शब्दयात्रा प्रकाशनका संस्थापक अध्यक्ष हरि मञ्जुश्रीले जीवित छँदै आफ्नो शरीरको हड्डी दान गर्ने नेपाली सन्त लीलादास घिमिरेका विषयमा प्रवचन गर्नुभयो । सनातन वैदिक विवेचना नामक कार्यक्रममा साप्ताहिक रूपमा नेपाली सन्तहरूका विषयमा प्रवचन गर्ने क्रममा उहाँले यो हप्ता ताप्लेजुङ चाँगेका लीलादास घिमिरेका विषयमा प्रवचन गर्नुभएको हो । सन्त लीलादास घिमिरेले सिक्किमका लामाहरूलाई आफ्नो नलिखुट्टाको हाड दान गर्नुभएको थियो । उहाँको हाडलाई भुटानका बौद्ध गुम्बाहरूमा राखिएको छ ।

शब्दयात्रा प्रकाशन काभ्रेपलान्चोक सम्पर्क केन्द्रको आयोजनामा सञ्चालित ‘कर्मयोद्धासँग शब्दसंवाद’ कार्यक्रममा अन्वेषक तथा साहित्यकार लालबहादुर भुजेलले नेपालको मौलिक सङ्गीत ठाडोभाकाका विषयमा जानकारीमूलक प्रवचन गर्नुभयो । उहाँले ठाडोभाकाका विषयमा अन्वेषणात्मक कृति नै लेखेर प्रकाशन गराउनुभएको छ । प्रवचन कार्यक्रममा उहाँले ठाडोभाकाशिरोमणि भेडीखर्के साइँलोका रूपमा प्रसिद्धि प्राप्त गरेका दीर्घराज अधिकारी लगायत अन्य गायकहरू र लमजुङमा रहेको ठाडोभाका सम्बन्धी प्रतिष्ठानका बारेमा पनि जानकारी गराउनुभएको थियो । शब्दयात्रा प्रकाशनका संस्थापक अध्यक्ष हरि मञ्जुश्रीको सभापतित्व र काभ्रेपलान्चोक सम्पर्क केन्द्रका संयोजक साधुराम गिरीको उद्घोषणमा सञ्चालित उक्त कार्यक्रममा ‘शब्दसञ्चार’ रेडियो कार्यक्रमका प्रस्तोता शिव बन्जारा, काभ्रेपलान्चोक सम्पर्क केन्द्रका सदस्य सहदीप पलान्चोके आदिले ठाडोभाका सम्बन्धी जिज्ञासाहरू राख्नुभएको थियो । कार्यक्रममा नानु उप्रेती लगायतका व्यक्तिहरू पनि सहभागी हुनुहुन्थ्यो ।

शब्दयात्रा प्रकाशनले १७१ औँ प्रकाशनपुष्पका रूपमा ‘श्रीकृष्ण रहस्य’ नामक पुस्तक प्रकाशन गर्ने भएको छ । प्रेमदास उपाध्याय घिमिरेद्वारा लिखित यस पुस्तकको सम्पादन हरि मञ्जुश्री र डिल्लीराम निरौलाले संयुक्त रूपमा गर्नुभएको छ । हिमाली निरौला, गम्भीर घिमिरे र लीला घिमिरेको प्रकाशन सम्बन्धी व्यवस्थापनमा प्रकाशन हुन लागेको यो पुस्तक करिब ४ सय ६४ पृष्ठको हुनेछ । 

अन्वेषकहरू परशु घिमिरे र डा. बलराम तिमल्सिनाले शब्दसाधक तीर्थमा गएर शब्दयात्रा प्रकाशनको जग्गा, शब्दयात्रा प्रकाशनले राखेका सालिकहरू, शब्दयात्रा स्तम्भ, शब्दयात्रा शारदा मन्दिर, शब्दयात्रा पुस्तकालय आदिको अवलोकन गर्नुभयो । उहाँहरूले शब्दयात्रा प्रकाशन पुस्तकालयका लागि अन्वेषणमूलक केही पुस्तकहरू प्रदान गर्नुभयो । त्यस बखत शब्दयात्रा प्रकाशनका संस्थापक अध्यक्ष हरि मञ्जुश्री र उहाँहरूका बीच शब्दयात्रा प्रकाशनले निर्माण गर्न लागेको शब्दयात्रा बहुआयामिक अनुसन्धान केन्द्रका विषयमा विचार–विमर्श भएको थियो ।

शब्दयात्रा प्रकाशनका चारजना आजीवन सदस्य सुभाष स्मृति प्रतिष्ठानको कार्यसमितिमा निर्विरोध निर्वाचित हुनुभएको छ । प्रतिष्ठानको वार्षिक दिवसमा नयाँ कार्यसमितिको गठन गर्दा चन्द्रबहादुर खड्का, हरि मञ्जुश्री, पुण्यवती घले र प्रदीप केसी कार्यसमितिमा चयन हुनुभएको हो ।

शब्दयात्रा प्रकाशनका आजीवन सदस्य डा. इन्दुल केसी सुभाष स्मृति प्रतिष्ठानद्वारा गठित ‘अन्तरसंस्था समन्वय समिति’ को संयोजकमा चयन हुनुभएको छ । सुभाष स्मृति प्रतिष्ठानको १८ औँ वार्षिक दिवसको अवसरमा उहाँलाई समन्वय समितिको संयोजक चयन गरिएको हो । कार्यक्रममा माल्यार्पण शब्दयात्रा प्रकाशनका आजीवन सदस्य साधुराम गिरीले गर्नुभएको थियो ।