Shabdayatra Prakashan

काभ्रे बनेपाको गोसाइँस्थानमा बसेर दुई दशकअघि समाधिस्थ हुनुभएका रमेश बाबा नाउँबाट चर्चित स्वामी रमेश गिरिका विषयमा अनुसन्धान गरी पुस्तक प्रकाशन गर्नका लागि काठमाडौँ कोटेश्वरमा रहेको शान्ति सेवा आश्रमले शब्दयात्रा प्रकाशनलाई आर्थिक सहयोग गर्ने भएको छ । त्यसका लागि पहिलो किस्तास्वरूप शान्ति सेवा आश्रमले पचास हजार रुपियाँ शब्दयात्रा प्रकाशनलाई उपलब्ध गराएको छ ।
गोसाइँस्थान नैमिषारण्य क्षेत्र विकास समितिले नैमिषारण्य गुरुकुलको प्रथम वार्षिक दिवसको अवसर पारी आयोजना गरेको समारोहमा डा. चिन्तामणि योगीले पचास हजार रुपियाँको चेक शब्दयात्रा प्रकाशनका अध्यक्ष हरि मञ्जुश्रीलाई हस्तान्तरण गर्नुभएको थियो ।

सञ्चार–माध्यमहरूले प्रायः राम्रो कामलाई प्रोत्साहन हुने गरी राम्रो कामको समाचार र जानकारी दिँदैनन् । नराम्रो खबर र टिप्पणी पढ्दापढ्दा पाठकको स्वभावमा नै नकारात्मकता उत्पन्न हुन थालिसकेको छ र समाजका सबै मान्छे खराबै पो छन् कि भन्ने भान हुन थालिसकेको छ । अधिकांश मान्छेहरू नराम्रा मान्छेको फेला परियो भन्न थालेका छन् । तर शब्दयात्रा सहयोगी समाजका सदस्य चन्द्रबहादुर खड्काचाहिँ हालसालै राम्रा मान्छेको फेला पर्नुभयो ।
चन्द्रबहादुर खड्काले हालसालै काठमाडौँ नयाँ बानेश्वरको बस्नेत कोल्डस्टोर एन्ड कफी हाउसमा पसेर कफी पिउनुभएछ । पैसा तिरेपछि निकै पैसा राखिएको पर्स त्यहीँ बिर्सेर हिँड्नुभएछ । दिनभरि धेरै ठाउँ घुमेर साँझ घर पुगेपछि पो पर्स हराएको थाहा पाउनुभएछ । भोलिपल्ट बिहान अघिल्लो दिन गएका ठाउँहरू सम्झिई ती ठाउँहरूमध्ये कहाँ पर्स बिर्सिएँ हुँला भनेर खोज्न हिँड्नुभएछ । कफी हाउसमा पुगेर सोद्धा काउन्टरमा बसेका पसल–मालिकले पर्स झिकेर दिएछन् । उनले भनेछन् — “पर्समा भिजिटिङ कार्ड रहेनछ, नत्र फोन गरेर बोलाउँथेँ ।”
अनि उनीसँग परिचय भएछ । उनी रहेछन् काभ्रे जिल्ला पनौती नगरपालिका वडा नं. ३ का कृष्ण बस्नेत । उनी र उनकी श्रीमती रुकु बस्नेतले सञ्चालन गरेका रहेछन् त्यो कफी हाउस ।
घटना सानो हो, तर समाजमा बढ्दै गएको पैसामुखी चिन्तनका आधारमा हेर्दा यो ठूलो घटना हो । यो घटना प्रफुल्ल बनेर सुनाउँदा चन्द्रबहादुर खड्काले भन्नुभयो — “समाजमा यस्ता असल मान्छेहरू पनि छन्, त्यसैले समाज अहिलेसम्म बस्नलायक नै छ । समाज खराबै भइसक्यो भनेर हार खाने बेला भइसकेको रहेनछ ।”
त्यस्ता असल दम्पतीलाई शब्दयात्रा प्रकाशनका तर्फबाट हार्दिक धन्यवाद !

शब्दयात्रा प्रकाशनले आफ्नो ६५ औँ प्रकाशनपुष्पका रूपमा ग्रामकवि रोजनाथ लुइँटेलको नवीनतम कवितासङ्ग्रह प्रकाशन गरेको छ । ‘सबैतिर कम्पनको चोट’ नाम दिइएको उक्त कवितासङ्ग्रह कवि लुइँटेलको सातौँ कृति हो ।
काभ्रे जिल्लाको देवभूमि बालुवा गाउँ विकास समिति वडा नं. ८ लुइँटेलगाउँनिवासी कवि लुइँटेलले यसअघि ‘किसानको दुःखी जीवन’, ‘श्री स्वस्थानी सारश्लोक’, ‘दासढुङ्गा जीप दुर्घटना’, ‘सत्यका कुराकानी हाम्रा राजारानी’, ‘अकल्पनीय राजदरबार हत्याकाण्ड’ र ‘समसामयिक घटना सिलोक’ नामक कृतिहरू प्रकाशन गराइसकेका छन् ।
‘सबैतिर कम्पनको चोट’ कवितासङ्ग्रह आगामी जेठ महिनामा आयोजना गरिने सम्मान समर्पण तथा पुस्तक सार्वजनिकीकरण समारोहमा सार्वजनिक गर्ने कार्यक्रम रहेको छ ।

शब्दयात्रा प्रकाशनले ‘सत्यनारायण व्रतकथा’ नामक नेपाली भाषामा अनूदित काव्य प्रकाशन गरेको छ । काव्यमा ‘हरितालिका व्रतकथा’ को काव्यात्मक अनुवाद पनि समावेश गरिएको छ ।
काभ्रे जिल्लाका महाकाव्यकार कविप्रसाद प्याकु¥यालले संस्कृत भाषाबाट नेपाली भाषामा काव्यात्मक अनुवाद गर्नुभएको उक्त पुस्तक काव्यकारकै अर्को नाम श्रीधर उपाध्याय भन्ने नामबाट प्रकाशन गरिएको छ ।
जम्मा ४० पृष्ठको उक्त पुस्तकको मूल्य ७० रुपियाँ राखिएको छ । आगामी जेठ महिनामा शब्दयात्रा प्रकाशनबाट आयोजना गरिने सम्मान समर्पण तथा पुस्तक सार्वजनिकीकरण समारोहमा उक्त पुस्तकलाई सार्वजनिक गरिनेछ ।
श्रीधर प्याकु¥यालले यसअघि हेलम्बू (लघुकाव्य), भरतेन्दु (महाकाव्य), बेलप्रसाद (नव्यकाव्य), तिमीलाई नमोनमः (कवितासङ्ग्रह), अपरोक्ष अनुभूति (भावानुवाद), वन्दे नेपाल मातरम् (महाकाव्य) र मधुत्रयी (यात्राकाव्य) गरी सातवटा काव्यकृति लेखी प्रकाशन गराइसक्नुभएको छ । ‘सत्यनारायण व्रतकथा’ उहाँको आठौँ कृति हो । उहाँले लेखेका तर प्रकाशन हुन बाँकी रहेका कृतिहरू पनि प्रशस्तै छन् ।
‘सत्यनारायण व्रतकथा’ समेत शब्दयात्रा प्रकाशनबाट प्रकाशित पुस्तकहरूको सङ्ख्या ६४ पुगेको छ ।

नेपालभूमि (विचारप्रधान राष्ट्रिय साप्ताहिक पत्रिका) का संस्थापक प्रधानसम्पादक तथा शब्दयात्रा पत्रकार समाजका सभापति रामचन्द्र हुमागाईंलाई मातृशोक परेको छ । उहाँकी माता खिलकुमारी हुमागाईंको गत वैशाख १७ गते राति १० बजेर २० मिनेट जाँदा देहावसान भएको थियो । उहाँ ९० वर्षकी हुनुहुन्थ्यो ।
खिलकुमारी हुमागाईं विगत केही समयदेखि शारीरिक रूपमा अस्वस्थ हुनुहुन्थ्यो । विभिन्न अस्पतालहरूमा उपचार गराउँदा पनि स्वस्थ हुन नसकेपछि अन्ततः उहाँलाई काठमाडौँको पाशुपत क्षेत्रमा पुयाइएको थियो । त्यहीँ उहाँले आफ्नो देहलाई विसर्जन गर्नुभएकाले नजिकैको आर्यघाटमा उहाँको भौतिक देहलाई दाहसंस्कार गरिएको थियो ।
रामचन्द्र हुमागाईं पूर्वीय सांस्कृतिक विधानअनुरूप बानेश्वर पूजा प्रतिष्ठानको क्रियाभवनमा बस्नुभएको छ ।
खिलकुमारी हुमागाईंको आत्माले चिरशान्ति प्राप्त गरोस् भन्ने कामना गर्दै शब्दयात्रा प्रकाशन, शब्दयात्रा पत्रकार समाज तथा नेपालभूमि साप्ताहिक परिवारले रामचन्द्र हुमागाईंलगायत शोकसन्तप्त परिवारजनप्रति हार्दिक समवेदना व्यक्त गरेका छन् ।

शब्दयात्रा प्रकाशनले केदारनाथ तिमल्सिनाद्वारा लिखित भजन, कविता र गीतहरूको सङ्ग्रह ‘भावनाका भुल्का’ प्रकाशन गरेको छ । उक्त पुस्तक शब्दयात्रा प्रकाशनको ६३ औँ प्रकाशनपुष्पका रूपमा केही दिनपछि नै बजारमा आउन लागेको छ ।
२००१ साल माघ १३ गते शुक्रबार काभ्रे जिल्लाको रयाले गा. वि. स. वडा नं. १ मा सामान्य किसान परिवारमा जन्मनुभएका केदारनाथ तिमल्सिना सरकारी सेवाबाट निवृत्त भई सामाजिक कार्य र साहित्यिक सिर्जना गर्दै हाल बनेपामा बसोवास गरिरहनुभएको छ । ‘भावनाका भुल्का’ उहाँको पहिलो पुस्तकाकार कृति हो ।

सिन्धुपाल्चोक जिल्लाको बाबरे — ५ मा अवस्थित जालपेश्वरी देवीस्थान परिसर खिपिङमा शिवशक्ति विराट् महायज्ञअन्तर्गत श्रीमद्भागवत ज्ञान महायज्ञको आयोजना गरियो । गत वैशाख ४ गतेदेखि प्रारम्भ गरिएको उक्त यज्ञ १२ गते समापन गरियो । भगवान् गौरीशङ्करका उपासक बाबा विश्वनाथ महाराजको समुपस्थितिमा सम्पन्न उक्त यज्ञमा पं. नवराज धितालले भागवतकथा वाचन गर्नुभएको थियो ।
उक्त यज्ञमा शब्दयात्रा प्रकाशनका अध्यक्ष साहित्यकार तथा ग्रन्थसम्पादक हरि मञ्जुश्रीलाई प्रमुख अतिथिका रूपमा आमन्त्रण गरिएको थियो । उहाँले यज्ञमा उपस्थित भक्तजनका लागि अघिल्लो दिन १ घन्टा प्रवचन गर्नुभएको थियो भने भोलिपल्ट विद्यार्थीहरूलाई नैतिक शिक्षाका विषयमा १५ मिनेटसम्म अध्यापन गराउनुभएको थियो । उहाँले शब्दयात्रा प्रकाशनका तर्फबाट त्यहाँको विद्यालयका लागि एक दर्जन पुस्तक उपहार प्रदान गर्नुभएको थियो । उहाँलाई यज्ञमा सम्मान पनि गरिएको थियो ।
प्रमुख अतिथि हरि मञ्जुश्रीसँग कान्तिपुर एफएमका तर्फबाट जनार्दन घिमिरेले त्यहाँको अनुभवका विषयमा टेलिफोनबाट संवाद गरेर प्रत्यक्ष प्रसारण गर्दा र बाबा विश्वनाथसँग यज्ञका विषयमा जानकारी लिँदा रेडियोबाट संवाद सुनिरहेका उपस्थित भक्तजनमा हाम्रो समाचार राष्ट्रिय रूपमा फैलियो भनेर खुसी छाएको थियो ।
स्थानीय शिक्षासेवी तथा समाजसेवी सुरेन्द्र प्रधानको अध्यक्षतामा गठित आयोजक समितिले उक्त यज्ञका लागि आवश्यक सम्पूर्ण व्यवस्थापन मिलाएको थियो । उहाँका अनुसार स्थानीय जनतामा नैतिक र आध्यात्मिक जागरण एवं सामाजिक एकताका लागि यस यज्ञले ठूलो सहयोग पु¥याएको छ ।