आगामी भदौ १३ गते दिउँसो १ः३० बजे बनेपाको के. एन. ब्यान्क्वेटमा पुगौँ । त्यस दिन निम्नलिखित कार्यक्रमहरू हुनेछन् —
सम्मान समर्पण ः
१. आध्यात्मिक पत्रकारिता सम्मान पुरुषोत्तम सापकोटालाई, २. नेपालभूमि स्तम्भकार सम्मान प्रेम कैदीलाई, ३. फोटो पत्रकारिता सम्मान वसन्त चित्रकारलाई, ४. साहित्यिक पत्रिका सम्मान ‘दायित्व द्वैमासिक’ लाई
पुस्तक सार्वजनिक ः
१. परिवर्तित पाइला (नाटक) ः गणेशबहादुर खत्री, २. वेदान्तशिरोमणि एक संस्मरण (लेखसङ्ग्रह) ः मुकुन्दप्रसाद उपाध्याय, ३. मञ्जुश्री (ज्योतिषकाव्य) ः श्रीधर प्याकु¥याल, ४. अभियान (नाटक) ः टेकलाल भारती, ५. हाम्रो बालक्लब (बालनाटक) ः भवानी पाण्डे, ६. माधुरी आचार्य (लघु–उपन्यास) ः आख्यान कृष्णमणि कुइँकेल र लेखन हरि मञ्जुश्री, ७. कल्याणं ब्रुवन्तु (कवितासङ्ग्रह) ः कल्याण लम्साल, ८. शब्दयात्रा प्रकाशनको ६ वर्ष ः पदमनाथ ढुङ्गाना र शारदाप्रसाद शर्मा
उपस्थितिका लागि अनुरोध
दुई पत्रकारलाई कदरपत्र दिइने
शब्दयात्रा प्रकाशनले आगामी भदौ १३ गते आयोजना गरिने सम्मान समर्पण तथा पुस्तक सार्वजनिकीकरण समारोहमा दुईजना काभ्रेली पत्रकारलाई कदरपत्र प्रदान गर्ने भएको छ ।
कदरपत्र पाउने पत्रकारहरूमा राजकुमार गोले र मधुसूदन तिमल्सिना रहेका छन् । शब्दयात्रा प्रकाशनले २०६९ सालदेखि हरेक वर्षको भदौ महिनामा काभ्रे जिल्लामा क्रियाशील दुईजना पत्रकारलाई कदरपत्र प्रदान गर्ने गरेको छ ।
आठ पुस्तक सार्वजनिक गरिने
आगामी भदौ १३ गते आयोजना गरिने सम्मान समर्पण तथा पुस्तक सार्वजनिकीकरण समारोहमा शब्दयात्रा प्काशनद्वारा प्रकाशित ८ वटा पुस्तक एकैसाथ सार्वजनिक गरिने भएका छन् ।
सार्वजनिक गरिने पुस्तकहरूमा गणेशबहादुर खत्रीको नाटक ‘परिवर्तित पाइला’, मुकुन्दप्रसाद उपाध्यायद्वारा लिखित लेखसङ्ग्रह ‘वेदान्तशिरोमणि एक संस्मरण’, श्रीधर प्याकु¥यालको ज्योतिषकाव्य ‘मञ्जुश्री’, टेकलाल भारतीको नाटक ‘अभियान’, भवानी पाण्डेको बालनाटक ‘हाम्रो बालक्लब’, हरि मञ्जुश्रीको लेखन र कृष्णमणि कुइँकेलको आख्यान रहेको लघु–उपन्यास ‘माधुरी आचार्य’, कल्याण लम्सालको कवितासङ्ग्रह ‘कल्याणं ब्रुवन्तु’ तथा पदमनाथ ढुङ्गाना र शारदाप्रसाद शर्माद्वारा सङ्कलित तथा संयोजित ‘शब्दयात्रा प्रकाशनको ६ वर्ष’ रहेका छन् ।
‘शब्दयात्रा प्रकाशनको छ वर्ष’ प्रकाशित
शब्दयात्रा प्रकाशन स्थापना भई औपचारिक रूपमा समुद्घाटन गरिएको ६ वर्ष पूरा भएको अवसर पारी शब्दयात्रा प्रकाशनले ‘शब्दयात्रा प्रकाशनको ६ वर्ष’ नामक पुस्तकको प्रकाशन गरेको छ । शब्दयात्रा प्रकाशनको नियमित साप्ताहिक कार्यक्रम ‘कर्मयोद्धासँग शब्दसंवाद’ कार्यक्रमका संयोजक पदमनाथ ढुङ्गाना र शब्दयात्रा प्रकाशनका महाप्रबन्धक शारदाप्रसाद शर्माको सङ्कलन तथा संयोजनमा तयार पारिएको उक्त पुस्तकलाई आगामी भदौ १३ गते आयोजना गरिने सम्मान समर्पण तथा पुस्तक सार्वजनिकीकरण समारोहमा सार्वजनिक गरिने भएको छ । शब्दयात्रा प्रकाशनद्वारा प्रकाशित यो ९० औँ पुस्तक हो ।
शब्दयात्रा प्रकाशनको इतिहास, उद्देश्य, कार्यक्रमहरू र भावी योजनाहरू समेटिएको यस पुस्तकले शब्दयात्रा प्रकाशनका विषयमा पूर्ण जानकारी गराउने र मार्गनिर्देशनसमेत गराउने जानकारी सङ्कलक तथा संयोजकद्वयले गराउनुभएको छ ।
सम्मान कार्यक्रम १३ गते
शब्दयात्रा प्रकाशनको सम्मान समर्पण तथा पुस्तक सार्वजनिकीकरण समारोह आगामी भदौ १३ गते मङ्गलबार बनेपाको बे. एन. ब्यान्क्वेटमा हुने भएको छ । उक्त समारोहमा चारजना शब्दसाधकहरूलाई सम्मान तथा आठवटा पुस्तकलाई सार्वजनिक गरिनेछ ।
हरेक वर्षको भदौ महिनामा गरिने नियमित समारोहअन्तर्गत उक्त समारोह गर्न लागिएको हो । शब्दयात्रा प्रकाशनले उक्त समारोहमा सहभागी हुन शुभेच्छुक र अक्षरप्रेमी सबैलाई आग्रह गरेको छ ।
‘शब्दसंवाद’ मा डा. नवराज खतिवडा
शब्दयात्रा प्रकाशनद्वारा सञ्चालित नियमित साप्ताहिक कार्यक्रम ‘कर्मयोद्धासँग शब्दसंवाद’ को अट्ठाइसौँ शृङ्खलाको प्रमुख वक्ताका रूपमा काठमाडौँ विश्वविद्यालय वातावरण विभागका सहप्राध्यापक डा. नवराज खतिवडा प्रस्तुत हुनुभयो । उहाँले ‘शब्दप्रेम’ का विषयमा पावर प्वाइन्टका माध्यमबाट आफ्ना सारगर्भित धारणाहरू, आफ्नो लेखनयात्रा र लेखनकौशलका बारेमा प्रस्ट पार्नुभयो ।
शब्दयात्रा प्रकाशनका अध्यक्ष हरि मञ्जुश्रीको सभापतित्व र कार्यक्रमका सञ्चालक पदमनाथ ढुङ्गानाको सञ्चालनमा सम्पन्न उक्त कार्यक्रममा शारदाप्रसाद शर्मा, मच्छेश्वर सापकोटा, कृष्णमणि कुइँकेल, दामोदर घिमिरे, छविलाल कुइँकेल, फणीन्द्रराज अधिकारी, रामप्रसाद अधिकारी, श्री शर्मा मूर्ख, विष्णुहरि तिमल्सिना, रघु कर्माचार्य, गङ्गा लुइँटेल, पूर्णबहादुर कार्की, पूर्णबहादुर कर्माचार्य, सिद्धिबहादुर कर्माचार्य, धनमाया खत्री, भवानी पाण्डे, अम्बिका धिताल, रोशन मञ्जुश्री, दीपक तिमल्सिना, दीक्षा घिमिरे आदिको उपस्थिति रहेको थियो ।
आगामी शुक्रबार तीजको सन्दर्भ परेको हुनाले ‘शब्दसंवाद’ कार्यक्रम सञ्चालन नगरिने, त्यसपछिको शुक्रबारदेखि फेरि नियमित रूपमा शब्दयात्रा प्रकाशनको नयाँ कार्यालय बनेपा — ६ कृष्ण–गीता परिसरमा सञ्चालन हुने जानकारी उक्त कार्यक्रममा गराइएको थियो ।
सकुल, पदम र निर्मलाको मनोनयन
शब्दयात्रा बहुआयामिक अनुसन्धान प्रतिष्ठानको संरचना निर्माण समितिमा शब्दयात्रा प्रकाशनका सञ्चालक सदस्यहरूमध्येबाट सकुल थापा, कार्यक्रम सञ्चालकहरूमध्येबाट पदमनाथ ढुङ्गाना र सम्मानकोषका दाताहरूमध्येबाट निर्मलाकुमारी यगोल श्रेष्ठलाई सदस्य मनोनयन गरिएको छ ।
केही सदस्यहरू अझै मनोनयन गरिने जानकारी शब्दयात्रा प्रकाशनले गराएको छ ।
पुरुषोत्तम सापकोटा, प्रेम कैदी, वसन्त चित्रकार र दायित्वलाई सम्मान गरिने
शब्दयात्रा प्रकाशनले आध्यात्मिक पत्रकारिता सम्मानबाट पुरुषोत्तम सापकोटालाई, नेपालभूमि स्तम्भकार सम्मानबाट प्रेम कैदीलाई, फोटो पत्रकारिता सम्मानबाट वसन्त चित्रकारलाई र साहित्यिक पत्रिका सम्मानबाट दायित्व (द्वैमासिक) लाई सम्मान गर्ने भएको छ ।
शब्दयात्रा प्रकाशनले हरेक वर्षको भदौ महिनामा समर्पण गर्ने गरेका पत्रकारिता क्षेत्रका चार विधाका यी सम्मानहरू २०७४ सालका लागि घोषणा भएका हुन् ।
पुरुषोत्तम सापकोटाले लामो समयसम्म रेडियो नेपालको धार्मिक कार्यक्रम सञ्चालन तथा आध्यात्मिक प्रवचन गर्नुभएको छ भने प्रेम कैदीले ‘रातो युगधारा’ लगायतका साप्ताहिक पत्रिकाको सम्पादन लामो समयसम्म गर्नुभएको छ । यसै गरी वसन्त चित्रकारले गोरखापत्र संस्थानमा लामो समयसम्म फोटो पत्रकारिता गर्नुभएको छ भने ‘दायित्व’ पत्रिका साहित्यिक द्वैमासिकका रूपमा २०४७ सालदेखि नियमित रूपमा प्रकाशन भइरहेको छ ।
हरेक सम्मानमा पाँच हजार रुपियाँ, उपहार, किरीट र अभिवन्दनापत्र समर्पण गरिन्छ । त्यसका लागि शब्दयात्रा प्रकाशनलाई विभिन्न व्यक्तिहरूले कोषको व्यवस्था गरिदिनुभएको छ ।
सम्मानित व्यक्तिहरूको निर्णय गर्नका लागि बीसौँ सम्मानित व्यक्तित्व चयन समितिमा रहनुभएका पूर्णबहादुर कर्माचार्य, सुनील सापकोटा र अम्बिका धितालको बैठकले सिफारिस गरेको हो ।
शब्दयात्राबाट ‘कल्याणं ब्रुवन्तु’
शब्दयात्रा प्रकाशनको ८९ औँ प्रकाशनपुष्पका रूपमा कवि कल्याण लम्सालद्वारा लिखित तेस्रो कवितासङ्ग्रह ‘कल्याणं ब्रुवन्तु’ प्रकाशन हुन लागेको छ । यसअघि कल्याण लम्सालका दुई कवितासङ्ग्रह ‘कल्याण कविता’ र ‘कल्याणं भवन्तु’ पनि शब्दयात्रा प्रकाशनबाटै प्रकाशित भएका थिए ।
कवि कल्याण लम्सालले शब्दयात्रा प्रकाशनद्वारा संस्थापित शब्दयात्रा सिर्जना सम्मानका लागि आर्थिक व्यवस्थापन गर्नुभएको छ ।
‘माधुरी आचार्य’ भदौमा आउने
शब्दयात्रा प्रकाशनको ८८ औँ प्रकाशनपुष्पका रूपमा ‘माधुरी आचार्य’ नामको लघु–उपन्यास यही भदौ महिनाको दोस्रो सातादेखि पाठकवर्गको हातमा आउने भएको छ । शब्दयात्रा प्रकाशनका जग्गादाता कृष्णमणि कुइँकेलको कथावस्तुमा शब्दयात्रा प्रकाशनका अध्यक्ष हरि मञ्जुश्रीको लेखन रहेको यो उपन्यासको नाउँ उपन्यासकी मूल पात्राको नाउँबाट राखिएको हो ।
उपन्यासका भूमिकाकारहरूले यस उपन्यासलाई नेपाली गद्यशैलीको चमत्कारका रूपमा लिँदै यसलाई हालको दुई दशकभित्रको उत्कृष्ट उपन्यास भनेका छन् ।