शब्दयात्रा प्रकाशनका अभिभावक तथा काठमाडौँ विश्वविद्यालयका संस्थापक उपकुलपति नेपालका शैक्षिक शिरोभूषण डा. सुरेशराज शर्माको जीवनीलाई आधारभूमि बनाएर कवि श्रीधर प्याकु¥यालद्वारा लिखित लघुकाव्य ‘शैक्षिक शिरोभूषण’ शब्दयात्रा प्रकाशनले प्रकाशन गर्ने भएको छ ।
श्रीधर प्याकु¥यालले यसअघि पनि ‘डा. सुरेशराज शर्मा’ नामक लघुकाव्य लेख्नुभएको थियो र उक्त लघुकाव्य शब्दयात्रा प्रकाशनबाट नै प्रकाशित भएको थियो ।

शब्दयात्रा प्रकाशनले शब्दयात्रा लेखक समाजको रिक्त रहेका दुई सदस्यमा केदारनाथ तिमल्सिना र रोजनाथ लुइँटेललाई मनोनयन गरेको छ ।
लेखक समाजका सदस्यद्वय भरतराज महत र रामप्रसाद शर्मा तिमल्सिनाको निधन भएपछि दुई सदस्य रिक्त रहेका थिए ।

शब्दयात्रा प्रकाशनले ‘शब्दयात्रा सामाजिक जागरण सम्मान’ बाट सम्मानित अग्रज समाजसेवी बेलप्रसाद श्रेष्ठको सम्मानस्वरूप होटल हिमालयन होराइजनको परिसरमा ‘बेलप्रसाद श्रेष्ठ सम्मानस्तम्भ’ को निर्माण गरेको छ ।
गत २०७४ कार्तिक २९ गते बुधबार शब्दयात्रा प्रकाशनका अध्यक्ष हरि मञ्जुश्रीले उक्त स्तम्भको उद्घाटन गर्नुभयो ।

शब्दयात्रा प्रकाशनद्वारा साप्ताहिक रूपमा सञ्चालित प्रवचन कार्यक्रम ‘कर्मयोद्धासँग शब्दसंवाद’ को सैँतीसौँ शृङ्खलामा मानव–अधिकारकर्मी भोजराज तिमल्सिना प्रमुख वक्ताका रूपमा प्रस्तुत हुनुभयो । उहाँले मानव–अधिकारका विषयमा विस्तृत रूपमा जानकारी गराउनुभएको थियो ।
‘कर्मयोद्धासँग शब्दसंवाद’ कार्यक्रमका सञ्चालक पदमनाथ ढुङ्गानाद्वारा सञ्चालित उक्त कार्यक्रम फणीन्द्रराज अधिकारीको सभापतित्वमा सम्पन्न भएको थियो । कार्यक्रममा श्री शर्मा मूर्ख, खाइबा लामा, कृष्णमणि कुइँकेल, दीक्षा घिमिरे आदिको उपस्थिति रहेको थियो ।

शब्दयात्रा प्रकाशनले बनेपामा स्थापना गर्न लागेको सालिकका लागि देवीप्रसाद सापकोटा स्मृति प्रतिष्ठानका तर्फबाट ५० हजार रुपियाँ भुक्तानी गरिएको छ ।
प्रतिष्ठानका अध्यक्ष सुनील सापकोटाले विभिन्न व्यक्तिहरूबाट अर्थसङ्कलन गरी सालिक निर्मातालाई उक्त रकम भुक्तानी गरिदिनुभएको हो ।

शब्दयात्रा प्रकाशनले २०७४ मङ्सिर १२ गते आयोजना गर्ने समारोहमा तीनवटा पुस्तकलाई सार्वजनिक गर्ने भएको छ ।
ती पुस्तकहरूमा लक्ष्मीभक्त अधिकारीद्वारा लिखित तथा दुर्गाप्रसाद अधिकारीद्वारा सम्पादित ‘लक्ष्मीभक्तको कविता’, द्रोणप्रसाद श्रेष्ठ ‘मुन्डाघरे’ द्वारा लिखित ‘केही दृष्टि केहीदृष्टिकोण’ निबन्धसङ्ग्रह र श्रीधर प्याकु¥यालद्वारा लिखित ‘शैक्षिक शिरोभूषण’ लघुकाव्य,रहेका छन् । ती पुस्तकहरू शब्दयात्रा प्रकाशनबाट प्रकाशित भएका हुन् ।
यी कृतिसमेत शब्दयात्रा प्रकाशनद्वारा प्रकाशित कृतिको सङ्ख्या ९३ पुगेको छ ।

शब्दयात्रा प्रकाशनले हरेक वर्षको मङ्सिर महिनामा आयोजना गर्ने सम्मान समर्पण तथा पुस्तक सार्वजनिकीकरण कार्यक्रम यस वर्ष मङ्सिर १२ गते मङ्गलबार काठमाडौँ कमलादीस्थित नेपाल प्रज्ञाप्रतिष्ठानको सभाकक्षमा गर्ने भएको छ । कार्यक्रममा पूर्वप्रमुख निर्वाचन आयुक्त तथा पूर्वराजदूत सूर्यप्रसाद श्रेष्ठले प्रमुख आतिथ्य ग्रहण गर्नुहुनेछ ।
उक्त कार्यक्रममा विभिन्न सम्मानहरू समर्पण गरिनुका साथै विभिन्न पुस्तकहरू सार्वजनिक गरिनेछन् ।

आगामी मङ्सिर १२ गते मङ्गलबार दिउँसो ठीक १ बजे काठमाडौँ कमलादीस्थित नेपाल प्रज्ञाप्रतिष्ठानमा पुगौं । त्यस दिन गीतकार किरण खरेल, गायिका नूपुर भट्टाचार्य, समालोचक डा. दयाराम श्रेष्ठ सम्भव, बालसाहित्यकार कल्पना प्रधान र अन्वेषक प्रा. चेतोनाथ गौतमलाई सम्मान गरिनेछ । उक्त कार्यक्रममा द्रोणप्रसाद श्रेष्ठ ‘मुन्डाघरे’, लक्ष्मीभक्त अधिकारी र श्रीधर प्याकु¥यालका गरी तीनवटा पुस्तकलाई सार्वजनिक गरी वितरण गरिनेछ ।