शब्दयात्रा प्रकाशनले ‘भोजप्रबन्ध’ नामक कृति प्रकाशन गर्न लागेको छ । नेपाल र भारतमा प्रसिद्ध रहेको कृति ‘भोजप्रबन्ध’ लाई गद्य र पद्य मिश्रित चम्पु विधामा नेपाली भाषामा श्रीधर प्याकुरेलले अनुवाद गर्नुभएको हो ।
राजा भोज र महाकवि कालिदासका अनेक रोचक प्रसङ्गहरू रहेको ‘भोजप्रबन्ध’ मूल संस्कृत भाषामा लेखिएको छ । यसको अनुवाद हिन्दी र अङ्ग्रेजीलगायत विभिन्न भाषाहरूमा भइसकेको छ ।
यो कृति शब्दयात्रा प्रकाशनको १२० औँ प्रकाशनपुष्प हुनेछ ।
शब्दयात्रा प्रकाशनबाट ‘भोजप्रबन्ध’ छापिँदै
‘शब्दसंवाद’ मा चूडाप्रसाद चौलागाईं
शब्दयात्रा प्रकाशनको साप्ताहिक प्रवचन कार्यक्रम ‘कर्मयोद्धासँग शब्दसंवाद’ को ८० औँ शृङ्खला गत २०७५ चैत ८ गते शुक्रबार शब्दयात्रा प्रकाशनको सभाकक्षमा सम्पन्न भयो । उक्त कार्यक्रममा ‘नेपालभूमि राष्ट्रिय साप्ताहिक’ पत्रिकाका कार्यकारी सम्पादक चूडाप्रसाद चौलागाईं प्रमुख वक्ताका रूपमा समुपस्थित हुनुहुन्थ्यो । उहाँले अष्टावक्रगीताका विषयमा सारगर्भित प्रवचन गर्नुभएको थियो ।
शिक्षासेवी रामप्रसाद अधिकारीको सभापतित्व, लेखक डा. इन्दुल केसीको प्रमुख आतिथ्य र शब्दयात्रा प्रकाशनका महाप्रबन्धक शारदाप्रसाद शर्माको सञ्चालनमा सम्पन्न भएको उक्त कार्यक्रममा जग्गादाता कृष्णमणि कुइँकेल, लेखकहरू केदारनाथ तिमल्सिना, सहदीप पलान्चोके, पुण्यवती घले र पूर्णबहादुर कार्की, व्यवस्थापनविद् श्री शर्मा मूर्ख, नवराज पराजुली, खुदकुमार दाहाल, पुरुषोत्तम हुमागाईं, नानुदेवी कुइँकेल, रीक्षा घिमिरे आदिको समुपस्थिति रहेको थियो ।
हार्दिक बधाई
शब्दयात्रा साहित्यिक पत्रिका सम्मान, २०७० बाट सम्मानित ‘अभिव्यक्ति’ साहित्यिक पत्रिकाका सम्पादक नगेन्द्रराज शर्मा बद्री राष्ट्रिय कलाश्री पत्रकारिता पुरस्कार, २०७५ बाट पुरस्कृत हुनुभएकोमा हार्दिक बधाई ज्ञापन गर्दछौं ।
शब्दयात्रा प्रकाशन परिवार
चिरशान्तिको कामना
शब्दयात्रा सामाजिक जागरण सम्मान, २०७२ बाट सम्मानित अग्रज समाजसेवी भीमबहादुर अधिकारीकी धर्मपत्नी रेवती अधिकारीको स्वर्गारोहण भएकाले गतात्माको चिरशान्तिको कामना गर्दै शोकसन्तप्त परिवारजनमा धैर्य धारण गर्ने शक्ति प्राप्त होस् भनी भगवान्सँग प्रार्थना गर्दछौं ।
शब्दयात्रा प्रकाशन परिवार
‘शब्दसंवाद’ मा ज्यो. रमेश अधिकारी
शब्दयात्रा प्रकाशनको नियमित साप्ताहिक प्रवचन कार्यक्रम ‘कर्मयोद्धासँग शब्दसंवाद’ को ७९ औँ शृङ्खला गत २०७५ चैत १ गते शुक्रबार शब्दयात्रा प्रकाशनको सभाकक्षमा सम्पन्न भयो । कार्यक्रमका प्रमुख वक्ताका रूपमा ज्योतिष पण्डित रमेश अधिकारी रहनुभएको थियो । लेखिका सुभद्रा दाहालको प्रमुख आतिथ्य र पूर्णबहादुर कार्कीको सभापतित्वमा सम्पन्न उक्त कार्यक्रम ‘नेपालभूमि’ राष्ट्रिय साप्ताहिक पत्रिकाका कार्यकारी सम्पादक चूडाप्रसाद चौलागाईंले सञ्चालन गर्नुभएको थियो । कार्यक्रममा प्रमुख वक्ता ज्यो. पं. रमेश अधिकारीले ज्योतिष विज्ञानसम्बन्धी जानकारी गराउनुभएको थियो ।
उक्त कार्यक्रममा शब्दयात्रा प्रकाशनका अध्यक्ष हरि मञ्जुश्री, लेखिका पुण्यवती घले, समाजसेवी छविलाल कुइँकेल, स्तम्भकार सहदीप पलान्चोके, व्यवस्थापनविद् श्री शर्मा मूर्ख, चन्द्रमान सुवाल, विदुर थापा, नवराज पराजुली, लक्ष्मी हुमागाईं, रीक्षा घिमिरे आदिको समुपस्थिति रहेको थियो ।
हार्दिक बधाई
शब्दयात्रा आमसञ्चार सम्मानबाट सम्मानित पत्रकार श्रीधर खनाल र शब्दयात्रा बालसाहित्य सम्मानबाट सम्मानित बालसाहित्यकार कल्पना प्रधान वासु शशी स्मृति परिषद्बाट आगामी २०७५ चैत १२ गते रु. १०००० सहित सम्मानित हुन लाग्नुभएकोमा हार्दिक बधाई ज्ञापन गर्दछौं ।
शब्दयात्रा प्रकाशन परिवार
गोत्र विवाद निरूपण समिति गठन
शब्दयात्रा प्रकाशनका अध्यक्ष हरि मञ्जुश्रीसहित केही अधिकारीहरूलाई कश्यपगोत्रीय अधिकारी वंश प्रतिष्ठानको केन्द्रीय समितिले ‘कश्यप–काश्यप गोत्र विवाद निरूपण समिति’ मा मनोनयन गरी कश्यप गोत्र र काश्यप गोत्रका बीचमा रहेको भेद निरूपण गर्ने जिम्मेवारी दिएको छ ।
अधिकारीहरूमध्ये कसैले कश्यप गोत्र हो भन्ने गरेको, कसैले काश्यप गोत्र हो भन्ने गरेको, कसैले कश्यप र काश्यप फरक गोत्र हुन् भनी वैवाहिक सम्बन्ध चलाएको र कसैले दुवै एकै हो भन्ने गरेको हुनाले अधिकारीहरूले भन्नुपर्ने र लेख्नुपर्ने गोत्र कश्यप वा काश्यप के हो, त्यसको निक्र्योल गरी प्रतिवेदन प्रस्तुत गर्न ‘कश्यप–काश्यप गोत्र विवाद निरूपण समिति’ को गठन गरिएको जानकारी प्रतिष्ठानले गराएको छ ।
समितिमा नरेन्द्रकुमार अधिकारी, डा. बलदेव अधिकारी, प्रा. सीताराम अधिकारी र राजेन्द्र विरही पनि रहनुभएको छ ।
शब्दयात्रामा कवितागोष्ठी
शब्दयात्रा प्रकाशन नारी स्रष्टा समाजको आयोजनामा अन्तर्राष्ट्रिय श्रमिक महिला दिवसको अवसर पारी कवितागोष्ठीको आयोजना गरियो । शब्दयात्रा प्रकाशनको सभाकक्षमा गत २०७५ फागुन २४ गते शुक्रबार आयोजित उक्त गोष्ठीमा हरि मञ्जुश्री, राधा कार्की, डा. इन्दुल केसी, पं. रमेश अधिकारी, सुभद्रा दाहाल, मीरा चापागाईं पौड्याल, ओतबहादुर खड्का, गीता मञ्जुश्री, ललिता अधिकारी, केदारनाथ तिमल्सिना, सरस्वती चिमोरिया, पुण्यवती घले, शारदाप्रसाद शर्मा, दामोदर घिमिरे, चन्द्रमान सुवाल, यज्ञबहादुर कार्की आदिले कविता पाठ गर्नुभएको थियो ।
कार्यक्रममा कृष्णमणि कुइँकेल, रामप्रसाद अधिकारी, श्रीराम शर्मा धिताल, श्री शर्मा मूर्ख, चूडाप्रसाद चौलागाईं, छविलाल कुइँकेल, नवराज पराजुली, रीक्षा घिमिरे आदिको समेत सहभागिता रहेको थियो । शब्दयात्रा प्रकाशनका अध्यक्ष हरि मञ्जुश्रीको सभापतित्व, साहित्यकार राधा कार्कीको प्रमुख आतिथ्य र पत्रकार यज्ञबहादुर कार्कीको आतिथ्यमा सञ्चालित उक्त कार्यक्रमको सञ्चालन शारदाप्रसाद शर्माले गर्नुभएको थियो ।
‘शब्दसंवाद’ मा राधा कार्की
शब्दयात्रा प्रकाशनको नियमित साप्ताहिक प्रवचन कार्यक्रम ‘कर्मयोद्धासँग शब्दसंवाद’ को ७८ औँ शृङ्खला गत २०७५ फागुन २४ गते शुक्रबार शब्दयात्रा प्रकाशनको सभाकक्षमा सम्पन्न भयो । शब्दयात्रा प्रकाशनका अध्यक्ष हरि मञ्जुश्रीको सभापतित्व र यज्ञबहादुर कार्कीको आतिथ्यमा संस्थाका महाप्रबन्धक शारदाप्रसाद शर्माद्वारा सञ्चालित उक्त कार्यक्रममा साहित्यकार राधा कार्कीले अन्तर्राष्ट्रिय श्रमिक महिला दिवस र साहित्यिक संस्थाका विषयमा मन्तव्य व्यक्त गर्दै आफ्ना केही गद्यकविताहरू वाचन गर्नुभएको थियो ।
कार्यक्रममा विभिन्न कवि–कवयित्रीहरूको उपस्थिति रहेको थियो ।
लेख–संस्मरण उपलब्ध गराइदिन अनुरोध
‘नेपालभूमि राष्ट्रिय साप्ताहिक’ का संस्थापक सम्पादक अग्रज पत्रकार तथा लेखक रामचन्द्र हुमागाईंको स्मृति र सम्मानमा शब्दयात्रा प्रकाशनबाट ‘पत्रकार रामचन्द्र हुमागाईं स्मृतिग्रन्थ’ प्रकाशित गरिने भएको छ । उक्त स्मृतिग्रन्थमा प्रकाशन गर्नका लागि रामचन्द्र हुमागाईंको जीवनी, व्यक्तित्व, कृतित्व, संस्मरण, समीक्षा, सम्बन्धित तस्बिर र अन्य सम्बन्धित सामग्रीहरू यस संस्थामा उपलब्ध गराइदिन अनुरोध छ ।