Shabdayatra Prakashan

काभ्रे जिल्लाकी लेखिका श्रीमती लक्ष्मी बडालले शब्दयात्रा प्रकाशनको आजीवन सदस्यता ग्रहण गर्नुभएको छ । उहाँले केही पुस्तकहरू प्रकाशन गरिसक्नुभएको छ । ‘साहित्यिक चौतारी नेपाल’ लगायतका केही साहित्यिक संस्थाहरूसँग पनि उहाँ आबद्ध हुनुहुन्छ । शब्दयात्रा प्रकाशनको आजीवन सदस्यता ग्रहण गर्नुभएकोमा शब्दयात्रा प्रकाशन उहाँलाई धन्यवाद ज्ञापन गर्दछ ।

शब्दयात्रा प्रकाशनका आजीवन सदस्य डा. भास्कर हुमागाईं एक लाख साठी हजार रुपियाँ राशीसहित टोरेन्ट योङ स्कलर अवार्डबाट सम्मानित हुनुभएको छ । काठमाडौँमा आयोजना गरिएको विशेष समारोहमा उहाँलाई उहाँलाई उक्त सम्मान प्रदान गरिएको हो ।

शब्दयात्रा प्रकाशनको प्रकाशकत्वमा ‘शकुनावली’ नामक पुस्तक प्रकाशन हुने भएको छ । प्रतापदिल साधुले तयार पारेको ‘शकुनावली’ यसअघि सन् १९३६ मा बनारसबाट प्रकाशन भएको थियो । विभिन्न देवताहरूको दर्शनफलका विषयमा लेखिएको उक्त पुस्तकलाई सहदीप पलान्चोकेको सङ्कलन तथा सम्पादनमा शब्दयात्रा प्रकाशनबाट प्रकाशन हुन लागेको हो ।

काभ्रे सेवा समाजको कार्यसमितिका पदाधिकारीहरूले शब्दसाधक तीर्थको अवलोकन गर्नुभएको छ । उहाँहरूले नीलकण्ठेश्वर महादेव, शेषशायी विष्णु, सरस्वती र हनुमानको दर्शन गर्नुका साथै शब्दयात्रा शारदा मन्दिर, शब्दयात्रा पुस्तकालय, शब्दयात्रा स्तम्भ आदिको पनि अवलोकन गर्नुभएको थियो । काभ्रे सेवा समाजको कार्यसमितिका पदाधिकारीहरू समाजका अध्यक्ष केशव थापाको नेतृत्वमा शब्दसाधक तीर्थमा पुग्नुभएको थियो ।

काठमाडौँ विश्वविद्यालयका उपकुलपति प्रा. डा. भोला थापाले शब्दसाधक तीर्थको अवलोकन गर्नुभएको
छ । उहाँले नीलकण्ठेश्वर महादेवको दर्शन गर्नुका साथै शब्दयात्रा शारदा मन्दिर, शब्दयात्रा पुस्तकालय, शब्दयात्रा स्तम्भ आदिको पनि अवलोकन गर्नुभएको थियो ।

शब्दयात्रा प्रकाशनका संस्थापक अध्यक्ष हरि मञ्जुश्रीलाई सुभाष स्मृति प्रतिष्ठानले आगामी चैत महिनामा आयोजना गर्ने वार्षिकोत्सवमा सम्मान गर्ने भएको छ । नेपाली समाजमा आध्यात्मिक जागरण गराउन उहाँले खेल्नुभएको भूमिकाको उच्च मूल्याङ्कन गर्दैै उहाँलाई सम्मान गर्न लागिएको कुरा प्रतिष्ठानका संस्थापक अध्यक्ष चन्द्रबहादुर खड्काले जानकारी दिनुभएको छ । वार्षिकोत्सवमा हरि मञ्जुश्रीका साथमा आध्यात्मिक जागरणका लागि उल्लेख्य भूमिका निर्वाह गर्ने अन्य व्यक्तित्वहरूलाई पनि सम्मान गरिने जानकारी गराइएको छ ।

शब्दयात्रा प्रकाशनबाट प्रकाशित पछिल्ला दुई पुस्तक यही फागुन २२ गते सार्वजनिक गरिने भएका छन् । तीमध्ये किरण त्रिपाठी पन्तद्वारा लिखित ‘कुँडिएका मनहरू’ नामक कवितासङ्ग्रह र नवीना श्रेष्ठद्वारा लिखित ‘शङ्मूल माहात्म्य र कुम्भेश्वर महादेव’ नामक अनुसन्धानमूलक पुस्तक शब्दयात्रा प्रकाशनका १ सय ५१ औँ र १ सय ५२ औँ प्रकाशनपुष्प हुन् । दुवै पुस्तकको मूल्य एक–एक सय रुपियाँ राखिएको छ ।

शब्दयात्रा प्रकाशनका संस्थापक अध्यक्ष हरि मञ्जुश्रीले स्वस्थानी कथाका विषयमा भक्तपुरमा दिनुभएको प्रवचनलाई पत्रकार दीपक भेटवालले छायाङ्कन गरी भिडिओ बनाउनुभएको छ । उक्त भिडिओ शब्दयात्रा प्रकाशनको वेबसाइट www.sypublication.com.np, दीपक भेटवालको फेसबुक र यु–ट्युबबाट सुन्न सकिनेछ ।