- Episode 82 – Shabda Sanchar 31:36
शब्दसञ्चारः पौष १३, २०७८
पुरस्कारका लागि शब्दयात्रामा अर्को अक्षयकोष
शब्दयात्रा प्रकाशनले काभ्रेपलान्चोक जिल्लामा जन्मेर कुनै पनि क्षेत्रमा राष्ट्रिय स्तरको योगदान गरेको व्यक्तिलाई नगद रकम, रुद्राक्षको माला, अभिवन्दनापत्र र शब्दयात्रा पट्टसहित २०७९ सालदेखि हरेक वर्ष पुरस्कृत गर्ने भएको छ । पुरस्कारको नाम ‘शब्दयात्रा लीला–मध्यमार्ग काभ्रेपलान्चोक प्रतिभा पुरस्कार’ राखिएको छ । त्यसका लागि ललितपुर जिल्लाको महालक्ष्मी नगरपालिका वडा नं। ७ चाँगाथलीमा ध्रुव थापा र कल्पना थापाका सुपुत्रका रूपमा जन्मेर हाल अस्ट्रेलियामा बसोवास गर्ने निरोज थापाले आफ्ना मावली हजुरबुबा पनौतीका समाजसेवी लीलाबहादुर केसीको सम्मान तथा स्मृतिमा ‘लीला–मध्यमार्ग सम्मानकोष’ मार्फत पुरस्कारको आर्थिक व्यवस्थापन गरिदिनुभएको छ । यससम्बन्धी सम्झौतापत्रमा शब्दयात्रा प्रकाशनका संस्थापक अध्यक्ष हरि मञ्जुश्रीले शब्दयात्रा प्रकाशनका तर्फबाट र ‘लीला–मध्यमार्ग सम्मानकोष’ का संयोजक तथा निरोज थापाका मामा प्रदीप केसीले निरोज थापाका तर्फबाट हस्ताक्षर गर्नुभएको छ । काभ्रेपलान्चोक जिल्लाका राष्ट्रिय प्रतिभाका लागि पुरस्कारको व्यवस्थापन गरिदिनुभएकोमा निरोज थापा र प्रदीप केसीप्रति शब्दयात्रा प्रकाशन हार्दिक आभार व्यक्त गर्दछ ।
प्रदीप केसी पनि आजीवन सदस्य
‘मध्यमार्ग साप्ताहिक’ का सम्पादक–प्रकाशक तथा ‘लीला–मध्यमार्ग अक्षयकोष’ का संयोजक प्रदीप केसीले शब्दयात्रा प्रकाशनको आजीवन सदस्यता ग्रहण गर्नुभएको छ । उहाँ लेखक, छापाखाना व्यवसायी तथा समाजसेवी पनि हुनुहुन्छ । शब्दयात्रा प्रकाशनको आजीवन सदस्यता ग्रहण गर्नुभएकोमा प्रदीप केसीलाई हार्दिक बधाई छ ।
शब्दयात्रा पुस्तकालयलाई उपहार प्रदान
शब्दयात्रा प्रकाशन पुस्तकालयका लागि सर्लाहीको हरिवनबाट सम्पादक तथा लेखक पार्थमणि भट्टराईले आफ्ना केही पुस्तकहरू उपहारस्वरूप पठाइदिनुभएको छ । उहाँले पठाउनुभएका ती पुस्तकहरू डा. श्याम भट्टराईले हस्तान्तरण गर्नुभएको छ भने शब्दयात्रा प्रकाशनका संस्थापक अध्यक्ष हरि मञ्जुश्रीले ग्रहण गर्नुभएको छ । शब्दयात्रा प्रकाशन पुस्तकालयका लागि आफ्ना केही पुस्तकहरू उपहारस्वरूप पठाइदिनुभएकोमा सम्पादक तथा लेखक पार्थमणि भट्टराईप्रति शब्दयात्रा प्रकाशनले हार्दिक आभार व्यक्त गरेको छ ।
आजीवन सदस्यता ग्रहण
आध्यात्मिक चिन्तक, लेखक, योगप्रशिक्षक तथा तनाव व्यवस्थापक उद्धवप्रसाद भट्टराईले शब्दयात्रा प्रकाशनको आजीवन सदस्यता ग्रहण गर्नुभएको छ । उहाँ वित्तीय संस्थाका पूर्वव्यवस्थापक तथा समाजसेवी पनि हुनुहुन्छ । शब्दयात्रा प्रकाशनको आजीवन सदस्यता ग्रहण गर्नुभएकोमा उद्धवप्रसाद भट्टराईलाई हार्दिक बधाई छ ।
ज्ञान उदासलाई पुरस्कृत गरिने
शब्दयात्रा प्रकाशनले सङ्खुवासभा जिल्लामा जन्मेर साहित्यिक क्षेत्रबाट राष्ट्रिय ख्याति आर्जन गर्नुभएका अग्रज साहित्यकार ज्ञान उदासलाई ‘शब्दयात्रा–केदारनाथ–लीला श्रेष्ठ सङ्खुवासभा प्रतिभा पुरस्कार, २०७८’ समर्पण गर्ने भएको छ । पुरस्कारमा रुद्राक्षमाला, उपहार, शब्दयात्रा पट्ट, नगद रकम र अभिवन्दनापत्र समर्पण गर्ने गरिन्छ । शब्दयात्रा प्रकाशन परिवार पुरस्कार ग्रहण गर्न स्वीकृति दिनुभएकोमा अग्रज साहित्यकार ज्ञान उदासप्रति हार्दिक आभार व्यक्त गर्दछ । स्मरणीय छ — पुरस्कारको आर्थिक व्यवस्थापन गर्नुहुने गीतकार श्रीमती लीला श्रेष्ठले हरेक वर्ष सङ्खुवासभा जिल्लाका राष्ट्रिय प्रतिभालाई पुरस्कृत गर्ने गरी शब्दयात्रा प्रकाशनको नाउँमा अक्षयकोष राखिदिनुभएको छ ।
‘शब्दचित्रमा हामी’ कवितासङ्ग्रह सार्वजनिक
शब्दयात्रा प्रकाशन भक्तपुर सम्पर्क केन्द्रको आयोजनामा भक्तपुरको ठिमीमा आयोजित विशेष समारोहमा ‘शब्दचित्रमा हामी’ नामक कवितासङ्ग्रह सार्वजनिक गरियो । डा. इन्दुल केसी, पदम दाहाल, सुनील सापकोटा, जीवनाथ अधिकारी, पुण्यवती घले, डिल्लीराम गौतम र निर्मला श्रेष्ठ रहनुभएको सात सदस्यीय सम्पादक मण्डलको संयुक्त सम्पादनमा शब्दयात्रा प्रकाशन भक्तपुर सम्पर्क केन्द्रबाट प्रकाशित ‘शब्दचित्रमा हामी’ नामक कवितासङ्ग्रह १ सय २४ पृष्ठको छ । यस सङ्ग्रहमा ‘शब्दचित्रमा म’ शीर्षकका ३७ वटा कविता सङ्कलित छन् ।
मध्यपुर ठिमी नगरपालिकाका नगरप्रमुख मदनसुन्दर श्रेष्ठको प्रमुख आतिथ्य र अग्रज सञ्चारकर्मी एवं साहित्यकार शान्ता श्रेष्ठ तथा शब्दयात्रा प्रकाशनका संस्थापक अध्यक्ष हरि मञ्जुश्रीको विशेष आतिथ्य रहेको उक्त कार्यक्रमको सभापतित्व शब्दयात्रा प्रकाशन भक्तपुर सम्पर्क केन्द्रका संयोजक डिल्लीराम गौतमले, सञ्चालन सदस्य जीवनाथ अधिकारीले, स्वागत भाषण सदस्य पदम दाहालले, धन्यवाद ज्ञापन सदस्य सुनील सापकोटाले र पुस्तकका विषयमा परिचयात्मक टिप्पणी सदस्य डा. इन्दुल केसीले गर्नुभएको थियो । ‘शब्दचित्रमा हामी’ कवितासङ्ग्रहका विषयामा डा. देवी नेपालले समीक्षा गर्नुभएको थियो ।
कार्यक्रममा भक्तपुरका कवि बुद्धिकुमार घो श्रेष्ठद्वारा लिखित ‘देश दुखेको बेला’ कवितासङ्ग्रह र ललितपुरका कवि भक्तबहादुर नेपालीद्वारा लिखित खण्डकाव्य ‘सुन्तली’ लाई पनि सार्वजनिक गरिएको थियो । सार्वजनिक गरिएका ती कृतिहरूका विषयमा डा. कृष्णप्रसाद घिमिरे, डा. फणीन्द्र निरौला, डा. जगदीशचन्द्र भण्डारी र डा. यज्ञेश्वर निरौलाले टिप्पणी गर्नुभएको थियो ।
‘शब्दचित्रमा हामी’ कवितासङ्ग्रहमा पशुपतिमान पःमाँ, डा. इन्दुल केसी, भक्तबहादुर नेपाली, लोकमान मास्के, ढुण्डिराज पोखरेल, हरिभक्त सिग्देल, पदम दाहाल, नवीना श्रेष्ठ, लालबहादुर भुजेल, रमेश अधिकारी, शारदाप्रसाद शर्मा, सुनील सापकोटा, प्रकाश खड्का, हरि मञ्जुश्री, कलानिधि दाहाल, जीवनाथ अधिकारी, उद्धवप्रसाद भट्टराई चैतन्यदीप, माधवप्रसाद पोखरेल गोज्याङ्ग्रे, पुण्यवती घले, साधुराम गिरी, गीता मञ्जुश्री, डिल्लीराम गौतम, निर्मला श्रेष्ठ, केबी सम्राट, बुद्धिकुमार घो, रश्मि भट्ट, डा. देवी नेपाल, सीता सुवेदी पन्थी, डिल्लीराम ढकाल, डा. राजेन्द्र कोजू, हरिसुन्दर पोतामाहा, वीरजा घिमिरे, विमला पोखरेल, लक्ष्मी तिवारी, नगेन्द्रप्रसाद आचार्य ‘विरामरशिम’ र बासमती राना थारूका कविता रहेका छन् ।
कार्यक्रमका लागि मध्यपुर ठिमी नगरपालिकाले आर्थिक सहयोग गरेको थियो ।
‘कर्मयोद्धासँग शब्दसंवाद’ मा सहकारीको चर्चा
शब्दयात्रा प्रकाशन काभ्रेपलान्चोक सम्पर्क केन्द्रको आयोजनामा सञ्चालित ‘कर्र्मयोद्धासँग शब्दसंवाद’ कार्यक्रममा गत शुक्रबार सम्पर्क केन्द्रका सदस्य दीपक तिमल्सिनाले प्रवचन गर्नुभयो । उहाँको प्रवचनको विषय काभ्रेपलान्चोक जिल्लाका सहकारी संस्थाहरूको स्थितिका विषयमा रहेको थियो । कार्यक्रमको सञ्चालन शब्दयात्रा प्रकाशन काभ्रेपलान्चोक सम्पर्क केन्द्रका संयोजक साधुराम गिरीले र समीक्षा ‘शब्दसञ्चार’ रेडियो कार्यक्रमका प्रस्तोता शिव बन्जाराले गर्नुभएको थियो । कार्यक्रममा शब्दयात्रा प्रकाशनका संस्थापक अध्यक्ष हरि मञ्जुश्री पनि उपस्थित हुनुहुन्थ्यो ।
पुस्तकालयलाई पुस्तक उपहार
साहित्यकारहरू गायत्रीकुमार चापागाईं, डा. छत्रपति दाहाल, ढुण्डिराज पोखरेल, भक्तबहादुर नेपाली र लोकमान मास्केले आफूले लेखेका पुस्तकहरू शब्दयात्रा प्रकाशन पुस्तकालयका लागि उपहारस्वरूप प्रदान गर्नुभएको छ । ती पुस्तकहरू शब्दयात्रा प्रकाशनका संस्थापक अध्यक्ष हरि मञ्जुश्रीले ग्रहण गर्नुभएको थियो । शब्दयात्रा प्रकाशन पुस्तकालयका लागि उपहारस्वरूप आफूले लेखेका पुस्तकहरू प्रदान गर्नुभएकोमा साहित्यकारहरू गायत्रीकुमार चापागाईं, डा. छत्रपति दाहाल, ढुण्डिराज पोखरेल, भक्तबहादुर नेपाली र लोकमान मास्केप्रति शब्दयात्रा प्रकाशनले हार्दिक आभार व्यक्त गरेको छ ।
षडानन्दसम्बन्धी वृत्तचित्रमा शब्दसाधक तीर्थ
आबाल ब्रह्मचारी षडानन्द प्रतिष्ठानले निर्माण गरेको वृत्तचित्रमा शब्दयात्रा प्रकाशनले बनेपामा स्थापना गरेको शब्दसाधक तीर्थलाई पनि समेटिएको छ । उक्त वृत्तचित्रका लागि छायाङ्कन गर्ने क्रममा एउटा टोली शब्दसाधक तीर्थमा समेत आई छायाङ्कन गर्नुका साथै शब्दयात्रा प्रकाशनका संस्थापक अध्यक्ष हरि मञ्जुश्रीको अन्तर्वार्ता पनि लिएको थियो । उक्त वृत्तचित्रको प्रथम प्रदर्शन काठमाडौँमा गत विवाह पञ्चमीका दिन गरिएको थियो । शब्दसाधक तीर्थमा रहेका पाँच सालिकमध्ये एउटा सालिक षडानन्द अधिकारीको हो ।