पचास वर्षभन्दा बढी समय पत्रकारिता गरेपछि साहित्यिक यात्रामा लाग्नुभएका बलदेव थापा धमाधम साहित्यिक कृति तयार पार्दै हुनुहुन्छ । प्रस्तुत महाकाव्य ‘काग–कोइली’ उहाँको चौथो पुस्तक हो । यसअघि उहाँका ‘कुराको सास्ती’, ‘बा’को वाम’ र ‘मतिपुराण’ प्रकाशनमा आइसकेका छन् । उहाँका सबै पुस्तकको प्रकाशन गर्ने श्रेय शब्दयात्रा प्रकाशनले पाएको छ । उहाँको चौथो पुस्तक ‘काग–कोइली’ नामक महाकाव्य पनि शब्दयात्रा प्रकाशनको प्रकाशकत्वमा प्रकाशित हुँदैछ । यस महाकाव्यमा काग र कोइली मुख्य पात्र छन् र नेपालमा पाइने विभिन्न चराहरू सहायक पात्र बनेका छन् । चरालाई महाकाव्यको पात्र बनाएर चराहरूको चिनारी र विशेषताको जानकारी दिने पहिलो महाकाव्य नै यही हो र बलदेव थापा महाकाव्यमा चराचुरुङ्गीलाई प्रवेश गराउने पहिलो महाकाव्यकार बन्नुभएको छ । यो महाकाव्य ११ चरण (सर्ग) मा विभक्त छ र बोलीचालीको भाषाको संवादात्मक शैलीमा लेखिएको छ ।
२७६. काग–कोइली
