शब्दयात्रा प्रकाशनले हरेक वर्षको जेठ महिनामा आयोजना गर्ने गरेको सम्मान समर्पण तथा पुस्तक सार्वजनिकीकरण समारोह २०७६ सालका लागि आगामी जेठ २१ गते मङ्गलबार बनेपास्थित होटल सत्यम्मा गर्ने भएको छ ।
उक्त समारोहमा छजना राष्ट्रिय व्यक्तित्वलाई सम्मान समर्पण गरिनेछ भने छवटा पुस्तक सार्वजनिक गरिनेछन् ।

शब्दयात्रा प्रकाशनद्वारा सञ्चालित साप्ताहिक प्रवचन कार्यक्रम ‘कर्मयोद्धासँग शब्दसंवाद’ को ८५ औँ शृङ्खला गत २०७६ साल वैशाख २० गते शुक्रबार शब्दयात्रा प्रकाशनको सभाकक्ष बनेपा नीलकण्ठेश्वरमा सम्पन्न भयो । कार्यक्रममा धुलिखेलस्थित सञ्जीवनी माध्यमिक विद्यालयका प्राचार्य सानुकाजी महतले प्रमसख वक्ताका रूपबाट आफ्नो जीवनयात्रा र शैक्षिक क्षेत्रप्रतिको आफ्नो दृष्टिकोण प्रस्तुत गर्नुभयो ।
अग्रज लोकगायक मच्छेश्वर सापकोटाको प्रमुख आतिथ्य र लेखक केदारनाथ तिमल्सिनाको सभापतित्वमा दामोदर घिमिरेद्वारा उद्घोषण गरिएको उक्त कार्यक्रममा शब्दयात्रा प्रकाशनका अध्यक्ष हरि मञ्जुश्री, लेखकहरू पुण्यवती घले र सहदीप पलान्चोके, व्यवस्थापनविद् श्री शर्मा मूर्ख, समाजसेवी छविलाल कुइँकेल तथा वासुदेव कुइँकेल, पुरुषोत्तम हुमागाईं, सीता भट्टराई कुइँकेल, रीक्षा घिमिरे आदिको समुपस्थिति रहेको थियो ।
यसै गरी ‘कर्मयोद्धासँग शब्दसंवाद’ को ८६ औँ शृङ्खला गत २०७६ साल वैशाख २७ गते शुक्रबार शब्दयात्रा प्रकाशनको सभाकक्ष बनेपा नीलकण्ठेश्वरमा सम्पन्न भयो । कार्यक्रममा बनेपास्थित सर्वश्री क्वालिटी प्रिन्टर्सका प्रोप्राइटर अमृत अधिकारीले प्रमुख वक्ताका रूपबाट आफ्नो जीवनयात्रा र मुद्रण क्षेत्रप्रतिको आफ्नो अनुभव तथा जानकारी प्रस्तुत गर्नुभयो ।
शब्दयात्रा प्रकाशनका महाप्रबन्धक शारदाप्रसाद शर्माले सञ्चालन गर्नुभएको उक्त कार्यक्रमको सभापतित्व वासुदेव कुइँकेल तथा प्रमुख आतिथ्य गीता मञ्जुश्री अधिकारीले गर्नुभएको थियो भने कार्यक्रमम शब्दयात्रा प्रकाशनका अध्यक्ष हरि मञ्जुश्री, लेखकहरू सहदीप पलान्चोके, केदारनाथ तिमल्सिना, ओतबहादुर खड्का, पुण्यवती घले र पूर्णबहादुर कार्की, व्यवस्थापनविद् श्री शर्मा मूर्ख, समाजसेवी छविलाल कुइँकेल तथा नवराज पराजुली, नानुदेवी कुइँकेल, पुरुषोत्तम हुमागाईं, लालप्रसाद पौड्याल, सीता भट्टराई कुइँकेल, रीक्षा घिमिरे आदिको समुपस्थिति रहेको थियो ।

शब्दयात्रा प्रकाशनले २०७६ सालका लागि ‘शब्दयात्रा द्रोणपुष्प पत्रकारिता छात्रवृत्ति’ काभ्रे क्याम्पसमा कक्षा ११ मा पत्रकारिता विषय लिई अध्ययन गरिरहेकी भुम्लुटारकी रन्जिता उप्रेतीलाई प्रदान गर्ने भएको छ । छात्रवृत्तिको राशी १० हजार रुपियाँ छ । छात्रवृत्ति आगामी जेठ महिनाको दोस्रो साता प्रदान गरिनेछ ।
पत्रकारिता विषय अध्ययन गर्ने काभ्रे जिल्लाकी गरिब तथा जेहेन्दार छात्रा एकजनालाई हरेक वर्ष प्रदान गर्ने गरी शब्दयात्रा प्रकाशनमा अक्षयकोष खडा गरेर स्थापना गरेको यो छात्रवृत्तिको आर्थिक व्यवस्थापन आफ्नी धर्मपत्नी मनका श्रेष्ठको स्मृतिमा लेखक तथा पूर्वप्रशासक द्रोणप्रसाद श्रेष्ठले गर्नुभएको हो ।

नेपालको वाङ्मयिक क्षेत्रका पाँचजना प्रथम शब्दसाधकहरूको सालिक पहिलोपटक एकै ठाउँमा शब्दयात्रा प्रकाशनले स्थापना गरेको सन्दर्भमा त्यसका लागि खोटाङ जलेश्वरीका दामोदर घिमिरेले काभ्रे बनेपाका स्व. आशाकाजी सेवकको स्मृतिमा गुरुदक्षिणास्वरूप ५ हजार १ सय ५ रुपियाँ आर्थिक सहयोग गर्नुभएको छ ।
दामोदर घिमिरेले काभ्रे बहुमुखी क्याम्पसमा पढ्दा आशाकाजी सेवक त्यहाँ क्याम्पस प्रमुख हुनुका साथै प्राध्यापन पनि गर्नुहुन्थ्यो । उहाँबाट अभिप्रेरित हुनुभएका र शिक्षा पनि लिनुभएका दामोदर घिमिरेले आफ्ना गुरु आशाकाजी सेवकको स्मृतिमा कविता र लेख लेखेर ‘नेपालभूमि राष्ट्रिय साप्ताहिक’ मा प्रकाशन पनि गराउनुभएको छ ।
स्मरणीय छ — प्रथम शिक्षासेवी षडानन्द अधिकारी, प्रथम लोकतान्त्रिक पत्रकार देवीप्रसाद सापकोटा, राष्ट्रिय पुरस्कारप्राप्त प्रथम वैज्ञानिक नरबहादुर भारती, प्रथम साहित्यिक सहिद कृष्णलाल अधिकारी र गीत रेकर्ड गर्ने प्रथम गायिक मेलवादेवी गुरुङका अर्धकदका सालिकहरू शब्दयात्रा प्रकाशनले बनेपामा स्थापना गरेको छ । ती सालिकहरूको अवलोकन गर्न टाढाटाढादेखिका वाङ्मयसेवीहरू बनेपामा आउन थालेका छन् ।

शब्दयात्रा प्रकाशनको नियमित साप्ताहिक प्रवचन कार्यक्रम ‘कर्मयोद्धासँग शब्दसंवाद’ को ८४ औँ शृङ्खला शब्दयात्रा प्रकाशनको सभाकक्षमा गत २०७६ वैशाख १३ गते शुक्रबार लक्ष्मी पोखरेलको सभापतित्व, समाजसेवी चन्द्रबहादुर खड्काको प्रमुख आतिथ्य र शब्दयात्रा प्रकाशनका महाप्रबन्धक शारदाप्रसाद शर्माको उद्घोषणमा सम्पन्न भयो । उक्त कार्यक्रमका प्रमुख वक्ताका रूपबाट शिक्षासेवी शङ्कर काफ्लेले संस्कृत भाषा, देवनागरी लिपि र पाणिनीय व्याकरणका विषयमा सारगर्भित प्रवचन गर्नुभएको थियो ।
उक्त कार्यक्रममा शब्दयात्रा प्रकाशनका अध्यक्ष हरि मञ्जुश्री, अग्रज लोकगायक मच्छेश्वर सापकोटा, लेखक तथा प्राकृतिक चिकित्सक डा. इन्दुल केसी, ज्यो. पं. रमेश अधिकारी, शिक्षासेवी फणीन्द्रराज अधिकारी, लेखकहरू दामोदर घिमिरे, केदारनाथ तिमल्सिना, ओतबहादुर खड्का, पुण्यवती घले र सहदीप पलान्चोके, वासुदेव कुइँकेल, सिना ढकाल, मनकुमारी दाहाल, नवराज पराजुली, पुण्यप्रसाद निरौला, गङ्गा अधिकारी, रीक्षा घिमिरे आदिको समुपस्थिति रहेको थियो ।

शब्दयात्रा प्रकाशनले हरेक वर्षको वैशाख महिनामा प्रदान गर्ने गरेको ‘शब्दयात्रा कर्मशीलता पुरस्कार’ २०७६ सालका लागि आगामी वैशाख १३ गते शुक्रबार प्रदान गरिने भएको छ ।
शब्दयात्रा प्रकाशनको सभाकक्षमा आयोजना गरिने पुरस्कार वितरण गरिने समारोहमा यस वर्षको ‘शब्दयात्रा कर्मशीलता पुरस्कार’ दामोदर घिमिरेलाई प्रदान गरिँदैछ । पुरस्कारमा नगद १० हजार रुपियाँ, प्रमाणपत्र र शब्दयात्रापट्ट प्रदान गर्ने गरिएको छ । यसअघि उक्त पुरस्कार पदमनाथ ढुङ्गाना र शिवप्रसाद बन्जारालाई प्रदान गरिएको थियो ।