतिकारका सुपुत्र माधव बरालले धन्यवाद ज्ञापन गर्नुभएको थियो । आन्तरिक व्यवस्था कृष्णमणि कुइकेल, सकुल थापा, अमृत अधिकारी र सङ्गीता केसीले मिलाउनुभएको थियो भने शारदाप्रसाद शर्माले कार्यक्रमको सञ्चालन र ढुण्डिराज पोखरेलले स्वस्तिवाचन गर्नुभएको थियो ।
‘महाकवि देवकोटाका काव्यको अध्ययन’ टीकादत्त बरालद्वारा लिखित पाँचौँ कृति हो । उक्त कृति शब्दयात्रा प्रकाशनबाट प्रकाशित भएको हो । १९९२ सालमा जन्मेर २०७७ सालमा दिवङ्गत हुनुभएका टीकादत्त बराल शब्दयात्रा प्रकाशन, कुलचन्द्र कोइराला स्मृति प्रतिष्ठान लगायतका संस्थाबाट सम्मानित हुनुभएको थियो ।
कार्यक्रममा पदम दाहाल, डा. इन्दुल केसी, दामोदर घिमिरे, नगेन्द्रप्रसाद आचार्य, केदारनाथ तिमल्सिना, छत्रपति दाहाल, प्रदीप केसी, शिव बन्जारा, शकुन्तला बन्जारा, लालबहादुर भुजेल, चूडाप्रसाद चौलागाई, रामप्रसाद अधिकारी, कृष्ण काश्यप, शिवप्रताप कार्की, तीर्थराज अधिकारी, गोविन्द हुमागाई, शम्भु पोखरेल, नवराज पराजुली, दीपकराम भण्डारी, पुरुषोत्तम हुमागाई, गणेश बडाल, महेश्वर थापा, राममणि अधिकारी, पूर्णबहादुर कर्माचार्य आदिलगायत विभिन्न विद्वान–विदुषीहरूको उपस्थिति थियो ।