शब्दयात्रा प्रकाशनले २०८१ सालको ‘शब्दयात्रा षडानन्द अधिकारी आध्यात्मिक पत्रकारिता सम्मान’ आध्यात्मिक पत्रकार तथा लेखक अच्युतप्रसाद पौडेल ‘चिन्तन’ (काठमाडौँ) लाई समर्पण गर्ने भएको छ । विभिन्न पत्रिकाहरूमा आध्यात्मिक स्तम्भलेखन गर्नुका साथै टेलिभिजनमा आध्यात्मिक कार्यक्रम पनि प्रस्तुत गर्ने गर्नुभएका उहाँ आध्यात्मिक पुस्तकहरूका लेखक तथा प्रवाचक पनि हुनुहुन्छ । उहाँलाई आगामी असोज महिनामा सम्मान समर्पण गरिनेछ । यस सम्मानको आर्थिक व्यवस्थापन समाजसेवी सुदर्शन आचार्यले गर्नुभएको हो । सम्मान ग्रहण गर्न स्वीकृति प्रदान गर्नुभएकोमा अच्युतप्रसाद पौडेल ‘चिन्तन’ प्रति शब्दयात्रा प्रकाशन हार्दिक आभार व्यक्त गर्दछ ।

शब्दयात्रा प्रकाशनले २०८१ सालको ‘शब्दयात्रा बेलप्रसाद श्रेष्ठ दानशीलता सम्मान’ नीरकला शर्मा अधिकारी (चितवन) लाई समर्पण गर्ने भएको छ । आफूले आर्जन गरेको सबै सम्पत्ति समर्पण गरेर दुई दशकअघि चितवनमा ‘असहाय बृद्ध कल्याण समाज’ खोल्नुभएकी उहाँले शारीरिक रूपमा अशक्त भएर पनि र आफैँ ९१ वर्षकी बृद्धा भएर पनि १३ जना बृद्धबृद्धाको पालनपोषण र सेवा गरिरहनुभएको छ र समाजसेवाका क्षेत्रमा अरूका लागि प्रेरणा बन्नुभएको छ । उहाँलाई आगामी असोज महिनामा सम्मान समर्पण गरिनेछ । यस सम्मानको आर्थिक व्यवस्थापन समाजसेवी बेलप्रसाद श्रेष्ठले गर्नुभएको हो । सम्मान ग्रहण गर्न स्वीकृति प्रदान गर्नुभएकोमा नीरकला शर्मा अधिकारीप्रति शब्दयात्रा प्रकाशन हार्दिक आभार व्यक्त गर्दछ ।

शब्दयात्रा प्रकाशनका संस्थापक अध्यक्ष शब्दसारथि हरि मञ्जुश्रीलाई यही भदौ २२ गते शनिबार काठमाडौँ कमलपोखरीको सिटी सेन्टरमा आयोजित कार्यक्रममा सम्मान गरियो । विश्वकीर्तिमानी गीतकार हरिगोपाल प्रधानको गीत ‘बग्यो हावा सरर’ लाई सार्वजनिक गर्न आयोजित कार्यक्रममा उहाँलाई सम्मानपत्र र विभिन्न उपहारहरू प्रदान गरिएको हो । उहाँलाई वर्ल्ड बुक अफ रेकर्डस् लन्डन नेपाल च्याप्टर, नेपाल वायुसेवा निगम, नेपाल स्मार्ट सर्भिस इन लगायतका संस्थाहरूले सम्मान गरेका थिए । प्रतिनिधि सभाका उपसभामुख इन्दिरा रानामगर कार्यक्रमका प्रमुख अतिथि हुनुहुन्थ्यो ।

शब्दयात्रा प्रकाशनका संस्थापक अध्यक्ष हरि मञ्जुश्रीलाई हिजो साउन ३२ गते कुलचन्द्र कोइराला स्मृति प्रतिष्ठानले २५ हजार रुपियाँ, ताम्रपत्र, दोसल्ला र रुद्राक्षमालासहित जीवनचन्द्र कोइराला स्रष्टा पुरस्कार २०८१ प्रदान गरेको छ । स्वतन्त्र लेखन, अनुसन्धान, सम्पादन तथा प्रकाशनका अतिरिक्त शब्दयात्रा प्रकाशनजस्तो संस्था सञ्चालनका साथै विभिन्न साधक प्रतिभालाई अनेकौँ प्रकारका सम्मान तथा पुरस्कार प्रदान गर्ने महनीय काम गर्न एक पैसा पनि सरकारी अनुदान, दानदातव्य नलिईकन समाजका मनस्वीका दानदातव्यका भरमा राज्यले सञ्चालन गरेका यस प्रकारका सङ्घसंस्थाभन्दा पनि बढी नियमित र मर्यादाबद्ध गराएर सञ्चालन गर्ने उच्चतम कलात्मक क्षमता प्रदर्शन गरी तेत्तीसवटा मौलिक कृतिसहित एक सय सैँतीस कृति प्रकाशन गर्ने आभ्यन्तरिक क्षमताको उच्च मूल्याङ्कन गर्दै पुरस्कार अर्पण गरिएको कुरा ताम्रपत्रमा उल्लेख छ । त्यस प्रतिष्ठानले यो पुरस्कार पहिलोपटक प्रदान गरेको थियो । कार्यक्रमका प्रमुख अतिथि माननीय उपप्रधानमन्त्री प्रकाशमान सिंह, विशिष्ट अतिथि डा. सुरेशराज शर्मा र सभापति डा. कुलप्रसाद कोइराला हुनुहुन्थ्यो ।