लामो समयसम्म फोटो पत्रकारिता क्षेत्रमा आबद्ध रही राष्ट्रिय समाचार समितिका वरिष्ठ फोटो पत्रकार, राष्ट्रिय फोटो पत्रकार समूह नेपालका अध्यक्ष तथा फोटोग्राफी प्रशिक्षक हुनुका साथै फोटो पत्रकारका रूपबाट विशेष महत्त्वका तस्बिरहरू खिची जनसमक्ष प्रस्तुत गरेर फोटो पत्रकारिता क्षेत्रलाई उचाइतर्फ लैजान विशिष्ट योगदान गर्नुभएकोमा फोटो पत्रकार प्रदीपराज वन्त (गोरखा) लाई ‘शब्दयात्रा रत्नदेवी प्रधान फोटो पत्रकारिता सम्मान, २०८१’ समर्पण गरिएको छ । प्रधानमन्त्रीको भ्रमण दलमा रही उहाँ अमेरिका जानुभएकाले उहाँका प्रतिनिधि रेजिना तुलाधरलाई पदम दाहालले माला, हरिगोपाल प्रधानले उपहार र भेटी, हरि मञ्जुश्रीले किरीट र चन्द्रबहादुर खड्काले अभिवन्दनापत्र समर्पण गर्नुभएको थियो । कार्यक्रम हरि मञ्जुश्रीको सभापतित्व र बेलप्रसाद श्रेष्ठको प्रमुख आतिथ्यमा यही असोज ११ गते शुक्रबार शब्दयात्रा प्रकाशनको सभाकक्षमा आयोजना गरिएको थियो । यस सम्मानको व्यवस्था आफ्नी आमाको स्मृति र सम्मानमा फोटो पत्रकार तथा विश्वकीर्तिमानी गीतकार हरिगोपाल प्रधान (काठमाडौँ) ले गर्नुभएको हो ।
‘रङ्गमञ्चमा म’ हरिबहादुर थापाको आत्मकथाका साथै नेपाली रङ्गमञ्चका क्षेत्रमा उहाँबाट पु¥याइएको योगदानको विवरण हो । यो नेपाली रङ्गमञ्चको आरोह–अवरोह र इतिहासको सङ्क्षिप्त झलक पनि हो । यसमा व्यक्ति हरिबहादुर थापाका साथमा नेपाल प्रज्ञा–प्रतिष्ठान जस्ता संस्थाहरू पनि प्रस्तुत भएका छन् । नेपाली नाटकले अमेरिकासम्म गरेको यात्रा–विवरण पनि यहाँ प्रस्तुत गरिएको छ । नाट्यलेखन, नाट्यनिर्देशन, नाट्याभिनय र नाट्येतिहासमा अन्वेषण गर्न चाहने अन्वेषकलाई यस पुस्तकले प्रशस्त बौद्धिक खजाना उपलब्ध गराउँछ । नेपालको रङ्गमञ्चीय इतिहासको केही झलक पनि यसमा पाउन सकिन्छ । त्यसैले यो पुस्तक नाट्यकर्मी हरिबहादुर थापासँग सम्बन्ध रहेका अभिनीत नाट्यसाहित्यको आधिकारिक अभिलेख नै बनेको छ ।