शब्दयात्रा प्रकाशनले नेपालको गीत–सङ्गीतका क्षेत्रमा नयाँ प्रतिभाको खोजी गर्न, नयाँ प्रतिभालाई उचाइ दिएर स्थापित गराउन, लोकदोहोरी गीत र गायकीलाई जनजनमा विस्तार गराउन, सामाजिक जीवन र लोकसंस्कृतिलाई गीत–सङ्गीतका माध्यमबाट प्रवर्द्धन गराउन, नेपाली जनजीवनका बारेमा राष्ट्रिय तथा अन्तर्राष्ट्रिय समुदायलाई जानकारी दिलाउन र सङ्कटमा परेका प्रतिभाशाली व्यक्तिहरूलाई सङ्कटबाट यथासम्भव मुक्त गराउन खेल्नुभएको अहम् भूमिकाका लागि कृष्ण कँडेललाई ‘शब्दयात्रा विशेष सम्मान, २०८१’ समर्पण गरेको छ । शब्दयात्रा प्रकाशनले स्थापनाको १२ वर्ष पूरा गरेको अवसर पारी उहाँलाई विशेष सम्मान समर्पण गरेको हो । सम्मान समर्पण गर्दा हरि मञ्जुश्रीले पुष्पमाला, गीता अधिकारीले रुद्राक्षमाला, मच्छेश्वर सापकोटाले उपहार र प्रा. रामकुमार पाँडेले सम्मानपत्र समर्पण गर्नुभएको थियो ।

महात्मा सुशीललाई २०८१ सालको ‘शब्दयात्रा नारायणी–शङ्कर राष्ट्रिय योगप्रतिभा पुरस्कार’ समर्पण गरिएको छ । पूर्वीय पद्धतिका रूपमा सुपरिचित पाशुपत योग नामक योगशिक्षाको प्रयोगकर्ता बनेर मानव जीवनलाई सार्थक बनाउने हेतुले पाशुपत योगपद्धतिलाई नेपालभित्र र नेपालबाहिरका विभिन्न स्थानहरूमा प्रचार र प्रयोग गर्न–गराउन व्यक्तिगत र संस्थागत रूपबाट विशिष्ट योगदान गर्नुभएकोमा उहाँलाई २५ हजार रुपियाँ, अभिवन्दनापत्र, शब्दयात्रा पट्ट, उपहार र रुद्राक्षमालासहित उक्त पुरस्कार समर्पण गरिएको हो । हरेक वर्ष समर्पण गरिने यस पुरस्कारका लागि शिक्षासेवी शङ्करप्रसाद मानन्धरले कोषको व्यवस्थापन गर्नुभएको छ । पुरस्कार समर्पण गर्दा प्रा. रामकुमार पाँडेले अभिवन्दनापत्र, राप्रउ पोखरेलले शब्दयात्रा पट्ट, शङ्करप्रसाद मानन्धरले उपहार र भेटी तथा केदारनाथ तिमल्सिनाले रुद्राक्षमाला समर्पण गर्नुभएको थियो ।

साहित्यकार खेमराज शर्माद्वारा लिखित आठौँ कृति ‘सय पाइला पैले’ (उपन्यास) लाई शब्दयात्रा प्रकाशनले सार्वजनिक गराएको छ । उक्त उपन्यास प्रा. केदारनाथ श्रेष्ठले सार्वजनिक गर्नुभएको हो । त्यस बखत वटुकहरूले शङ्खध्वनि गरेका थिए भने उद्घोषकबाट पुर्खाका सङ्घर्षहरूलाई सम्मान गरौँ भन्ने ध्वनि उच्चारण गरिएको थियो । पुस्तकको चिनारी साहित्यकार कालिका त्रिपाठी पन्तले गराउनुभएको थियो । उपन्यासकार खेमराज शर्मा आफ्नै गृहजिल्ला रोल्पामा हुनुभएकाले उहाँ कार्यक्रममा उपस्थित हुन सक्नुभएको थिएन ।

शब्दयात्रा प्रकाशनले नेपालको लोकदोहोरी गीतलाई विषयवस्तु बनाई कोलम्बिया विश्वविद्यालयबाट विद्यावारिधि गर्नुभएकी डा. आना स्टरलाई ‘शब्दयात्रा विशेष सम्मान, २०८१’ आज साउन १९ गते समर्पण गरेको छ । उहाँ नेपाली भाषामा लोकदोहोरी गाउने गायिका पनि हुनुहुन्छ । उहाँले नेपाली गीत–सङ्गीत, सामाजिक जीवन, लोकसंस्कृति आदिका विषयमा अङ्ग्रेजी भाषामा लेखहरू लेखी अन्तर्राष्ट्रिय पत्रिकाहरूमा प्रकाशित गराउनुभएको छ । उहाँले नेपाली जनजीवनका बारेमा लेख्नुभएको कृति अक्सफोर्ड युनिभर्सिटी प्रेसबाट छापिएको छ । हवाई विश्वविद्यालयमा एसियन स्टडिज विषय पढाउने एसोसिएट प्रोफेसर तथा दक्षिण एसियाली अध्ययन केन्द्रका निर्देशक अमेरिकी नागरिक डा. आना स्टरलाई नेपाली वाङ्मयका क्षेत्रमा गर्नुभएको यिनै योगदानको कदरस्वरूप शब्दयात्रा प्रकाशनले स्थापनाको १२ वर्ष पूरा गरेको अवसर पारी सम्मान गरेको हो ।

शब्दयात्रा प्रकाशनका संस्थापक अध्यक्ष हरि मञ्जुश्रीको १३७ औं पुस्तक ‘किसुनजी’ (कृष्णप्रसाद भट्टराई स्मृतिग्रन्थ) र उहाँले नै सम्पादन गर्नुभएको ‘सेवा नेपाल’ (वार्षिक मुखपत्र) यही साउन ११ गते शुक्रबार कर्मयोगी बद्रीविक्रम थापा स्मृति सेवा गुठीद्वारा नेपाल प्रज्ञाप्रतिष्ठानमा आयोजित वार्षिक कार्यक्रममा सार्वजनिक गरियो । दिव्य शताब्दी पुरुष डा. गौरीशङ्करलाल दासको प्रमुख आतिथ्य, वर्तमान मन्त्री शरदसिंह भण्डारी र पूर्वमन्त्री नवराज सुवेदीको विशेष आतिथ्य तथा शैक्षिक शिरोभूषण डा. सुरेशराज शर्माको सभापतित्वमा सम्पन्न आजको समारोहमा उल्लिखित दुवै पुस्तक उहाँहरू चारैजनाले संयुक्त रूपमा सार्वजनिक गर्नुभएको थियो । सम्पादकका रूपबाट हरि मञ्जुश्रीले ‘किसुनजी’ पुस्तक र ‘सेवा नेपाल’ मुखपत्रका विषयमा सङ्क्षिप्त जानकारी दिनुभएको थियो । ‘किसुनजी’ ४१६ पृष्ठको छ र मूल्य ६०० रुपियाँ राखिएको छ । यसमा कृष्णप्रसाद भट्टराईका विषयमा नेपाली र अङ्ग्रेजी भाषामा लेखिएका १०४ वटा लेख–संस्मरण राखिएका छन् । कार्यक्रममा शब्दयात्रा प्रकाशनका तर्फबाट सकुल थापा, मच्छेश्वर सापकोटा, जीवन थापा, शिव बन्जारा, डा. इन्दुल केसी, पदम दाहाल, जयनारायण नेपाल, श्रीराम पौडेल उदासी आदि उपस्थित हुनुहुन्थ्यो ।

शब्दयात्रा प्रकाशनमा शिक्षासेवी तथा साहित्यकार माधवी अधिकारीको नाउँबाट ‘शब्दयात्रा माधवी अधिकारी छात्रवृत्ति’ का लागि अक्षयकोष खडा गरिने भएको छ । शब्दयात्रा प्रकाशनबाट २०८० साल वैशाखदेखि मासिक रूपमा ‘शब्दयात्रा माधवी अधिकारी छात्रवृत्ति’ प्रदान गरिरहे पनि त्यसका लागि छुट्टै कोषको व्यवस्था गरिएको थिएन । काभ्रेपलान्चोक जिल्लाको विद्यालयमा अध्ययन गर्ने गरिब तथा जेहेन्दार छात्रामध्ये एउटी छात्राका लागि यस छात्रवृत्तिको व्यवस्था गरिएको थियो । अहिलेचाहिँ त्यही छात्रवृत्तिलाई दीर्घकालसम्म निरन्तरता दिनका लागि अक्षयकोष खडा गरिने भएको हो । माधवी अधिकारीको नाउँ रहने यो अक्षयकोष हालका लागि २ लाख रुपियाँबाट प्रारम्भ गरिनेछ । माधवी अधिकारी काठमाडौँको टेङ्गलटोलमा इन्द्रमञ्जरी र लक्ष्मीप्रसाद भट्टराईकी सुपुत्री भई २००४ सालमा जन्मनुभएको थियो । उहाँ साहित्यकार तथा शिक्षासेवी हुनुहुन्थ्यो । उहाँका ‘ॐ नमः शिवाय’, ‘महालक्ष्मी तथा रुद्राष्टकम्’, ‘अनुभवको स्पन्दन’, ‘अभिव्यक्ति नै अभिव्यक्ति’ र ‘हाकिमसाहेब’ नामका कृतिहरू प्रकाशित छन् । उहाँले लामो समयसम्म शिक्षिका भई सेवा गर्नुभएको थियो र राष्ट्रिय शिक्षा पुरस्कार पनि प्राप्त गर्नुभएको थियो । उहाँ नारी शिक्षामा जोड दिनुहुन्थ्यो । उहाँको निधन २०६६ सालमा भएको थियो । काभ्रेपलान्चोक जिल्लाको विद्यालयमा अध्ययन गर्ने गरिब तथा जेहेन्दार छात्रालाई उहाँको नाउँबाट छात्रवृत्ति दिने यस सत्कर्मले गर्दा उहाँको शिक्षाप्रेमले थप सार्थकता पाउने विश्वास गरिएको छ । यहाँ राखिएको तस्बिर शिक्षासेवी तथा साहित्यकार माधवी अधिकारीको हो ।

शब्दयात्रा प्रकाशनले यही साउन १९ गते शनिबार पुरस्कार समर्पण समारोहको आयोजना गर्ने भएको छ । उक्त कार्यक्रममा प्रोल्लास सिन्धुलीयलाई सिन्धुली प्रतिभा पुरस्कार, राप्रउ पोखरेललाई महोत्तरी प्रतिभा पुरस्कार, महात्मा सुशीललाई राष्ट्रिय योगप्रतिभा पुरस्कार, ललिता दोषी र सरस्वती सापकोटालाई रणलक्ष्मी राष्ट्रिय प्रतिभा पुरस्कार, सुमित्रा चौलागाईं (सुमी मानव) लाई दूरदर्शी नेतृत्व पुरस्कार र प्रेमकण्ठ माकजू श्रेष्ठलाई उद्यमशीलता पुरस्कार समर्पण गरिनेछ । कार्यक्रम शब्दयात्रा प्रकाशनको सभाकक्ष शब्दसाधक तीर्थ बनेपामा दिउँसो १ बजे सुरु हुनेछ ।

शब्दयात्रा प्रकाशनको आयोजनामा हिजो साउन २ गते बुधबार हरिशयनी एकादशीका दिन पूर्णप्रसाद ब्राह्मणको १०२ औँ जन्मजयन्ती मनाइयो । अग्रज पत्रकार बलदेव थापाको प्रमुख आतिथ्य, गीतिभास्कर मच्छेश्वर सापकोटाको आतिथ्य र कवि पदम दाहालको सभापतित्वमा शब्दयात्रा प्रकाशनका संस्थापक अध्यक्ष हरि मञ्जुश्रीद्वारा सञ्चालित उक्त कार्यक्रमको समुद्घाटन पानसमा दीप प्रज्ज्वलन गरेर डा. छत्रपति दाहालले गर्नुभएको थियो । स्वागत भाषण कृष्णमणि कुइकेलले र प्रमुख अतिथिलाई शब्दयात्रा प्रकाशनका तर्फबाट उपहार समर्पण सहदीप पलान्चोकेले गर्नुभएको उक्त कार्यक्रममा हरि मञ्जुश्रीले पूर्णप्रसाद ब्राह्मणका बारेमा विस्तृत जानकारी गराउनुभएको थियो भने डा. इन्दुल केसीले पूर्णप्रसाद ब्राह्मण प्रमुख निर्वाचन आयुक्त हुँदाको प्रसङ्ग सुनाउनुभएको थियो । उपस्थित महानुभावहरूले पूर्णप्रसाद ब्राह्मणको तस्बिरमा पुष्पार्पण गर्नुभएको थियो । स्मरणीय छ — पूर्णप्रसाद ब्राह्मणको जन्म १९७९ असार शुक्ल एकादशीमा र निधन २०४६ जेठ शुक्ल एकादशीमा भएको थियो । उहाँ संस्कृत साहित्यका चौथो महाकवि, खण्डकाव्यकार र अनुवादक, नेपाली साहित्यका कवि, खण्डकाव्यकार, प्रथम लघुकथाकार, कथाकार र उपन्यासकार, जयतु संस्कृतम् आन्दोलनका प्रमुखका रूपमा पहिलो विद्यार्थी नेता, राष्ट्रिय जनता पार्टीका संस्थापक अध्यक्ष, राजसभा स्थायी समितिका सदस्य, राष्ट्रिय निर्देशन परिषदका सदस्य–सचिव र प्रमुख निर्वाचन आयुक्त, ब्राह्मणले पनि हलो जोत्न हुन्छ भनेर हलो क्रान्ति सुरु गर्ने नायक, पूर्वमीमांसा विषयमा सर्वोत्कृष्ट भएर पदक पाउने पहिलो विद्यार्थी, नेपाल राष्ट्रिय विद्यापीठका उपकुलपति र पहिलोपटक नेपालमा हिन्दू सम्मेलन गराउने हिन्दूसेवक हुनुहुन्थ्यो ।