Shabdayatra Prakashan

शब्दयात्रा प्रकाशनले २०७७ सालको दोस्रो चरणमा समर्पण गर्नुपर्ने विभिन्न ९ विधाका सम्मानका लागि उपयुक्त व्यक्ति वा संस्थाको नाउँ चयन गरी सञ्चालक समितिसमक्ष सिफारिस प्रस्तुत गर्न तीन सदस्यीय सम्मान्य व्यक्तित्व चयन समितिको गठन गरेको छ ।
‘अक्षरधाम’ साहित्यिक पत्रिकाका सम्पादक–प्रकाशक तथा लेखिका श्रीमती रश्मि हुमागाईंको संयोजकत्वमा गठित उक्त समितिमा लेखक साधुराम गिरी र समाजसेवी वेदप्रसाद गौतम सदस्य रहनुभएको छ ।
यस समितिले सम्मान गर्नुपर्ने व्यक्ति वा संस्थाको चयन यही पुस महिनाभित्र गर्नेछ । त्यसपछि मात्र सम्मान गरिने व्यक्ति वा संस्थाको नाउँ शब्दयात्रा प्रकाशनले घोषणा गर्नेछ ।

शब्दयात्रा प्रकाशनले म्युजिक भिडिओको निर्माण गरेको छ । शब्दयात्रा प्रकाशनका संस्थापक सदस्य हरिगोपाल प्रधानको ‘जीवनभरि तिमीलाई साथ दिन्छु’ बोलको आधुनिक गीतमा म्युजिक भिडिओको निर्माण गरिएको हो । उहाँ वरिष्ठ गीतकार, स्वतन्त्र पत्रकार, फोटो पत्रकार र साहित्यकार पनि हुनुहुन्छ ।
म्युुजिक भिडिओमा गायिका सरिता अधिकारीको स्वर र सङ्गीतकार किशोर खतिवडाको सङ्गीत रहेको छ । प्रदीपराज वन्त र कृजना डङ्गोलले नायक–नायिकाका रूपमा अभिनय गर्नुभएको उक्त म्युजिक भिडिओको नृत्यनिर्देशन लक्ष्मी खड्गीले र छायाङ्कन तथा सम्पादन सोहन मानन्धरले गर्नुभएको छ भने गीतका अन्य कलाकारहरू कुसुम तामाङ, नेहा महर्जन, मेघना महर्जन र नीलम तामाङ रहनुभएको छ ।
गीतका सिनियर एरेन्जर र संयोजक अमूल कार्कीढली, शृङ्गार सहयोगी हेम पुन मगर, मनु थापा मगर र रेखा बलामी, वेशभूषा सहयोगी शोभा महर्जन र कुसुम श्रेष्ठ, व्यवस्थापन सहयोगी निकेश सुवेदी, स्थीर फोटोग्राफर तथा निर्देशक राजेश मानन्धर, प्रबन्ध निर्देशक पदमसागर कक्षपति हुनुहुन्छ । गीतको छायाङ्कन फर्पिङ लुमन्ती स्थानमा गरिएको छ ।

शब्दयात्रा प्रकाशनले काभ्रे जिल्लाका पुराना राजनीतिक व्यक्तित्व गोविन्दनाथ उप्रेतीको सम्मानमा अभिनन्दनग्रन्थको प्रकाशन गर्ने भएको छ । उक्त अभिनन्दनग्रन्थमा प्रकाशन गर्नका लागि गोविन्दनाथ उप्रेतीका विषयमा आफ्नो संस्मरण र मूल्याङ्कन सकेसम्म छिटै उपलब्ध गराइदिन शब्दयात्रा प्रकाशनले सबैमा हार्दिकतापूर्वक अनुरोध गरेको छ । गोविन्दनाथ उप्रेतीका कार्यहरूको मूल्याङ्कन गरिएका लेखहरू काभ्रे जिल्लाका बौद्धिक व्यक्तित्वहरूबाट प्राप्त हुने अपेक्षा गरिएको छ ।

शब्दयात्रा प्रकाशनले कोरोना महामारी भएकै अवस्थामा पनि स्वास्थ्यसम्बन्धी पूर्ण सतर्कताका साथ सीमित व्यक्तिको उपस्थितिमा केही कार्यहरू सम्पन्न गर्न सकेको छ । जस्तै —
आजीवन सदस्य चारजना थप गरियो । सामाजिक परीक्षण मूल्याङ्कन गराइयो । शब्दयात्रा स्तम्भ निर्माण तथा अनावरण गराइयो । शब्दयात्रा शारदा मन्दिर निर्माण गरी पूर्णता दिइयो । शब्दसाधक तीर्थलाई सुरक्षित पार्न फलामको बारबन्देज थपियो । कार्यालयमा बिजुलीको मिटर जडान गरियो । सालिकका लागि सहयोग गर्ने दाताहरूको अभिलेख बनाई अनावरण गराइयो । बन्दाबन्दीकै अवस्थामा पनि १३ वटा पुस्तक प्रकाशन गरी प्रकाशित पुस्तकको सङ्ख्या १५० पु¥याइयो । पुस्तक सार्वजनिकीकरण कार्यक्रमहरू गर्न सकियो । ‘शब्दसञ्चार’ नामक साप्ताहिक रेडियो कार्यक्रम बन्द रहेकोमा २०७७ साल वैशाखको पहिलो सातादेखि प्राइम एफएम १०४.५ बाट पुनः प्रसारण सुरु गरियो । कार्यालयको सुरक्षाका लागि फलामको द्वार बनाइयो । नीलकण्ठेश्वरको ट्रसमा बार लगाइयो ।
यसै गरी पुस्तकालयका लागि पुस्तकहरू थप गरियो । पुस्तकालयका लागि दुइटा दराज सहयोगस्वरूप प्राप्त गर्न सकियो । प्राप्त भएका पुस्तकहरूमध्ये २ हजारभन्दा केही बढी पुस्तकको अभिलेख राखियो । ‘कर्मयोद्धासँग शब्दसंवाद’ कार्यक्रम फाटफुट रूपमा मात्रै भए पनि सञ्चालन गरियो । ‘नेपालभूमि’ का स्तम्भकारहरूलाई स्मृतिचिह्न प्रदान गरियो । प्रदेश सभासद्, प्रमुख जिल्ला अधिकारी, जिल्ला समन्वय समितिका प्रमुख, पूर्वउपकुलपति, साहित्यकारहरू आदिलाई शब्दसाधक तीर्थको अवलोकन गराइयो । बनेपा नीलकण्ठेश्वरमा रहेको जग्गामा बन्ने संरचनाका लागि गुरुयोजनाको खाका निर्माण गराइयो । ‘शब्दयात्रा कर्मशीलता पुरस्कार’ प्रदान गरियो । सम्मान समर्पण गर्ने कार्य बाँकी राखेर त्यससँग सम्बन्धित आवश्यक अन्य कार्यहरू अनलाइन पद्धतिबाट सम्पन्न गरियो ।
कोभिड — १९ का कारण शब्दयात्रा प्रकाशन परिवार यति कार्यमै मात्र सन्तुष्ट बन्न बाध्य बनेको छ ।