पत्रकार तथा लेखक युवराज गौतमको उपचार सहयोगका लागि शब्दयात्रा प्रकाशनले अक्षरसेवी सहयोग कोषबाट १० हजार रुपियाँ उपलब्ध गराएको छ । धुलिखेल नगरपालिका वडा नं. ४ बाँसघारी निवासी समाजसेवी डा. केशवबहादुर खुलाल छेत्रीले पिता टीकाबहादुर खुलाल छेत्री र माता रमाकुमारी खुलाल छेत्रीको स्मृति र सम्मानमा शब्दयात्रा प्रकाशनमा राख्नुभएको अक्षयकोषको ब्याजबाट उक्त रकम उपलब्ध गराइएको हो । विभिन्न पत्रिकाका स्तम्भकार रहनुभएका तथा नेपाल टेलिभिजन, रेडियो नेपाल आदिको पनि अनुभव बटुल्नुभएका युवराज गौतमले ‘सारथि’ साप्ताहिक, ‘गोरखापत्र’ दैनिक आदि पत्रिकाको सम्पादन गर्नुभएको छ । उहाँले केही पुस्तक पनि लेख्नुभएको छ । मृगौला, कलेजो र फोक्सोमा समस्या देखिएर हाल उहाँ अस्पतालमा उपचाररत हुनुहुन्छ । उहाँका सहृदयी मित्रहरूले उहाँको उपचारका लागि आर्थिक सहयोग गरिदिन सामाजिक सञ्जालबाट सबैसँग आग्रह गरिरहनुभएको छ । उहाँको स्वास्थ्यलाभका लागि नीलकण्ठेश्वर महादेवसँग प्रार्थना गर्दै उहाँको उपचारका लागि यथाशक्य आर्थिक सहयोग गरिदिन पत्रकारिता र साहित्यसँग सम्बन्धित सम्पूर्ण संस्थाहरूलाई शब्दयात्रा प्रकाशन पनि विनम्र आग्रह गर्दछ ।