शब्दयात्रा प्रकाशनले आगामी मङ्सिर महिनामा सम्मान समर्पण गर्दा अर्को एक विधामा पनि सम्मान थप गरी समर्पण गर्ने भएको छ । थप सम्मानका रूपमा राष्ट्रिय स्तरमा योगदान गर्ने महिला प्रतिभालाई सम्मान गरिनेछ ।
उक्त सम्मानका लागि योग्य महिला प्रतिभाको नाउँ सिफारिस गरी यासम्भव शीघ्र संस्थामा उपलब्ध गराइदिन शब्दयात्रा प्रकाशनले अनुरोध गरेको छ ।
शब्दयात्रा प्रकाशनले यसअघि विभिन्न १६ विधाका सम्मानको स्थापना र आर्थिक व्यवस्थापन गरिसकेको छ ।

शब्दयात्रा प्रकाशनको ७५ औँ प्रकाशनपुष्पका रूपमा ‘विचारहरूको बिटो’ नामक विचारसङ्ग्रह प्रकाशन गरिने भएको छ । उक्त पुस्तकलाई आगामी मङ्सिर महिनामा शब्दयात्रा प्रकाशनद्वारा आयोजना गरिने विशेष कार्यक्रममा सार्वजनिक गरिनेछ ।
‘विचारहरूको बिटो’ मा यस पुस्तकका सम्पादक साहित्यकार द्रोणप्रसाद श्रेष्ठ ‘मुन्डाघरे’ द्वारा यसअघि लिखित ‘मेरा पिता र म’ तथा उहाँद्वारा नै यसअघि सम्पादित ‘चण्डिप्रसाद परिक्रमा’ नामका दुई पुस्तकलाई सार्वजनिक गर्ने क्रममा व्यक्त गरिएका मन्तव्यहरू सङ्ग्रह गरिएको छ । पूर्वराजदूत सूर्यप्रसाद श्रेष्ठ, समालोचक डा. मोहन हिमांशु थापा, निबन्धकार तेजेश्वरबाबु ग्वंगः, गायिका उर्मिला श्रेष्ठ, ग्रन्थसम्पादक हरि मञ्जुश्री, लघुकथाकार श्रीओम श्रेष्ठ रोदन, समाजसेवी ईश्वरप्रसाद श्रेष्ठ र समाजसेवी मनका श्रेष्ठले उल्लिखित दुई पुस्तकहरूका साथै लेखक तथा सम्पादक द्रोणप्रसाद श्रेष्ठ र उहाँका पिता चण्डिप्रसाद श्रेष्ठका विषयमा विचारहरू व्यक्त गरेका थिए ।

मीरा चापागाईं पौड्यालद्वारा लिखित प्रकाशोन्मुख कवितासङ्ग्रह ‘अग्निजल’ माथि शब्दयात्रा प्रकाशनको आयोजनामा प्रकाशनपूर्व नै अन्तर्विमर्श कार्यक्रमको आयोजना गरियो । शब्दयात्रा प्रकाशनको कार्यालयमा प्रकाशनका अध्यक्ष हरि मञ्जुश्री, ‘नेपालभूमि साप्ताहिक’ का सम्पादक सुमन खड्का र शिक्षासेवी रमेश पौड्यालको समेत उपस्थितिमा सम्पन्न उक्त कार्यक्रममा ‘अग्निजल’ माथि साहित्यकारहरू डा. श्याम भट्टराई, शारदाप्रसाद शर्मा, भवानी पाण्डे र रामसुन्दर देउजाले आ–आफ्नो विचार व्यक्त गर्नुभएको थियो ।
‘अग्निजल’ लाई शब्दयात्रा प्रकाशनले ७४ औँ प्रकाशनपुष्पका रूपमा प्रकाशन गरी आगामी मङ्सिर महिनामा सार्वजनिक गर्ने भएको छ । उल्लिखित साहित्यकारहरूका अतिरिक्त साहित्यिक पत्रकार तथा साहित्यकार मोहन दुवालको समेत मन्तव्य राखिएको उक्त कवितासङ्ग्रहमा एक सय बीसवटा गद्यकविताहरू सङ्गृहीत छन् ।

आध्यात्मिक, साहित्यिक, राजनीतिक आदि विभिन्न विधाका पुस्तकहरू, राष्ट्रिय तथा स्थानीय पत्रपत्रिकाहरू, स्टेसनरी र खेलकुदका सामानहरू घुम्ती पुस्तक पसलमा राखी बिक्री गरेर आय आर्जन गर्न चाहने परिश्रमी, इमानदार र स्वाभिमानी व्यक्तिले शब्दयात्रा प्रकाशनमा संस्थामा सम्पर्क राख्नुहोला । पसल, पुस्तक, पत्रिका र अन्य सामानहरू शब्दयात्रा प्रकाशनले नै उपलब्ध गराइदिनेछ ।

शब्दयात्रा प्रकाशनले आगामी मङ्सिर महिनामा समर्पण गर्ने चार विधाको सम्मानका लागि उपयुक्त व्यक्ति वा संंस्थाको चयन गर्नका लागि ‘सम्मानित व्यक्तित्व चयन समिति’ को गठन गरेको छ । शब्दयात्रा प्रकाशनद्वारा गठित यो १७ औँ चयन समिति हो ।
उक्त समितिमा डा. पुरुषोत्तम खरेल संयोजक तथा डा. सरस्वती आचार्य, सुरेन्द्र के. सी. र शिवनाथ मैनाली सदस्य रहनुभएको छ । उहाँहरू चारैजना काठमाडौँ विश्वविद्यालयसँग आबद्ध हुनुहुन्छ ।
हरेक वर्षको मङ्सिर महिनामा समर्पण गरिने चार विधाको सम्मानका लागि विभिन्न व्यक्ति तथा संस्थाहरूले सिफारिस गरी पठाउनुभएका व्यक्ति वा संस्थाका नाउँहरूमध्येबाट चयन समितिले उपयुक्त व्यक्ति वा संस्थाको चयन गर्नेछ । उक्त समितिले चयन गरेका व्यक्ति वा संस्थालाई नै शब्दयात्रा प्रकाशनले सम्मान गर्नेछ ।
सम्मानका लागि उपयुक्त व्यक्ति वा संस्थाको नाउँ सिफारिस गरी पठाउन ‘नेपालभूमि’ (विचारप्रधान राष्ट्रिय साप्ताहिक) र ‘शब्दसञ्चार (साप्ताहिक रेडियो कार्यक्रम) बाट सार्वजनिक आह्वान गरिसकिएको छ ।
शब्दयात्रा प्रकाशनले हरेक वर्षको मङ्सिर महिनामा बालसाहित्य, समालोचना, अनुसन्धान र कविता–काव्य विधामा सम्मान गर्ने गरेको छ । सम्मान गरिँदा नगद ५ हजार रुपियाँ, उपहार र किरीटका साथमा अभिवन्दनापत्र समर्पण गर्ने गरिएको छ । यी सम्मानहरूको आर्थिक व्यवस्थापन गोपाल पराजुली, हरिगोपाल प्रधान, सकुल थापा र कविप्रसाद प्याकु¥यालले गर्नुभएको छ ।

शब्दयात्रा प्रकाशनसँग सम्बन्धित पुस्तक–पत्रिकाका पाठकहरू, रेडियो कार्यक्रमका श्रोताहरू र सम्मान कार्यक्रमका सहभागीहरूको सहभागिता रहने गरी ‘शब्दयात्रा पाठक समाज’ को गठन गरिएको छ ।
हालका लागि ९ जना सदस्य रहने गरी दामोदर घिमिरेको संयोजकत्वमा गठित ‘शब्दयात्रा पाठक समाज’ मा पदमनाथ ढुङ्गाना, सुदर्शन आचार्य, गीता कुँवर, सिना ढकाल, मनकुमारी दाहाल, पुण्यप्रसाद निरौला, तीर्थमाया श्रेष्ठ र नारायण नापित सदस्य रहनुभएको छ । सदस्यहरूको सङ्ख्या थप गर्दै जाने व्यवस्था गरिएको छ ।
शब्दयात्रा प्रकाशनबाट प्रस्तुत गरिएका पुस्तक–पत्रिका, रेडियो कार्यक्रम, सम्मान कार्यक्रम र अन्य विविध प्रस्तुतिहरूको प्रभावकारिताका विषयमा जनस्तरीय मूल्याङ्कन गर्दै त्यस्ता कार्यक्रमहरूलाई अझ प्रभावकारी कसरी बनाउन सकिन्छ र आम पाठक, श्रोता तथा दर्शकहरूले कस्ता सामग्री र प्रस्तुतिहरू खोजेका छन् भन्ने कुरा पत्ता लगाई त्यसका आधारमा सुझाव प्रस्तुत गर्न एवं लेखक र पाठकका बीचमा अन्तरसंवादको कार्यक्रम सञ्चालन गर्न ‘शब्दयात्रा पाठक समाज’ को गठन गरिएको कुरा संयोजक दामोदर घिमिरेले जानकारी गराउनुभएको छ ।
‘शब्दयात्रा पाठक समाज’ ले हरेक महिनाको दोस्रो मङ्गलबार शब्दयात्रा प्रकाशनको कार्यालयमा नियमित बैठक गर्ने निर्णय पनि गरेको छ ।
‘शब्दयात्रा पाठक समाज’ का संयोजक दामोदर घिमिरेले शब्दयात्रा प्रकाशनद्वारा सञ्चालित ‘अक्षरसेवी सहयोग कोष’ मा दैनिक ५ रुपियाँका दरले आर्थिक सहयोग गर्ने गर्नुभएको छ ।