Shabdayatra Prakashan

साहित्यकार प्रोल्लास सिन्धुलीय (सिन्धुली) लाई ‘शब्दयात्रा जीवनचन्द्र कोइराला सिन्धुली प्रतिभा पुरस्कार, २०८१’ समर्पण गरिने भएको छ । यस पुरस्कारका लागि विभिन्न महानुभावहरूको सहयोग लिएर शब्दयात्रा प्रकाशनमा अक्षयकोषको व्यवस्था गरिएको छ । पुरस्कार आगामी साउन महिनामा समर्पण गरिनेछ । पुरस्कार ग्रहण गर्न स्वीकृति प्रदान गर्नुभएकोमा कवि प्रोल्लास सिन्धुलीयप्रति शब्दयात्रा प्रकाशन परिवार हार्दिक आभार व्यक्त गर्दछ ।

लेखक राप्रउ पोखरेल (रामजीप्रसाद उपाध्याय पोखरेल, बिजलपुरा, बर्दिबास, महोत्तरी) लाई ‘शब्दयात्रा बद्रीविक्रम थापा महोत्तरी प्रतिभा पुरस्कार, २०८१’ समर्पण गरिने भएको छ । यस पुरस्कारका लागि कर्मयोगी बद्रीविक्रम थापा स्मृति सेवा गुठीले कोषको व्यवस्था गरिदिएको छ । पुरस्कार आगामी साउन महिनामा समर्पण गरिनेछ । पुरस्कार ग्रहण गर्न स्वीकृति प्रदान गर्नुभएकोमा साहित्यकार राप्रउ पोखरेलप्रति शब्दयात्रा प्रकाशन परिवार हार्दिक आभार व्यक्त गर्दछ ।

शब्दयात्रा प्रकाशनले २०८१ सालको ‘शब्दयात्रा दिव्यवती — कान्तुप्रसाद ढुङ्गाना छात्रवृत्ति’ काभ्रेपलान्चोक जिल्लाका गरिब तथा जेहेन्दार १० जना विद्यार्थीलाई प्रदान गर्ने भएको छ । विद्यार्थीहरू कक्षा १ देखि १० सम्मका छन् । गरिब तथा जेहेन्दार विद्यार्थीहरूको नाउँ सम्बन्धित विद्यालयले नै सिफारिस गरेको हुनाले त्यसैका आधारमा विद्यार्थीहरूलाई छात्रवृत्ति प्रदान गरिने भएको हो । शब्दयात्रा प्रकाशनबाट २०८१ सालको शब्दयात्रा दिव्यवती — कान्तुप्रसाद ढुङ्गाना छात्रवृत्ति पाउने विद्यार्थीहरू बालआदर्श माध्यमिक विद्यालय खोपासीमा अध्ययनरत अङ्कुश गुप्ता (कक्षा १), राजेश तामाङ (कक्षा २) र चमेली तामाङ (कक्षा ३), आजाद माध्यमिक विद्यालय बनेपामा अध्ययनरत सुदीप तामाङ (कक्षा ४), अमित बुढाथोकी (कक्षा ५) र एसिका धमला (कक्षा ६), चण्डेश्वरी सृष्टिकान्त माध्यमिक विद्यालय नालामा अध्ययनरत मिलन वाइबा (कक्षा ७) र सङ्गीता घिसिङ (कक्षा ८) तथा शिक्षासदन माध्यमिक विद्यालय बनेपामा अध्ययनरत सलिना अन्सारी (कक्षा ९) र विशाल परियार (कक्षा १०) रहेका छन् । यस छात्रवृत्तिका लागि आवश्यक रकम आफ्ना मातापिताको स्मृति र सम्मानमा काठमाडौँको चाबहिल शान्तिगोरेटो निवासी शेखरप्रसाद ढुङ्गानाले उपलब्ध गराउनुभएको हो ।