Shabdayatra Prakashan

सम्पादित १ सय २९ औँ पुस्तक ‘जीवनचन्द्र कोइराला ः व्यक्ति एक व्यक्तित्व अनेक’ ललितपुरमा आयोजित एक कार्यक्रममा सार्वजनिक गरिएको छ । अग्रज लोकसंस्कृतिविद् तथा वाङ्मय शताब्दी पुरुष डा. सत्यमोहन जोशीले उक्त पुस्तकलाई सार्वजनिक गर्नुभएको हो ।
उक्त पुस्तकमा ५२ जना लेखकहरूले ग्रन्थसम्पादक जीवनचन्द्र कोइरालाका विषयमा लेखेका लेख तथा संस्मरणहरू र अन्य केही सामग्रीहरू राखिएका छन् । जम्मा २ सय ५६ पृष्ठको उक्त पुस्तकको मूल्य ३ सय ५० रुपियाँ राखिएको छ ।
शब्दयात्रा प्रकाशनद्वारा संस्थापित शब्दयात्रा नन्दिकेश्वर अधिकारी शोध सम्मानबाट २०७७ सालमा सम्मानित हुनुभएका ग्रन्थसम्पादक जीवनचन्द्र कोइरालाको निधन २०७८ साल वैशाख २९ गते भएको थियो ।

शब्दयात्रा प्रकाशनका संस्थापक अध्यक्ष हरि मञ्जुश्रीलाई कर्मयोगी बद्रीविक्रम थापा स्मृति सेवा गुठीले २०७८ सालको बद्रीविक्रम स्मृति पुरस्कारबाट पुरस्कृत गरेको छ । उहाँलाई पुरस्कारस्वरूप ५१ हजार रुपियाँको चेकसहित ताम्रपत्र प्रदान गरिएको थियो ।
नेपाल प्रज्ञाप्रतिष्ठानका कुलपति गङ्गाप्रसाद उप्रेतीले प्रमुख अतिथिका रूपबाट उहाँलाई पुरस्कारको प्रमाणपत्र प्रदान गर्नुभएको थियो । कार्यक्रमको सभापतित्व अग्रज लोकसंस्कृतिविद् डा. सत्यमोहन जोशीले गर्नुभएको थियो । पुरस्कारको प्रमाणपत्रमा लेखिएको छ — “वि. सं. २०१६ साल असोज ५ गते दिङला भोजपुरमा माता युगला तथा पिता दुर्गाप्रसाद अधिकारीका सुपुत्रका रूपमा जन्मिई आफ्नो ६ पुस्तादेखिको पुस्तक लेखन परम्परालाई निरन्तरता दिँदै दिङलाको अधिकारी परिवारबाट आउनुभएका तपाईं वाङ्मय क्षेत्रका साधक हुनुहुन्छ । सादा जीवन एवम् सरल व्यक्तित्वका धनी तपाईंको जीवनकर्म वास्तवमै स्तुत्य र बोधगम्य रहेको छ ।
सयौँ पुस्तकहरूको लेखन तथा सम्पादन गर्नुभएका र काभ्रेको बनेपामा बसोवास गरी शब्दयात्रा प्रकाशनको संस्थापक अध्यक्ष बनेर त्यसैका माध्यमबाट संस्थागत रूपमा स्रष्टाहरूको सालिक स्थापना, पुस्तकालय स्थापना, सरस्वतीको मन्दिर निर्माण, विभिन्न सम्मान, पुरस्कार र छात्रवृत्ति प्रदान, साहित्यिक तथा साप्ताहिक पत्रिका र पुस्तक प्रकाशन, रेडियो कार्यक्रम सञ्चालन आदि विभिन्न सेवाका कर्महरू गर्दै पछिल्लो समयमा विद्युतीय माध्यमबाट नेपाली लेखक र साहित्यलाई अन्तर्राष्ट्रिय क्षेत्रसँग जोड्ने तपाईंको कार्य प्रशंसनीय र अनुकरणीय रहेको छ ।
सेवाका यिनै विभिन्न क्षेत्रहरूमा तपाईंले पु¥याउनुभएको योगदानको उच्च मूल्याङ्कन गर्दै उज्ज्वल भविष्यको कामनासहित कर्मयोगी बद्रीविक्रम थापा स्मृति सेवा गुठी ५१ हजार रुपियाँ राशीको बद्रीविक्रम स्मृति पुरस्कार २०७८ द्वारा अभिनन्दन गर्दछ ।”
यसरी पुरस्कृत हुनुभएकोमा शब्दयात्रा प्रकाशन परिवार हरि मञ्जुश्रीलाई हार्दिक बधाई ज्ञापन गर्दछ ।

शब्दयात्रा प्रकाशनका संस्थापक अध्यक्ष हरि मञ्जुश्रीलाई विश्व हिन्दू महासङ्घ नेपाल राष्ट्रिय समितिबाट अभिवन्दना गरिएको छ । नेपालको राजनीतिक, सामाजिक, धार्मिक, आध्यात्मिक, साहित्यिक र शैक्षिक क्षेत्रको समुन्नयनका लागि शब्दसाधनाका माध्यमले तपाईंले पु¥याउनुभएको योगदान अतुलनीय छ भन्दै उहाँलाई समर्पण गरिएको अभिवन्दनापत्रमा शब्दका सारथिका रूपमा उहाँको उच्चतम योगदानको कदर गरिएको कुरा उल्लेख गरिएको छ ।
विश्व हिन्दू महासङ्घ नेपाल राष्ट्रिय समिति बाँसबारी काठमाडौँका तर्फबाट हरि मञ्जुश्रीको निवासमै पुगी यही साउन ८ गते शनिबार उहाँलाई महासचिव अरुणकुमार पाण्डेले अभिवन्दनापत्र हस्तान्तरण गर्नुभएको थियो । त्यस बखत शारदाप्रसाद शर्मा, निर्मला श्रेष्ठ, सकुल थापा, अमृत अधिकारी आदिको पनि उपस्थिति रहेको थियो ।

शब्दयात्रा प्रकाशनका संस्थापक अध्यक्ष हरि मञ्जुश्रीले सम्पादन गरेको ९५ औँ पुस्तक ‘द म्यान बिहाइन्ड धुलिखेल’ यही २०७८ साल असार ३० गते बुधबार शब्दयात्रा प्रकाशनको आयोजनामा धुलिखेलस्थित होटल हिमालयन होराइजनमा आयोजित कार्यक्रममा सार्वजनिक गरियो । उक्त पुस्तक धुलिखेलका अग्रज समाजसेवी, समुन्नत धुलिखेलका लागि समग्र पूर्वाधारको विकास गराउने स्वप्नद्रष्टा तथा कार्यान्वयनका लागि जनपरिचालन गर्न नेतृत्वदायी भूमिका निर्वाह गर्ने सामाजिक अभियन्ताका रूपमा सुपरिचित व्यक्तित्व बेलप्रसाद श्रेष्ठका विषयमा तयार पारिएको थियो ।
काठमाडौँ विश्वविद्यालयका उपकुलपति डा. भोला थापाको प्रमुख आतिथ्य, काठमाडौँ विश्वविद्यालयका संस्थापक उपकुलपति डा. सुरेशराज शर्माको सभापतित्व, धुलिखेल नगरपालिकाका प्रमुख अशोक ब्यान्जू श्रेष्ठ र उपप्रमुख विमला शर्मा तथा काभ्रे जिल्लाका प्रमुख जिल्ला अधिकारी शिवराम पोखरेलको आतिथ्य रहेको उक्त कार्यक्रममा काठमाडौँ विश्वविद्यालयका परीक्षा नियन्त्रक डा. पन्ना थापाले उक्त पुस्तकमाथि समालोचना गर्नुभएको थियो । उक्त पुस्तक शब्दयात्रा प्रकाशनद्वारा प्रकाशित १ सय ५४ औँ कृति हो ।
‘शब्दसञ्चार’ रेडियो कार्यक्रमका प्रस्तोता शिव बन्जाराले सञ्चालन र महाप्रबन्धक शारदाप्रसाद शर्माले स्वागत भाषण गरी मैले पुस्तकको परिचय दिएको उक्त कार्यक्रममा अनुवादकद्वय डा. भास्कर हुमागाई र इ. रोशन अधिकारीलाई होटल हिमालयन होराइजनका तर्फबाट आभारपत्र प्रदान गरिएको थियो ।
कार्यक्रममा गीतिभास्कर मच्छेश्वर सापकोटा, लेखकहरू डा. इन्दुल केसी, डा. हेमराज काफ्ले, उद्धवप्रसाद नेपाल, निर्मला श्रेष्ठ, रमेश अधिकारी, पूर्णबहादुर कर्माचार्य, पुण्यवती घले, चूडाप्रसाद चौलागाई, केदारनाथ तिमल्सिना तथा रामप्रसाद अधिकारी, प्रह्लाद प्याकुरेल, अमृत अधिकारी, सिद्धिबहादुर कर्माचार्य, अम्बिका थापा, प्रकृति प्याकुरेल, सङ्गीता केसी, दीपक तिमल्सिना, वेदप्रसाद कोजू, अनमोल माकजू, चुनियालाल श्रेष्ठ आदिको सहभागिता रहेको थियो ।