Shabdayatra Prakashan

शब्दयात्रा पाठक समाजलाई विस्तार गरिने भएको छ । गत वैशाख १६ गते शनिबार शब्दयात्रा प्रकाशनको सभाकक्षमा बसेको एक बैठकले शब्दयात्रा पाठक समाजलाई विस्तार गर्ने निर्णय गरेको हो । दामोदर घिमिरेको संयोजकत्वमा गठित यसअघिको पाठक समाजमा ९ जना हुनुहुन्थ्यो ।
बैठकमा दामोदर घिमिरे, मनकुमारी दाहाल, सीना ढकाल, पुष्पदास स्याउला, शिव बन्जारा, शारदाप्रसाद शर्मा, गणेशदास उलक, मच्छेश्वर सापकोटा, हरि मञ्जुश्री आदिको उपस्थिति रहेको थियो ।

पूर्वप्रशासक, शिक्षासेवी तथा समाजसेवी चन्द्रबहादुर खड्काले आफू जिल्ला शिक्षा अधिकारी बनेर मुगु जिल्लामा रहँदा त्यस जिल्लामा देखेको शैक्षिक दुरवस्थाको मार्मिक शब्दचित्रण गरी ‘कर्मयोद्धासँग शब्दसंवाद’ कार्यक्रममा उपस्थित सहभागीहरू सबैलाई भावुक बनाइदिनुभयो । शब्दयात्रा प्रकाशनद्वारा पदमनाथ ढुङ्गानाको संयोजकत्वमा साप्ताहिक रूपमा सञ्चालित उक्त कार्यक्रमको गत २०७४ वैशाख १२ गते सम्पन्न बाह«ौँ शृङ्खलामा उहाँले शिक्षा क्षेत्रमा आफूले देखेका समस्याहरूको वर्णन गर्दा श्रोताहरू द्रवित बनेका थिए ।
शब्दयात्रा प्रकाशनको सभाकक्षमा महाप्रबन्धक शारदाप्रसाद शर्माद्वारा उद्घोषित उक्त कार्यक्रममा समाजसेवी विष्णुहरि तिमल्सिनाले सभापतित्व ग्रहण गर्नुभएको थियो । श्रोतादीर्घामा शब्दयात्रा प्रकाशनका अध्यक्ष हरि मञ्जुश्री, शब्दयात्रा सहयोगी समाजबाट अग्रज लोकगायक मच्छेश्वर सापकोटा, शब्दयात्रा लेखक समाजबाट आध्यात्मिक लेखकद्वय ओतबहादुर खड्का र तुतुकाजी प्रणामी श्रेष्ठ, शब्दयात्रा पाठक समाजबाट लेखक दामोदर घिमिरे, ‘नेपालभूमि साप्ताहिक’ बाट बजार व्यवस्थापक दीपक तिमल्सिना, लेखक पुष्पदास स्याउला, समाजसेवी जीवन थापा आदिको समुपस्थिति रहेको थियो ।

शब्दयात्रा प्रकाशनले पुस्तक प्रकाशनको ८१ औँ शृङ्खलाका रूपमा काभ्रेपलाञ्चोक जिल्लाका पूर्वप्रहरी कर्मचारीहरूको नाम, पद, ठेगाना र दूरभाषाङ्क समावेश गरिएको कोश प्रकाशन गर्ने भएको छ । पूर्वप्रहरी निरीक्षक जगन्नाथ गिरीद्वारा सङ्कलित तथा सम्पादित उक्त कोशलाई ‘काभ्रेली पूर्वप्रहरी कर्मचारी टेलिफोन कोश’ नाम दिइएको छ ।
२०७२ साल वैशाख १२ गतेको महाभूकम्पबाट प्रत्यक्ष प्रभावित पूर्वप्रहरी कर्मचारीहरूको अलग्गै सूची बनाइएको उक्त कोशलाई आगामी जेठ महिनामा बनेपामा आयोजना गरिने सम्मान समर्पण समारोहमा सार्वजनिक गरिने भएको छ ।

शब्दयात्रा प्रकाशनद्वारा सञ्चालित ‘कर्मयोद्धासँग शब्दसंवाद’ नामक साप्ताहिक प्रवचन कार्यक्रम हरेक हप्ता मङ्गलबार अपराह्न ४ बजेदेखि गर्ने गरिएकोमा अर्काे हप्तादेखि हरेक शुक्रबार गरिने भएको छ ।
कार्यक्रममा सहभागी हुनुभएका र हुन चाहने कर्मयोद्धाहरूले मङ्गलबारभन्दा शुक्रबार नै कार्यक्रमका लागि उपयुक्त हुने सुझाव दिनुभएकाले अबदेखि हरेक शुक्रबार ४ बजेदेखि ‘शब्दसंवाद’ कार्यक्रम गर्न लागिएको हो ।
आज १९ गते मङ्गलबार ‘शब्दसंवाद’ कार्यक्रम गरिएपछि अर्काे कार्यक्रम वैशाख २९ गते शुक्रबार अपराह्न ४ बजे शब्दयात्रा प्रकाशनको सभाकक्षमा साविकबमोजिम नै हुनेछ ।

शब्दयात्रा प्रकाशनबाट ‘नन्दिकेश्वर अधिकारी शोध सम्मान’ प्राप्त गरेका र ‘शब्दयात्रा बालसाहित्य सम्मान’ का लागि एक लाख रुपियाँ अक्षयकोष राखिदिएका बालसाहित्यकार गोपाल पराजुलीको व्यक्तित्व र कृतित्वका विषयमा ‘बालमनका गोपाल’ नामक पुस्तक शब्दयात्रा प्रकाशनबाट प्रकाशनमा आउने भएको छ ।
ग्रन्थसम्पादक हरि मञ्जुश्रीको सम्पादनमा प्रकाशित हुने उक्त पुस्तकलाई आगामी जेठमा आयोजना गरिने कार्यक्रममा सार्वजनिक गरिने भएको छ । उक्त पुस्तक शब्दयात्रा प्रकाशनको ८२ औँ प्रकाशनपुष्प हो ।
साढे ३ सयभन्दा बढी पृष्ठको र ८ भागमा विभक्त उक्त पुस्तकमा नेपालका ख्यातिप्राप्त बौद्धिक–प्राज्ञिक व्यक्तिहरूले गोपाल पराजुलीको व्यक्तित्व र कृतित्वका विषयमा लेखेका र ‘नेपालभूमि साप्ताहिक’ लगायतका पत्रिकाहरूमा प्रकाशित भइसकेका लेखहरू सङ्कलित छन् ।

शब्दयात्रा प्रकाशनद्वारा संस्थापित सामाजिक जागरण सम्मानबाट सम्मानित समाजसेवी श्री भीमबहादुर अधिकारी ‘राष्ट्रसेवा पुरस्कार’ बाट पुरस्कृत हुनुभएकोमा हार्दिक बधाई ज्ञापन गर्दछौं ।

शब्दयात्रा प्रकाशन परिवार

शब्दयात्रा प्रकाशनद्वारा प्रकाशित संस्मरणात्मक कृति ‘प्रशासनिक दाउपेच’ का कृतिकार तथा शब्दयात्रा लेखक समाजका सदस्य प्रसिद्ध साहित्यकार शिवभक्त शर्मा परमधामतर्फ प्रस्थान गर्नुभएकाले उहाँको मोक्षप्राप्तिका लागि भगवान्सँग प्रार्थना गर्दछौं ।

शब्दयात्रा प्रकाशन

शब्दयात्रा सहयोगी समाजको पुनर्गठन गरिएको छ । गत वैशाख ९ गते शनिबार शब्दयात्रा प्रकाशनको सभाकक्षमा भएको भेलाले उक्त समाजको पुनर्गठन गरेको हो । पुनर्गठनपछि शिक्षासेवी रामप्रसाद अधिकारी समाजको सर्वसम्मत संयोजक बन्नुभएको छ । यसअघि पनि उहाँ नै संयोजक हुनुहुन्थ्यो ।
समाजको सदस्यमा समाजसेवीद्वय गणेशदास उलक र त्रिरत्न रन्जितकार, लोकगायक मच्छेश्वर सापकोटा, स्वास्थ्यकर्मी प्रकाशबहादुर कायस्थ, साहित्यकार सोमकाजी शाक्य र लेखक पूर्णबहादुर कर्माचार्य रहनुभएको छ । अन्य सदस्यहरू थप गर्दै जाने निर्णय पनि गरिएको छ ।
शब्दयात्रा प्रकाशनका अध्यक्ष हरि मञ्जुश्रीको अध्यक्षतामा सम्पन्न उक्त भेलालाई महाप्रबन्धक शारदाप्रसाद शर्माले सञ्चालन गर्नुभएको थियो । भेलामा सञ्चालक सदस्यबाट सकुल थापा, शब्दयात्रा लेखक समाजबाट उद्धवप्रसाद नेपाल, शब्दयात्रा नारीस्रष्टा समाजबाट भवानी पाण्डे, शब्दयात्रा पत्रकार समाजबाट शिव बन्जारा आदिको पनि उपस्थिति रहेको थियो ।