ललितपुर जिल्लामा जन्मिएका वा ललितपुर जिल्लालाई कार्यस्थल बनाएका प्रतिभाशाली व्यक्तिलाई पुरस्कार समर्पण गर्ने गरी प्रा. डा. मुकेश–जनक चालिसेले शब्दयात्रा प्रकाशनमा हालका लागि दुई लाख रुपियाँको अक्षयकोष खडा गर्नुभएको छ । पुरस्कारको नाउँ ‘शब्दयात्रा क्याप्टेन टीकाराम–रामेश्वरी चालिसे ललितपुर प्रतिभा पुरस्कार’ राखिएको छ । यो पुरस्कार संस्कृति, वन्यजन्तु, वातावरण, विज्ञान–प्रविधि, खेलकुद जस्ता विधामा अध्ययन–अनुसन्धान तथा प्रकाशनका माध्यमबाट राष्ट्रिय स्तरको योगदान गर्ने एक व्यक्तिलाई हरेक वर्ष अलग–अलग विधामा समर्पण गरिनेछ । यही २०८१ सालदेखि यो पुरस्कार समर्पण गरिने भएकाले त्यसका लागि उहाँले पहिलो वर्षका लागि छुट्टै रकम उपलब्ध गराउनुभएको छ । शब्दयात्रा प्रकाशनबाट आफ्नो जिल्लाका प्रतिभालाई पुरस्कृत गर्न हजुरबुबा–हजुरआमाको नाउँमा पुरस्कारका लागि अक्षयकोष खडा गर्नुभएकोमा प्रा. डा. मुकेश–जनक चालिसेप्रति शब्दयात्रा प्रकाशन परिवार हार्दिक आभार व्यक्त गर्दछ ।
क्यान्सरपीडित कविलाई इ. रोशन मञ्जुश्रीबाट सहयोग
क्यान्सरपीडित कवि नवराज न्यौपानेलाई ५ सय रुपियाँ मूल्यको उहाँको कवितासङ्ग्रह (सपनाका लहरहरू — तेस्रो भाग) १० प्रति ५ हजार रुपियाँमा किनिदिएर शब्दयात्रा प्रकाशनका आजीवन सदस्य सफ्टवेयर इन्जिनियर रोशन मञ्जुश्री अधिकारीले सहयोग गर्नुभएको छ । त्यत्तिकै आर्थिक सहयोग नलिने, सहयोग गर्न चाहेमा पुस्तक किनिदिनुपर्ने भनाइ कविका परिवारजनबाट आएको हुनाले शब्दयात्रा प्रकाशनको अक्षरसेवी सहयोग कोषको रकम खर्च नहोस् भनेर उहाँले आफ्नै खर्चमा पुस्तक किनिदिनुभएको हो । ती पुस्तकहरू उहाँले सम्मान समर्पण समारोहमा सम्मानित ७ जनालाई ७ प्रति र शब्दयात्रा प्रकाशन पुस्तकालयका लागि ३ प्रति प्रदान गर्नुभएको छ । यस्तो उदार सहयोगका लागि सफ्टवेयर इन्जिनियर रोशन मञ्जुश्री अधिकारीप्रति शब्दयात्रा प्रकाशन परिवार हार्दिक आभार व्यक्त गर्दछ ।
‘व्यथाको कथा’ सार्वजनिक
साहित्यसर्जक तथा शब्दयात्रा प्रकाशनका आजीवन सदस्य लीलादेवी श्रेष्ठद्वारा लिखित कथासङ्ग्रह ‘व्यथाको कथा’ सार्वजनिक गरिएको छ । पाँचवटा कथाको सङ्ग्रह ‘व्यथाको कथा’ लाई कथाकार लीलादेवी श्रेष्ठ तथा लेखिकाहरू लक्ष्मी पोखरेल, निर्मला श्रेष्ठ, पुण्यवती घले र कालिका त्रिपाठी पन्तले संयुक्त रूपमा सार्वजनिक गर्नुभएको हो । कथासङ्ग्रहमाथि गीतिभास्कर तथा लेखक मच्छेश्वर सापकोटाले परिचयात्मक टिप्पणी गर्नुभएको थियो । लीलादेवी श्रेष्ठको यो तेस्रो कृति हो । यसअघि उहाँले ‘जिन्दगीका डोबहरू’ नामक कवितासङ्ग्रह र ‘अठोट’ नामक नाटक प्रकाशन गराइसक्नुभएको छ । उहाँ शब्दयात्रा प्रा. केदारनाथ–लीला श्रेष्ठ सङ्खुवासभा प्रतिभा पुरस्कारका कोष व्यवस्थापक हुनुहुन्छ ।
‘ॐ खं ब्रह्म’ आध्यात्मिक गान सार्वजनिक
शब्दयात्रा प्रकाशनका संस्थापक अध्यक्ष हरि मञ्जुश्रीद्वारा लिखित, सङ्गीतबद्ध र स्वरबद्ध आध्यात्मिक गान ‘ॐ खं ब्रह्म’ सार्वजनिक गरिएको छ । गानका वाद्यसंयोजक बालकृष्ण सेवाचार्यले उक्त गान सार्वजनिक गर्नुभएको हो । त्यस बखत उहाँले हरि मञ्जुश्री र आध्यात्मिक गानका बारेमा आफ्ना अनुभव र अनुभूतिहरू पनि व्यक्त गर्नुभयो । ‘ॐ खं ब्रह्म’ हरि मञ्जुश्रीको छैटौँ साङ्गीतिक सिर्जना हो । यसमा सफ्टवेयर इन्जिनियर रोशन मञ्जुश्री अधिकारीको पनि स्वर रहेको छ । गानका सुपरिवेक्षक गीतिभास्कर मच्छेश्वर सापकोटा हुनुहुन्छ ।
सम्मान कार्यक्रम जेठ २६ गते
शब्दयात्रा प्रकाशनले २०८१ सालको प्रथम चरणको सम्मान समर्पण समारोह यही जेठ २६ गते शनिबार आयोजना गर्ने भएको छ । शब्दयात्रा प्रकाशनको सभाकक्ष बनेपामा आयोजना गरिने उक्त समारोहमा विज्ञान–प्रविधि सम्मान प्रा. डा. मुकेशकुमार चालिसे (ललितपुर) मा, सामाजिक जागरण सम्मान किरण थापा (सिन्धुली) मा, सिर्जना सम्मान सिर्जना खनाल (रूपन्देही) मा, शिक्षक सम्मान किरण पौडेल आचार्य (बाँके) मा, शिक्षा सम्मान सुवास तामाङ (भोजपुर) मा, शोध सम्मान चूडाप्रसाद चौलागाईं (काभ्रेपलान्चोक) मा र आयुर्वेद सम्मान रामलाल श्रेष्ठ (काठमाडौँ) मा समर्पण गरिनेछ । समारोह दिउँसो ठीक १ बजे प्रारम्भ गरिनेछ ।
तन्ना प्रदान
शब्दयात्रा प्रकाशनका आजीवन सदस्य, कोष व्यवस्थापक तथा लेखिका लीलादेवी श्रेष्ठले शब्दसाधक अतिथिगृहका लागि दुई थान तन्ना सहयोगस्वरूप प्रदान गर्नुभएको छ । अतिथिगृहका तर्फबाट दुवै तन्ना शब्दयात्रा प्रकाशनका जग्गादाता कृष्णमणि कुइकेलले ग्रहण गर्नुभएको छ । तन्ना सहयोग गर्नुभएकोमा लीलादेवी श्रेष्ठप्रति शब्दयात्रा प्रकाशन परिवार हार्दिक आभार व्यक्त गर्दछ । उहाँले यसअघि पनि शब्दसाधक अतिथिगृहका लागि एक थान टेलिभिजन प्रदान गर्नुभएको थियो ।
शब्दयात्रा प्रकाशन १३ औँ वर्षमा प्रवेश
शब्दयात्रा प्रकाशन जेठ १५ गतेदेखि १३ औँ वर्षमा प्रवेश गरेको छ । त्यस अवसरमा शब्दयात्रा प्रकाशनले हिजो विशेष कार्यक्रमको आयोजना गरेको थियो । संस्थापक तथा अध्यक्ष हरि मञ्जुश्रीद्वारा सञ्चालित उक्त कार्यक्रमको सभापतित्व शब्दयात्रा प्रकाशनका जग्गादाता कृष्णमणि कुइकेलकी आमा धनकुमारी कुइकेल, प्रमुख अतिथि १८ पुराणका नेपाली अनुवादक डा. बद्री पोखरेल र विशेष अतिथि गीतिभास्कर मच्छेश्वर सापकोटा हुनुहुन्थ्यो । त्यस कार्यक्रममा शब्दसाधक अतिथिगृहको समुद्घाटन र शिलाभिलेखको अनावरण गरिएको थियो । शब्दयात्रा प्रकाशनका ज्येष्ठ सदस्य प्रा. केदारनाथ श्रेष्ठले पानसमा दीप प्रज्ज्वलन गरेर शुभारम्भ गर्नुभएको उक्त कार्यक्रममा संस्थापक सदस्य सकुल थापाले स्वागत मन्तव्य व्यक्त गर्नुभएको थियो भने आजीवन सदस्यद्वय हरिगोपाल प्रधान र केदारनाथ तिमल्सिनाले रुद्राक्षमाला र पुष्पमाला अर्पण गर्नुभएको थियो । कार्यक्रममा आजीवन सदस्य जयनारायण नेपालले प्रमुख अतिथिलाई शब्दयात्रा प्रकाशनका तर्फबाट उपहार समर्पण गर्नुभएको थियो । कार्यक्रममा शब्दयात्रा प्रकाशनले १२ वर्षभित्र गरेका कामहरूका बारेमा हरि मञ्जुश्रीले जानकारी गराउनुभएको थियो ।
अभिलेखको अनावरण
शब्दयात्रा प्रकाशन १३ औँ वर्षमा प्रवेश गरेको अवसरमा हिजो जेठ १५ गते आयोजित विशेष कार्यक्रममा समाजसेवी कृष्णमणि कुइकेलले शब्दयात्रा प्रकाशनलाई दीर्घजीवन दिन आफ्नो स्वामित्वको जग्गाको भोगाधिकार हस्तान्तरण गर्नुभएको विवरण उल्लेख भएको शिलाभिलेखलाई अनावरण गरियो । संस्कृत भाषामा लिखित १८ पुराणका नेपाली अनुवादक डा. बद्री पोखरेल प्रमुख अतिथि र गीतिभास्कर मच्छेश्वर सापकोटा विशेष अतिथिले संयुक्त रूपमा उक्त शिलाभिलेखको अनावरण गर्नुभएको थियो । शिलाभिलेखको बेहोरा शब्दयात्रा प्रकाशनका आजीवन सदस्य प्रजापति तिमिल्सिनाले वाचन गर्नुभएको थियो । संस्थापक अध्यक्ष हरि मञ्जुश्री कार्यक्रमका सञ्चालक र जग्गादाता कृष्णमणि कुइकेलकी आमा धनकुमारी कुइकेल सभापति हुनुहुन्थ्यो ।
लेखकहरूका लागि निर्मित अतिथिगृहको उद्घाटन
बनेपामा लेखक, अनुसन्धाता, पत्रकार, कलाकार आदिका लागि अतिथिगृह सञ्चालन गर्न थालिएको छ । शब्दयात्रा प्रकाशन पुस्तकालयको उपयोग गरी एकान्त र रमणीय स्थानमा बसेर लेखन, सम्पादन, पठन, अनुवाद, अन्वेषण, अनुसन्धान र साङ्गीतिक सिर्जना गर्न चाहने लेखक–साहित्यकार, पत्रकार, अन्वेषक–अनुसन्धाता, कलाकार–सङ्गीतकार आदिका लागि साधनास्थल उपलब्ध गराउन अतिथिगृह सञ्चालन गर्न थालिएको हो । शब्दयात्रा प्रकाशन र नीलकण्ठेश्वर धाम संरक्षण समितिको सहकार्यमा बनेपामा अवस्थित कृष्णगीता परिसर शब्दसाधक तीर्थ नीलकण्ठेश्वर धाममा सञ्चालित यस अतिथिगृहलाई ‘शब्दसाधक अतिथिगृह’ नाउँ दिइएको छ । अतिथिगृहको उद्घाटन शब्दयात्रा प्रकाशन १३ औँ वर्षमा प्रवेश गरेको अवसरमा आज जेठ १५ गते शब्दयात्रा प्रकाशनका आजीवन सदस्य लीलादेवी श्रेष्ठ र जग्गादाता कृष्णमणि कुइकेलकी आमा धनकुमारी कुइकेलले संयुक्त रूपमा गर्नुभएको छ । अध्यक्ष हरि मञ्जुश्रीद्वारा सञ्चालित आजको कार्यक्रमका प्रमुख अतिथि डा. बद्री पोखरेल र सभापति धनकुमारी कुइकेल हुनुहुन्थ्यो । अतिथिगृहको पहिलो अतिथि लेखक डा. इन्दुल केसी बन्नुभएको छ । उहाँले शब्दसाधक अतिथिगृहको आफू पहिलो अतिथि बन्ने घोषणा कार्यक्रममै गर्नुभएको थियो ।
शब्दसाधक अतिथिगृहको सञ्चालन यही महिनादेखि
शब्दयात्रा प्रकाशन र नीलकण्ठेश्वर धाम संरक्षण समितिको सहकार्यमा बनेपामा अवस्थित कृष्णगीता परिसर शब्दसाधक तीर्थ नीलकण्ठेश्वर धाममा यही जेठ महिनादेखि शब्दसाधक अतिथिगृह सञ्चालन गरिने भएको छ । अतिथिगृहको उद्घाटन छिटै गरिने योजना छ । तत्कालका लागि नीलकण्ठेश्वर धाम संरक्षण समितिले आफ्नो भवनको एक तला अतिथिहरूका लागि छुट्याएको छ । पछि यसलाई विस्तार गर्दै लगिने कुरा समितिका अध्यक्ष कृष्णमणि कुइकेलले जानकारी गराउनुभएको छ । शब्दयात्रा प्रकाशन पुस्तकालयको उपयोग गरी एकान्त र रमणीय स्थानमा बसेर लेखन, सम्पादन, पठन, अन्वेषण, अनुसन्धान र साङ्गीतिक सिर्जना गर्न चाहने लेखक–साहित्यकार, अन्वेषक–अनुसन्धाता, कलाकार–सङ्गीतकार आदिका लागि साधनास्थल उपलब्ध गराउने लक्ष्य बमोजिम यो अतिथिगृह सञ्चालन गर्न लागिएको हो ।