शब्दयात्रा प्रकाशनको सभाकक्षमा आज असार १४ गते शुक्रबार ‘शब्दयात्रा’ विषयक कवितावाचन कार्यक्रम सम्पन्न भएको छ । कार्यक्रममा डा. इन्दुल केसी, कालिका त्रिपाठी पन्त, केदारनाथ तिमल्सिना, गोविन्दबहादुर खड्का, डा. छत्रपति दाहाल, जयनारायण नेपाल, जुमन किरण, ढुण्डिराज पोखरेल, नवीना श्रेष्ठ, पदम दाहाल, प्रकाश उज्ज्वल बनेपा, पुण्यवती घले, पूर्णबहादुर कार्की, भवानी पाण्डे, मच्छेश्वर सापकोटा, राजेन्द्रप्रसाद भट्टराई, वेदकुमारी न्यौपाने, शारदाप्रसाद शर्मा, शिव बन्जारा, श्रीराम पौडेल उदासी र सहदीप पलान्चोकेका कविताहरू वाचन गरिएका थिए । शब्दयात्रा प्रकाशनका आजीवन सदस्य डा. इन्दुल केसीको सभापतित्व र कवि कलानिधि दाहालको प्रमुख आतिथ्यमा सम्पन्न उक्त कार्यक्रमको प्रारम्भ संस्थापक अध्यक्ष हरि मञ्जुश्रीले, समुद्घाटन गीतिभास्कर मच्छेश्वर सापकोटाले र स्वागत भाषण कृष्णमणि कुइकेलले गर्नुभएको थियो भने कवितावाचन कार्यक्रमको संयोजन डा. छत्रपति दाहालले गर्नुभएको थियो । कवितावाचन कार्यक्रमका संयोजक डा. छत्रपति दाहाल र प्रमुख अतिथि कवि कलानिधि दाहाललाई शब्दयात्रा प्रकाशनका तर्फबाट अमृत अधिकारीले उपहार समर्पण गर्नुभएको उक्त कार्यक्रममा कवितावाचन गर्ने कविहरूलाई मोहनप्रसाद खनालको पद्यकवितासङ्ग्रह ‘मेरा पद्यात्मक पाइलाहरू’ उपहार समर्पण गरिएको थियो । प्रमुख अतिथि कलानिधि दाहालले कवितावाचन र कार्यक्रमको समीक्षा गरी कार्यक्रमलाई विसर्जन गर्नुभएको थियो ।

शब्दयात्रा प्रकाशनले यही असार १४ गते शुक्रबार कविता वाचन गर्ने कार्यक्रम राखेको छ । शब्दब्रह्मको विराटतालाई लिएर लेखिएका ‘शब्दयात्रा’ शीर्षकका कविताहरू त्यस कार्यक्रममा वाचन गरिनेछन् । कविहरूका लागि उपहारको व्यवस्था गरिएको छ । वाचित कविताहरू सङ्ग्रह गरी पुस्तक प्रकाशन गर्ने योजना छ । कार्यक्रमको प्रमुख आतिथ्य ग्रहण गर्न महाकाव्यकार कलानिधि दाहालले र कविता वाचन कार्यक्रमको संयोजन गरी पुस्तकको सम्पादन गर्न डा. छत्रपति दाहालले अनुमति दिनुभएको छ । त्यही कार्यक्रममा १० जना विद्यार्थीलाई ‘दिव्यवती–कान्तुप्रसाद छात्रवृत्ति’ पनि प्रदान गरिनेछ । छात्रवृत्तिको कोष व्यवस्थापन शेखरप्रसाद ढुङ्गानाले गर्नुभएको छ । शब्दयात्रा प्रकाशनको सभाकक्षमा हुने उक्त कार्यक्रम दिउँसो १ बजे सुरु हुनेछ ।

शब्दयात्रा प्रकाशनका तर्फबाट आज असार ३ गते निर्जला एकादशीका दिन मानव कल्याण समाज (सेवाघर) मा गई त्यहाँ रहेका सातजना विद्यार्थीलाई प्रतिविद्यार्थी ६ हजार रुपियाँका दरले छात्रवृत्तिको रकम उपलब्ध गराइयो । पाँचजना विद्यार्थीका लागि सफ्टवेयर इन्जिनियर रोशन मञ्जुश्री अधिकारीले ३० हजार रुपियाँ र दुईजनाका लागि डा. छत्रपति दाहालले १२ हजार रुपियाँ उपलब्ध गराउनुभएको थियो । सो रकम र प्रमाणपत्र शब्दयात्रा प्रकाशनका संस्थापक अध्यक्ष हरि मञ्जुश्रीले हस्तान्तरण गर्नुभएको थियो । कृष्णमणि कुइकेलले पारस्परिक सेवा समन्वय सन्जालका तर्फबाट मानव कल्याण समाज (सेवाघर) लाई आभारपत्र प्रदान गर्नुभयो । मानव कल्याण समाज (सेवाघर) मा शब्दयात्रा प्रकाशनका तर्फबाट हरि मञ्जुश्री, गीता मञ्जुश्री, कृष्णमणि कुइकेल, सङ्गीता केसी र खाइबा लामा जानुभएको थियो । छात्रवृत्ति पाउने विद्यार्थीहरू सफलता मानव, खुसी मानव, आनन्द मानव, सम्राट मानव, केदार मानव, समीक्षा मानव र शाश्वत मानव हुनुहुन्छ । उहाँहरू सबैजना अभिभावकविहीन बालबालिका हुनुभएकाले मानव कल्याण समाज (सेवाघर) नै उहाँहरूको अभिभावक बनेको छ । उहाँहरू यस देशको असल नागरिक भई अभिभावकविहीन अन्य बालबालिकालाई भविष्यमा सहयोग गर्नुहुनेछ भन्ने कुरामा शब्दयात्रा प्रकाशन परिवार, इ. रोशन मञ्जुश्री अधिकारी र डा. छत्रपति दाहाल विश्वस्त बनेका छन् ।

शब्दयात्रा प्रकाशनले विशेष समारोहको आयोजना गरेर साधकहरू डा. मुकेश चालिसे, सुवास तामाङ, किरण थापा, किरण आचार्य पौडेल, चूडाप्रसाद चौलागाईं, सिर्जना खनाल र रामलाल श्रेष्ठलाई सम्मान समर्पण गरेको छ । यो समारोह २०८१ सालको पहिलो चरणको हो । समारोहमा हरि मञ्जुश्रीको सञ्चालन, जयनारायण नेपालको सभापतित्व, इ. रोशन अधिकारीको छायाङ्कन, सकुल थापाको सामग्री व्यवस्थापन र कृष्णमणि कुइकेलको स्वागत भाषण रहेको थियो । सम्मान गर्ने कार्यमा हरि मञ्जुश्री, चट्याङ मास्टर, डा. इन्दुल केसी, प्रा. केदारनाथ श्रेष्ठ, रामप्रसाद अधिकारी, पशुपतिमान प्रधान, गीता अधिकारी, केदारनाथ तिमल्सिना, निर्मला श्रेष्ठ, रमेश पौड्याल, आनन्दराज श्रेष्ठ, जयराम श्रेष्ठ र अमृत अधिकारी संलग्न हुनुहुन्थ्यो ।

ललितपुर जिल्लामा जन्मिएका वा ललितपुर जिल्लालाई कार्यस्थल बनाएका प्रतिभाशाली व्यक्तिलाई पुरस्कार समर्पण गर्ने गरी प्रा. डा. मुकेश–जनक चालिसेले शब्दयात्रा प्रकाशनमा हालका लागि दुई लाख रुपियाँको अक्षयकोष खडा गर्नुभएको छ । पुरस्कारको नाउँ ‘शब्दयात्रा क्याप्टेन टीकाराम–रामेश्वरी चालिसे ललितपुर प्रतिभा पुरस्कार’ राखिएको छ । यो पुरस्कार संस्कृति, वन्यजन्तु, वातावरण, विज्ञान–प्रविधि, खेलकुद जस्ता विधामा अध्ययन–अनुसन्धान तथा प्रकाशनका माध्यमबाट राष्ट्रिय स्तरको योगदान गर्ने एक व्यक्तिलाई हरेक वर्ष अलग–अलग विधामा समर्पण गरिनेछ । यही २०८१ सालदेखि यो पुरस्कार समर्पण गरिने भएकाले त्यसका लागि उहाँले पहिलो वर्षका लागि छुट्टै रकम उपलब्ध गराउनुभएको छ । शब्दयात्रा प्रकाशनबाट आफ्नो जिल्लाका प्रतिभालाई पुरस्कृत गर्न हजुरबुबा–हजुरआमाको नाउँमा पुरस्कारका लागि अक्षयकोष खडा गर्नुभएकोमा प्रा. डा. मुकेश–जनक चालिसेप्रति शब्दयात्रा प्रकाशन परिवार हार्दिक आभार व्यक्त गर्दछ ।