शब्दयात्रा प्रकाशनले शारीरिक रूपमा विकलाङ्ग र आर्थिक रूपमा विपन्न तर अध्ययनमा जेहेन्दार विद्यार्थीलाई हरेक वर्ष प्रदान गर्ने गरी छात्रवृत्तिको व्यवस्था गरेको छ । छात्रवृत्ति कोषका लागि भोजपुर जिल्ला षडानन्द नगरपालिका वडा नं. ८ दिङला तुङ्गेछा घर भई हाल काठमाडौँको शङ्खमूलमा बसोवास गर्ने सहप्राध्यापक रूपनारायण श्रेष्ठले आफ्ना मातापिता भूपलक्ष्मी श्रेष्ठ र मुक्तिबहादुर श्रेष्ठका नाउँमा एक लाख एक हजार रुपियाँको चेक शब्दयात्रा प्रकाशनलाई हस्तान्तरण गर्नुभएको छ ।
शब्दयात्रा प्रकाशनले द्रोणप्रसाद श्रेष्ठको आर्थिक व्यवस्थापनमा पत्रकारिता विषय अध्ययन गर्ने विपन्न तर जेहेन्दार छात्रालाई हरेक वर्ष छात्रवृत्ति उपलब्ध गराउँदै आएकोमा २०७८ सालदेखि हरेक वर्ष प्रदान गर्ने गरी थप छात्रवृत्तिको व्यवस्था गरेको हो ।
यही २०७७ साल माघ २ गते शुक्रबार आयोजित कार्यक्रममा छात्रवृत्ति कोषका लागि सहप्राध्यापक रूपनारायण श्रेष्ठले एक लाख एक हजार रुपियाँको चेक शब्दयात्रा प्रकाशनका संस्थापक अध्यक्ष हरि मञ्जुश्रीलाई हस्तान्तरण गर्नुभएको हो । त्यस बखत शब्दयात्रा प्रकाशन र रूपनारायण श्रेष्ठका बीच छात्रवृत्तिको व्यवस्थापन सम्बन्धी सम्झौतापत्रमा हस्ताक्षर गरी सम्झौतापत्र आदानप्रदान पनि गरिएको थियो । विकलाङ्ग छात्रवृत्तिका लागि आर्थिक व्यवस्थापन गरिदिनुभएकोमा शब्दयात्रा प्रकाशनले रूपनारायण श्रेष्ठप्रति हार्दिक आभार व्यक्त गरेको छ ।
शब्दयात्राबाट थप छात्रवृत्तिको व्यवस्था
शब्दयात्राबाट चार सम्मानको निर्णय
शब्दयात्रा प्रकाशनले २०७७ सालको दोस्रो चरणमा समर्पण गर्नुपर्ने ९ विधाका सम्मानहरू समर्पण गर्नका लागि व्यक्तित्वहरू चयन गर्न गठित सम्मान्य व्यक्तित्व चयन समितिले विभिन्न ४ विधाका व्यक्तित्वहरूको चयन गरेको छ ।
त्यसअनुसार समालोचना सम्मान भोजपुरका दधिराज सुवेदीलाई र बालसाहित्य सम्मान मोरङका प्रमोद प्रधानलाई समर्पण गरिने भएको छ । यसै गरी साहित्यिक पत्रिका सम्मान पर्वत जिल्लाबाट सरस्वती शर्मा जिज्ञासुको सम्पादनमा प्रकाशन हुने ‘नवमाधुरी’ साहित्यिक पत्रिकालाई र फोटो पत्रकारिता सम्मान ललितपुरका प्रकाश मास्केलाई समर्पण गरिने भएको छ । बाँकी ५ विधाका सम्मानको घोषणा अर्को हप्ता गरिने भएको छ ।
शब्दयात्रा प्रकाशनले सम्मान गर्न योग्य व्यक्तित्वको चयन गर्न तीन सदस्यीय समिति बनाएको थियो ।
स्तम्भकार डा. दुर्गा दाहालको निधन
शब्दयात्रा प्रकाशनद्वारा प्रकाशित ‘नेपालभूमि’ राष्ट्रिय साप्ताहिक पत्रिकाका स्तम्भकार तथा साहित्यकार डा. दुर्गा दाहालको निधन भएको छ । उहाँ अमेरिकामा बस्न थाल्नुभएको थियो ।
अन्तर्राष्ट्रिय नेपाली साहित्य समाजसँग आबद्ध उहाँले पुरस्कारको पनि स्थापना गर्नुभएको थियो । उहाँले अमेरिकाबाटै ‘नेपालभूमि’ का लागि लेखहरू पठाउने गर्नुभएको थियो ।
शब्दयात्रा प्रकाशन परिवार स्तम्भकार डा. दुर्गा दाहालको निधनप्रति गहिरो दुःख व्यक्त गर्दै शोकसन्तप्त परिवारजनप्रति हार्दिक समवेदना व्यक्त गर्दछ ।
गीतकार भैरवनाथ रिमाल ‘कदम’ को निधन
शब्दयात्रा प्रकाशनद्वारा संस्थापित ‘शब्दयात्रा वसन्त शर्मा कविता–काव्य सम्मान’ बाट २०७१ सालमा सम्मानित हुनुभएका अग्रज गीतकार तथा कवि भैरवनाथ रिमाल ‘कदम’ को निधन भएको छ । उहाँको निधन गत शनिबार पुस २५ गते ८६ वर्षको उमेरमा भएको हो ।
भैरवनाथ रिमाल ‘कदम’ को दृश्यमान् स्वरूपको भौतिक विसर्जनबाट व्यथित बनेर शब्दयात्रा प्रकाशनले उहाँलाई सहस्र अश्रुजलबाट मानसिक तर्पण दिएको छ । उहाँका शोकापन्न पारिवारिक सम्बन्धीहरूसमान सहवेदना अनुभूत गरिरहेको शब्दयात्रा प्रकाशन परिवार उहाँको अदृष्ट स्वरूप ब्रह्मलीन होस् भन्ने कामनाका साथ उहाँले गर्नुभएको सारस्वत योगदानप्रति हृदयतः भावपूर्ण शब्दश्रद्धा समर्पण गर्दछ ।
शब्दसाधक तीर्थमा पुग्नेहरूको सङ्ख्या बढ्दै
शब्दयात्रा प्रकाशनले बनेपामा निर्माण गरेको शब्दसाधक तीर्थमा गई तस्बिर खिचाउनेहरूको सङ्ख्या अचेल बढिरहेको छ । नेपालका प्रथम शिक्षासेवी षडानन्द अधिकारी, प्रथम लोकतान्त्रिक पत्रकार देवीप्रसाद सापकोटा, राष्ट्रिय पुरस्कार पाउने प्रथम वैज्ञानिक नरबहादुर भारती, प्रथम साहित्यिक सहिद कृष्णलाल अधिकारी र गीत स्वराङ्कन गर्ने प्रथम गायिका मेलवादेवी गुरुङको सालिक रहेको ठाउँलाई शब्दसाधक तीर्थ भनिएको हो ।
कोरोना महामारीको प्रभाव कम हुँदै गएको अनुभव भएकाले र बीपी राजमार्गबाट यात्रा गर्नेहरूले शब्दयात्रा स्तम्भको उज्यालोका कारण सालिकहरू प्रस्ट देख्न सक्ने भएकाले शब्दसाधक तीर्थमा जानेहरूको सङ्ख्या बढ्न थालेको अनुमान गरिएको छ ।
वाङ्मय अन्तर्गत शिक्षा–शिक्षण, आमसञ्चार–पत्रकारिता, विज्ञान–प्रविधि, भाषा–साहित्य र गीत–सङ्गीत क्षेत्रको साझा थलो भएकाले र यी पाँचै विधाका प्रथम व्यक्तित्वको सालिक नेपालमा बनेपामा मात्रै भएकाले यी पाँचै विधालाई माया गर्नेहरूका लागि शब्दसाधक तीर्थ प्रेरणादायक स्थल बनेको छ । सालिकको छेउमा बसेर तस्बिर खिची सामाजिक सन्जालमा राख्ने युवाहरू पनि धेरै देखिन थालेका छन् ।
शब्दयात्राबाट सम्मानित व्यक्ति ट्रान्सपरेन्सी इन्टरनेसनलमा
शब्दयात्रा प्रकाशनद्वारा संस्थापन गरिएको तथा कृष्णहरि मैनालीद्वारा आर्थिक व्यवस्थापन गरिएको ‘शब्दयात्रा राष्ट्रझङ्कार सम्मान’ बाट २०७३ सालमा सम्मानित हुनुभएका अग्रज सीमाविद् बुद्धिनारायण श्रेष्ठ ट्रान्सपरेन्सी इन्टरनेसनल नेपालको उपाध्यक्ष र शब्दयात्रा प्रकाशनका सहयोगी किरण थापा ट्रान्सपरेन्सी इन्टरनेसनल नेपालको कोषाध्यक्ष पदमा चयन हुनुभएको छ ।
शब्दयात्रा प्रकाशन परिवार उहाँहरूलाई हार्दिकतापूर्वक बधाई ज्ञापन गर्दछ ।
आध्यात्मिक प्रवचनमा सहभागिता
शब्दयात्रा प्रकाशनका संस्थापक अध्यक्ष हरि मञ्जुश्री काठमाडौँ कीर्तिपुरमा अवस्थित भागवतधामको आयोजनामा हुने सत्सङ्ग कार्यक्रममा हरेक आइतबार बेलुका आध्यात्मिक प्रवचन गर्न थाल्नुभएको छ ।
भागवतधामले शब्दयात्रा प्रकाशनका तर्फबाट उहाँलाई आध्यात्मिक प्रवचन कार्यक्रममा जोडिन आग्रह गरेपछि विगत डेढ महिनादेखि उहाँले नियमित रूपमा आध्यात्मिक प्रवचन गर्न थाल्नुभएको हो ।
प्रवचन कार्यक्रममा विभिन्न सञ्चार माध्यमका आध्यात्मिक पत्रकारहरूका साथै उज्ज्वल अधिकारी, भरत जङ्गम, बाबा विश्वनाथ, भक्तिनारायण घिमिरे लगायत प्रबुद्ध व्यक्तित्वहरूको सहभागिता रहने गरेको छ ।
‘सम्झनाका क्षणहरू’ पुस्तक सार्वजनिक
शब्दयात्रा प्रकाशनद्वारा १ सय ४७ औँ प्रकाशनपुष्पका रूपमा प्रकाशित तथा शिक्षासेवी एवं लेखक चूडाप्रसाद चौलागाईंद्वारा लिखित लेख–निबन्ध–सङ्ग्रह ‘सम्झनाका क्षणहरू’ लाई सार्वजनिक गरिएको छ । यही २०७७ साल पुस २२ गते बुधबार शब्दयात्रा प्रकाशनको सभाकक्षमा आयोजित कार्यक्रममा शिक्षासेवी तथा सुभाष स्मृति प्रतिष्ठानका अध्यक्ष चन्द्रबहादुर खड्काले उक्त पुस्तकलाई सार्वजनिक गर्नुभएको हो । यो पुस्तक शब्दयात्रा प्रकाशनको वेबसाइट कथउगदष्अिबतष्यल।अयm।लउ मा पढ्न पाइन्छ ।
शब्दयात्रा प्रकाशनद्वारा प्रकाशित ‘नेपालभूमि’ राष्ट्रिय साप्ताहिक पत्रिकाका पूर्व कार्यकारी सम्पादक रहनुभएका चूडाप्रसाद चौलागाईंको यो पुस्तक उहाँको तेस्रो कृति हो ।
पुस्तक सार्वजनिक गरिएको कार्यक्रममा शब्दयात्रा प्रकाशनका संस्थापक अध्यक्ष हरि मञ्जुश्री, महाप्रबन्धक शारदाप्रसाद शर्मा, आजीवन सदस्यहरू डा. इन्दुल केसी, पण्डित रमेश अधिकारी, केदारनाथ तिमल्सिना, कार्यालय व्यवस्थापक सङ्गीता केसी, दीपक तिमल्सिना, गीतिभास्कर मच्छेश्वर सापकोटा, पत्रकारहरू मोतीराम तिमल्सिना, प्रदीप केसी, ईश्वरीराजकुमार मैनाली, रोजन तामाङ, शुभराज अधिकारी, कपिल कोइराला, मधुसूदन तिमल्सिना आदिको उपस्थिति रहेको थियो ।
शब्दयात्रा प्रकाशनका दाता पत्रकारलाई लीला–मध्यमार्ग सम्मान
शब्दयात्रा प्रकाशनलाई आफ्नो स्वामित्वको ‘नेपालभूमि राष्ट्रिय साप्ताहिक’ पत्रिका निःशुल्क हस्तान्तरण गर्नुभएका दाता पत्रकार रामचन्द्र हुमागाईंलाई ‘लीला–मध्यमार्ग अक्षयकोष’ ले २०७७ सालको ‘लीला–मध्यमार्ग सम्मान’ मरणोपरान्त समर्पण गरेको छ । उहाँलाई समर्पण गरिएको सम्मान उहाँका सुपुत्र राजु हुमागाईंले ग्रहण गर्नुभएको थियो ।
कार्यक्रममा अग्रज राजनीतिकर्मी राजेन्द्र खरेललाई पनि सम्मान गरिएको थियो । उहाँको सम्मान उहाँका सुपुत्र पाँचखाल नगरपालिकाका नगरप्रमुख महेश खरेलले ग्रहण गर्नुभएको थियो ।
सम्मान गर्दा शब्दयात्रा प्रकाशनका संस्थापक अध्यक्ष हरि मञ्जुश्रीले सम्मानपत्र, नेपाल पत्रकार महासङ्घ काभ्रे शाखाका अध्यक्ष मोतीराम तिमल्सिनाले दोसल्ला तथा लीला–मध्यमार्ग अक्षयकोषका संयोजक प्रदीप केसीले टीका, माला र उपहार समर्पण गर्नुभएको थियो ।
बनेपाको नीलकण्ठेश्वर धाममा आयोजित सम्मान कार्यक्रममा शब्दयात्रा प्रकाशनले स्थापना गरेको शब्दसाधक तीर्थमा उपस्थित भई नेपालका प्रथम शिक्षासेवी षडानन्द अधिकारी, प्रथम लोकतान्त्रिक पत्रकार देवीप्रसाद सापकोटा, राष्ट्रिय पुरस्कार पाउने प्रथम वैज्ञानिक नरबहादुर भारती, प्रथम साहित्यिक सहिद कृष्णलाल अधिकारी र गीत स्वराङ्कन गर्ने प्रथम गायिका मेलवादेवी गुरुङको सालिकमा माल्यार्पण गरिएको थियो ।
शब्दयात्राबाट १ सय ५० पुस्तक छापिए
शब्दयात्रा प्रकाशनबाट हालसम्म १ सय ५० वटा पुस्तक प्रकाशित भएका छन् । शब्दयात्रा प्रकाशनको स्थापना भएको १ सय १४ महिना भएकाले यस संस्थाले १ वर्षमा औसत १६ वटा पुस्तक प्रकाशन गरेको र आधारमा यो संस्था पुस्तक प्रकाशनका लागि अग्रणी संस्था बनेको देखिन्छ ।