शब्दयात्रा प्रकाशनले आजीवन सदस्य भावना थापाको संयोजकत्वमा आजीवन सदस्य प्रदीप केसी र आजीवन सदस्य निर्मला श्रेष्ठ सदस्य रहेको तीन सदस्यीय ‘शब्दयात्रा सावित्री जङ्गम थापा अध्ययन–अनुसन्धान कक्ष सञ्चालन उपसमिति’ गठन गरेको छ । ‘सावित्री जङ्गम थापा अध्ययन–अनुसन्धान कक्ष’ लाई अनुसन्धान केन्द्रका रूपमा विकास गर्न, सावित्री जङ्गम थापाका विषयमा अनुसन्धान गराउन, विद्वतवृत्तिको व्यवस्था गर्न, उहाँका कृतिहरू र उहाँका विषयमा गरिएका अनुसन्धानहरूको प्रकाशन तथा बिक्री–वितरण गर्ने व्यवस्था मिलाउन उपसमितिको गठन गरिएको हो । उपसमितिमा सदस्य थप गर्नुपरे तीन सदस्यीय उपसमितिले आजीवन सदस्यमध्येबाट दुईजनासम्म थपेर सञ्चालक समितिबाट अनुमोदन गराउने निर्णय गर्दै शब्दयात्रा प्रकाशनको सञ्चालक समितिले ‘शब्दयात्रा सावित्री जङ्गम थापा अध्ययन–अनुसन्धान कक्ष सञ्चालन कार्यविधि निर्देशिका, २०७९’ पनि पारित गरेको छ । सभाकक्ष सञ्चालन उपसमितिमा रहनुभएकोमा भावना थापा, प्रदीप केसी र निर्मला श्रेष्ठमा हार्दिक बधाई छ ।

शब्दयात्रा प्रकाशनलाई सिद्धार्थ वनस्थली इन्स्टिच्युटले आभारपत्र पठाएको छ । आभारपत्रमा लामो समयदेखि नेपाली भाषा, साहित्य, कला, शिक्षा लगायत विभिन्न विधामा उल्लेख्य योगदान गर्ने कर्मवीरहरूको सम्मान, अभिनन्दन र पुरस्कार समर्पण तथा कृति प्रकाशन जस्ता अनेकानेक सुकर्म गरेको कुरा उल्लेख गर्दै यस कार्यका लागि साधुवाद अर्पण गरी उत्तरोत्तर प्रगति र सुयशको कामना गरिएको छ । आभारपत्रमा २०७९।९।१२ मा बसेको सिद्धार्थ वनस्थली इन्स्टिच्युटको व्यवस्थापन समितिको बैठकले कुशल शैक्षिक प्रशासक र आदर्श शिक्षकको गरिमा कायम गरेका सिद्धार्थ वनस्थली इन्स्टिच्युटको व्यवस्थापन समितिका सदस्य रामप्रसाद अधिकारीको सार्वजनिक सम्मान र ‘आदर्श शिक्षक (अभिनन्दनग्रन्थ)’ प्रकाशन गरी उहाँको जीवनकालमै कदर गर्ने वन्दनीय कार्यका लागि धन्यवाद पनि व्यक्त गरिएको छ । पत्रमा प्राचार्य नारायण निरौलाले हस्ताक्षर गर्नुभएको छ ।

शब्दयात्रा प्रकाशनले आजीवन सदस्य भावना थापाको संयोजकत्वमा आजीवन सदस्य प्रदीप केसी र आजीवन सदस्य निर्मला श्रेष्ठ सदस्य रहेको तीन सदस्यीय ‘शब्दयात्रा सावित्री जङ्गम थापा अध्ययन–अनुसन्धान कक्ष सञ्चालन उपसमिति’ गठन गरेको छ । ‘सावित्री जङ्गम थापा अध्ययन–अनुसन्धान कक्ष’ लाई अनुसन्धान केन्द्रका रूपमा विकास गर्न, सावित्री जङ्गम थापाका विषयमा अनुसन्धान गराउन, विद्वतवृत्तिको व्यवस्था गर्न, उहाँका कृतिहरू र उहाँका विषयमा गरिएका अनुसन्धानहरूको प्रकाशन तथा बिक्री–वितरण गर्ने व्यवस्था मिलाउन उपसमितिको गठन गरिएको हो । उपसमितिमा सदस्य थप गर्नुपरे तीन सदस्यीय उपसमितिले आजीवन सदस्यमध्येबाट दुईजनासम्म थपेर सञ्चालक समितिबाट अनुमोदन गराउने निर्णय गर्दै शब्दयात्रा प्रकाशनको सञ्चालक समितिले ‘शब्दयात्रा सावित्री जङ्गम थापा अध्ययन–अनुसन्धान कक्ष सञ्चालन कार्यविधि निर्देशिका, २०७९’ पनि पारित गरेको छ । सभाकक्ष सञ्चालन उपसमितिमा रहनुभएकोमा भावना थापा, प्रदीप केसी र निर्मला श्रेष्ठमा हार्दिक बधाई छ ।

शब्दयात्रा प्रकाशनले ‘शब्दयात्रा साहित्यिक पत्रिका सम्मान, २०७९’ साहित्यिक पत्रकार, अन्वेषक तथा सम्पादक शेषराज सिवाकोटी (दोलखा) द्वारा सम्पादित ‘ज्ञानगुनका कुरा’ नामक साहित्यिक पत्रिकालाई समर्पण गर्ने भएको छ । साहित्यिक पत्रकारिताको क्षेत्रमा ३५ वर्षभन्दा बढी निरन्तर सेवा गर्नुका साथै लेखन, अन्वेषण र सम्पादन विधाका महान् साधकहरूका विषयमा महत्त्वपूर्ण विशेषाङ्कहरू प्रकाशन गरेर नेपाली भाषा–साहित्यको श्रीबृद्धिमा अतुल्य योगदान गरेकोमा ‘ज्ञानगुनका कुरा’ लाई यो सम्मान समर्पण गर्ने निर्णय गरिएको हो । कवि तथा समाजसेवी योगेन्द्र खत्री (भोजपुर) ले व्यवस्था गरिदिनुभएको अक्षयकोषको ब्याजबाट प्रथम साहित्यिक सहिद कृष्णलाल अधिकारीको नाउँमा संस्थापित यो सम्मान हरेक वर्ष समर्पण गर्ने गरिन्छ । सम्मानित हुन लागेकोमा साहित्यिक पत्रकार, अन्वेषक तथा सम्पादक शेषराज सिवाकोटीद्वारा सम्पादित ‘ज्ञानगुनका कुरा’ नामक साहित्यिक पत्रिकालाई हार्दिक बधाई छ ।

शब्दयात्रा प्रकाशनले ‘शब्दयात्रा समालोचना सम्मान, २०७९’ नेपाली, हिन्दी, मैथिली र अङ्ग्रेजी भाषाका समालोचक, साहित्यकार तथा अनुवादक डा. रामदयाल राकेश (सर्लाही) लाई समर्पण गर्ने भएको छ । समालोचना विधामा ‘नेपाली कविता विभिन्न आयाम’, ‘नेपाली साहित्य विभिन्न आयाम’, ‘नेपाली समालोचना विभिन्न आयाम’ जस्ता पुस्तकहरू लेखी प्रकाशन गराउनुका साथै नेपाली र मैथिलीभाषी साहित्यलाई हिन्दी र अङ्ग्रेजीभाषी पाठकसमक्ष प्रस्तुत गरेर विशिष्ट योगदान गर्नुभएको हुनाले उहाँलाई यो सम्मान समर्पण गर्ने निर्णय गरिएको हो । लेखक लालानाथ सुवेदी र उहाँका भाइहरू (भोजपुर) ले आफ्ना मातापिता पद्मकला — भीमप्रसाद सुवेदीको स्मृति र सम्मानमा व्यवस्था गरिदिनुभएको अक्षयकोषको ब्याजबाट हरेक वर्ष यो सम्मान समर्पण गरिन्छ । सम्मानित हुन लाग्नुभएकोमा नेपाली, हिन्दी, मैथिली र अङ्ग्रेजी भाषाका समालोचक, साहित्यकार तथा अनुवादक डा. रामदयाल राकेशलाई हार्दिक बधाई छ ।

शब्दयात्रा प्रकाशनले ‘शब्दयात्रा महिला प्रतिभा सम्मान, २०७९’ सामाजिक अभियन्ता तथा साहित्यकार शान्ता मानवी (अर्घाखाँची) लाई समर्पण गर्ने भएको छ । सामाजिक चेतना अभिबृद्धि, महिला जागरण र सशक्तीकरण तथा मानव–अधिकारका क्षेत्रमा आजीवन समर्पित रही संस्थागत नेतत्ृव र सहभागिता एवम् साहित्यिक लेखनमा पनि सक्रिय रहँदै आफ्नो व्यावहारिक कौशलका कारणबाट समेत आदर्श र अनुकरणीय महिलाका रूपमा स्थापित भई आफूले अँगालेका विधाहरूबाट राष्ट्रिय समाजमा विशिष्ट योगदान गर्नुभएकोमा उहाँलाई यो सम्मान समर्पण गर्ने निर्णय गरिएको हो । लेखक तथा पूर्वप्रशासक द्रोणप्रसाद श्रेष्ठ ‘मुन्डाघरे’ (भोजपुर) ले आफ्नी अर्धाङ्गिनी मनका श्रेष्ठको स्मृतिमा व्यवस्था गरिदिनुभएको अक्षयकोषको ब्याजबाट हरेक वर्ष यो सम्मान समर्पण गरिन्छ । सम्मानित हुन लाग्नुभएकोमा सामाजिक अभियन्ता तथा साहित्यकार शान्ता मानवीलाई हार्दिक बधाई छ ।

शब्दयात्रा प्रकाशनले ‘शब्दयात्रा आध्यात्मिक पत्रकारिता सम्मान, २०७९’ आध्यात्मिक लेखक तथा प्रवाचक उद्धवप्रसाद भट्टराई (काभ्रेपलान्चोक) लाई समर्पण गर्ने भएको छ । राष्ट्रिय स्तरमा प्रकाशन हुने आध्यात्मिक, विचारप्रधान तथा समाचारप्रधान विभिन्न त्रैमासिक, मासिक, साप्ताहिक र अनलाइन पत्रिकाहरूमा फरक–फरक विषयका आध्यात्मिक लेखहरू लेखी प्रकाशन गराएर तथा यु–ट्युबमा पनि सुन्न सकिने गरी विविध विषयमा सारगर्भित प्रवचनहरू गरेर सनातन धर्मसंस्कृति, आध्यात्मिक भावना, नैतिक चरित्र एवम् मौलिक परम्परासम्बन्धी विषय राष्ट्रिय समाजमा परिचित गराई पाठकलाई यथार्थ जानकारी गराउनुभएकोमा उहाँलाई यो सम्मान समर्पण गर्ने निर्णय गरिएको हो । समाजसेवी सुदर्शन आचार्य (काभ्रेपलान्चोक) ले नेपालका प्रथम शिक्षासेवी आबाल ब्रह्मचारी षडानन्द अधिकारीको सम्मानमा व्यवस्था गरिदिनुभएको अक्षयकोषको ब्याजबाट हरेक वर्ष यो सम्मान समर्पण गरिन्छ । सम्मानित हुन लाग्नुभएकोमा आध्यात्मिक लेखक तथा प्रवाचक उद्धवप्रसाद भट्टराईलाई हार्दिक बधाई छ ।