Shabdayatra Prakashan

शब्दयात्रा प्रकाशनद्वारा प्रकाशित १ सय ५३ औँ पुस्तक ‘शकुनावली’ सार्वजनिक गरिएको छ । प्रतापदिल साधुले लेख्नुभएको ‘शकुनावली’ ८५ वर्षअघि भारतको बनारसबाट प्रकाशन भएकोमा त्यो पुस्तक अप्राप्य भइसकेको हुँदा त्यसलाई सहदीप पलान्चोकेले सङ्कलन तथा सम्पादन गरेपछि राजेन्द्र थापाको आर्थिक सहयोगमा यो पुस्तक प्रकाशन गरिएको हो ।
शब्दयात्रा प्रकाशनले आयोजना गरेको सार्वजनिकीकरण कार्यक्रममा प्रमुख अतिथि पूर्वप्रशासक तथा लेखक द्रोणप्रसाद श्रेष्ठ, सभाध्यक्ष अग्रज पत्रकार हरिगोपाल प्रधान र पुस्तकका सङ्कलक तथा सम्पादक सहदीप पलान्चोकेले शब्दयात्रा प्रकाशनले चलाएको परम्परा बमोजिम थैलीबाट पुस्तक निकाली संयुक्त रूपमा सार्वजनिक गर्नुभएको थियो ।
यस पुस्तकको बिक्रीबाट प्राप्त भएको सम्पूर्ण रकम सङ्कलक तथा सम्पादकमार्पmत सनातन धनेश्वर भजन मण्डलका लागि खर्च गरिने भएको छ ।

शब्दयात्रा प्रकाशन परिवारका सम्पूर्ण मित्रहरू !
विक्रम सम्वत् अनुसारको नयाँ वर्ष २०७८ आजदेखि प्रारम्भ भएको छ । यस अवसरमा शब्दयात्रा प्रकाशनका संस्थापक, सञ्चालक, सदस्य, दाता, कार्यालय सहयोगी, अर्थसहयोगी, अन्य सहयोगी, लेखक, स्तम्भकार, पाठक, मुद्रक, शुभेच्छुक तथा उहाँहरूका परिवार सबैमा हार्दिक मङ्गलकामना व्यक्त गर्दछु ।
शब्दयात्रा प्रकाशन विचार, विवेक, कल्पनाशीलता र रचनात्मकतालाई जाग्रत गराउने संस्था हो । विचारहरूलाई मन्थन गरेर गूढ तत्त्व फेला पार्ने र त्यस तत्त्वलाई मानव–कल्याणका लागि उपयोग गर्ने हाम्रो संस्कार अनुसार नै हामी आफूलाई अघि बढाऊँ । सम्भावनाका क्षेत्रहरू पहिल्याऊँ । राष्ट्रिय समाज र स्थानीय समुदायको हितमा कार्यक्रमहरू सञ्चालन गरौँ । अनि मात्र हामी शब्दयात्रा प्रकाशनको महिमालाई अझ उच्च बनाउन सक्छौँ ।
नयाँ वर्ष २०७८ ले हामीलाई आफ्नो कर्तव्य निर्वाह गरेर शब्दयात्रा प्रकाशनको गौरव र गरिमा बढाउने उत्साह, उमङ्ग, शक्ति र सामथ्र्य देओस्, यस संस्थासँग जुनसुकै रूपमा सम्बन्धित व्यक्तिमा पनि शान्ति र समृद्धि प्राप्त भएर आत्मबल सुदृढ र जीवन सुखमय बनोस्, शब्दसाधक तीर्थबाट निरन्तर सकारात्मक ऊर्जा प्रवाहित भइरहोस्, नीलकण्ठेश्वर महादेवसँग म यही प्रार्थना गर्दछु ।

शब्दयात्रा प्रकाशनले दुईजना काभ्रेली पत्रकारलाई २०७७ सालका लागि ‘शब्दयात्रा प्रकाशन हरिगोपाल प्रधान कदरपत्र’ प्रदान गरेको छ । नागरिक दैनिकका काभ्रे प्रतिनिधि मधुसूदन गुरागाईं र कामना प्रकाशन समूहका कार्यरत भगवती तिमल्सिनालाई उक्त कदरपत्र प्रदान गरिएको हो ।
शब्दयात्रा प्रकाशनद्वारा आयोजित विशेष कार्यक्रममा पत्रकारद्वय मधुसूदन गुरागाईं र भगवती तिमल्सिनालाई कदरपत्रका व्यवस्थापक तथा कार्यक्रमका सभापति हरिगोपाल प्रधानले कदरपत्र प्रदान गर्नुभएको थियो । कार्यक्रममा सम्मानित पत्रकारको चिनारी चयन समितिका संयोजकका रूपबाट शब्दयात्रा प्रकाशनका सदस्य तथा ‘शब्दसञ्चार’ रेडियो कार्यक्रमका प्रस्तोता शिव बन्जाराले गराउनुभएको थियो ।
सम्मानित पत्रकारद्वय मधुसूदन गुरागाईं र भगवती तिमल्सिनाले शब्दयात्रा प्रकाशनले प्रदान गरेको कदरपत्रले आफूलाई थप ऊर्जा प्राप्त भएको कुरा बताउनुभएको थियो ।
शब्दयात्रा प्रकाशनका संस्थापक सदस्य हरिगोपाल प्रधानले व्यवस्थापन गर्नुभएको उक्त कदरपत्र शब्दयात्रा प्रकाशनले २०७० सालदेखि प्रदान गर्न थालेको हो । यो सम्मानपत्र हरेक वर्ष काभ्रेपलान्चोक जिल्लाका दुईजना सक्रिय पत्रकारलाई प्रदान गर्ने गरिएको छ ।

नेपालका ख्यातिप्राप्त बौद्धिक व्यक्तित्वहरूले शब्दयात्रा प्रकाशनलाई लिखित रूपमा शुभकामना र सन्देशहरू उपलब्ध गराउनुभएको छ । उहाँहरूबाट प्राप्त भएका शुभकामना र सन्देशहरू हामी बेलाबेलामा वाचन गर्नेछौँ । आजको कार्यक्रममा १० जनाले लेख्नुभएका शुभकामना सन्देशहरू वाचन गर्नेछौँ ।
नेपाल प्रज्ञाप्रतिष्ठानका उपकुलपति डा. जगमान गुरुङले लेख्नुभएको छ — शब्दयात्रा प्रकाशन मर्यादित होस् । म शब्दयात्रा प्रकाशनको उत्तरोत्तर अभिवृद्धिको हार्दिक मङ्गलमय शुभकामना अभिव्यक्त गर्दछु । शब्दयात्रा प्रकाशन नेपाल राष्ट्र र नेपाली राष्ट्रियताको उन्नयनतर्फ अग्रसर होस् । राष्ट्रः धारयेत् ध्रुवम् । वयं राष्ट्र जागृयामः पुरोहिता ।
शिक्षाविद् डा. मनप्रसाद वाग्लेले लेख्नुभएको छ — शब्दयात्रा प्रकाशनको नामबाटै यसको अर्थ बुझ्न सकिन्छ । सबै कुराको आ–आफ्नो अर्थ त हुन्छ नै तर शब्दयात्राभित्र शब्दको यात्रा भन्ने अर्थले एउटा छुट्टै स्थान बनाएको छ । कमलजीवीहरूको यो एउटा यस्तो मञ्च हो जहाँ लेखक, कवि, समालोचक एवं शब्दका अन्य पारखीको समेत सम्मान हुन्छ । पुस्तक प्रकाशनदेखि अनवरत रुपमा आफ्नो सेवामा इमानदारीपूर्वक सेवा गर्नेहरूको सम्मान गर्ने क्रियाकलापमा व्यस्त छ शब्दयात्रा प्रकाशन । स्थापना कालदेखि २०७७ पौषसम्ममा १५० पुस्तक प्रकाशन गर्नु र नेपाली साहित्य र वाङ्मयको सम्बर्धन गर्नु ठट्टाको कुरा भएन । यसमा समय, अर्थ र विचारको लगानी प्रशस्त भएको छ र यसले नेपाली भाषाको सम्बद्र्धनमा विशिष्ट योगदान गरिरहेछ । अक्षरधाम साहित्यिक पत्रिका शब्दयात्रा प्रकाशनको अर्को विशेषता मान्न सकिन्छ । यो पत्रिकाको प्रकाशनबाट पाठकहरू त लाभान्वित हुने नै भए, त्यसको अतिरिक्त साहित्य प्रवर्धनमा समेत यसको योगदान अनुकरणीय मान्न सकिन्छ । आपतकालीन अवस्थामा लेखकको सहयोगार्थ स्थापना गरिएको ‘सहयोग कोष’ यसको अर्को महत्वपूर्ण पाटो हो । सहयोग कोष स्थापनार्थ चालिएका कदम र प्रक्रिया हेर्दा यो पारदर्शी देखिन्छ । निःस्वार्थ  भावले सञ्चालन भएको शब्दयात्रा प्रकाशनको सकारात्मक चिन्तन यहाँनेर उल्लेख्य मान्नुपर्दछ । संस्था ठूलो भएर उन्नति हुने होइन । ‘सानो नै राम्रो’ भन्ने सिद्धान्तमा अडिग भई शब्दयात्रा प्रकाशनले आफ्नो गन्तव्य अझ सूक्ष्म रुपमा पहिचान गरोस् । तथापि सङ्घीय, प्रादेशिक र स्थानीय स्तरका ‘शब्दयात्रा’ लाई एउटै मालामा उनेर भाषागत, साहित्यगत र विभिन्न विधागत क्षेत्रमा अग्रसर हुँदै जाओस् भन्ने शुभकामना दिन चाहन्छु ।
गुञ्जन साहित्य संस्थाका अध्यक्ष हिरण्यकुमारी पाठकले लेख्नुभएको छ — साहित्य समाजको ऐना हो । समाजमा भएका कुरीतिहरू, भेदभावका विभिन्न गतिविभिहरूलाई शब्दरुपी घेरामा बुन्दै–बुन्दै पाठकको मन छुने गरी दर्शाउन सक्नु नै साहित्यकारको कुशल लेखन हो भन्ने म ठान्छु । सिद्धहस्त लेखको कलमलाई सम्मान गर्न शब्दयात्रा प्रकाशनले विगत दश वर्षदेखि अनवरत रुपमा महत्वपूर्ण कार्यक्रम गर्दै आएको छ । हरेक वर्ष १८ जना विभिन्न विधाका साहित्यकारहरूलाई सम्मान गर्नुका साथै प्रत्येक वर्ष पत्रकारिता पढ्दै गरेका एक महिला र एक अपाङ्ग विद्यार्थीलाई छात्रवृत्ति प्रदान गर्दै आएकोमा प्रकाशनलाई साधुवाद दिन चाहन्छु । साथै शब्दयात्रा प्रकाशनले देवी माता सरस्वतीको मन्दिर स्थापना गर्नुका साथै पुस्तकालयको स्थापना समेत गरेकोमा प्रकाशन संस्था चिरकालसम्म जीवित रहने र गौरवमय भएको प्रष्ट नै छ । यसबाट त्यस भेगका समाजलाई ठूलो योगदान पुगेको छ । प्रकाशनले यसरी नै साहित्यको विकासको लागि साहित्यकारहरूको आत्मसम्मान बढाउँदै जाओस् भन्ने शुभकामना दिन चाहन्छु ।
साहित्यकार प्रमोद प्रधानले लेख्नुभएको छ — शब्दयात्रा प्रकाशनले गर्दै आएका काम एवं गतिविधिहरू हामी सबैका लागि प्रेरणादायी छन् । पुस्तक प्रकाशन, सम्मान एवं पुरस्कार, रेडियो कार्यक्रम सञ्चालन जस्ता कामहरूका अतिरिक्त विभिन्न विशिष्ट व्यक्तित्वहरूको प्रतिमा स्थापना र संरक्षणको कार्यले अरु संस्थाभन्दा यसले बेग्लै र विशिष्ट परिचय बनाएको छ । मलाई शब्दयात्रा प्रकाशनसँग जोडिन पाएकोमा गौरवबोध भएको छ । वास्तवमा यस्ता सिर्जनात्मक कार्यहरूमा लाग्न र सधै सक्रिय भइरहन गाह«ो छ । तथापि हरि मञ्जुश्रीलगायत सम्बद्ध सबैको समर्पण र सक्रियताले मात्र यो सम्भव हुन सकेको हो ।
पहिलो कम्प्युटर इन्जिनियर देवीप्रसाद चापागाईले लेख्नुभएको छ — शब्दयात्रा प्रकाशनलाई विभिन्न प्रकारको कार्यक्रम सञ्चालन गरेकोमा साधुवाद दिन चाहन्छु । समाजका विविन्न क्षेत्रमा योगदान दिने व्यक्ति चयन गरी सम्मान गर्नु राष्ट्रलाई उन्नतितर्फ लाग्ने प्रयास हो । शब्दयात्रा प्रकाशनको यसरी अनुकरणीय कार्य गरेको छ । म शब्दयात्रा प्रकाशनलाई धन्यवाद दिन्छु ।
ग्रन्थसम्पादक जीवनचन्द्र कोइरालाले लेख्नुभएको छ — काभ्रे जिल्लामा स्थापित शब्दयात्रा प्रकाशन नेपाली भाषा, साहित्य, संस्कृति र ज्ञान विज्ञानका क्षेत्रमा सेवा पु¥याउने ध्येयले विगत १०–१२ वर्षदेखि कार्यरत सामाजिक संस्था हो । यो संस्था साहित्यकार हरि मञ्जुश्रीको नेतृत्वमा काभ्रे क्षेत्रका उत्साहित साहित्यसेवी मित्रहरूको सवल र सफल प्रयासबाट सञ्चालित हुँदै आएको छ । यस संस्थाका सम्पूर्ण सदस्यहरूको सामुहिक प्रयत्नबाट काभ्रे क्षेत्रमा गहकिला एवं नमुना कार्यहरू हुँदै आएका छन् । तसर्थ म यस शब्दयात्रा प्रकाशनका सम्पूर्ण बन्धुहरूलाई सफलताको हार्दिक शुभकामना व्यक्त गर्न चाहन्छु । यहाँहरूले स्रष्टा एवं राष्ट्रका विभूतिहरूको सालिक निर्माण गर्ने, पुस्तकालय र सङ्ग्रहालय बनाउने, स्रष्टाहरूका महत्वपूर्ण कृति प्रकाशन गर्ने महत्तम कार्य गर्दै आउनुभएको छ । यसको म मुरीमुरी प्रशंसा गर्दछु । त्यस्तै यस संस्थाबाट साप्ताहिक पत्रिका प्रकाशन, अक्षरधाम नामक साहित्यिक पत्रिका प्रकाशन, रेडियो कार्यक्रम सञ्चालन, साहित्यिक वेबसाइड सञ्चालन र राष्ट्रिय स्तरका प्रतिभाहरूको सम्मान गर्ने कार्यक्रमहरू पनि नियमित रुपमा सञ्चालन गर्दै आउनु समाजका लागि महत्वपूर्ण कार्यहरू हुन् । आजको विकसित विज्ञान र प्रविधिलाई आत्मसात गरी साहित्यसेवा, समाजसेवाका अनुकरणीय कार्यलाई सर्वसाधारण जनतामा पु¥याउने, सूसुचित गराउने कार्य यहाँहरूबाट जुन प्रभावकारी रुपमा भएको छ, त्यसको म हृदयदेखि नै प्रशंसा गर्न चाहन्छु । तपाईहरूको सकृयता र लगनशिलतामा अझ वृद्धि होस् र यस क्षेत्रकै नमुना संस्था बन्न सकोस् भन्ने हार्दिक शुभेच्छा व्यक्त गर्दछु ।
साहित्यिक पत्रकार सरस्वती शर्मा ‘जिज्ञासु’ ले लेख्नुभएको छ — शब्दयात्रा प्रकाशनको ऐतिहासिक क्रियाकलाप देखेर अत्यन्त हर्षित भएको छु । यो संस्थाले आगामी दिनमा थप साहित्यिक उन्नयन  गर्नेछ भनेर विश्वाससहित हार्दिक शुभकामना अर्पण गर्दछु । विशेषतः हरि मञ्जुश्रीज्यूलाई हार्दिक कृतज्ञता टक्य्राउँछु ।
आख्यानकार प्रजापति तिमिल्सिनाले लेख्नुभएको छ — शब्दयात्रा प्रकाशन जन्मेर यहाँसम्म आइपुग्दा कहिले काँडैकाँडामा हिँड्यो होला । कहिले तीखा ढुङ्गाको बगरै बगर पनि हिँड्यो होला । समस्यालाई कुल्चँदै, पहाड छिचोल्दै यहाँसम्म आइपुगेको होला । अब पनि यसका पैतालामा काँडा बिझेर रनस्ता अवरोध भए हटाइदिने हातहरू उत्ति नै जुटुन् । पयर नडगमगाई अनन्त यात्रामा लागिरहोस् । मङ्गलमय शुभकामना ।
शिक्षासेवी सुश्री एक्कुमाया पुनले लेख्नुभएको छ — शब्दयात्रा प्रकाशनलाई मेरो शुभकामना छ । निरन्तर रूपमा आफ्नो लक्ष्य र उद्देश्यमा अटल रही अघि बढ्नको लागि मेरो हृदयदेखि नै कामना गर्दछु ।
मनोक्रान्ति अभियन्ता सिमोन न्यौपानेले लेख्नुभएको छ — हार्दिक धन्यवाद छ है तिमीलाई । तिम्रो आत्मीय आलोकले आज प्रकाशित गरेको छ मलाई । हार्दिक धन्यवाद छ है तिमीलाई । तिमी युगयुग बाँच्नुपर्छ । शब्दयात्राबाटै सही, धारिला सत्यका आयाम साँच्नुपर्छ । शतशत प्रणाम तिम्रो सत्य प्रयासलाई । हार्दिक धन्यवाद छ है तिमीलाई ।