नियात्राकार पोष चापागाईंको ११ औँ नियात्राकृति ‘आनन्द’ (यात्रा र अनुभूति) धमाधम छापिँदैछ । अब केही दिनमै पढ्न पाइन्छ । डा. गोविन्दराज भट्टराईले लेख्नुभएको छ — ‘यसले पाठकलाई तिब्बतका पठार डुलाउँदै मानसरोवर दर्शन गराउँछ अनि कैलाश पर्वत घुमाउँछ । नेपाली वाङ्मयमा त्यस पुण्यभूमिको यात्रा पूरा गरेको वर्णन अत्यन्तै सुन्दर साहित्यिक ढाँचामा प्रस्तुत छ । यो अत्यन्तै नौलो र पठनीय विषय हो ।’ यस पुस्तकको प्रकाशक शब्दयात्रा प्रकाशनको यो १७१ औँ प्रकाशनपुष्प हो ।
मन्दिर बनाउन आर्थिक सहयोग
बनेपा — ६ मा रहेको शब्दयात्रा शारदा मन्दिरको छेउमा राधाकृष्णको मन्दिर निर्माण गर्नका लागि ‘तरुण’ (राष्ट्रिय साप्ताहिक पत्रिका) का सम्पादक तथा ‘तरुण खबर’ (डिजिटल पत्रिका) का सल्लाहकार सम्पादक श्री परशु घिमिरे (ढुङ्खर्क, काभ्रेपलान्चोक) ले शब्दयात्रा प्रकाशनलाई १० हजार रुपियाँ आर्थिक सहयोग उपलब्ध गराउनुभएको छ । शब्दयात्रा प्रकाशन परिवार उहाँप्रति हार्दिक आभार व्यक्त गर्दछ ।
शब्दसञ्चारः चैत २२, २०७८
- Episode 96 – Shabda Sanchar 32:19
२०७८ सालमा शब्दयात्रा प्रकाशनबाट छापिएका पुस्तकहरू
(१) भरतांशु (महाकाव्य) — नीलकण्ठ भट्टराई, (२) गोमाको फूलबारी (जीवनी) — लोकेन्द्र ढकाल, (३) कुमारी सिन्दुर (गीतिकाव्य) — नगेन्द्रप्रसाद आचार्य ‘विरामरश्मि’, (४) संस्मरण र आत्मवृत्तान्त (लेखसङ्ग्रह) — हर्षनारायण कर्माचार्य, (५) अरू सात समुद्र (कवितासङ्ग्रह) — शैलेन्द्र साकार, (६) पाइला–पाइलामा उमङ्ग (नियात्रासङ्ग्रह) — हिरण्यकुमारी पाठक, (७) शब्दचित्रमा हामी (कवितासङ्ग्रह) — सं. डा. इन्दुल केसीसमेत, (८) ठुमरीकी रानी (लेखसङ्ग्रह) — द्रोणप्रसाद श्रेष्ठ ‘मुन्डाघरे’, (९) भरत (महाकाव्य) — मनिराज जोशी, (१०) विकसित नेपाल सम्पन्न नेपाली (चिन्तन) — कृष्णप्रसाद भट्टराई, (११) जनताका साथी (शशिधर तिमिल्सिना स्मृतिग्रन्थ) — सं. हरि मञ्जुश्री, (१२) श्वेताम्बरी (कवितासङ्ग्रह) — पदम दाहाल, (१३) अशोकचन्द्र धुँजूका लेखहरू (लेखसङ्ग्रह) — अशोकचन्द्र धुँजू श्रेष्ठ, सं. शिव बन्जारा, (१४) आध्यात्मिक ज्ञानभण्डार (लेखसङ्ग्रह) — उद्धवप्रसाद नेपाल, (१५) नजोडिएको सम्बन्ध (उपन्यास) — माधवप्रसाद चापागाई, (१६) आस्था (बिरौंलासङ्ग्रह) — सं. केदारनाथ तिमल्सिना ।
‘आस्था’ (बिरौंलासङ्ग्रह) छापिने
शब्दयात्रा प्रकाशनबाट केदारनाथ तिमल्सिनाको लेखन तथा सङ्कलनमा ‘आस्था’ नामक बिरौंलासङ्ग्रह यही चैत महिनाभित्रै प्रकाशित हुने भएको छ । यस पुस्तकमा शिक्षासेवी रामप्रसाद अधिकारीको मन्तव्य रहेको छ । यो पुस्तक शब्दयात्रा प्रकाशनको १ सय ७० औँ र केदारनाथ तिमल्सिनाको ५ औँ कृति हो । यो पुस्तकसमेत शब्दयात्रा प्रकाशनबाट २०७८ सालमा प्रकाशित पुस्तकको सङ्ख्या १६ पुगेको छ । यसअघि शब्दयात्रा प्रकाशनले केदारनाथ तिमल्सिनाद्वारा लिखित पुस्तक ‘परिवर्तन’ प्रकाशित गरेको थियो ।
आर्थिक सहयोग
शब्दयात्रा प्रकाशनलाई ललितपुर महानगरपालिका वडा नं. १५ ताल्छीखेल निवासी समाजसेवी प्रा. डा. जगदीश वैद्यले ५ हजार रुपियाँ आर्थिक सहयोग गर्नुभएको छ । शब्दयात्रा प्रकाशन परिवार यस सहयोगका लागि उहाँप्रति हार्दिक आभार व्यक्त गर्दछ ।
रामकृष्ण कर्माचार्य, मुक्तिनाथ शर्मा न्यौपाने र चन्द्रकला शाहलाई सम्मान गरिने
शब्दयात्रा प्रकाशनद्वारा गठित सम्मान्य व्यक्तित्व चयन समितिले २०७८ सालमा समर्पण गरिने बाँकी तीन विधाका सम्मानको पनि निर्णय गरेको छ । त्यस अनुसार २०७८ सालको ‘शब्दयात्रा देवीप्रसाद सापकोटा आमसञ्चार सम्मान’ अग्रज पत्रकार रामकृष्ण कर्माचार्य (ललितपुर) लाई समर्पण गरिने भएको छ । यस सम्मानका आर्थिक व्यवस्थापक मोरङ जिल्लाका लेखक सुनील सापकोटा हुनुहुन्छ । यसै गरी २०७८ सालको ‘शब्दयात्रा विष्णुमाया–टीकाप्रसाद बालसाहित्य सम्मान’ बालसाहित्यकार मुक्तिनाथ शर्मा न्यौपाने (लमजुङ) लाई समर्पण गरिने भएको छ । यस सम्मानका आर्थिक व्यवस्थापक काभ्रेपलान्चोक जिल्लाका बालसाहित्यकार गोपाल पराजुली हुनुहुन्छ । यसै गरी २०७८ सालको ‘शब्दयात्रा मेलवादेवी गुरुङ महिला प्रतिभा सम्मान’ लोकगायिका चन्द्रकला शाह (दाङ) लाई प्रदान गरिने भएको छ । यस सम्मानका आर्थिक व्यवस्थापक भोजपुर जिल्लाका लेखक द्रोणप्रसाद श्रेष्ठ हुनुहुन्छ । यी सम्मान पनि यसै महिनामा समर्पण गरिनेछन् ।
शब्दसञ्चारः चैत १५, २०७८
- Episode 95 – Shabda Sanchar 29:50
मञ्जुल, डा. तुलसी भट्टराई र डा. गोविन्द टण्डनलाई सम्मान गरिने
शब्दयात्रा प्रकाशनद्वारा गठित सम्मान्य व्यक्तित्व चयन समितिले २०७८ सालमा समर्पण गरिने कविता–काव्य, समालोचना र अनुसन्धान सम्मानको निर्णय गरेको छ । निर्णय अनुसार २०७८ सालको वसन्त शर्मा कविता–काव्य सम्मान कवि मञ्जुल (२००३, भोजपुर) लाई समर्पण गरिने भएको छ । यस सम्मानका आर्थिक व्यवस्थापक काभ्रेपलान्चोक जिल्लाका कवि कविप्रसाद प्याकुरेल हुनुहुन्छ । यसै गरी २०७८ सालको पद्मकला–भीमप्रसाद सुवेदी समालोचना सम्मान समालोचक डा. तुलसी भट्टराई (२००६, ताप्लेजुङ) लाई समर्पण गरिने भएको छ । यस सम्मानका आर्थिक व्यवस्थापक भोजपुरका लेखक लालानाथ सुवेदी हुनुहुन्छ । यसै गरी २०७८ सालको जयदेव अधिकारी अनुसन्धान सम्मान अनुसन्धाता डा. गोविन्द टण्डन (२०१२, काठमाडौँ) लाई समर्पण गरिने भएको छ । यस सम्मानका आर्थिक व्यवस्थापक मोरङका शिक्षासेवी राजेन्द्र विरही हुनुहुन्छ । तीनैवटा सम्मान यसै महिनामा समर्पण गरिनेछन् ।
ॐकार टेलिभिजन, कपन–बानेश्वर र पद्मसागर कक्षपतिलाई सम्मान गरिने
शब्दयात्रा प्रकाशनद्वारा गठित सम्मानित व्यक्तित्व चयन समितिले २०७८ सालमा समर्पण गरिने तीन विधाका सम्मानको निर्णय गरेको छ । २०७८ सालको ‘शब्दयात्रा षडानन्द अधिकारी आध्यात्मिक पत्रकारिता सम्मान’ आध्यात्मिक जागरण गराइरहेको ॐकार टेलिभिजनलाई समर्पण गरिने भएको छ । यस सम्मानका आर्थिक व्यवस्थापक काभ्रेपलान्चोक जिल्लाका समाजसेवी सुदर्शन आचार्य हुनुहुन्छ । यसै गरी २०७८ सालको ‘शब्दयात्रा कृष्णलाल अधिकारी साहित्यिक पत्रिका सम्मान’ नेपालको पहिलो साहित्यिक साप्ताहिक रङ्गीन पत्रिका ‘कपन–बानेश्वर’ लाई समर्पण गरिने भएको छ । यस सम्मानका आर्थिक व्यवस्थापक भोजपुर जिल्लाका समाजसेवी योगेन्द्र खत्री हुनुहुन्छ । यसै गरी २०७८ सालको ‘शब्दयात्रा रत्नदेवी प्रधान फोटो पत्रकारिता सम्मान’ फोटो–पत्रकार पद्मसागर कक्षपतिलाई प्रदान गरिने भएको छ । यस सम्मानका आर्थिक व्यवस्थापक काठमाडौँ जिल्लाका फोटो–पत्रकार हरिगोपाल प्रधान हुनुहुन्छ । तीनैवटा सम्मान यसै महिनामा समर्पण गरिनेछन् ।