शब्दयात्रा प्रकाशनका सम्पूर्ण सदस्य महानुभावहरू !
सञ्चालक समितिको मिति २०७८ भदौ १३ गतेको बैठकबाट निर्णय भएअनुसार यही २०७८ साल असोज ९ गते शनिबार अपराह्न १ बजे कृष्ण–गीता परिसर, नीलकण्ठेश्वर धाम, बनेपामा यस शब्दयात्रा प्रकाशनको आठौँ वार्षिक साधारण सभा बस्ने भएकाले प्रकाशनका सम्पूर्ण सदस्यज्यूहरूको जानकारीका लागि यो सूचना प्रकाशित गरिएको छ । यससम्बन्धी विस्तृत जानकारी ‘शब्दसञ्चार’ रेडियो कार्यक्रमको प्रसारण एवं यस प्रकाशनको वेबसाइट www.sypublication.com.np मा र कार्यालयको सूचनापाटीमा सुन्न, हेर्न र पढ्न सकिनेछ । साथै सबै सदस्यज्यूहरूको घर–ठेगानामा पनि पठाइएको छ । कुनै कारणले पत्र प्राप्त नभएमा पनि यसै सूचनालाई आधार मानी सभामा उपस्थित भइदिन सम्बन्धित सबैमा अनुरोध छ । सदस्यज्यूहरूको सुविधाका लागि आवश्यक विवरणहरू कार्यालयमै बसी अध्ययन गर्न सकिने व्यवस्थासमेत मिलाइएकाले कार्यालय समयभित्र कार्यालयमा सम्पर्क राख्न सक्नुहुनेछ ।

आठौँ वार्षिक साधारण सभा, २०७८ मा पेस हुने प्रस्तावहरू —
१. सञ्चालक समितिको प्रतिवेदन, २०७८ छलफल गरी पारित गर्ने ।
२. स्वतन्त्र लेखापरीक्षकको प्रतिवेदनसहित २०७८ असार मसान्तको वासलात र सोही मितिमा सम्पन्न आ. व. २०७७।७८ को नगद प्रवाह विवरण, नाफा नोक्सान विवरण एवं आर्थिक प्रतिवेदन छलफल गरी पारित गर्ने ।
३. आ. व. २०७८।७९ को लेखापरीक्षणका लागि दर्तावाला स्वतन्त्र लेखापरीक्षक नियुक्त गर्ने र निजको पारिश्रमिक तोक्ने ।
४. आ. व. २०७८।७९ को वार्षिक कार्यक्रम र आयव्ययको संशोधित अनुमान तथा २०७९।८० का लागि अनुमानित कार्यक्रम र आयव्यय विवरण छलफल गरी पारित गर्ने ।
५. सञ्चालक समितिको पुनर्गठन गर्ने ।
६. विविध
कुनै सदस्य महानुभावले साधारण सभासमक्ष थप कुनै विषय वा प्रस्ताव प्रस्तुत गर्न चाहेमा सभा सुरु हुनुभन्दा अगावै त्यस्तो विषय वा प्रस्ताव लिखित रूपमा दर्ता गराइसक्नुपर्नेछ । साधारण सभाले स्वीकार गरेमा त्यस्तो विषय वा प्रस्तावलाई साधारण सभाको कार्यसूचीमा समावेश गरी छलफल र निर्णय गर्न सकिनेछ ।

सञ्चालक समितिका आज्ञाले :
………………….
(शारदाप्रसाद शर्मा)
महाप्रबन्धक
१३ भदौ २०७८

शब्दयात्रा प्रकाशनका संस्थापक अध्यक्ष हरि मञ्जुश्रीलाई ५० हजार रुपियाँ र सम्मानपत्रसहितको ‘गोपाल पाँडे असीम पुरस्कार, २०७८’ प्रदान गरिएको छ । विविध विधाका कृति सिर्जनाका साथै विभिन्न रचनात्मक क्रियाकलापद्वारा नेपाली साहित्यको श्रीबृद्धिमा उल्लेखनीय योगदान पु¥याएकोमा उहाँलाई नेपाली शिक्षा परिषदले पुरस्कृत गरेको हो ।
नेपाली शिक्षा परिषदका अध्यक्ष रमा शर्मा सभापति, अग्रज कवि मुकुन्दशरण उपाध्याय प्रमुख अतिथि, पूर्वराजदूत डा. जयराज आचार्य अतिथि वक्ता र डा. इन्दिरा शर्मा कार्यक्रम सञ्चालक हुनुभएको पुरस्कार समर्पण कार्यक्रममा आयोजक संस्थाका गतिविधिबारे समाजसेवी लक्ष्मण थापाले र पुरस्कृत व्यक्तित्व हरि मञ्जुश्रीका विषयमा आख्यानकार भरत जङ्गमले जानकारी गराउनुभएको थियो । स्वागत भाषण संस्कृतिविद तेजेश्वरबाबु ग्वंगःले गर्नुभएको त्यस कार्यक्रममा कवि डा. बमबहादुर थापा जितालीले कविता वाचन गर्नुभएको थियो । कार्यक्रममा डा. मोहन लोहनी, रमेश खकुरेल, कोषराज न्यौपाने, प्रह्लाद पोखरेल, पवन आलोक, धनराज गिरी, होम सुवेदी, मुकुन्द शर्मा चालिसे, खोलाघरे साहिँलो, किरण थापा, चन्द्रवदना घिमिरे, नवीना श्रेष्ठ, हरिगोपाल प्रधान आदिको उपस्थिति रहेको थियो ।