शब्दयात्रा प्रकाशनले काठमाडौँको नेक्स्ट जेनेरेसन आवासीय माध्यमिक विद्यालयलाई केही पुस्तकहरू उपहार प्रदान गरेको छ । ती पुस्तकहरू शब्दयात्रा प्रकाशनका अध्यक्ष हरि मञ्जुश्रीले विद्यालयका प्राचार्य श्रीमती निर्मला अर्याललाई हस्तान्तरण गर्नुभएको थियो ।
उपहार प्रदान गरिएका पुस्तकहरूमा ‘शब्दयात्रा प्रकाशनको छ वर्ष’, ‘माधुरी आचार्य’, ‘डा. सुरेशराज शर्मा’, ‘सुशील कोइराला अरूका दृष्टिमा’, ‘मञ्जुश्री’, ‘नेपाल माहात्म्य’, ‘नागा बाबा रमेश गिरि’, ‘नैमिषारण्य नेपाल’, ‘काभ्रेका केही सुवासहरू’, ‘धनेश्वर वन्दना’, ‘सत्यनारायण व्रतकथा’, ‘वेदान्तशिरोमणि एक अध्ययन’, ‘आँसु पुछेपछि’, ‘कपिलवस्तुमा भगवान्’ र ‘मेरा पद्यात्मक पाइलाहरू’ रहेका छन् ।

शब्दयात्रा प्रकाशनद्वारा आगामी मङ्सिर महिनामा शब्दयात्रा बालसाहित्य सम्मान, शब्दयात्रा अनुसन्धान सम्मान, शब्दयात्रा समालोचना सम्मान, शब्दयात्रा महिला–प्रतिभा सम्मान र शब्दयात्रा कविता–काव्य सम्मान समर्पण गरिने भएकाले यी सम्मानहरू समर्पण गर्न योग्य व्यक्ति वा संस्थाको नाउँ र योगदानको विवरण आगामी कार्तिक २५ गतेभित्र प्राप्त हुने गरी पठाइदिन शब्दयात्रा प्रकाशनले सबै शुभेच्छुकहरूमा अनुरोध गरेको छ ।
शब्दयात्रा प्रकाशनको कार्यालय अक्षरधाम बनेपा काभ्रेमा आफैँ आएर अथवा इमेलबाट अथवा दूरभाषाङ्क ०११–६६२९६२ र ०११–६६१३६१ बाट सिफारिस गर्न सकिने जानकारी पनि शब्दयात्रा प्रकाशनले गराएको छ ।
उल्लिखित सम्मानहरूको आर्थिक व्यवस्थापन गोपाल पराजुली, राजेन्द्र विरही, हरिगोपाल प्रधान, द्रोणप्रसाद श्रेष्ठ र कविप्रसाद प्याकु¥यालले गर्नुभएको छ ।

शब्दयात्रा प्रकाशनका अध्यक्ष हरि मञ्जुश्रीको सम्पादनमा बालसाहित्यकार गोपाल पराजुलीका विषयमा लेखिएका लेख–समीक्षाहरूको सँगालोका रूपमा ‘बालमनका गोपाल (द्रष्टाको दृष्टि)’ नामक कृति प्रकाशन भएको छ ।
ओरिएन्टल पब्लिकेसनद्वारा प्रकाशित उक्त पुस्तक २६४ पृष्ठको रहेको छ भने मूल्य ३५० रुपियाँ राखिएको छ । यस पुस्तकमा बालसाहित्यकार गोपाल पराजुलीको व्यक्तित्व र कृतित्वका विषयमा ७० भन्दा बढी सङ्ख्याका लेखक–पत्रकारहरूले लेखेर विभिन्न पुस्तक–पत्रिकामा प्रकाशित गराइसकेका लेख–समीक्षाहरू सङ्कलन गरिएका छन् ।
गोपाल पराजुली शब्दयात्रा प्रकाशन सम्मान व्यवस्थापक समाजका सदस्य तथा नन्दिकेश्वर अधिकारी शोध सम्मानद्वारा सम्मानित व्यक्तित्व हुनुहुन्छ ।

शब्दयात्रा प्रकाशनले हरेक वर्षको मङ्सिर महिनामा शब्दयात्रा अनुसन्धान सम्मान समर्पण गर्ने गरेकोमा यस वर्षदेखि उक्त सम्मानको आर्थिक व्यवस्थापन अन्वेषक तथा शिक्षासेवी राजेन्द्र विरहीले बहन गर्ने हुनुभएको छ । त्यसका लागि उहाँले आफ्ना साहित्यकार तथा शिक्षासेवी पिता जयदेव अधिकारीको स्मृतिमा १ लाख रुपियाँ शब्दयात्रा प्रकाशनको अक्षयकोषमा राखिदिने घोषणा गर्नुभएको छ । उक्त रकम आगामी मङ्सिर महिनामा हस्तान्तरण गर्ने जानकारी उहाँले गराउनुभएको छ । आगामी मङ्सिर महिनाको सम्मानका लागि ११ हजार १ सय ११ रुपियाँ छुट्टै प्रदान गर्ने जानकारी पनि उहाँले गराउनुभएको छ ।
मङ्सिर महिनामा अनुसन्धान, बालसाहित्य, महिला प्रतिभा, समालोचना र कविता–काव्य विधाका सम्मानहरू समर्पण गरिनेछन् ।

दसैँ, तिहार, छठ र नेपाल सम्वत् ११३८ का अवसरमा शब्दयात्रा प्रकाशन, नीलकण्ठेश्वरधाम संरक्षण समिति र गोसाइँस्थान नैमिषारण्य क्षेत्र विकास समितिको संयुक्त आयोजनामा शब्दयात्रा प्रकाशनको सभाकक्ष नीलकण्ठेश्वरधाम नैमिषारण्य क्षेत्र बनेपामा शुभकामना आदानप्रदान तथा जलपान कार्यक्रमको आयोजना गरियो ।
काठमाडौँ विश्वविद्यालयका संस्थापक उपकुलपति नेपालका शैक्षिक शिरोभूषण डा. सुरेशराज शर्माको प्रमुख आतिथ्य तथा अन्वेषक तथा शिक्षासेवी राजेन्द्र विरहीको सभापतित्वमा सम्पन्न उक्त कार्यक्रममा नीलकण्ठेश्वरधाम संरक्षण समितिका अध्यक्ष कृष्णमणि कुइँकेलले स्वागत मन्तव्य व्यक्त गर्नुभएको थियो । पदमनाथ ढुङ्गानाद्वारा सञ्चालित उक्त कार्यक्रममा गोसाइँस्थान नैमिषारण्य क्षेत्र विकास समितिका अध्यक्ष मुकुन्दप्रसाद उपाध्याय, शब्दयात्रा प्रकाशनका अध्यक्ष हरि मञ्जुश्री र नैमिषारण्य संस्कृत गुरुकुलम्का आचार्य पर्वतराज घिमिरेले शुभकामना मन्तव्य व्यक्त गर्नुभएको थियो ।
कार्यक्रममा सभापति राजेन्द्र विरहीले शब्दयात्रा प्रकाशनका लागि ‘जयदेव अधिकारी स्मृतिग्रन्थ’ हस्तान्तरण गर्नुभएको थियो । उक्त स्मृतिग्रन्थ शब्दयात्रा प्रकाशनका तर्फबाट जगन्नाथ गिरीले ग्रहण गर्नुभएको थियो ।
उक्त अवसरमा सुभाष स्मृति प्रतिष्ठानका तर्फबाट शिक्षासेवी रामप्रसाद अधिकारीले नीलकण्ठेश्वरधाम संरक्षण समितिका लागि कृष्णमणि कुइँकेललाई ‘सुभाष’ पत्रिका उपहारस्वरूप प्रदान गर्नुभएको थियो । उक्त पत्रिका समितिका तर्फबाट समारोहमा उपस्थित सम्पूर्ण महानुभावहरूलाई दीपक तिमल्सिना र दीक्षा घिमिरेले उपलब्ध गराउनुभएको थियो ।
नैमिषारण्य संस्कृत गुरुकुलम्का वटुकहरूले स्वस्तिवाचन गरेको उक्त कार्यक्रममा मोहनविनोद बजगाईंले मञ्चस्थ महानुभावहरूलाई रुद्राक्षको माला लगाइदिएर स्वागत गर्नुभएको थियो । कार्यक्रमका छायाछविकार सुदर्शन आचार्य हुनुहुन्थ्यो ।
कार्यक्रममा अग्रज लोकगायक मच्छेश्वर सापकोटा, खाइबा लामा, फणीन्द्रराज अधिकारी, श्री शर्मा मूर्ख, दण्डपाणि अधिकारी, छविलाल कुइँकेल, नानीदेवी कुइँकेल, वासुदेव कुइँकेल, पूर्णबहादुर कार्की, पुण्यवती घले, गीता कुइँकेल, राधा अधिकारी, सहदीप पलाञ्चोके आदिसहित तीनै संस्थाका महानुभावहरूको उपस्थिति रहेको थियो ।

काठमाडौँ विश्वविद्यालयमा शब्दयात्रा प्रकाशनको सम्मानित व्यक्तित्व चयन समितिका सदस्य सम्बोजन लिम्बू (सोह«ौँ समिति) र डा. सरस्वती आचार्य (सत्रौँ समिति) असिस्टेन्ट प्रोफेसर तथा भरतकुमार श्रेष्ठ (सोह«ौँ समिति) र श्रीमती रीमा खनाल (अठाह«ौँ समिति) म्यानेजर बन्नुभएकोमा हार्दिक बधाई !

शब्दयात्रा प्रकाशन

‘ठाडोभाका गायन शिरोमणि’ उपाधिबाट विभूषित एवं ‘भेडीखर्के साइँला’ उपनामबाट सुपरिचित लोकगायक दीर्घराज अधिकारीको निधनबाट नेपाली लोकसङ्गीत क्षेत्रमा अपूरणीय क्षति भएको छ । उहाँप्रति हार्दिक शब्दश्रद्धा !

शब्दयात्रा प्रकाशन

दसैं, तिहार, छठ र नेपाल सम्वत्को अवसरमा शुभकामना आदानप्रदान तथा जलपान कार्यक्रम निम्नलिखित स्थान, मिति र समयमा आयोजना गरिएको हुनाले उपस्थितिका लागि हार्दिक अनुरोध छ ।

स्थान : शब्दयात्रा प्रकाशनको सभाकक्ष, नीलकण्ठेश्वरधाम परिसर, नैमिषारण्य क्षेत्र, बनेपा — ६, काभ्रे
मिति : २०७४ साल असोज ४ गते बुधबार
समय : अपराह्न ३ बजे

शब्दयात्रा प्रकाशन,
नीलकण्ठेश्वरधाम संरक्षण समिति, र
गोसाइँस्थान नैमिषारण्य क्षेत्र विकास समिति

शब्दयात्रा प्रकाशनको साप्ताहिक प्रवचन कार्यक्रम ‘कर्मयोद्धासँग शब्दसंवाद’ दसैँका कारणले केही समयसम्म स्थगित गरिने भएको छ ।
शब्दयात्रा प्रकाशनका महाप्रबन्धक शारदाप्रसाद शर्माले दिनुभएको जानकारीअनुसार आगामी असोज ६, १३ र २० गते गरी तीन हप्ता ‘कर्मयोद्धासँग शब्दसंवाद’ कार्यक्रम सञ्चालन गरिने छैन, असोज २७ गते शुक्रबारदेखि पुनः सञ्चालन गरिनेछ ।

शब्दयात्रा प्रकाशनको नियमित साप्ताहिक प्रवचन कार्यक्रम ‘कर्मयोद्धासँग शब्दसंवाद’ को एकतीसौँ शृङ्खला गत २०७४ भदौ ३० गते शुक्रबार शब्दयात्रा प्रकाशनको सभाकक्षमा सम्पन्न भयो । पदमनाथ ढुङ्गानाको सञ्चालनमा सञ्चालित उक्त कार्यक्रमको सभापतित्व प्रसिद्ध लोकगायक मच्छेश्वर सापकोटाले गर्नुभएको थियो भने प्रमुख वक्ताका रूपमा दिवाकर जङ्गमले योग र मुद्रासम्बन्धी जानकारीहरूका साथै तत्सम्बन्धी आफ्ना विचारहरू प्रस्तुत गर्नुभएको थियो ।
उक्त कार्यक्रममा श्री शर्मा मूर्ख, फणीन्द्रराज अधिकारी, विष्णुहरि तिमल्सिना, छविलाल कुइँकेल, सहदीप पलान्चोके, भाजुराम तखाछे, शारदाप्रसाद शर्मा, दीक्षा घिमिरे आदिको उपस्थिति रहेको थियो ।