प्रा. केदारनाथ श्रेष्ठ, डा. इन्दुल केसी र लीलादेवी श्रेष्ठले आगामी चैत महिनामा गरिने शब्दयात्रा सम्मानका लागि प्राप्त भएका सिफारिसहरू अध्ययन गरी सम्मान गर्नुपर्ने व्यक्ति वा संस्थाको चयन गर्नुहुनेछ ।
२६९. नेवाः सभ्यताका केही संस्कार–संस्कृति
शब्दयात्रा प्रकाशनले प्रकाश ‘उज्ज्वल’ बनेपा (प्रकाशबहादुर कायस्थ) लाई लघु अनुसन्धान परियोजना अन्तर्गत २०८२ सालको ‘शब्दयात्रा प्रतापमान–झरना मास्के नेवाः सभ्यता अनुसन्धान विद्वतवृत्ति’ समर्पण गरेको थियो । त्यही विद्वतवृत्ति अन्तर्गत रहेर ‘नेवाः सभ्यताका केही संस्कार–संस्कृति’ नामक यो पुस्तक तयार पारिएको हो ।
२६८. गृहस्थ योगसाधकका गुणहरू
प्राचीनकालदेखि नै गृहस्थ योगसाधकमा कुन–कुन गुणहरू हुनपर्दछ, जसले गर्दा ऊ योगसाधना र गृहस्थ धर्म दुवैमा सफल होस् भनी विभिन्न चिन्तन, मनन र अनुसन्धानहरू हुँदै आएका छन् । १२ औं शताब्दीमा महान् साहित्यकार हेमचन्द्र सूरीश्वरले आफ्नो ‘योगशास्त्र’ भन्ने पुस्तकको प्रथम अध्यायमा गृहस्थ योगसाधकका लागि आवश्यक ३५ गुणहरूको वर्णन गर्नुभएको थियो । तिनै ३५ गुणहरूलाई पतञ्जली योगपीठबाट आचार्य बालकृष्णजी महाराजले संस्कृतबाट हिन्दीमा अनुवाद गरी सबै सद्गृहस्थका लागि उपलब्ध गराइदिनुभएको थियो । गृहस्थ योगसाधकमा हुनुपर्ने ३५ गुणहरूलाई विदुरनीति, चाणक्यनीति, भर्तृहरिनीति, मनुस्मृति, योगदर्शन तथा श्रीमद्भगवद्गीताबाट समेत अझ बढी पुष्टि र प्रकाश पार्ने प्रयास गर्दै दिवाकर जङ्गमले यो पुस्तक तयार पार्नुभएको हो ।
२६७. यस्तो मोडमा
‘यस्तो मोडमा’ प्रकाश श्रेष्ठको पहिलो कवितासङ्ग्रह हो । यस सङ्ग्रहमा उहाँका गद्यकविताहरू सङ्कलित छन् । उहाँका सयौँ सङ्ख्याका फुटकर कविताहरूमध्ये छानिएका एकचालीसवटा कविताहरू मात्र यसमा राखिएका छन् । तीमध्ये पनि केही त छोटा–छोटा अथवा मुक्तकजस्ता छन् । लामो कविता चार पृष्ठको छ । यसभित्रका सबै कविताहरूले युग बोलेका छन्, नेपालको अवस्था बोलेका छन्, जनताको आवाज बोलेका छन्, विसङ्गतिले थिलथिलो बनाएको समाज बोलेका छन्, घात र अविश्वास बोलेका छन् अनि अन्याय र विरोधाभास बोलेका छन् । पहिलो कवितासङ्ग्रह नै यति सुन्दर छ भने माझिएको अर्को सङ्ग्रह कस्तो होला भन्ने कौतूहलले पाठकलाई कुतकुत्याउँछ ।
कुराको सास्ती दोस्रोपटक
अग्रज पत्रकार तथा साहित्यकार बलदेव थापाद्वारा लिखित ‘कुराको सास्ती’ नामक व्यङ्ग्यकवितासङ्ग्रह दोस्रो संस्करण प्रकाशन हुन लागेको छ । उक्त पुस्तक यही फागुन महिनामा सार्वजनिक गर्ने योजना छ । ‘कुराको सास्ती’ को पहिलो संस्करण २०८२ साल जेठ महिनामा प्रकाशन गरिएको थियो ।
बालसाहित्य पुरस्कार पनि समर्पण गरिने
शब्दयात्रा प्रकाशनले २०८३ सालदेखि बालसाहित्य पुरस्कार पनि समर्पण गर्ने भएको छ । पुरस्कारको नाउँ ‘शब्दयात्रा गोपाल पराजुली बालसाहित्य पुरस्कार’ रहनेछ । पुरस्कारको अक्षयकोषका लागि हिजो अर्थात् २०८२ साल फागुन ९ गते सम्झौता गरिएको छ । सम्झौतापत्रमा शब्दयात्रा प्रकाशनका तर्फबाट संस्थापक अध्यक्ष हरि मञ्जुश्रीले र कोष व्यवस्थापकका रूपमा बालसाहित्यकार गोपाल पराजुलीकी धर्मपत्नी माधवी पराजुलीले हस्ताक्षर गर्नुभएको छ । पुरस्कारको अक्षयकोषका लागि माधवी पराजुलीले शब्दयात्रा प्रकाशनलाई बैङ्कको चेक उपलब्ध गराउनुभएको छ । यो पुरस्कारसमेत शब्दयात्रा प्रकाशनबाट हरेक वर्ष समर्पण गरिने पुरस्कारको सङ्ख्या १९ पुगेको छ ।
शब्दयात्रा प्रकाशनका आध्यात्मिक गानहरूमाथि काठमाडौँमा विचारगोष्ठी
प्रातःकालीन मैत्री समूहको आयोजनामा आज २०८२ साल फागुन ९ गते शनिबार काठमाडौँको कोटेश्वरमा शब्दयात्रा प्रकाशनका आध्यात्मिक गानहरूमाथिको विचारगोष्ठी सम्पन्न गरियो । उक्त गोष्ठीमा शब्दयात्रा प्रकाशनका संस्थापक अध्यक्ष साहित्यकार तथा सङ्गीतकार हरि मञ्जुश्रीले शब्दयात्रा प्रकाशनद्वारा उत्पादित आध्यात्मिक गानहरूको लेखन, सङ्गीत र गायनले भजन सङ्गीतको आधुनिकीकरणमा गरेको योगदानका बारेमा बताउनुभएको थियो । गोष्ठीको सञ्चालन लेखक रत्नकुमार श्रेष्ठले गर्नुभएको थियो भने डा. इन्दुल केसीले हरि मञ्जुश्रीको विशेषताका बारेमा जानकारी गराउनुभएको थियो । कार्यक्रमको समापन डा. नवराज खतिवडाले गर्नुभएको थियो ।
नेवाः सभ्यता अनुसन्धान विद्वतवृत्ति अन्तर्गत लिखित प्रतिवेदन प्राप्त
शब्दयात्रा प्रकाशनबाट २०८२ सालको ‘शब्दयात्रा प्रतापमान–झरना मास्के नेवाः सभ्यता अनुसन्धान विद्वतवृत्ति’ प्राप्त गर्नुभएका अनुसन्धाता प्रकाश उज्ज्वल बनेपा (प्रकाशबहादुर कायस्थ) ले विद्वतवृत्ति ग्रहण गरेर लेख्नुभएको अनुसन्धान प्रतिवेदन शब्दयात्रा प्रकाशनमा बुझाउनुभएको छ । उहाँले प्रतिवेदनको नाउँ ‘नेवाः सभ्यताका केही संस्कार–संस्कृति’ राख्नुभएको छ । उक्त विद्वतवृत्ति शब्दयात्रा प्रकाशनको लघु अनुसन्धान परियोजना अन्तर्गत नेवाः सभ्यताका विषयमा प्रकाशनयोग्य अनुसन्धानात्मक सामग्री तयार पार्नका लागि गत मङ्सिर २७ गते समर्पण गरिएको थियो । उक्त विद्वतवृत्ति साहित्यकार तथा लेखाविज्ञ लोकमान मास्केको आर्थिक व्यवस्थापनमा स्थापना गरिएको हो । उक्त प्रतिवेदन यही फागुन महिनामा सार्वजनिक गरिनेछ ।
सरस्वती चिमोरियालाई सारस्वत सम्मान समर्पण गरिने
शब्दयात्रा प्रकाशनले कवयित्री सरस्वती चिमोरियालाई ‘शब्दयात्रा विश्वनाथ अधिकारी सारस्वत सम्मान’ समर्पण गर्ने भएको छ । काभ्रेपलाञ्चोक जिल्लामा जन्मेकी सरस्वती चिमोरियाले लामो समयसम्म कविता विधामा सक्रिय रही राष्ट्रिय ख्याति आर्जन गर्नुभएको छ । यस सम्मानको कोष व्यवस्थापन भोजपुर जिल्लामा जन्मेर सुनसरी जिल्लामा बसोवास गरेकी कवयित्री शकुन्तला मञ्जरीले आफ्ना पिता विश्वनाथ अधिकारीको स्मृति र सम्मानमा गर्नुभएको हो । सारस्वत सम्मान अन्तर्राष्ट्रिय महिला दिवसको अवसर पारी यही फागुन २४ गते समर्पण गरिनेछ । कार्यक्रम शब्दयात्रा प्रकाशनको सभाकक्ष बनेपामा दिउँसो १२ः३० बजे प्रारम्भ गरिनेछ ।
सम्मानकोषका लागि ओतबहादुर खड्काबाट ५१ हजार रुपियाँ प्रदान
शब्दयात्रा प्रकाशनका ज्येष्ठ आजीवन सदस्य आध्यात्मिक लेखक ओतबहादुर खड्का (उमेर ८८ वर्ष, पनौती, काभ्रेपलाञ्चोक) ले आफ्नी धर्मपत्नी मैयादेवी खड्काको स्मृतिमा शब्दयात्रा प्रकाशनको सम्मानकोषका लागि ५१ हजार रुपियाँ उपलब्ध गराउनुभएको छ । उक्त रकम शब्दयात्रा प्रकाशनका तर्फबाट आजीवन सदस्य इ. रोशन मञ्जुश्री अधिकारीले ग्रहण गर्नुभएको छ । यसअघि पनि उहाँले मन्दिर निर्माण, पुस्तक पसल आदिका लागि पटक–पटक आर्थिक सहयोग गर्नुभएको छ । शब्दयात्रा प्रकाशन परिवार यस्तो स्नेह र सद्भावका लागि उहाँप्रति हार्दिक आभार व्यक्त गर्दछ र उहाँबाट सदैव आशीर्वाद प्राप्त भइरहोस् भन्ने कामना गर्दै उहाँको सक्रिय जीवनका लागि शब्दसाधक तीर्थ नीलकण्ठेश्वर धाममा विराजित सम्पूर्ण पितृ र देवीदेवतासँग प्रार्थना गर्दछ ।