शब्दयात्रा प्रकाशनबाट हरेक वर्ष प्रदान गर्ने गरी स्थापना गरिएको ‘दूरदृष्टि नेतृत्व पुरस्कार’ २०७९ सालका लागि कैलाली धनगढीकी समाजसेवी कल्पना भट्टलाई प्रदान गरिने भएको छ । कल्पना भट्टले दृष्टि फाउन्डेसन नेपाल नामक संस्थाको स्थापना गरेर मानसिक सन्तुलन गुमाएका व्यक्तिहरूका लागि खानपिन, बसोवास र उपचारको प्रबन्ध गर्दै आउनुभएको कुरा उहाँका लागि गरिएको सिफारिसपत्रमा उल्लेख छ । उहाँको नाउँ महाकवि मनिराज जोशीले सिफारिस गर्नुभएको थियो । विदेशीसँग सहायता नलिई आफ्नै स्रोत परिचालन गरेर सामाजिक कार्य गर्दै संस्थागत सुदृढीकरण गर्न प्रयत्नरत व्यक्तिलाई प्रदान गरिने यो पुरस्कारका लागि आएका विभिन्न सिफारिसमध्येबाट कल्पना भट्टको नाउँ चयन गरिएको हो । पुरस्कृत व्यक्तिको चयन गर्न शब्दयात्रा प्रकाशनले गठन गरेको चयन समितिमा दामोदर घिमिरे संयोजक तथा रश्मि अधिकारी हुमागाईं र अञ्जनि कोइराला सदस्य हुनुहुन्छ । पुरस्कारमा १५ हजार रुपियाँ, अभिवन्दनापत्र, शब्दयात्रा पट्ट र उपहार प्रदान गरिन्छ । यस पुरस्कारको आर्थिक व्यवस्थापन रश्मि मञ्जुश्री र इ. रोशन मञ्जुश्रीले गर्नुभएको हो ।
छ प्रकारका कोष
शब्दयात्रा प्रकाशनले कस्ता–कस्ता कोषहरू बनाएर गतिविधि गर्ने गरेको छ भनेर धेरैजनाले जिज्ञासा राख्नुभएको हुँदा उत्तर दिन लागिएको छ । शब्दयात्रा प्रकाशनमा छ प्रकारका कोषको व्यवस्था गरिएको छ — (१) विभिन्न विधाका सम्मान समर्पण गर्न, (२) विभिन्न विधाबाट योगदान गर्ने व्यक्तिलाई पुरस्कृत गर्न, (३) छात्रछात्रालाई अध्ययनवृत्ति दिन, (४) अनुसन्धातालाई विद्वतवृत्ति दिन, (५) विपत्तिपीडित लेखक, पत्रकार र कलाकारलाई आर्थिक सहयोग गर्न, (६) भौतिक संरचना निर्माण गर्न । कुनै पनि कोषका लागि सरकारी निकाय र विदेशीहरूबाट रकम लिइएको छैन । शब्दयात्रा प्रकाशनमार्फत वाङ्मयिक सेवा गर्न चाहने व्यक्तिहरूले राखेको अक्षयकोषबाट यस संस्थाका गतिविधिहरू सञ्चालन भएका छन् ।
शब्दयात्रा प्रकाशनको भवन उद्घाटन
शब्दयात्रा प्रकाशनको भवनको उद्घाटन हिजो साउन २४ गते मङ्गलबार गरियो । काठमाडौँ विश्वविद्यालयका उपकुलपति प्रा. डा. भोला थापा र संस्थापक उपकुलपति प्रा. डा सुरेशराज शर्माले संयुक्त रूपमा भवनको उद्घाटन गर्नुभयो । शब्दयात्रा प्रकाशनको झण्डाको समाजसेवी बेलप्रसाद श्रेष्ठले, भवन हस्तान्तरण गरिँदाको शिलालेखको प्रा. डा. भोला थापा र सावित्री जङ्गम थापाले संयुक्त रूपमा अनावरण अर्नुभयो । यसै गरी ‘सावित्री जङ्गम थापा अध्ययन–अनुसन्धान कक्ष’ को पूर्वमन्त्री अष्टलक्ष्मी शाक्य र दाता सावित्री जङ्गम थापाले तथा ‘शब्दयात्रा शारदा थापा सभाकक्ष’ को पूर्वमन्त्री शान्ता मानवी र दाता सकुल थापाले संयुक्त रूपमा उद्घाटन गर्नुभयो । तत्पश्चात् ‘सावित्री जङ्गम थापा अध्ययन–अनुसन्धान कक्ष’ को साँचो सावित्री जङ्गम थापाले र ‘शब्दयात्रा शारदा थापा सभाकक्ष’ को साँचो दाता सकुल थापाले शब्दयात्रा प्रकाशनका संस्थापक अध्यक्ष हरि मञ्जुश्रीलाई हस्तान्तरण गनुर््भयो । कार्यक्रममा ‘सावित्री जङ्गम थापाको जीवनी र व्यक्तित्व’ पुस्तक प्रा. डा. भोला थापा र प्रा. डा सुरेशराज शर्माले संयुक्त रूपमा सार्वजनिक गर्नुभयो । त्यसपछि भवन निर्माणमा सहयोग गर्नेहरू कृष्णमणि कुइकेल, सकुल थापा, हरिगोपाल प्रधान, शारदाप्रसाद शर्मा, नवीना श्रेष्ठ, निर्मला श्रेष्ठ, शिव बन्जारा, सङ्गीता थापा र कृष्णप्रसाद सापकोटालाई कदरपत्र प्रदान गरियो । कदरपत्र आर्किटेक इन्जिनियर तथा राजनीतिकर्मी हिसिला यमी, राष्ट्रिय योजना आयोगका सदस्य सलोनी सिंह, राष्ट्रिय मानव–अधिकार आयोगका सदस्य लिली थापा, साहित्यकार हिरण्यकुमारी पाठक, साहित्यकार रामप्रसाद पन्त र साहित्यकार रवीन्द्र आशीष शैलीले प्रदान गर्नुभयो । हरि मञ्जुश्रीको सभापतित्वमा सम्पन्न भएको उक्त कार्यक्रम भ्रष्टविरोधी शास्त्रका प्रवर्तक भरत जङ्गमले समापन गर्नुभयो । प्रजापति तिमिल्सिनाले स्वस्तिवाचन र शिव बन्जाराले उद्घोषण गर्नुभएको उक्त कार्यक्रममा रुद्राक्षको माला अमृत अधिकारीले लगाइदिनुभयो भने प्रकृति प्याकुरेल र पद्मसागर कक्षपतिले छायाङ्कन गर्नुभयो । उपस्थित महानुभावहरूलाई हरि मञ्जुश्रीद्वारा लिखित ‘फोरिएको पर्खाल’ कथासङ्ग्रह सफ्टवेयर इन्जिनियर रोशन मञ्जुश्री अधिकारी र केदारनाथ तिमल्सिनाले प्रदान गर्नुभयो ।
पुस्तक पाइयो
शब्दयात्रा प्रकाशनका आजीवन सदस्य पदम दाहालले मादी नगरपालिकाबाट दुईवटा पुस्तक प्रकाशन गराउनुभएको छ — ‘गुरुचेला गौरवग्रन्थ’ र ‘सङ्खुवासभाका २७ राजनीतिक योद्धाहरू’ । उहाँले शब्दयात्रा प्रकाशनका संस्थापक अध्यक्ष हरि मञ्जुश्री अधिकारीलाई दुवै पुस्तक दिनुभएको छ । ‘सङ्खुवासभाका २७ राजनीतिक योद्धाहरू’ लेख्ने श्रेय हरि मञ्जुश्री अधिकारीले दिएको कुरा कृतिकारले आफ्नो भूमिकामा र दयानन्द दाहालले आफ्नो मन्तव्यमा उल्लेख गर्नुभएको छ । यसका लागि शब्दयात्रा प्रकाशन परिवार उहाँहरूप्रति हार्दिक आभार व्यक्त गर्दछ । दुवै पुस्तक शब्दयात्रा प्रकाशन पुस्तकालयमा राखिनेछन् । पुस्तक निःशुल्क प्रदान गर्नुभएकोमा पदम दाहालज्यूप्रति शब्दयात्रा प्रकाशन फेरि आभार प्रकट गर्दछ ।
डा. पुष्करराज भट्ट शब्दसाधक तीर्थमा
लघुकथाका विषयमा विद्यावारिधि गर्नुभएका साहित्यकार तथा ग्रन्थसम्पादक डा. पुष्करराज भट्टलाई शब्दयात्रा प्रकाशनका संस्थापक अध्यक्ष हरि मञ्जुश्रीले शब्दयात्रा प्रकाशनद्वारा निर्मित शब्दसाधक तीर्थमा आज २०७९ साल साउन २१ गते शनिबार स्वागत गर्नुभयो । त्यस बखत डा. भट्टले शब्दयात्रा प्रकाशनको नवनिर्मित भवन, कार्यालय, शब्दयात्रा पुस्तकालय, शब्दयात्रा स्तम्भ, शब्दयात्रा शारदा मन्दिर आदिको पनि अभिरुचिपूर्वक अवलोकन गर्नुभयो ।
गरुडध्वज बस्नेतले ‘प्रलय’ ल्याउने
लेखक गरुडध्वज बस्नेतले ‘प्रलय’ ल्याउन लाग्नुभएको छ । ‘प्रलय’ शब्दयात्रा प्रकाशनको प्रकाशकत्वमा प्रकाशन हुन लागेको कवितासङ्ग्रह हो । यसअघि उहाँले २०७६ सालको वैशाख महिनामा ‘जीवनका तीन घुम्ती’ नामक आत्मसंस्मरणात्मक पुस्तक प्रकाशन गराउनुभएको थियो । भोजपुर जिल्लाको दावाँमा जन्मनुभएका गरुडध्वज बस्नेत झापाको गौरादहलाई कर्मक्षेत्र बनाई हाल भक्तपुरको मध्यपुर ठिमीमा बसोवास गर्नुहुन्छ । उहाँ ७९ वर्षका हुनुहुन्छ । उहाँले प्रकाशनका लागि अरू दुई पुस्तक पनि तयार पारिसक्नुभएको छ ।
छान्ने जिम्मा समितिलाई
शब्दयात्रा प्रकाशनबाट आगामी असोज महिनामा शब्दयात्रा दूरदृष्टि नेतृत्व पुरस्कार, शब्दयात्रा रणलक्ष्मी राष्ट्रिय प्रतिभा पुरस्कार र शब्दयात्रा जीवनचन्द्र कोइराला सिन्धुली प्रतिभा पुरस्कार समर्पण गरिनेछन् । सबै पुरस्कारमा १५–१५ हजार रुपियाँ, शब्दयात्रा पट्ट र अभिवन्दनापत्र रहनेछ । तीनैवटा पुरस्कारका लागि उपयुक्त पात्रको नाउँ सिफारिस गरी साउन १५ गतेभित्र पठाउन शब्दयात्रा प्रकाशनको वेबसाइट र हरि मञ्जुश्रीको फेसबुकबाट सार्वजनिक आह्वान गरिएको थियो । त्यसैअनुरूप तीनैवटा पुरस्कारका लागि विभिन्न नाउँमा सिफारिसहरू प्राप्त भएका छन् । प्राप्त भएका सिफारिसहरूको अध्ययन गरी उपयुक्त पात्रको नाउँ चयन गरेर यही साउन महिनाभित्र शब्दयात्रा प्रकाशनलाई बुझाउन तीन सदस्यीय समितिलाई आग्रह गरिएको छ । समितिमा लेखक दामोदर घिमिरे संयोजक रहनुभएको छ भने अन्य दुई सदस्य उहाँले नै छान्नुहुनेछ । उक्त समितिबाट चयन गरिएका पात्रलाई नै शब्दयात्रा प्रकाशनले पुरस्कृत गर्नेछ ।
रामप्रसाद अधिकारी अभिनन्दनग्रन्थको सम्पादन सुरु
रामप्रसाद अधिकारी काभ्रेपलान्चोक जिल्लाका सुप्रसिद्ध शिक्षासेवी हुनुहुन्छ । उहाँको सम्मानस्वरूप उहाँका विषयमा विभिन्न व्यक्तिहरूले लेख–संस्मरण लेखेर शब्दयात्रा प्रकाशनमा पठाउनुभएको छ । ती लेख–संस्मरणहरू समावेश गरी ‘रामप्रसाद अधिकारी अभिनन्दनग्रन्थ’ प्रकाशन गर्न लागिएको छ । अभिनन्दनग्रन्थको सम्पादनकार्य सुरु भइसकेको छ । केही समयपछि अभिनन्दनग्रन्थ मुद्रणका लागि छापाखानामा जानेछ । मुद्रणकार्य सकिएपछि उक्त अभिनन्दनग्रन्थलाई सार्वजनिक गरिनेछ । शब्दयात्रा प्रकाशनले शिक्षासेवी रामप्रसाद अधिकारीको सम्मानमा अभिनन्दनग्रन्थ प्रकाशन गर्न नौ सदस्यीय अभिनन्दनग्रन्थ प्रकाशन समिति गठन गरेको हुनाले त्यही समितिको आग्रहमा रामप्रसाद अधिकारीका बारेमा लेखिएका लेख–संस्मरणहरू अभिनन्दनग्रन्थका लागि प्राप्त भएका हुन् ।
पुस्तक–पत्रिकाका लागि आभार
शब्दयात्रा प्रकाशन पुस्तकालयका लागि मानसाग्निले दार्शनिक हाइकुहरूको सङ्ग्रह ‘प्रारम्भ’, केशवप्रसाद चौलागाईंले ‘स्वराज्य र मेलमिलाप’ पुस्तिकाको सातौँ संस्करण तथा अर्जुन लामिछानेले ‘गौरी’ मासिक पत्रिकाको २०७९ साउन अङ्क संस्थापक अध्यक्ष हरि मञ्जुश्रीलाई उपलब्ध गराउनुभएको छ । उहाँहरूप्रति शब्दयात्रा प्रकाशन परिवार हार्दिक आभार व्यक्त गर्दछ ।
फेरि १५ हजार रुपियाँ
‘शब्दयात्रा जीवनचन्द्र कोइराला सिन्धुली प्रतिभा पुरस्कार’ का लागि मनिका शर्मा कोइरालाले १५ हजार रुपियाँ उपलब्ध गराउनुभएको छ । शब्दयात्रा प्रकाशन उहाँप्रति हार्दिक आभार व्यक्त गर्दछ ।