Shabdayatra Prakashan

युवा अक्षरप्रेमी कमानसिंह घलानद्वारा लिखित ‘चलेको छ जिन्दगी’ पञ्चभाषी कवितासङ्ग्रह हो । यसमा ५१ वटा कविता छन् । तीमध्ये नेपाली भाषामा ४३ वटा, अङ्ग्रेजी भाषामा ५ वटा तथा तामाङ, चेपाङ र हिन्दी भाषामा १–१ वटा कविता छन् । यी कविताहरूले समसामयिक राजनीतिक र सामाजिक परिवेश, युवा मनको उद्वेलन, विपरीतलिङ्गीप्रतिको प्रेम आदि विषयलाई सामान्य पाठकले पनि बुझ्ने गरी प्रकट गरेका छन् ।

अम्बिका धितालको ‘जूनको जात्रा’ (लघुकथासङ्ग्रह) मा पछिल्ला तीन वर्षभित्र (२०७८, २०७९, २०८०) लेखिएका लघुकथाहरूमध्ये ६५ वटा लघुकथा सङ्कलित छन् । लघुकथाकारमा ग्राम्य जीवनको, शहरी वातावरणको, सामाजिक संरचनाको, पारिवारिक स्थितिको र शिक्षणको अनुभव छ, राजनीतिक सचेतता पनि छ । त्यसैले यस सङ्ग्रहभित्रका लघुकथाहरूमा उहाँले पारिवारिक, राजनीतिक र सामाजिक क्षेत्रका समसामयिक अव्यवस्था, वैदेशिक रोजगारी, शैक्षिक व्यवस्थापन, दाम्पत्य जीवन, सकारात्मक सोच आदिसँग सम्बन्धित विषयवस्तुलाई कथातन्तुमा उन्नुभएको छ । हठात् प्रारम्भ र हठात् अन्त्यले शोभित यसभित्रका लघुकथाहरूले हरेक पाठकलाई मोहित बनाउन र केही न केही सोच्न बाध्य बनाउनेछन् ।

लेखन विधामा पहिलोपटक कलम चलाउनुभएकी लेखिका गीतादेवी शर्माले आफ्ना भावनाहरू जेजस्तो रूपमा प्रकट गर्नुभयो र जेजस्तो रूपमा अक्षराङ्कित पाण्डुलिपि प्राप्त भयो, लेखिकाको भावना बुझेर त्यस रूपमा नै ‘सत्य गीता ज्ञान’ यहाँ प्रस्तुत भएको छ । लेखिकाको मौलिकता यथावत रहोस् भन्ने सोचले हामीले लेखनमा परिमार्जन, संशोधन, सम्पादन गरेका छैनौँ । भित्री साजसज्जा, बाहिरी साजसज्जा, मुद्रण आदिजस्ता प्राविधिक सहयोगहरू चाहिँ हामीले गरेका हौँ ।

यज्ञप्रसाद उपाध्याय त्रिपाठीद्वारा लिखित ‘चमेली’ मा ५१ सर्ग छन् भने जम्मा २ हजार ७ सय ८ श्लोक छन् । यी श्लोकलाई छन्दोबद्ध गर्न नसके पनि यथासम्भव लयबद्ध पार्ने प्रयास कृतिकारले गर्नुभएको छ । भाषा–व्याकरण पनि उहाँकै इच्छाबमोजिम जस्ताको तस्तै राखिएको छ । जीवनको उत्तरार्धमा पुगेका व्यक्तिमा गुम्सिएर बसेको प्रतिभाबाट जस्तोसुकै रूपमा कृति तयार पारिए पनि त्यसलाई समाजसमक्ष ल्याइदिनुपर्छ भन्ने अभिप्रायले यस कृतिको प्रकाशन गरिएको हो ।

‘सय पाइला पैले’ खेमराज शर्माद्वारा लिखित आञ्चलिक उपन्यास हो ।  यसमा एक सय वर्ष पहिलेको नेपाली ग्रामीण समाजको विषयवस्तुलाई उठाइएको छ । उपन्यासमा पश्चिम नेपालको परिवेशको चित्रण गरिए पनि लोकव्यवहार र जनजीवनको चित्रण पूर्वी नेपालसँग पनि मिल्दोजुल्दो छ । पाठकले यसमा नेपालको पहाडे जीवन भेट्टाउनेछ र आफ्ना पुर्खाहरूको तत्कालीन अवस्था थाहा पाउनेछ ।

प्रा. रामकुमार पाँडेद्वारा सम्पादित ‘अर्काको आँखामा आफू’ प्रा. रामकुमार पाँडेको हास्यव्यङ्ग्य सिर्जना, कविता सिर्जना, बालसाहित्य सिर्जना, कला सिर्जना, भूगोल विषयको सिर्जना र शिक्षा विषयको सिर्जनामाथि समालोचकीय दृष्टिकोण तथा उहाँको व्यक्तित्व, उहाँका केही पुस्तकका प्रकाशकीय र उहाँप्रति अरूको दुष्टि उल्लेख गरिएका एक सय पाँचवटा लेख–संस्मरण र विचारहरू सङ्कलन गरिएका छन् ।