शब्दयात्रा प्रकाशनका संस्थापक अध्यक्ष हरि मञ्जुश्रीसँग सूचना चौतारीका तर्फबाट जुम संवादको आयोजना गरियो । ‘लोकतन्त्र, महामारी र देश’ शीर्षकको नवीनतम शृङ्खलाको उक्त जुम संवाद गत २८ गते बिहीबार आयोजना गरिएको थियो । त्यस शृङ्खलामा उहाँलाई आयोजकका तर्फबाट आग्रह गरिएअनुसार उहाँले ग्रन्थसम्पादक जीवनचन्द्र कोइरालाका विषयमा आफूले थाहा पाएका जानकारीहरू व्यक्त गर्नुभएको थियो । उहाँका साथमा नेपाल संस्कृत विश्वविद्यालयका पूर्वउपकुलपति प्रा. डा. कुलप्रसाद कोइराला तथा सञ्चारकर्मीद्वय पुरुषोत्तम दाहाल र जीवनाथ धमलाले पनि मन्तव्य व्यक्त गर्नुभएको थियो । कवि कलानिधि दाहालले कविता वाचन गर्नुभएको उक्त कार्यक्रममा डा. तुलसी भट्टराई, वनमाली निराकार आदि पनि उपस्थित हुनुहुन्थ्यो । कार्यक्रमको सञ्चालन कवि तथा सञ्चारकर्मी मनोज न्यौपानेले गर्नुभएको थियो ।