आज शब्दयात्रा प्रकाशनले काभ्रेपलान्चोक कोसीदेखाका ८० वर्षीय यज्ञप्रसाद उपाध्याय त्रिपाठीद्वारा लिखित ‘कन्याकुमारी’, ‘राधाचरणामृत, ‘भगवतीचरणामृत’, ‘श्रीकृष्णचरणामृत’ र ‘कृपालुचरणामृत’ नामका पाँचवटा महाकाव्य एकसाथ सार्वजनिक गरायो । कार्यक्रमका प्रमुख अतिथि षट्कृतिकाका रूपमा समाजसेवी तथा लेखिका सावित्री जङ्गम थापा, काभ्रेपलान्चोक जिल्ला समन्वय समितिका सदस्य तथा प्रवक्ता अप्सरा ढुङ्गाना, धुलिखेल नगरपालिकाका पूर्वउपप्रमुख विमला शर्मा, पाँचखाल नगरपालिकाका पूर्वउपप्रमुख लक्ष्मी दनुवार, मन्डन देउपुर नगरपालिकाका पूर्वउपप्रमुख निर्मला शाही र नमोबुद्ध नगरपालिकाका पूर्वउपप्रमुख रामदेवी तामाङ हुनुहुन्थ्यो । उहाँहरूले पाँचैवटा महाकाव्य एकसाथ सार्वजनिक गर्नुभएको थियो । शब्दयात्रा प्रकाशनका संस्थापक अध्यक्ष हरि मञ्जुश्रीको सभापतित्वमा सम्पन्न आजको कार्यक्रममा महाकाव्यकारको चिनारी कृष्णमणि कुइकेलले, महाकाव्यमाथि टिप्पणी शारदाप्रसाद शर्माले, स्वागत मन्तव्यका साथै प्रमुख अतिथिहरूको चिनारी शिव बन्जाराले र कार्यक्रम सञ्चालन प्रदीप केसीले गर्नुभएको थियो । कार्यक्रममा महाकाव्यकार यज्ञप्रसाद त्रिपाठीलाई अभिनन्दन पनि गरिएको थियो । अभिनन्दनका क्रममा ढुण्डिराज पोखरेलले पुष्पमाला, हरि मञ्जुश्रीले रुद्राक्षमाला, प्रजापति तिमिल्सिनाले उपहार, चन्द्रबहादुर खड्काले शब्दयात्रा पट्ट र रामप्रसाद अधिकारीले किरीट लगाइदिनुभएको थियो भने अभिवन्दनापत्रको वाचन पदम दाहालले र अभिवन्दनापत्र हस्तान्तरण सावित्री जङ्गम थापाले गर्नुभएको थियो । कृतिकारकी अर्धाङ्गिनी गङ्गादेवी त्रिपाठीलाई डा. इन्दुल केसीले पुष्पमाला, हरि मञ्जुश्रीले रुद्राक्षमाला, प्रमुख अतिथिहरूले पुस्तक र सावित्री जङ्गम थापाले पछ्यौरा समर्पण गर्नुभएको थियो । कार्यक्रममा महाकाव्यकारले सङ्क्षिप्त मन्तव्य व्यक्त गर्नुभएको थियो भने कवि गोविन्दबहादुर खड्काले कविता वाचन गर्नुभएको थियो । सामग्रीको व्यवस्थापन सङ्गीता केसीले, छायाङ्कन तथा ध्वन्याङ्कन प्रकृति प्याकुरेलले, प्रमुख अतिथिहरूलाई शब्दयात्रा प्रकाशनका तर्फबाट उपहार समर्पण निर्मला श्रेष्ठले, स्वस्तिवाचन केदारनाथ तिमल्सिनाले, ब्राह्मणपूजन श्री शर्मा मूर्खले, कार्यक्रमको समुद्घाटन शिक्षासेवी पूर्णबहादुर कर्माचार्यले र कार्यक्रमलाई समीक्षासहित विसर्जन गीतिभास्कर मच्छेश्वर सापकोटाले गर्नुभएको थियो ।