Shabdayatra Prakashan

शब्दयात्रा प्रकाशनले हिजो २०८० साल भदौ २ गते शनिबार एकजनालाई सम्मान र एकजनालाई पुरस्कार समर्पण गरेको छ ।
शिक्षार्थीहरूलाई आफ्नो विषयमा शिक्षा दिने क्रममा आत्मानुशासन, नैतिक चरित्र, कर्तव्यबोध, सामाजिक मर्यादा, मानवीय भावना र आध्यात्मिक चेतनाको पनि शिक्षा दिनुका साथै ती विषयमा शिक्षार्थीहरू थप सबल बनून् भन्ने ध्येयले विभिन्न पुस्तकहरूको लेखन–प्रकाशन समेत गर्नुभएकोमा ललितपुरकी प्रा. डा. वीणा पौड्याललाई २०८० सालको शब्दयात्रा अङ्गुरबाबा जोशी शिक्षक सम्मान समर्पण गरिएको हो । सम्मान गर्दा प्रा. डा. कुलप्रसाद कोइरालाले अभिवन्दनापत्र, हरि मञ्जुश्रीले किरीट, रामप्रसाद अधिकारीले भेटी, इस्मालीले उपहार र मच्छेश्वर सापकोटाले रुद्राक्षमाला समर्पण गर्नुभएको थियो । यस सम्मानका कोष व्यवस्थापक धुलिखेलकी शिक्षासेवी निर्मलाकुमारी यगोल श्रेष्ठ हुनुहुन्छ ।
यसै गरी नेपाली राष्ट्रिय परिवेशको भावभूमिमा आञ्चलिकतालाई समेत आधार बनाई विचारशील र राष्ट्रप्रेमयुक्त कथा, उपन्यास र बालकथा विधाका साहित्यिक कृतिहरूको लेखन–प्रकाशन गरेर नेपाली समाजको सकारात्मक रूपान्तरणमा साहित्यका माध्यमबाट महत्त्वपूर्ण भूमिका निर्वाह गर्नुभएकोमा महोत्तरीका कथाकार श्री इस्माली अथवा महेश्वरप्रसाद उपाध्याय पौडेललाई २०८० सालको शब्दयात्रा बद्रीविक्रम थापा महोत्तरी प्रतिभा पुरस्कार समर्पण गरिएको हो । सम्मान गर्दा प्रा. डा. कुलप्रसाद कोइरालाले अभिवन्दनापत्र, हरि मञ्जुश्रीले शब्दयात्रा पट्ट, सुवर्णलता थापाले भेटी, प्रा. डा. वीणा पौड्यालले उपहार र मच्छेश्वर सापकोटाले रुद्राक्षमाला समर्पण गर्नुभएको थियो । यस पुरस्कारको कोष व्यवस्थापक कर्मयोगी बद्रीविक्रम थापा स्मृति सेवागुठी रहेको छ ।
यी सम्मान र पुरस्कारबाट सम्मानित र पुरस्कृत हुनुभएकोमा दुवैलाई हार्दिक बधाई ज्ञापन गर्दै समारोहमा समुपस्थित सहभागीहरूका तर्फबाट सम्मानित तथा पुरस्कृत व्यक्तित्वहरूको कीर्तिपताका निरन्तर फैलिरहोस् भनी शब्दसाधक तीर्थ नीलकण्ठेश्वर धाममा विराजित सम्पूर्ण देवीदेवता र पितृहरूसँग प्रार्थना गरिएको छ । दुवै अभिवन्दनापत्रको वाचन नवराज तिमल्सिनाले गर्नुभएको थियो ।

शब्दयात्रा प्रकाशनले कर्मयोगी बद्रीविक्रम थापा स्मृति सेवागुठीको सहयोगमा ‘कर्मयोगी बद्रीविक्रम थापा’ विषयक कवितागोष्ठी सम्पन्न गरेको छ । गोष्ठीमा सकुल थापा, केशव रूपाखेती, रश्मि हुमागाई, चन्द्रबहादुर खड्का, सहदीप पलान्चोके, लक्ष्मी बडाल, प्रकाश उज्ज्वल बनेपा, ढुण्डिराज पोखरेल, कालिका त्रिपाठी पन्त, जयनारायण नेपाल, गोविन्दबहादुर खड्का, केदारनाथ तिमल्सिना, शारदा घिमिरे भैल, सोमकाजी शाक्य, लालबहादुर भुजेल, छत्रपति दाहाल, पदम दाहाल, शारदाप्रसाद शर्मा, दामोदर घिमिरे, जयराम श्रेष्ठ र लीलादेवी श्रेष्ठ गरी २१ जनाले आआफ्ना कविता वाचन गर्नुभएको थियो । उपस्थित कविहरूलाई शब्दयात्रा प्रकाशनका तर्फबाट भाषासेवी प्रा. डा. नन्दीश अधिकारीले रुद्राक्षमाला, उपहार र आभारपत्र समर्पण गर्नुभएको थियो ।

शब्दयात्रा प्रकाशनको आयोजनामा आज २०८० साल भदौ २ गते शनिबार सम्मान तथा पुरस्कार समर्पण तथा कविता वाचन कार्यक्रम सम्पन्न गरियो । शब्दयात्रा प्रकाशनको सभाकक्षमा संस्थापक अध्यक्ष हरि मञ्जुश्रीको सभापतित्व र नेपाल संस्कृत विश्वविद्यालयका उपकुलपति प्रा. डा. कुलप्रसाद कोइरालाको प्रमुख आतिथ्य तथा प्रा. डा. नन्दीश अधिकारी र डा. रेखा यादवको आतिथ्य रहेको आजको कार्यक्रममा २०८० सालको शब्दयात्रा अङ्गुरबाबा जोशी शिक्षक सम्मान प्रा. डा. वीणा पौड्याललाई र शब्दयात्रा बद्रीविक्रम थापा महोत्तरी प्रतिभा पुरस्कार कथाकार श्री इस्मालीलाई समर्पण गरियो । आजकै कार्यक्रममा विभिन्न कविहरूले कर्मयोगी बद्रीविक्रम थापा विषयक कविताहरूको वाचन गर्नुभयो । पूर्वप्रशासक तथा लेखक शङ्करनारायण मानन्धरले कार्यक्रमको शुभारम्भ र कृष्णमणि कुइकेलले स्वागत भाषण गर्नुभएको आजको कार्यक्रममा चयन समितिका संयोजक गीतिभास्कर मच्छेश्वर सापकोटाले सम्मानित तथा पुरस्ृत व्यक्तित्वको चिनारी गराउनुभएको थियो भने कार्यक्रमको सञ्चालन शिव बन्जाराले गर्नुभएको थियो ।

शब्दयात्रा प्रकाशनले आगामी असोज महिनामा ७ विधाका सम्मान समर्पण गर्नुपर्नेछ — १. आध्यात्मिक पत्रकारिता सम्मान, २. आध्यात्मिक संस्था सम्मान, ३. साहित्यिक पत्रिका सम्मान, ४. स्तम्भकार सम्मान, ५. फोटो पत्रकारिता सम्मान, ६. महिला प्रतिभा सम्मान, ७. आयुर्वेद सम्मान ।

शब्दयात्रा प्रकाशनले २०८० सालको ‘शब्दयात्रा बद्रीविक्रम थापा महोत्तरी प्रतिभा पुरस्कार’ कथाकार इस्माली (महेश्वरप्रसाद उपाध्याय पौडेल) मा समर्पण गर्ने भएको छ । गीतिभास्कर मच्छेश्वर सापकोटाको संयोजकत्वमा गठित ‘पुरस्करणीय व्यक्तित्व चयन समिति’ ले उहाँलाई उक्त पुरस्कार समर्पण गर्ने निर्णय गरेको हो । महोत्तरी जिल्लाको औरहीमा २०१२ साल जेठमा जन्मनुभएका कथाकार इस्माली लामो समयसम्म त्रिभुवन विश्वविद्यालयमा प्राध्यापन गरी हाल निवृत्त जीवन बिताइरहनुभएको छ । उहाँले नेपाली भाषामा कथा, उपन्यास र बालकथाका विभिन्न पुस्तकहरू लेख्नुभएको छ । उहाँमा पुरस्कार समर्पण गर्दा २५ हजार रुपियाँ, अभिवन्दनापत्र, शब्दयात्रा पट्ट, उपहार र रुद्राक्षमाला समर्पण गरिनेछ । कर्मयोगी बद्रीविक्रम थापा स्मृति सेवागुठीको कोष व्यवस्थापनमा हरेक वर्ष समर्पण गर्ने गरी शब्दयात्रा प्रकाशनमा स्थापना गरिएको यो पुरस्कार पहिलोपटक उहाँमा समर्पण गर्न लागिएको हो । पुरस्कार ग्रहण गर्न स्वीकृति दिनुभएकोमा उहाँप्रति शब्दयात्रा प्रकाशन हार्दिक आभार व्यक्त गर्दछ ।

अग्रज समाजसेवी तथा लेखिका सावित्री जङ्गम थापाको उपस्थितिमा बसेको ‘शब्दयात्रा सावित्री जङ्गम थापा अध्ययन–अनुसन्धान कक्ष सञ्चालन उपसमिति’ को बैठकले शब्दयात्रा प्रकाशनका आजीवन सदस्यद्वय कालिका त्रिपाठी पन्त र शारदा घिमिरे भैललाई सदस्य मनोनयन गरेको छ । उपसमितिका संयोजक भावना थापाको अध्यक्षतामा बसेको बैठकले उहाँहरूलाई सदस्यमा मनोनयन गरेपछि उपसमिति पाँच सदस्यीय बनेको छ । यसअघि सदस्यमा प्रदीप केसी र निर्मला श्रेष्ठ मात्र सदस्य हुनुहुन्थ्यो । सावित्री जङ्गम थापाका विषयमा अनुसन्धान गराउन, विद्वतवृत्तिको व्यवस्था गर्न तथा उहाँका कृतिहरू र उहाँका विषयमा गरिएका अनुसन्धानहरूको प्रकाशन तथा बिक्री–वितरण गर्ने व्यवस्था मिलाउन शब्दयात्रा प्रकाशनले उक्त उपसमितिको गठन गरेको थियो । उपसमितिको निर्देशिकामा भएको व्यवस्था अनुसार उपसिमितिको बैठकले दुईजना सदस्य थपेको हो । सदस्यमा मनोनीत हुनुभएकोमा कालिका त्रिपाठी पन्त र शारदा घिमिरे भैललाई हार्दिक बधाई छ ।